ધ્રાંગધ્રા પંથકમાં વધતા જતા અકસ્માતોના બનાવો અને શહેરી વિસ્તારમાં ટ્રાફિકની સમસ્યાના નિવારણ માટે પોલીસે એક ખાસ ટ્રાફિક ડ્રાઇવનું આયોજન કર્યું હતું. આ ડ્રાઇવ દરમિયાન, પોલીસે ટ્રાફિક નિયમ ભંગ કરનારા ત્રણ વાહનચાલકો સામે ગુનો નોંધી કાર્યવાહી હાથ ધરી હતી. જેમાં શહેરના રોકડિયા સર્કલથી બસ સ્ટેન્ડ તરફ પૂરપાટ ઝડપે જીજે 01 ટી કે 3588 નંબરની રિક્ષા ચલાવતા દેવરાજભાઈ ખેંગારભાઈ કટોડીયા સામે ગુનો નોંધાયો હતો. આ ઉપરાંત, રોકડિયા સર્કલ નજીક જીજે 13 યુ 8671 નંબરના છકડો રિક્ષાના ચાલક જયેશ પ્રવિણભાઈ સોલંકી સામે પણ ગુનો નોંધવામાં આવ્યો હતો. તાલુકા પોલીસ દ્વારા કલ્પના ચોકડી પાસેથી જીજે 13 એચ એચ 5153 નંબરના બાઇક ચાલક સામે પણ ટ્રાફિક નિયમ ભંગ બદલ કાર્યવાહી કરવામાં આવી હતી.

મોરબી જિલ્લાના જેતપર ગામમાં ખેડૂતો દ્વારા એક અનોખું વિરોધ પ્રદર્શન કરવામાં આવ્યું હતું. આ વિરોધ પ્રદર્શનમાં જેતપર ગામના ખેડૂતોની સાથે અન્ય ગામોથી પધારેલા ખેડૂતો પણ જોડાયા હતા.

પાટણ એલસીબી પોલીસે દેલમાલ ગામેથી નકલી નોટો સાથે બે ઈસમોને ઝડપી પાડ્યા છે.

રાજકોટ જિલ્લાના ધોરાજી શહેરમાં વિવિધ યોજનાઓ હેઠળ થઈ રહેલા લોકહિતના કામોમાં વ્યાપક ભ્રષ્ટાચારના આક્ષેપો વચ્ચે હવે મનુષ્યના અંતિમ વિશ્રામ સ્થાન સમા એકમાત્ર સ્મશાનગૃહને પણ ભ્રષ્ટાચારથી બાકાત ન રાખવામાં આવ્યું હોવાનો સ્થાનિક લોકો દ્વારા આક્ષેપ કરવામાં આવી રહ્યો છે. ધોરાજી નગરપાલિકા તંત્ર દ્વારા કુંભારવાડા વિસ્તાર પાસે આવેલા આ સ્મશાનગૃહમાં હાલ સમારકામનું કામ ચાલી રહ્યું છે, જેમાં સ્ટ્રીટ લાઇટ માટે બનાવવામાં આવી રહેલા કોંક્રિટના કામમાં નબળી ગુણવત્તાની રેતી, સિમેન્ટ, બેલા અને લોખંડનો ઉપયોગ થતો હોવાના ગંભીર આક્ષેપો છે. અગાઉ પણ ધોરાજીમાં રોડ-રસ્તા (આરસીસી રોડ અને ડામર રોડ) સહિત ગ્રાન્ટમાંથી થયેલા અનેક કામોમાં ભ્રષ્ટાચાર થયાના આક્ષેપો ઉઠ્યા હતા. ત્યારે તંત્ર સફાળું જાગ્યું અને ભૂલો સુધારવાનો પ્રયાસ પણ થયો, પરંતુ કોઈ પક્ષના નેતાઓ કે આગેવાનો દ્વારા કોઈ નક્કર કામગીરી કરવામાં આવી ન હતી અને જવાબદારો સામે કોઈ પગલાં લેવાયા ન હતા. હવે તો કૈલાશ ધામ ગણાતા સ્મશાનગૃહમાં પણ ભ્રષ્ટાચારની તમામ હદો વટાવી દેવામાં આવી હોવાનું લાગી રહ્યું છે, જેના પર ધોરાજીના જવાબદાર તંત્ર, કોન્ટ્રાક્ટર અને રાજકીય આગેવાનો કેમ ચૂપ છે તે એક મોટો સવાલ છે. સ્થાનિક લોકો માંગ કરી રહ્યા છે કે ધોરાજીમાં આ બાબતે વ્યવસ્થિત રીતે અને પારદર્શી કામગીરી થાય અને સ્મશાનગૃહ જેવા સ્થળને તો ભ્રષ્ટાચારથી મુક્ત રાખીને સારું કામ કરવામાં આવે.

કડી તાલુકા અને શહેરી વિસ્તારમાં છેલ્લા દસ દિવસમાં બનેલી અલગ-અલગ ચાર હત્યાઓની ઘટનાઓને પગલે સમગ્ર પંથકમાં ભય અને અરેરાટીનો માહોલ છવાઈ ગયો હતો. કડી શહેરમાં વધતી જતી ગુનાખોરી અને હત્યાઓ મામલે બહુચરાજીના પૂર્વ ધારાસભ્ય ભરતજી ઠાકોરે મુખ્યમંત્રીને પત્ર લખી રજૂઆત કરી હતી, જેના અનુસંધાને જિલ્લા પોલીસ તંત્ર તાત્કાલિક એક્શન મોડમાં આવી ગયું હતું. શનિવારે સાંજે કાયદો અને વ્યવસ્થા જાળવવા માટે શહેરમાં એક વ્યાપક ઓપરેશન હાથ ધરવામાં આવ્યું હતું. આ ઓપરેશન અંતર્ગત કડી ડિવિઝનના ડીવાયએસપી હાર્દિક પ્રજાપતિના નેતૃત્વ હેઠળ જિલ્લાના 10 પીઆઈ, 17 પીએસઆઈ અને 100 થી વધુ પોલીસ કર્મચારીઓના કાફલા દ્વારા કડી શહેરમાં ફૂટ પેટ્રોલિંગનું આયોજન કરવામાં આવ્યું હતું. શનિવારે સાંજે પોલીસનો આ મોટો કાફલો રસ્તાઓ પર ઉતરી આવતા અસામાજિક તત્વોમાં ફફડાટ વ્યાપી ગયો હતો. સંયુક્ત પોલીસ ટીમોએ સંવેદનશીલ વિસ્તારોમાં સઘન ચેકિંગ હાથ ધર્યું હતું અને પેટ્રોલિંગ દરમિયાન વાહન ચેકિંગ પણ કર્યું હતું, જેમાં ટ્રાફિક નિયમોનું ઉલ્લંઘન કરનાર અને શંકાસ્પદ જણાતા 10 થી વધુ વાહનોને ડિટેઇન કરવામાં આવ્યા હતા. પોલીસે નાગરિકોને ખાતરી આપી હતી કે શહેરમાં શાંતિ ડહોળવાનો પ્રયાસ કરનારા કે કાયદો હાથમાં લેનાર તત્વો સામે આગામી દિવસોમાં પણ આવી જ રીતે કડક ઝુંબેશ ચલાવવામાં આવશે. આ પોલીસ કાર્યવાહીથી કડીની જનતાએ રાહતનો શ્વાસ લીધો હતો. આ ઉપરાંત, મોકાસણ ગામે થયેલ આધેડ મજૂરની હત્યાના બે આરોપીઓને કડી પોલીસે ઝડપી પાડી જેલ હવાલે કર્યા હતા. ઉલ્લેખનીય છે કે, મોકાસણ ગામના ઠાકોર વાસમાં રહેતા 55 વર્ષીય પ્રતાપજી મોહનજી ઠાકોર કડિયા કામ કરીને ગુજરાન ચલાવતા હતા. 17 જૂન 2026 ના રોજ બપોરના આશરે ચાર વાગ્યે ગામમાં ડેરી પાસે વડલા નીચે ગામના જ ઘનશ્યામભાઈ ઉર્ફે લાલી ચંદુભાઈ પટેલે પૈસાની લેવડદેવડ બાબતે તેમની સાથે ઝઘડો કર્યો હતો. આ ઝઘડાએ ઉગ્ર સ્વરૂપ ધારણ કરતાં ઘનશ્યામભાઈ પટેલે પ્રતાપજી પર ધોકા વડે હુમલો કર્યો હતો. ગંભીર ઈજાઓ થતા પ્રતાપજીને તાત્કાલિક કડીની કુંડાળ સિવિલ હોસ્પિટલ, ત્યાંથી ગાંધીનગર અને ત્યારબાદ અમદાવાદ સિવિલ હોસ્પિટલ રીફર કરવામાં આવ્યા હતા, જ્યાં સારવાર દરમિયાન તેમનું મૃત્યુ નિપજ્યું હતું. કડી પોલીસે બંને વિરુદ્ધ હત્યાની કલમ ઉમેરી વધુ કાર્યવાહી હાથ ધરી હતી.

આજે સમગ્ર દેશમાં 12મા આંતરરાષ્ટ્રીય યોગ દિવસની ઉત્સાહભેર ઉજવણી કરવામાં આવી હતી, ત્યારે બોટાદ જિલ્લામાં પણ જિલ્લા કક્ષાએ યોગ દિવસની વિશેષ ઉજવણીનું આયોજન કરાયું હતું. બોટાદ શહેરની સરકારી હાઈસ્કૂલ ખાતે જિલ્લા વહીવટી તંત્ર દ્વારા આયોજિત આ કાર્યક્રમમાં મોટી સંખ્યામાં જનપ્રતિનિધિઓ, અધિકારીઓ અને વિદ્યાર્થીઓએ ભાગ લીધો હતો. આ અવસરે સૌએ યોગના મહત્વ અંગે સંદેશ આપી યોગના ફાયદાઓ પર ભાર મૂક્યો હતો.

વાંકાનેર તાલુકામાં મેટલ રોડ પર સ્થિત એડિકોન પેપર પ્રાઇવેટ લિમિટેડ નામની એક પેપર મિલમાં અચાનક આગ ફાટી નીકળી હતી. આ ઘટનાને પગલે સમગ્ર વિસ્તારમાં ભારે અફરાતફરી મચી ગઈ હતી.

ગોંડલ શહેરના જામવાડી GIDC વિસ્તારમાં આવેલી 'મિસરી સ્પાઈસીસ' નામની ફેક્ટરી પર ફૂડ એન્ડ ડ્રગ્સ વિભાગે ભેળસેળની શંકાના આધારે દરોડા પાડ્યા હતા. આ કાર્યવાહી દરમિયાન આશરે 79,900 કિલો મસાલા, લોટ અને પામતેલ સહિત કુલ ₹1.90 કરોડનો શંકાસ્પદ જથ્થો સીઝ કરવામાં આવ્યો હતો. તપાસ દરમિયાન ધાણા પાવડર, મરચું પાવડર, હળદર, ચોખા અને મકાઈનો લોટ જેવો જથ્થો ઝડપાયો હતો. ફેક્ટરી પાસે જરૂરી માન્ય લાયસન્સ ન હોવાનું પણ સામે આવ્યું છે. અધિકારીઓએ આ જથ્થાના નમૂનાઓ લઈ લેબમાં પરીક્ષણ માટે મોકલી આપ્યા છે. રિપોર્ટના આધારે આગળની કાયદેસરની કાર્યવાહી કરવામાં આવશે. નોંધનીય છે કે, બે દિવસ પહેલાં પણ જામવાડી GIDCની 'સત્યમ મસાલા' ફેક્ટરીમાં ફૂડ એન્ડ ડ્રગ્સ વિભાગે દરોડા પાડીને કાર્યવાહી કરી હતી.

બોટાદ જિલ્લામાં આંતરરાષ્ટ્રીય યોગ દિવસની ઉત્સાહભેર ઉજવણી કરવામાં આવી. આ ઉજવણીમાં 75 હજારથી વધુ લોકોએ યોગાભ્યાસ કર્યો હતો. જિલ્લામાં કુલ 250થી વધુ સ્થળોએ આ કાર્યક્રમોનું આયોજન કરવામાં આવ્યું હતું.

અમદાવાદ જિલ્લાના સાણંદ તાલુકાના મોરૈયા ગામે નજીવી બાબતે બે જૂથો વચ્ચે હિંસક અથડામણ થઈ હતી. આ લોહિયાળ ઝડપમાં ગામના મહિલા સરપંચના પતિ ભીખાભાઈ અને તેમના પુત્ર મયુરભાઈ પર કેટલાક શખ્સો દ્વારા જીવલેણ હુમલો કરવામાં આવ્યો હોવાની ઘટના સામે આવી છે. ઉલ્લેખનીય છે કે ભીખાભાઈ ગામના મહિલા સરપંચના પતિ છે, જ્યારે તેમના પુત્ર મયુરભાઈના પત્ની તાલુકા પંચાયતના ડેલીગેટ સભ્ય છે. આ હિંસક ઝડપ દરમિયાન બંને પક્ષે સામસામે પથ્થરમારો અને હુમલો કરવામાં આવ્યો હતો. જેમાં ભીખાભાઈ અને મયુરભાઈ ગંભીર રીતે ઈજાગ્રસ્ત થયા હતા, જ્યારે સામા પક્ષે પણ બે લોકોને ઈજાઓ પહોંચી હોવાના અહેવાલ છે. બનાવની જાણ થતાં જ ચાંગોદર પોલીસનો મોટો કાફલો તાત્કાલિક ઘટનાસ્થળે દોડી ગયો હતો અને પરિસ્થિતિ પર કાબૂ મેળવ્યો હતો. ઈજાગ્રસ્તોને તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યા છે. આ મામલે બંને પક્ષો દ્વારા એકબીજા વિરુદ્ધ ચાંગોદર પોલીસ સ્ટેશનમાં ક્રોસ ફરિયાદ સામસામે ગુનો નોંધાવવામાં આવ્યો છે.