రింగ్‌లో అద్భుతమైన పంచ్‌లతో ప్రత్యర్థులను ఓడిస్తూ, వరుసగా పతకాలు సాధిస్తూ జైపూర్‌కు చెందిన బాల బాక్సర్లు హర్షిత్ పటేల్, సాహిత్ పటేల్ జిల్లాకు గుర్తింపు తెస్తున్నారు. సింగరేణి థర్మల్ పవర్ ప్లాంట్‌లో సీఐఎస్ఎఫ్ జవాన్‌గా పనిచేస్తున్న పాదం మహేందర్ తన కుమారులు హర్షిత్ పటేల్, సాహిత్ పటేల్‌లను బాక్సింగ్‌లో తీర్చిదిద్దుతూ రాష్ట్రస్థాయిలో వారిని రాణింపజేస్తున్నారు. పాదం మహేందర్ స్వయంగా జాతీయస్థాయి బాక్సర్. ఆయన గత రెండేళ్లుగా జరిగిన సీఐఎస్ఎఫ్ జాతీయ బాక్సింగ్ పోటీల్లో బంగారు పతకాలు సాధించి సీఐఎస్ఎఫ్ సౌత్ జోన్‌కు ప్రత్యేక గుర్తింపు తీసుకొచ్చారు. క్రీడల పట్ల ఉన్న ఆసక్తితో, ఆయన తన విధులకు విరామ సమయంలో యువ క్రీడాకారులకు ఉచితంగా శిక్షణ ఇస్తూ ఆదర్శంగా నిలుస్తున్నారు. ఇప్పటివరకు ఆయన వద్ద శిక్షణ పొందిన సుమారు 20 మంది క్రీడాకారులు రాష్ట్ర, జాతీయ స్థాయి పోటీల్లో పతకాలు సాధించారు. మహేందర్ పెద్ద కుమారుడు పాదం హర్షిత్ పటేల్ 2025లో స్కూల్ గేమ్స్ ఉమ్మడి కరీంనగర్ జిల్లా స్థాయి పోటీల్లో బంగారు పతకం సాధించాడు. అదే ఏడాది వరంగల్‌లో జరిగిన రాష్ట్ర స్థాయి పోటీల్లో కాంస్య పతకం గెలుచుకున్నాడు. హైదరాబాద్‌లో బాక్సింగ్ అసోసియేషన్ నిర్వహించిన రాష్ట్ర స్థాయి పోటీల్లో మరో కాంస్య పతకాన్ని తన ఖాతాలో వేసుకున్నాడు. ఇటీవల 2026లో జరిగిన ఉమ్మడి కరీంనగర్ జిల్లా బాక్సింగ్ అసోసియేషన్ పోటీల్లో మరోసారి బంగారు పతకం సాధించి, ఈ నెల 13, 14 తేదీల్లో హైదరాబాద్‌లో జరిగే సబ్ జూనియర్ రాష్ట్ర స్థాయి బాక్సింగ్ ఛాంపియన్‌షిప్‌కు అర్హత సాధించాడు. ప్రస్తుతం రాష్ట్రస్థాయి పతకంపై గురిపెట్టి కఠిన సాధన చేస్తున్నాడు. చిన్న కుమారుడు పాదం సాహిత్ పటేల్ కూడా తన అన్నకు ఏమాత్రం తీసిపోకుండా బాక్సింగ్‌లో దూసుకుపోతున్నాడు. సాహిత్ 2024లో ఆదిలాబాద్‌లో జరిగిన జిల్లా స్థాయి పోటీల్లో వెండి పతకం సాధించాడు. 2025లో కాగజ్‌నగర్‌లో జరిగిన ఎస్‌జీఎఫ్ ఉమ్మడి ఆదిలాబాద్ జిల్లా స్థాయి పోటీల్లో బంగారు పతకం గెలుచుకున్నాడు. అదే సంవత్సరం వరంగల్‌లో జరిగిన రాష్ట్రస్థాయి స్కూల్ గేమ్స్ బాక్సింగ్ పోటీల్లో వెండి పతకం సాధించి జిల్లా ప్రతిష్ఠను పెంచాడు. ప్రస్తుతం రానున్న సబ్ జూనియర్ రాష్ట్రస్థాయి పోటీల కోసం తీవ్రంగా శ్రమిస్తున్నాడు. సింగరేణి ప్రాంతంలో బాక్సింగ్‌కు ప్రోత్సాహం అందించాలనే లక్ష్యంతో మహేందర్ ఎలాంటి పారితోషికం ఆశించకుండా యువతకు శిక్షణ ఇస్తున్నారు. ఆయన శిక్షణలో తయారైన పలువురు క్రీడాకారులు ఇప్పటికే రాష్ట్ర, జాతీయ స్థాయిల్లో పతకాలు సాధించడం ఆయన ప్రతిభకు నిదర్శనం. హర్షిత్, సాహిత్‌లకు తగిన ప్రోత్సాహం, ఆధునిక శిక్షణ సదుపాయాలు కల్పిస్తే జాతీయస్థాయిలోనే కాకుండా అంతర్జాతీయ స్థాయిలోనూ రాణించే సామర్థ్యం ఉందని మంచిర్యాల జిల్లా బాక్సింగ్ అసోసియేషన్ చైర్మన్ నిట్టూరి మైసూర్, జాతీయస్థాయి బాక్సర్ జయకృష్ణ అభిప్రాయపడ్డారు. జైపూర్ ప్రాంతం నుంచి ఎదుగుతున్న ఈ యువ బాక్సర్లు భవిష్యత్తులో తెలంగాణతో పాటు దేశానికి కూడా పతకాలు అందించాలని స్థానిక క్రీడాభిమానులు ఆకాంక్షిస్తున్నారు. వారి విజయగాథ ప్రస్తుతం జిల్లాలోని యువతకు స్ఫూర్తిగా నిలుస్తోంది.

Thalapalli Ramesh

బెల్లంపల్లె, మంచిర్యాల, తెలంగాణ•

13 hrs ago

రింగ్‌లో అద్భుతమైన పంచ్‌లతో ప్రత్యర్థులను ఓడిస్తూ, వరుసగా పతకాలు సాధిస్తూ జైపూర్‌కు చెందిన బాల బాక్సర్లు హర్షిత్ పటేల్, సాహిత్ పటేల్ జిల్లాకు గుర్తింపు తెస్తున్నారు. సింగరేణి థర్మల్ పవర్ ప్లాంట్‌లో సీఐఎస్ఎఫ్ జవాన్‌గా పనిచేస్తున్న పాదం మహేందర్ తన కుమారులు హర్షిత్ పటేల్, సాహిత్ పటేల్‌లను బాక్సింగ్‌లో తీర్చిదిద్దుతూ రాష్ట్రస్థాయిలో వారిని రాణింపజేస్తున్నారు. పాదం మహేందర్ స్వయంగా జాతీయస్థాయి బాక్సర్. ఆయన గత రెండేళ్లుగా జరిగిన సీఐఎస్ఎఫ్ జాతీయ బాక్సింగ్ పోటీల్లో బంగారు పతకాలు సాధించి సీఐఎస్ఎఫ్ సౌత్ జోన్‌కు ప్రత్యేక గుర్తింపు తీసుకొచ్చారు. క్రీడల పట్ల ఉన్న ఆసక్తితో, ఆయన తన విధులకు విరామ సమయంలో యువ క్రీడాకారులకు ఉచితంగా శిక్షణ ఇస్తూ ఆదర్శంగా నిలుస్తున్నారు. ఇప్పటివరకు ఆయన వద్ద శిక్షణ పొందిన సుమారు 20 మంది క్రీడాకారులు రాష్ట్ర, జాతీయ స్థాయి పోటీల్లో పతకాలు సాధించారు. మహేందర్ పెద్ద కుమారుడు పాదం హర్షిత్ పటేల్ 2025లో స్కూల్ గేమ్స్ ఉమ్మడి కరీంనగర్ జిల్లా స్థాయి పోటీల్లో బంగారు పతకం సాధించాడు. అదే ఏడాది వరంగల్‌లో జరిగిన రాష్ట్ర స్థాయి పోటీల్లో కాంస్య పతకం గెలుచుకున్నాడు. హైదరాబాద్‌లో బాక్సింగ్ అసోసియేషన్ నిర్వహించిన రాష్ట్ర స్థాయి పోటీల్లో మరో కాంస్య పతకాన్ని తన ఖాతాలో వేసుకున్నాడు. ఇటీవల 2026లో జరిగిన ఉమ్మడి కరీంనగర్ జిల్లా బాక్సింగ్ అసోసియేషన్ పోటీల్లో మరోసారి బంగారు పతకం సాధించి, ఈ నెల 13, 14 తేదీల్లో హైదరాబాద్‌లో జరిగే సబ్ జూనియర్ రాష్ట్ర స్థాయి బాక్సింగ్ ఛాంపియన్‌షిప్‌కు అర్హత సాధించాడు. ప్రస్తుతం రాష్ట్రస్థాయి పతకంపై గురిపెట్టి కఠిన సాధన చేస్తున్నాడు. చిన్న కుమారుడు పాదం సాహిత్ పటేల్ కూడా తన అన్నకు ఏమాత్రం తీసిపోకుండా బాక్సింగ్‌లో దూసుకుపోతున్నాడు. సాహిత్ 2024లో ఆదిలాబాద్‌లో జరిగిన జిల్లా స్థాయి పోటీల్లో వెండి పతకం సాధించాడు. 2025లో కాగజ్‌నగర్‌లో జరిగిన ఎస్‌జీఎఫ్ ఉమ్మడి ఆదిలాబాద్ జిల్లా స్థాయి పోటీల్లో బంగారు పతకం గెలుచుకున్నాడు. అదే సంవత్సరం వరంగల్‌లో జరిగిన రాష్ట్రస్థాయి స్కూల్ గేమ్స్ బాక్సింగ్ పోటీల్లో వెండి పతకం సాధించి జిల్లా ప్రతిష్ఠను పెంచాడు. ప్రస్తుతం రానున్న సబ్ జూనియర్ రాష్ట్రస్థాయి పోటీల కోసం తీవ్రంగా శ్రమిస్తున్నాడు. సింగరేణి ప్రాంతంలో బాక్సింగ్‌కు ప్రోత్సాహం అందించాలనే లక్ష్యంతో మహేందర్ ఎలాంటి పారితోషికం ఆశించకుండా యువతకు శిక్షణ ఇస్తున్నారు. ఆయన శిక్షణలో తయారైన పలువురు క్రీడాకారులు ఇప్పటికే రాష్ట్ర, జాతీయ స్థాయిల్లో పతకాలు సాధించడం ఆయన ప్రతిభకు నిదర్శనం. హర్షిత్, సాహిత్‌లకు తగిన ప్రోత్సాహం, ఆధునిక శిక్షణ సదుపాయాలు కల్పిస్తే జాతీయస్థాయిలోనే కాకుండా అంతర్జాతీయ స్థాయిలోనూ రాణించే సామర్థ్యం ఉందని మంచిర్యాల జిల్లా బాక్సింగ్ అసోసియేషన్ చైర్మన్ నిట్టూరి మైసూర్, జాతీయస్థాయి బాక్సర్ జయకృష్ణ అభిప్రాయపడ్డారు. జైపూర్ ప్రాంతం నుంచి ఎదుగుతున్న ఈ యువ బాక్సర్లు భవిష్యత్తులో తెలంగాణతో పాటు దేశానికి కూడా పతకాలు అందించాలని స్థానిక క్రీడాభిమానులు ఆకాంక్షిస్తున్నారు. వారి విజయగాథ ప్రస్తుతం జిల్లాలోని యువతకు స్ఫూర్తిగా నిలుస్తోంది.