भोकरदन येथील पिंपळगाव रेणुकाई जमीन प्रकरणात 'खोदा पहाड निकला चुहा' अशी स्थिती समोर आली आहे. या प्रकरणी 'मिशन सागर देशमुख' अयशस्वी ठरले असून, असे असले तरी मुख्य आरोपीला पोलीस कोठडी मिळाली आहे.

बुलढाणा जिल्हा मराठी पत्रकार संघाने खासदार संजय दिना पाटील यांच्याविरोधात पत्रकार संरक्षण कायद्यांतर्गत गुन्हे दाखल करण्याची मागणी केली आहे. पत्रकारांना शिवीगाळ करून जीवे मारण्याची धमकी दिल्याप्रकरणी ही मागणी जिल्हाधिकारी तसेच जिल्हा पोलीस अधीक्षक यांच्यामार्फत थेट मुख्यमंत्र्यांकडे करण्यात आली आहे.

छत्रपती संभाजीनगर जिल्ह्यात, पोलिओ मुक्त भारत ही मोहीम यशस्वी करण्यासाठी शासन सदैव तत्पर असून समाजातील प्रत्येक घटकापर्यंत, विशेषतः लहान मुलांच्या पालकांपर्यंत, पोलिओ लसीकरणाचा संदेश पोहोचवणे आवश्यक आहे. या उद्देशाने, शासनातर्फे २८ जून २०२६ रोजी पल्स पोलिओचे आयोजन करण्यात आले आहे. या मोहिमेची जनजागृती करण्यासाठी, जिल्हा परिषद उच्च प्राथमिक शाळा, बेंदेवाडी शाळेने बेंदेवाडी गावात शाळेतील सर्व विद्यार्थी, शिक्षक आणि पालकांच्या उपस्थितीत प्रभात फेरी काढून जनजागृती केली. या प्रभात फेरीची सुरुवात प्रार्थनेने झाली. शाळेतील शिक्षक तुषार गवई, कैलास पवार आणि शितल भडांगे यांनी ० ते ५ वयोगटातील सर्व बालकांना पल्स पोलिओची लस घेणे का महत्त्वाचे आहे, यावर मार्गदर्शन केले. त्यानंतर, सर्व विद्यार्थी आणि शिक्षकांनी जनजागृतीसाठी प्रभात फेरीत विविध घोषणा देत संपूर्ण गावकऱ्यांना २८ जून रोजी ० ते ५ वयोगटातील १०० टक्के बालकांना पोलिओ लस घेण्याचा संदेश दिला. शाळेचे मुख्याध्यापक रणजित राठोड यांनी पल्स पोलिओ व विविध रोगांना कसे समूळ नष्ट करू शकतो, प्रत्येक लस ० ते ५ वयोगटातील बालकासाठी किती महत्त्वाची असते, तसेच संतुलित आहार, योग, रोगमुक्त व तणावमुक्त जीवन यावर सखोल मार्गदर्शन केले. या प्रभात फेरीत सर्व विद्यार्थी, शिक्षक यांच्यासह शाळा व्यवस्थापन समितीचे अध्यक्ष प्रकाश नारहाडे, माजी सरपंच नारायण बैनाडे, सुरेश उसारे, दिनेश शिहिरे, गितेश शिहिरे, चतरसिंग बैनाडे, शाम शिहिरे, प्रदीप बैनाडे, संतोष नारहाडे, गणेश शिहिरे, करण शेवगण, सागर राजपूत, राहुल धनावत, संतोष तसेवाल, जगन्नाथ ठोंबरे, दीपक हिवराळे, सुवर्णसिंग राजरवाल, अनुसया चरावंडे, कांचनाबाई नारहाडे यांसह अनेक पालक उपस्थित होते. प्रभातफेरीच्या माध्यमातून जनजागृती करून पोलिओ मुक्त भारत ही मोहीम यशस्वी व्हावी यासाठी शाळेचे मुख्याध्यापक रणजित राठोड, कैलास पवार, तुषार गवई आणि शितल भडागे यांनी परिश्रम घेतले.

महाराष्ट्र राज्य परीक्षा परिषद पुणेमार्फत २८ जून रोजी होणाऱ्या शिक्षक पात्रता परीक्षा (TET) पेपरफुटी प्रकरणी शिक्षकांमध्ये आणि भावी शिक्षकांमध्ये मोठ्या संतापाची लाट उसळली आहे. या प्रकरणाच्या संदर्भात, तीन जणांना पोलिसांनी ताब्यात घेतल्याची माहिती समोर आली आहे. विशेष म्हणजे, परीक्षेच्या अवघ्या पूर्वसंध्येलाच हे प्रकरण उघडकीस आल्याने भावी शिक्षकांमध्ये तीव्र संताप व्यक्त होत आहे.

शिवसेना खासदार श्रीकांत शिंदे हे छत्रपती संभाजी नगर येथील विमानतळावर उपस्थित होते.

औरंगाबाद जिल्हा मध्यवर्ती सहकारी बँक लि., छत्रपती संभाजीनगरच्या संचालक मंडळ निवडणुकीच्या पार्श्वभूमीवर, शेतकरी विकास पॅनलच्या उमेदवारांच्या प्रचारासाठी सिल्लोड येथे एक महत्त्वपूर्ण बैठक आयोजित करण्यात आली होती. सिल्लोडमधील आमदार अब्दुल सत्तार यांच्या जनसंपर्क कार्यालयातील शिवसेना भवन येथे ही बैठक पार पडली. या बैठकीला ओबीसी विकास मंत्री अतुल सावे, खासदार संदिपान भुमरे, आमदार अब्दुल सत्तार, आमदार सतीश चव्हाण, आमदार अनुराधा चव्हाण, आमदार सुहास शिरसाट आणि माजी आमदार नितीन पाटील यांची प्रमुख उपस्थिती होती. मंत्री अतुल सावे यांनी मतदारांना मार्गदर्शन करताना, पक्षीय मतभेद बाजूला ठेवून जिल्हा बँक आणि शेतकऱ्यांच्या हितासाठी सर्वांनी एकजुटीने काम करण्याचे आवाहन केले. त्यांनी 'कपबशी' या निवडणूक चिन्हासमोरील बटण दाबून शेतकरी विकास पॅनलच्या सर्व उमेदवारांना प्रचंड मतांनी विजयी करण्याचे आवाहन केले. सावे यांनी स्पष्ट केले की, महायुतीसोबतच विरोधी पक्षनेते अंबादास दानवे यांचाही या पॅनलमध्ये सहभाग असून, राजकीय भूमिका बाजूला ठेवून जिल्हा बँकेच्या विकासाला प्राधान्य देत ही निवडणूक लढवली जात आहे. तसेच, मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांच्या नेतृत्वाखाली जिल्हा बँकेच्या विकासासाठी निधीची कोणतीही कमतरता भासू दिली जाणार नसल्याचा विश्वास त्यांनी व्यक्त केला. आमदार अब्दुल सत्तार यांनी आपल्या मार्गदर्शनपर भाषणात शेतकरी विकास पॅनलच्या उमेदवारांची सविस्तर माहिती दिली आणि शेतकऱ्यांच्या सर्वांगीण विकासासाठी हे पॅनल कटिबद्ध असल्याचे सांगितले. त्यांनी जिल्हा बँकेला अधिक सक्षम आणि शेतकरीहिताचे बनवण्यासाठी पॅनलच्या सर्व उमेदवारांना भरघोस मतांनी विजयी करण्याचे आवाहन केले. खासदार संदिपान भुमरे, आमदार सतीश चव्हाण, आमदार अनुराधा चव्हाण आदी मान्यवरांनीही यावेळी मनोगत व्यक्त करत शेतकरी विकास पॅनलच्या उमेदवारांना प्रचंड मतांनी विजयी करण्याचे आवाहन केले. या बैठकीपूर्वी नगराध्यक्ष अब्दुल समीर अ. सत्तार आणि शिवसेना पदाधिकाऱ्यांच्या वतीने उपस्थित मान्यवरांचे स्वागत करण्यात आले. कार्यक्रमाचे सूत्रसंचालन सुदर्शन अग्रवाल यांनी केले, तर प्रास्ताविक आमदार अब्दुल सत्तार यांनी केले आणि उपस्थितांचे आभार नगराध्यक्ष अब्दुल समीर यांनी मानले. या बैठकीला गंगापूरचे नगराध्यक्ष संजय जाधव, वैजापूरचे नगराध्यक्ष डॉ. दिनेश परदेशी, शिवसेना तालुकाप्रमुख केशवराव तायडे, सोयगाव तालुकाप्रमुख प्रभाकर काळे, रामराव शेळके, रवींद्र काळे, जिल्हा परिषद सदस्य अब्दुल आमेर, राजेंद्र दानवे, दुर्गाबाई पवार, राजश्री निकम, रामदास पालोदकर, उपनगराध्यक्ष विठ्ठल सपकाळ, दामू अण्णा गव्हाणे, सय्यद नासेर हुसेन, सभापती विश्वास दाभाडे, उपसभापती संदीप राऊत यांच्यासह महायुतीचे पदाधिकारी, कार्यकर्ते आणि जिल्हा बँकेचे मतदार मोठ्या संख्येने उपस्थित होते.

शिवसेना (उद्धव बाळासाहेब ठाकरे) पक्षाचे नेते संजय राऊत यांनी शिंदे गटाच्या शिवसेनेवर जोरदार टीका केली आहे. यावेळी राऊतांनी शिंदे गटातील सहा खासदारांनाही लक्ष्य करत विविध मुद्द्यांवर प्रश्न उपस्थित केले. राऊतांच्या या वक्तव्यानंतर महाराष्ट्राच्या राजकीय वर्तुळात पुन्हा एकदा आरोप-प्रत्यारोपांना वेग आला असून, या टीकेला शिंदे गटाकडून काय प्रत्युत्तर दिले जाते, याकडे सर्वांचे लक्ष लागले आहे.

बेंगळुरूच्या राजाजीनगरमधील राम मंदिर रोडवर चालत्या दुचाकीवर अचानक झाडाची सुकलेली फांदी कोसळल्याने ५२ वर्षीय सतीश गंभीर जखमी झाले आहेत. या अपघातात ते कोमात गेले असून, ही संपूर्ण घटना सीसीटीव्ही कॅमेऱ्यात कैद झाली आहे.

छत्रपती संभाजीनगर जिल्ह्यातील शेतकऱ्यांना ऐन पेरणीच्या काळात खत टंचाईचा सामना करावा लागत आहे, ज्यामुळे ते हतबल झाले आहेत. केंद्र सरकारद्वारे अनुदानित रासायनिक खत विक्रीसाठी सुरू करण्यात आलेले “फ्रेमवर्क फॉर फर्टिलायझर सेल” हे ॲप (FSS app) सध्या शेतकरी आणि खत विक्रेत्यांसाठी मोठी डोकेदुखी ठरत आहे. खरीप हंगाम तोंडावर असताना या ॲपमध्ये वारंवार तांत्रिक अडचणी येत असल्याने छत्रपती संभाजीनगरात खत खरेदी प्रक्रिया पूर्णपणे विस्कळीत झाली आहे. यामुळे शेतकऱ्यांना तासन्‌तास रांगेत उभे राहूनही खत बुकिंग करता येत नसल्याचे चित्र आहे, ज्यामुळे शेतकऱ्यांमध्ये संतापाचे वातावरण आहे. जिल्ह्यातील विविध भागात तीन दिवसांपूर्वी पाऊस झाल्याने शेतकरी पेरणी आणि लागवडीच्या कामात व्यस्त आहेत. मात्र, डिएपी आणि युरियासारख्या महत्त्वाच्या खतांची पैठण, वैजापूर, गंगापूर, सिल्लोड, सोयगाव, खुलताबाद, फुलंब्री, छत्रपती संभाजीनगर या तालुक्यांमध्ये तीव्र टंचाई आहे. ऑनलाइन पोर्टलवर खताचा पुरेसा साठा दिसत असला, तरी तांत्रिक अडचणींमुळे शेतकऱ्यांचे ऑनलाइन बुकिंग होत नाही, परिणामी त्यांना खत मिळत नाही. शासनाने खत वितरणात पारदर्शकता आणण्यासाठी आणि अनुदानित खत थेट पात्र शेतकऱ्यांपर्यंत पोहोचावे यासाठी ही ऑनलाइन प्रणाली लागू केली आहे. परंतु, प्रत्यक्षात ॲप सतत हँग होणे, सर्व्हर डाऊन जाणे आणि इंटरनेट कनेक्टिव्हिटीच्या समस्यांमुळे शेतकऱ्यांना मोठ्या अडचणींचा सामना करावा लागतोय. कृषी दुकानदारांनीही ऑनलाइन प्रक्रिया पूर्ण झाल्याशिवाय खत देऊ शकत नसल्याचे म्हटले आहे. या दरम्यान, छत्रपती संभाजीनगर जिल्ह्यातील खत टंचाई आणि खतांच्या लिंकिंगच्या मुद्द्यावर स्वाभिमानी शेतकरी संघटना आक्रमक झाली आहे. कृषी विभागाने साठेबाजी करणाऱ्यांवर कारवाई न केल्यास, स्वाभिमानी शेतकरी संघटना खतांच्या गोदामांवर धाडी टाकून आंदोलन करेल, असा इशारा त्यांनी दिला आहे. ऐन पेरणीच्या हंगामात महत्त्वाची खते मिळत नसल्याने शेतकऱ्यांसमोर पेरणी कशी करावी, असा प्रश्न निर्माण झाला आहे. शेतकरी खत टंचाईमुळे हतबल झाले असून, प्रशासनाने तातडीने ऑफलाइन खत विक्री सुरू करावी, अशी मागणी ते करत आहेत.

बुलढाणा जिल्ह्यातील जळगाव जामोद तालुक्यातील खेर्डा खुर्द येथे महावितरणच्या कथित हलगर्जीपणामुळे एका २० वर्षीय तरुणाचा जीव गेल्याचा आरोप होत आहे. आर्मीमध्ये भरती होण्याचे स्वप्न पाहणाऱ्या संकेत वेरुळकर या तरुणाचा विजेच्या धक्क्याने मृत्यू झाल्यानंतर ग्रामस्थांमध्ये संतापाची लाट उसळली आहे. ग्रामस्थ महावितरणच्या निष्काळजी अधिकाऱ्यांवर कठोर कारवाईची मागणी करत आहेत. २६ जून रोजी दुपारच्या सुमारास संकेत प्रभाकर वेरुळकर शेतात पेरणीचे काम करत असताना विजेच्या खांबाच्या तानाच्या संपर्कात आला आणि त्याचा जागीच मृत्यू झाला. ग्रामस्थांनी त्याला तातडीने रुग्णालयात नेले, परंतु डॉक्टरांनी त्याला मृत घोषित केले. संकेतने आर्मी भरतीची मैदानी चाचणी आधीच उत्तीर्ण केली होती आणि काही दिवसांत त्याची लेखी परीक्षा होणार होती. देशसेवेचे स्वप्न पाहणाऱ्या या तरुणाच्या मृत्यूने एका कुटुंबाची स्वप्नेही उद्ध्वस्त झाल्याची भावना व्यक्त होत आहे. ग्रामस्थांनी आरोप केला आहे की, परिसरातील धोकादायक विद्युत तारा, जीर्ण झालेले खांब आणि दुर्लक्षित वीज यंत्रणा याबाबत अनेकदा तक्रारी करूनही महावितरणने याकडे गांभीर्याने लक्ष दिले नाही. जर वेळेत दुरुस्ती झाली असती, तर संकेत आज जिवंत असता, असा संतप्त सवाल नागरिक उपस्थित करत आहेत. या घटनेनंतर राष्ट्रवादी काँग्रेसचे रंगराव देशमुख, काँग्रेसचे अविनाश उमरकर आणि डॉ. संदीप वाकेकर यांनी घटनास्थळी भेट देऊन महावितरणच्या कारभाराचा तीव्र निषेध केला. या नेत्यांनी आठ दिवसांच्या आत धोकादायक पोल आणि विद्युत वाहिन्यांची दुरुस्ती न झाल्यास महावितरण कार्यालयासमोर तीव्र आंदोलन छेडण्याचा इशारा दिला आहे. दरम्यान, जळगाव जामोद पोलिसांनी याप्रकरणी आकस्मिक मृत्यूची नोंद करून तपास सुरू केला आहे. पावसाळा सुरू असताना धोकादायक वीज यंत्रणा तातडीने सुरक्षित करण्याची मागणी नागरिकांकडून जोर धरत आहे.