गोंदिया सालेकसा बीजेपार सालेकसा तालुक्यातील नक्षलग्रस्त व अतिदुर्गम भाग म्हणून ओळखल्या जाणाऱ्या बिजेपार येथे गेल्या अनेक वर्षांपासून वाचनालयाची प्रलंबित असलेली मागणी अखेर पूर्ण झाली आहे. माजी सभापती सौ. सविता संजय पुराम यांच्या आग्रहाखातर आणि आमदार संजय पुराम यांनी मंजुरी दिलेल्या निधीतून या ठिकाणी अत्याधुनिक 'ई-लायब्ररी'चे निर्माण करण्यात आले असून, गुरुवारी या ग्रंथालयाचा लोकार्पण सोहळा उत्साहात संपन्न झाला. नक्षलग्रस्त आणि दुर्गम भागातील विद्यार्थ्यांना पोलीस भरती तसेच इतर शैक्षणिक स्पर्धा परीक्षांच्या तयारीसाठी अभ्यासाची सोय व्हावी, या उद्देशाने ही ई-लायब्ररी सुरू करण्यात आली आहे. आजवर अभ्यासासाठी सोयीसुविधा नसल्यामुळे या भागातील तरुणांना अनेक अडचणींचा सामना करावा लागत होता, मात्र आता गावातच अभ्यासाचे हक्काचे व्यासपीठ उपलब्ध झाल्याने विद्यार्थ्यांच्या स्वप्नांना बळ मिळणार आहे. या कार्यक्रमाचे आणखी एक वैशिष्ट्य म्हणजे, सालेकसा तालुक्यातील ज्या युवक-युवतींची भारतीय सैन्यात निवड झाली आहे, त्यांचाही मान्यवरांच्या हस्ते विशेष गौरव व सत्कार करण्यात आला. या दुहेरी सोहळ्यामुळे परिसरात देशसेवेचे आणि शिक्षणाचे एक सकारात्मक वातावरण निर्माण झाले आहे. अनेक वर्षांची मागणी पूर्ण झाल्याबद्दल बिजेपारसह परिसरातील गावकऱ्यांनी आणि विद्यार्थ्यांनी समाधान व्यक्त करत आमदार संजय पुराम आणि सौ. सविता पुराम यांचे विशेष आभार मानले. या सोहळ्याला जिल्ह्याचे जिल्हाधिकारी प्रजित नायर, अतिरिक्त मुख्य कार्यकारी अधिकारी, उपविभागीय अधिकारी कविता गायकवाड, तहसीलदार नरसय्या कोंडागुर्ले, प्रकल्प अधिकारी उमेश काशिद, तसेच पोलीस निरीक्षक भूषण बुराडे, प्रवीण डांगे, बालाजी राणे आणि विकास आडे यांच्यासह विविध विभागांचे अधिकारी व नागरिक मोठ्या संख्येने उपस्थित होते. या कार्यक्रमाचे यशस्वी आयोजन व नियोजन सौ. सविता संजय पुराम (माजी सभापती, महिला व बालकल्याण विभाग) यांनी केले होते.

नरेश बोपचे

Journalist आमगाव, गोंदिया, महाराष्ट्र•

3 hrs ago