தேனி மாவட்டத்தில், பாரதப் பிரதமரின் கௌரவ நிதி பெரும் திட்டத்தின் கீழ் பதிவு செய்யாத விவசாயிகள் உடனடியாக தங்களைப் பதிவு செய்யுமாறு மாவட்ட நிர்வாகம் அவசர அழைப்பு விடுத்துள்ளது. இத்திட்டத்தின் கீழ் மொத்தம் உள்ள 26,050 பயனாளிகளில், இதுவரை 23,550 விவசாயிகள் மட்டுமே விவசாய அடையாள எண் பெற்றுள்ளனர். விவசாய அடையாள எண்ணை அடிப்படையாகக் கொண்டே உரக் கடைகள் மற்றும் கூட்டுறவு நிறுவனங்களில் உரம் வழங்கும் திட்டம் தொடங்கப்பட உள்ளதால், விடுபட்ட விவசாயிகள் அனைவரும் விரைந்து விவசாய அடையாள எண்ணைப் பதிவு செய்து கொள்ளுமாறு மாவட்ட நிர்வாகம் கேட்டுக்கொண்டுள்ளது.

தமிழக முதல்வர் விஜய் அவர்களின் பிறந்தநாளை முன்னிட்டு, நேற்று (ஜூன் 19) இரவு மதுரை திருப்பரங்குன்றத்தில் உள்ள அருள்மிகு சுப்பிரமணிய சுவாமி திருக்கோயிலில் சிறப்பு தங்கத்தேர் வழிபாடு நடைபெற்றது. தவெக நிர்வாகிகள் சசி முருகன் மற்றும் ரேஷன் கடை கார்த்திக் ஆகியோரின் ஏற்பாட்டில் நடந்த இந்த வழிபாட்டில், ஏராளமான ரசிகர்கள் கலந்து கொண்டு தங்கத் தேரினை இழுத்து முருகப்பெருமானுக்கு சிறப்பு பூஜைகள் செய்து வழிபட்டனர்.

திண்டுக்கல் மாவட்டம், வடமதுரை ஒன்றியம், அய்யலூர் வேங்கனூர் முதல் வடுகபட்டி வரை எரியோடு செல்லும் தார் சாலை புதுப்பிக்கும் பணி, கடந்த சட்டசபைத் தேர்தல் அறிவிப்பிற்கு முன்பு தொடங்கப்பட்டது. ஆனால், ஜல்லிகள் கொட்டப்பட்டு அரைகுறையாக பாதியில் நிறுத்தப்பட்டுள்ளது. இந்த காரணத்தினால், வாகன ஓட்டிகள் சாலையில் செல்ல முடியாத சூழ்நிலை ஏற்பட்டு, விபத்துகள் அதிகரித்து வருகின்றன. எனவே, சாலைப்பணியை உடனடியாக மீண்டும் துவங்கிட வேண்டும் என்று பொதுமக்கள் மற்றும் வாகன ஓட்டிகள் கோரிக்கை விடுத்துள்ளனர்.

விருதுநகர் மாவட்டம், சாத்தூர் பெரியார் நகர் சிறுவர் பூங்காவில், ஒரு தனியார் தொண்டு நிறுவனத்தின் 15வது ஆண்டு தினத்தையொட்டியும், சுற்றுச்சூழல் தினத்தை முன்னிட்டும், மரம் நடு விழா மற்றும் பிளாஸ்டிக் ஒழிப்பு விழிப்புணர்வு நிகழ்ச்சி நடைபெற்றது. இந்நிகழ்வில் சாத்தூர் நகர் தலைவர் குருசாமி, நகராட்சி ஆணையாளர் ஜெகதீஸ்வரி, தொண்டு நிறுவன அமைப்பினர், சிலம்பம் கலைக்கூட ஆசான் மற்றும் மாணவ மாணவிகள் எனப் பலரும் கலந்து கொண்டனர். நிகழ்ச்சியில் பேசிய தொண்டு நிறுவன அமைப்பினர், பொதுமக்கள் ஆர்வத்துடன் விலங்குகளை வளர்ப்போம் என்ற எண்ணத்தில் மாடுகளை சாலைகளில் துரத்திவிடுவது பெரும் ஆபத்தை விளைவிப்பதாகக் குறிப்பிட்டனர். இதேபோன்று, நாய்களை விருப்பப்பட்டு வளர்த்து, பின்பு பராமரிக்க முடியாமல் தெருக்களில் விட்டுவிடுவதால் பல்வேறு இடர்பாடுகளும் பொதுமக்களுக்கு ஆபத்தும் ஏற்படுவதாகவும் சுட்டிக்காட்டினர். இதனால் பொதுமக்கள் முறைப்படி நாய்களை வளர்க்க லைசன்ஸ் பெற்று வளர்க்க வேண்டும் என்றும், ஆர்வத்துடன் நாய்களை வளர்த்து தெருவில் விட்டுவிடுவதால் ஏற்படும் விபத்துகளைத் தவிர்க்க வேண்டும் என்றும் கேட்டுக்கொண்டனர். இதனைத் தொடர்ந்து, நாகர்கோவில் சேர்மன், ஆணையாளர், தொண்டு நிறுவன அமைப்பினர் மற்றும் மாணவர்கள் அனைவரும் அப்பகுதியில் ஏராளமான மரக்கன்றுகளை நட்டு சுற்றுச்சூழல் விழிப்புணர்வை ஏற்படுத்தினர். மேலும், பிளாஸ்டிக்கால் ஏற்படும் ஆபத்துகளை எடுத்துரைத்து, பிளாஸ்டிக் ஒழிப்பது தொடர்பான விழிப்புணர்வு துண்டுப் பிரசுரங்களையும் வழங்கினர். இறுதியாக, சிலம்பக் கலைக்கூட மாணவர்கள் பொதுமக்களுக்கு விழிப்புணர்வு ஏற்படுத்தும் வகையில் பல்வேறு வகையான சிலம்பக் கலைகளைச் சுழற்றி வெளிப்படுத்தினர்.

தூத்துக்குடி மாவட்டம் கோவில்பட்டியில் அமைக்கப்பட்டு வரும் விமானப் பயிற்சி மையத்தின் (Flying Training Organization - FTO) கட்டுமானப் பணிகளைக் கண்காணிப்பதற்கான முக்கிய நடவடிக்கையை தமிழ்நாடு தொழில் மேம்பாட்டுக் கழகம் (TIDCO) மேற்கொண்டுள்ளது. தமிழ்நாடு அரசின் நிறுவனமான TIDCO, இந்தப் பணிகளை மேற்பார்வையிட ஒரு சுயாதீன பொறியாளரைத் தேர்ந்தெடுப்பதற்கான மின்னணு டெண்டர் அறிவிப்பை வெளியிட்டுள்ளது. இந்த அறிவிப்பின்படி, கட்டுமானப் பணிகளின் தரம், தொழில்நுட்ப அம்சங்கள் மற்றும் திட்ட முன்னேற்றத்தைத் தொடர்ந்து கண்காணித்து ஆலோசனை வழங்கும் தகுதியான நிறுவனங்களிடமிருந்து விண்ணப்பங்கள் வரவேற்கப்படுகின்றன. ஆர்வமுள்ள நிறுவனங்கள் டெண்டர் ஆவணங்களை TIDCO மற்றும் தமிழ்நாடு அரசின் மின்னணு டெண்டர் இணையதளங்களிலிருந்து இலவசமாகப் பதிவிறக்கம் செய்துகொள்ளலாம். ஒப்பந்தப் புள்ளிகள் மற்றும் விண்ணப்பங்களைச் சமர்ப்பிப்பதற்கான கடைசி நாள் வருகிற ஜூலை 15ஆம் தேதி மதியம் 3 மணி என நிர்ணயிக்கப்பட்டுள்ளது. இந்த விமானப் பயிற்சி மையம் கோவில்பட்டி வட்டம் கயத்தாறு பகுதியில் அமைய உள்ளதாகத் தெரிவிக்கப்பட்டுள்ளது. திட்டமிட்ட காலக்கெடுவிற்குள் உயர்தரத்துடன் பணிகள் நிறைவேறுவதை உறுதி செய்வதே இந்த டெண்டரின் முக்கிய நோக்கம் என்று TIDCO தெரிவித்துள்ளது. கோவில்பட்டியில் உருவாகி வரும் இந்த விமானப் பயிற்சி மையம் செயல்பாட்டுக்கு வந்தால், தமிழகத்தில் விமானப் பயிற்சி மற்றும் விமானத் துறை சார்ந்த உள்கட்டமைப்பு வசதிகள் வலுப்பெறும் எனக் கருதப்படுகிறது. மேலும், தென் தமிழக இளைஞர்களுக்கு விமானப் பயிற்சி பெறும் புதிய வாய்ப்புகள் உருவாகும் என்பதுடன், அப்பகுதியின் தொழில் மற்றும் பொருளாதார வளர்ச்சிக்கும் இது ஊக்கமளிக்கும் என்று எதிர்பார்க்கப்படுகிறது.

சிங்கம்புணரி அருகே முறையூரில் அமைந்துள்ள 800 ஆண்டுகள் பழமையான ஸ்ரீ மீனாட்சி சொக்கநாதர் திருக்கோவிலின் ஆனி திருமஞ்சன பெருவிழா இன்று (ஜூன் 20) கொடியேற்றத்துடன் விமர்சையாக தொடங்கியது. இந்த விழாவின் தொடக்கமாக, ரிஷப கொடியுடன் ஊர்வலம் மற்றும் சிறப்பு பூஜைகள் விமர்சையாக நடைபெற்றன. சிவகங்கை தேவஸ்தானம் மற்றும் பொதுமக்கள் இணைந்து இந்த பெருவிழாவை ஏற்பாடு செய்துள்ளனர். விழாவின் முக்கிய நிகழ்வுகளாக, ஜூன் 27 அன்று திருக்கல்யாணம் மற்றும் ஜூன் 28 அன்று திருத்தேரோட்டம் நடைபெற உள்ளது.

தென்காசி மாவட்டம், சுரண்டை நகராட்சிக்குட்பட்ட, சுரண்டை - திருநெல்வேலி செல்லும் தேசிய நெடுஞ்சாலைப் பகுதியில், பங்களா சுரண்டை கீழ்புறம், பரங்குன்றா புறம் விலக்கு அருகே உள்ள ஸ்ரீ ஜெயேந்திரா பள்ளி அருகில் உள்ள மெயின்ரோட்டில், தாமிரபரணி குடிநீர் குழாய் மெயின் பைப்லைன் உடைப்பு ஏற்பட்டுள்ளது. இதன் காரணமாக, தினசரி பல லட்சம் லிட்டர் குடிநீர் வீணாகி வருகிறது. எனவே, இந்த பைப்லைன் உடைப்பை சம்பந்தப்பட்ட குடிநீர் வடிகால் வாரிய அதிகாரிகள் உடனடியாக சரிசெய்து, பொதுமக்களின் குடிநீர் தேவையை பூர்த்தி செய்யுமாறு சமூக ஆர்வலர் வேல்சாமி கோரிக்கை விடுத்துள்ளார்.

தமிழ்நாடு முதலமைச்சரும் தமிழக வெற்றிக்கழக தலைவருமான ஜோசப் விஜய் பிறந்தநாளை முன்னிட்டு, தேனியில் மாபெரும் ரத்த தான முகாம் நடைபெற்றது. தமிழக வெற்றி கழக தேனி வடக்கு மாவட்டம் மற்றும் தமிழக வெற்றிக்கழக திண்டுக்கல் மண்டல தமிழ்நாடு போக்குவரத்து தொழிற்சங்கம் இணைந்து, தேனி தனியார் மண்டபத்தில் இந்த முகாமிற்கு ஏற்பாடு செய்திருந்தன. இந்த ரத்த தான முகாமிற்கு தமிழக வெற்றி கழக திண்டுக்கல் தமிழ்நாடு போக்குவரத்து கழக தொழிற்சங்க மண்டல பொறுப்பாளர் கார்த்திக் தலைமை வகித்தார். தமிழக வெற்றி கழக தேனி வடக்கு மாவட்ட செயலாளர் பிரகாஷ் சிறப்பு அழைப்பாளராக கலந்து கொண்டு, ரத்த தானம் வழங்கிய குருதி கொடையாளர்களுக்கு சான்றிதழ்கள் வழங்கி கௌரவித்தார். தேனி அரசு மருத்துவமனை ரத்த தான பிரிவு மருத்துவர் பிரியா தலைமையிலான மருத்துவ குழுவினர், ரத்த மாதிரிகளை சேகரித்தனர். தமிழக வெற்றி கழகம் சார்பில் நடத்தப்பட்ட இந்த மாபெரும் ரத்த தான முகாமில் சுமார் நூற்றுக்கும் மேற்பட்டோர் கலந்து கொண்டு குருதி கொடை வழங்கி சிறப்பித்தனர்.

தூத்துக்குடி மாவட்டம் எட்டையாபுரம் அருகேயுள்ள ராசா பட்டி கிராமத்தில் செயல்பட்டு வந்த பாலாஜி பட்டாசு ஆலையில் இன்று மாலை வெடி விபத்து ஏற்பட்டது. இந்த விபத்தில் சுமார் 15க்கும் மேற்பட்டோர் படுகாயம் அடைந்ததாகவும், ஒருவர் உயிரிழந்ததாகவும் தகவல்கள் தெரிவிக்கின்றன. படுகாயம் அடைந்தவர்கள் பட்டாசு ஆலைக்குச் சொந்தமான வாகனங்கள் மற்றும் ஆம்புலன்ஸ்கள் மூலம் விருதுநகர் மாவட்டத்திலுள்ள சாத்தூர் அரசு மருத்துவமனைக்குக் கொண்டுவரப்பட்டனர். சாத்தூர் அரசு மருத்துவமனையின் விபத்து மற்றும் தீவிர சிகிச்சை பிரிவுகளில் அனுமதிக்கப்பட்ட சுமார் 15க்கும் மேற்பட்டோருக்கு முதலுதவி மற்றும் தீவிர சிகிச்சை அளிக்கப்பட்டு வருகிறது. காயமடைந்தவர்களில் பெரும்பாலானோர் நத்தத்துப்பட்டி, மாசார்பட்டி, எம். நாகலாபுரம் உள்ளிட்ட பல்வேறு கிராமங்களைச் சேர்ந்தவர்கள் ஆவர்; இவர்களில் அதிகமான பெண்கள் அடங்குவர். இந்த நிலையில், உயிரிழப்பு எண்ணிக்கை மேலும் அதிகரிக்கக்கூடும் என்று அஞ்சப்படுகிறது.

தூத்துக்குடி மாவட்டம் கோவில்பட்டியில் அடுத்தடுத்து இரண்டு வீடுகளில் பூட்டை உடைத்து திருட்டு சம்பவங்கள் நடந்துள்ளன. வடக்கு திட்டங்குளத்தைச் சேர்ந்த கோமதிநாயகம் தனது குடும்பத்துடன் திருச்சி ஸ்ரீரங்கம் சென்றுவிட்டு இரவு வீடு திரும்பியபோது, வீட்டின் கதவுகள் திறந்திருப்பதைக் கண்டு அதிர்ச்சியடைந்தார். அவர் உடனடியாக கோவில்பட்டி கிழக்கு காவல் நிலையத்திற்கு தகவல் தெரிவித்தார். சம்பவ இடத்திற்கு விரைந்து வந்த போலீசார் நடத்திய விசாரணையில், வீட்டின் கதவை உடைத்து அங்கிருந்த ₹1 லட்சம் பணம் திருட்டு போனது தெரியவந்தது. இதேபோன்று, கோவில்பட்டி கணேஷ் நகர் நான்காவது தெருவைச் சேர்ந்த ஜான்கோராணியின் வீட்டிலும் திருட்டு நடந்துள்ளது. ஜான்கோராணி சென்னையில் திருமண நிகழ்ச்சிக்கு சென்றிருந்த நிலையில், அவரது வீட்டுப் பணிப்பெண் ராஜேஸ்வரி செடிகளுக்கு தண்ணீர் ஊற்ற வந்தபோது வீட்டின் கதவு உடைக்கப்பட்டிருப்பதைக் கண்டு அதிர்ச்சியடைந்தார். ராஜேஸ்வரி உடனடியாக வீட்டு உரிமையாளர் மற்றும் காவல் துறைக்கு தகவல் கொடுத்தார். கோவில்பட்டி கிழக்கு காவல் நிலைய போலீசார் விரைந்து வந்து விசாரணை நடத்தியதில், வீட்டிலிருந்த 41 இன்ச் டிவி திருடு போனது தெரியவந்தது. இந்த இரண்டு சம்பவங்கள் குறித்தும் போலீசார் வழக்கு பதிவு செய்து மர்ம நபர்களை தீவிரமாக தேடி வருகின்றனர்.