திருச்சி மாவட்டம் மருங்காபுரியை அடுத்த துவரங்குறிச்சியில் உள்ள சேது பள்ளி வளாகம் முன்பு, அடையாளம் தெரியாத வாகனம் மோதியதில் ஒரு குரங்கு காயமடைந்தது. இதை அறிந்த Sky ஆம்புலன்ஸ் ஓட்டுநர்கள், உடனடியாக அந்த குரங்கை மீட்டு பத்திரமாக அரசு மருத்துவமனையில் அனுமதித்தனர். அங்கு காயமடைந்த குரங்கிற்கு சிகிச்சை அளிக்கப்பட்டது.

திருச்சி மாவட்டம் மணப்பாறை விராலிமலை சாலையில் நகராட்சி பணியாளர்களால் குப்பைகள் கொட்டப்படுவதால் அப்பகுதியில் கடும் துர்நாற்றம் வீசி வருகிறது. இதனால் அப்பகுதி பொதுமக்கள், வாகன ஓட்டிகள், பள்ளி மாணவர்கள் மற்றும் தனியார் மருத்துவமனை நோயாளிகள் என அனைவரும் பெரும் அவதிக்குள்ளாகி வருகின்றனர். குப்பைகள் தேங்குவதால் துர்நாற்றம் பரவுவதோடு, பன்றிகள் மற்றும் நாய்களின் தொல்லை அதிகரித்து, வாகன ஓட்டிகள் அச்சத்துடன் சாலையைக் கடந்து செல்ல வேண்டியுள்ளது. சுமார் 100 மீட்டர் தொலைவில் அமைந்துள்ள ஒரு தனியார் பள்ளியின் மாணவ, மாணவிகளும் பெற்றோர்களும் அப்பகுதியை கடக்கும்போது மூக்கைப் பிடித்துக்கொண்டு செல்லும் அவலநிலை உள்ளது. மேலும், சாலையின் எதிர்புறத்தில் உள்ள தனியார் மருத்துவமனையில் சிகிச்சை பெற்றுவரும் உள் நோயாளிகளும் இந்த துர்நாற்றத்தால் கடுமையான சிரமத்துடன் சிகிச்சை பெறும் அவலநிலைக்குத் தள்ளப்பட்டுள்ளனர். இந்த துர்நாற்றத்தினால் தொற்று நோய்கள் பரவும் அபாயம் நிலவுவதாகவும் சுட்டிக்காட்டப்பட்டுள்ளது. இந்த அவலநிலைக்கு உடனடியாக தீர்வு காண, சம்பந்தப்பட்ட அதிகாரிகள் மற்றும் மணப்பாறை சட்டமன்ற உறுப்பினர் நடவடிக்கை எடுக்க வேண்டும் என்று அப்பகுதி பொதுமக்கள் மற்றும் சமூக ஆர்வலர்கள் கோரிக்கை விடுத்துள்ளனர்.

திண்டுக்கல் எம்.வி. முத்தையா மகளிர் அரசு கலை மற்றும் அறிவியல் கல்லூரியில், சமூக நலன் மற்றும் மகளிர் உரிமைத்துறை சார்பில் இன்று (25.06.2026) ஒரு மாபெரும் விழிப்புணர்வு பேரணி நடைபெற்றது. 'பெண் குழந்தைகளை காப்போம், பெண் குழந்தைகளுக்கு கற்பிப்போம்' என்ற தலைப்பில் நடைபெற்ற இந்த பேரணியை மாவட்ட வருவாய் அலுவலர் ஜெயபாரதி தொடங்கி வைத்தார். இந்த நிகழ்வில் ஆயிரத்துக்கும் மேற்பட்ட மாணவிகள் திரளாகப் பங்கேற்றனர். அவர்கள் பெண் குழந்தைகள் பாதுகாப்பு, கல்வியின் அவசியம் மற்றும் பெண்களின் உரிமைகள் குறித்து விழிப்புணர்வு ஏற்படுத்தும் வகையில் பதாகைகளை ஏந்தி முழக்கங்களை எழுப்பினர். அரசு அலுவலர்கள் மற்றும் கல்லூரி பேராசிரியர்களும் மாணவிகளுடன் இணைந்து இந்தப் பேரணியில் கலந்து கொண்டனர்.

சிவகங்கை மாவட்டம் சிங்கம்புணரி அருகே அணைக்கரைப்பட்டியில் விவசாயிகள் நூதனப் போராட்டத்தில் ஈடுபட்டனர். பாலாற்று மண்ணில் மார்பளவு புதைந்து தங்கள் எதிர்ப்பைத் தெரிவித்த அவர்கள், சூரப்பட்டியில் 9.5 கோடி ரூபாய் மதிப்பில் கட்டப்பட்டு வரும் தடுப்பணைக்கு கடுமையான எதிர்ப்பு தெரிவித்தனர். இந்தத் தடுப்பணை கட்டுவதால் 650 கண்மாய்கள் மற்றும் ஒரு லட்சம் ஏக்கர் விவசாய நிலங்கள் பாதிக்கப்படும் என விவசாயிகள் எச்சரிக்கை விடுத்தனர். மேலும், அணை கட்டுமானப் பணிகளை உடனடியாக நிறுத்த வேண்டும் என்றும் கோரிக்கை வைத்தனர். காவல்துறை அதிகாரிகளுடனான பேச்சுவார்த்தைக்குப் பிறகு, இந்தப் போராட்டம் கைவிடப்பட்டது.

Post by Sangili.v

டீசல் மற்றும் உதிரிபாகங்களின் விலையேற்றத்தால் பெரிதும் பாதிக்கப்பட்டுள்ள எர்த் மூவர்ஸ் வாகன உரிமையாளர்கள், தமிழ்நாடு முழுவதும் 22.06.2026 முதல் வேலை நிறுத்தப் போராட்டத்தில் ஈடுபட்டு வருகின்றனர். இதன் ஒரு பகுதியாக, திண்டுக்கல் மாவட்டத்தில் மண் அள்ளும் இயந்திர உரிமையாளர்கள் நலச்சங்கம் சார்பில், மாவட்ட எர்த் மூவர்ஸ் உரிமையாளர்கள் அனைவரும் ஒன்றிணைந்து 24.06.2026 அன்று ஒரு நாள் அடையாள வேலை நிறுத்தப் போராட்டத்தில் ஈடுபட்டனர். இப்போராட்டத்தின் முக்கிய நோக்கம் வாடிக்கையாளர்களுக்கான வாடகையை உயர்த்துவது குறித்தும், பல்வேறு கோரிக்கைகளை வலியுறுத்துவதுமாகும். இந்த வேலை நிறுத்தத்தின்போது முன்வைக்கப்பட்ட கோரிக்கைகளில், வாகனங்களுக்கான லைஃப் டாக்ஸ் முறையை ரத்து செய்து பழைய முறையையே மீண்டும் கொண்டுவர வேண்டும் என்பதும், வெளிமாநில வாகனங்கள் சங்கத்தால் நிர்ணயிக்கப்பட்ட விலையை விட குறைவான கட்டணத்தில் இயங்கக்கூடாது என்பதும் வலியுறுத்தப்பட்டது. மேலும், அரசு வேலை மற்றும் அரசு ஒப்பந்த வேலைகளில் 80% உள்ளூர் வாகனங்களுக்கு முன்னுரிமை அளிக்க வேண்டும், அத்துடன் புதிய வாகனங்கள், உதிரிபாகங்கள் மற்றும் இன்சூரன்ஸ் ஆகியவற்றின் கடுமையான விலையேற்றத்தைக் கட்டுப்படுத்த வேண்டும் என்றும் கோரப்பட்டது. தமிழ்நாடு முழுவதும் உள்ள அனைத்து எர்த் மூவர்ஸ் வாகனங்களுக்கும் ஒரே மாதிரியான வாடகையை நிர்ணயம் செய்து, அதை அனைத்து மாவட்டங்களும் கட்டாயம் கடைபிடிக்க வேண்டும் என்ற கோரிக்கையும் முன்வைக்கப்பட்டது. தவிர, தமிழ்நாடு முழுவதும் உள்ள கிராவல் குவாரிகளை அரசே ஏற்று நடத்த வேண்டும் எனவும், அரசு ஒப்பந்தப் பணிகள், ஊரக வளர்ச்சித் துறை மற்றும் பொதுப்பணித்துறை அனைத்திலும் தற்போதுள்ள பேக்கேஜ் முறையை ரத்து செய்து மீண்டும் பழைய முறையையே பின்பற்ற வேண்டும் எனவும் போராட்டக்காரர்கள் வலியுறுத்தினர். திண்டுக்கல்லில் நடைபெற்ற இந்த அடையாள வேலை நிறுத்தப் போராட்டத்திற்கு ஏ. ஜான் தலைமை தாங்கினார். செயலாளர் முருகானந்தம், பொருளாளர் நாகராஜ், துணைத் தலைவர் சடையாண்டி மற்றும் இணைச் செயலாளர் ஜஸ்டின் திரவியம் ஆகியோர் முன்னிலை வகித்தனர். இந்நிகழ்வில் செயற்குழு உறுப்பினர்கள், சங்க உறுப்பினர்கள் மற்றும் திண்டுக்கல் மாவட்டத்தின் சுற்றுவட்டாரப் பகுதிகளான சின்னாளப்பட்டி, கொடைரோடு, நிலக்கோட்டை, காரமடை, ஒட்டன்சத்திரம், வடமதுரை, அய்யலூர், சாணார்பட்டி, கோபால்பட்டி ஆகிய இடங்களைச் சேர்ந்த சுமார் 300-க்கும் மேற்பட்ட வாகன உரிமையாளர்கள் பங்கேற்று தங்களது எதிர்ப்பைப் பதிவு செய்தனர்.

சிவகங்கை மாவட்டம், தேவகோட்டை வட்டம், மனைவிக்கோட்டை ஊராட்சிக்குட்பட்ட தெற்கு செய்யானேந்தல் கிராமத்தில் அமைந்துள்ள கொன்னையூர் ஸ்ரீ முத்துமாரியம்மன் திருக்கோவிலில் புனராவர்த்தன அஷ்டபந்தன மஹா கும்பாபிஷேக விழா சிறப்பாக நடைபெற்றது. தேவகோட்டை அருகே உள்ள தெற்கு செய்யானேந்தல் கிராமத்தில் நடைபெற்ற இந்த கும்பாபிஷேக நிகழ்வு பக்தர்களிடையே பெரும் ஈர்ப்பைப் பெற்றது. இந்த விழாவின் முதல் மற்றும் இரண்டாம் கால யாக பூஜைகள் நடத்தப்பட்டன. இதில் கோ பூஜை, நாடி சந்தானம் ஸ்பரிஷகுதி மூல மந்திர ஹோமம், மஹா பூர்ணாகுதி, தீபாராதனை, யாத்ரதானம் கட்டி புறப்பாடு போன்ற பல்வேறு சடங்குகள் நடைபெற்றன. இதைத் தொடர்ந்து, கலசத்திற்கு மஹா கும்பாபிஷேகம், மகா அபிஷேகம், தீபாராதனை மற்றும் மகா பூஜை ஆகியவை நிறைவடைந்தன. விழாவின் நிறைவாக, திருமறை, திருமுறை, பாராயணம் ஆகியவை வாசிக்கப்பட்டன. இந்த மங்களகரமான நிகழ்வில் சுற்றுவட்டார கிராமங்களைச் சேர்ந்த திரளான பொதுமக்கள் கலந்துகொண்டு இறைவனின் தரிசனம் பெற்று வழிபட்டனர்.

புதுக்கோட்டை மாவட்டம், ஆவுடையார்கோயில் அருகே பெருநாவலூரில் இயங்கி வரும் அறந்தாங்கி அரசு கலை மற்றும் அறிவியல் கல்லூரியில், போதைப்பழக்கத்திற்கு எதிரான உறுதிமொழி மற்றும் வெண்புள்ளி விழிப்புணர்வு உறுதிமொழி ஏற்கும் நிகழ்வுகள் கல்லூரி வளாகத்தில் நடைபெற்றன. கல்லூரி முதல்வர் முனைவர் ம.துரை அவர்கள் இந்நிகழ்வுகளுக்குத் தலைமையேற்று தொடங்கி வைத்தார். கல்லூரி போதைப்பொருள் பழக்கத்திற்கு எதிரான விழிப்புணர்வுக் குழுவின் ஒருங்கிணைப்பாளர் முனைவர் த.செந்தில்குமார், கல்லூரி முதல்வர் சார்பில் போதைப்பழக்கத்திற்கு எதிரான உறுதிமொழியை வாசித்தார். தொடர்ந்து, நாட்டு நலப்பணித்திட்ட அலுவலர் மு.பழனித்துரை வெண்புள்ளி விழிப்புணர்வு உறுதிமொழியை வாசிக்க, அனைவரும் அதனை ஏற்றுக்கொண்டனர். இந்நிகழ்வில், கல்லூரியின் கணினி அறிவியல் துறைத்தலைவர் முனைவர் து.சண்முகசுந்தரம், நிருவாகவியல் துறைத்தலைவர் முனைவர் மு.அன்பழகன், வணிகவியல் துறைத்தலைவர் முனைவர் கு.சீனிவாசன், வரலாற்றுத்துறைத்தலைவர் முனைவர் ரா.பிரகதாம்பாள், வேதியியல் துறைத்தலைவர் து.சிற்றரசு உள்ளிட்ட பேராசிரியர்கள், கண்காணிப்பாளர் பா.மகாராஜன் உள்ளிட்ட அலுவலகப் பணியாளர்கள், மற்றும் மாணவ, மாணவியர் அனைவரும் பங்கேற்று உறுதிமொழிகளை ஏற்றுக்கொண்டனர்.

வேடசந்தூர் பூதிபுரம் பஞ்சாயத்துக்குட்பட்ட குரும்பபட்டி கிராமத்தில் வசிக்கும் சுமார் 130 குடும்பத்தினர் தங்கள் ஊரின் முத்தாலம்மன் கோவில் திருவிழாவை வெகு விமர்சையாகக் கொண்டாடி வருகின்றனர். ஜூன் 23, 24 மற்றும் 25 ஆகிய தேதிகளில் செவ்வாய், புதன், வியாழன் என மூன்று நாட்கள் நடைபெற்று வரும் இந்தத் திருவிழாவில், இன்றைய நாளான புதன்கிழமை அன்று காலை மாவிளக்கு எடுத்தல், அக்னி சட்டி எடுத்தல் மற்றும் பொங்கல் வைத்தல் போன்ற சடங்குகளுடன், தப்பாட்டம் மற்றும் பறை இசை நிகழ்ச்சிகள் பார்வையாளர்களை வெகுவாகக் கவர்ந்தன. இளம் பெண்கள் அவரவர் சேர்ந்த நபர்களுடன், 'செட்டு சேலை பசங்க செட்டு' மற்றும் 'டீ செட்' போன்ற குழுக்களாகப் பிரிந்து, உற்சாகமாக விழாவில் பங்கேற்று வருகின்றனர். மேலும், இன்று இரவு ஒன்பது மணி அளவில் முத்தாலம்மன் என்னும் நாடகம் நடைபெறவுள்ளது.