தேனி மாவட்டம் உத்தமபாளையத்தின் நந்தவனத்தெரு 11-வது வார்டில் உள்ள சாக்கடை நீர் பாலம் பழுதடைந்துள்ளது. பழுதடைந்துள்ள இந்த சாக்கடை நீர் பாலத்தை உடனடியாக பழுது நீக்கி, சீரமைத்துத் தர வேண்டும் என்று வலியுறுத்தப்பட்டுள்ளது.

தேனி மாவட்டத்தின் மிக முக்கிய நீர் ஆதாரமாக விளங்கும் வைகை ஆறு, கடந்த ஆறு மாதங்களாக போதிய மழை இல்லாததால் முற்றிலும் வறண்டு மணல்மேடாக காட்சியளிக்கிறது. வருசநாடு மேற்கு தொடர்ச்சி மலைப்பகுதிகளில் உற்பத்தியாகும் இந்த ஆற்றை நம்பி வருசநாடு, மயிலாடும்பாறை, கடமலைக்குண்டு மற்றும் கண்டமனூர் உள்ளிட்ட 200-க்கும் மேற்பட்ட மலைக் கிராமங்கள் உள்ளன. இந்த ஆற்றில் அமைக்கப்பட்டுள்ள உறை கிணறுகள் மூலமே இப்பகுதி மக்களுக்கு குடிநீர் விநியோகம் செய்யப்பட்டு வந்த நிலையில், தற்பொழுது நீர்மட்டம் கிடுகிடுவென சரிந்து பெரும்பாலான கிணறுகளில் நீர் சுரப்பது நின்றுபோகும் நிலைக்குத் தள்ளப்பட்டுள்ளது. நடப்பாண்டில் தென்மேற்கு பருவமழையும் முழுமையாகக் கைவிட்டதால் இப்பகுதியில் கடும் வறட்சி நிலவுகிறது. நிலத்தடி நீர்மட்டம் அதல பாதாளத்திற்குச் சென்றதால், குடிநீருக்காக அமைக்கப்பட்ட ஆழ்துளை கிணறுகளும் வறண்டு போகும் நிலையை எட்டியுள்ளன. இந்த கடுமையான குடிநீர் பற்றாக்குறையை எப்படி கையாள்வது என்று தெரியாமல் உள்ளூர் ஊராட்சி நிர்வாகங்கள் விழிபிதுங்கி தவித்து வருகின்றன. பொதுமக்களின் தாகத்தைத் தீர்க்க மாவட்ட நிர்வாகம் போர்க்கால அடிப்படையில் தலையிட்டு உடனடி நடவடிக்கை எடுக்க வேண்டும் என்ற கோரிக்கை வலுவாக எழுந்துள்ளது.

தேனி மாவட்டம் போடி மூணாறு நெடுஞ்சாலையில் சிபிஏ கல்லூரி அருகே அமைந்துள்ள தமிழ்நாடு நுகர்பொருள் வாணிபக் கிடங்கில் உணவு மற்றும் உணவு வழங்கல் துறை அமைச்சர் வெங்கடரமணன் நேரில் ஆய்வு மேற்கொண்டார். இந்த ஆய்வின் போது, கிடங்கில் சேகரிக்கப்படும் அரிசி, பருப்பு, சர்க்கரை மற்றும் பாமாயில் ஆகியவை முறையாகவும், பாதுகாப்பாகவும் வைக்கப்பட்டுள்ளதா என்று அவர் பார்வையிட்டு ஆய்வு செய்தார். இதனைத் தொடர்ந்து, இந்த மாவட்டத்தின் நீண்ட நாள் கோரிக்கையான மாம்பழக் கூழ் தொழிற்சாலை அமைப்பது குறித்து முதல்வரின் கவனத்திற்கு கொண்டு சென்று, அது விரைவில் செயல்படுத்தப்படும் என்று அமைச்சர் தெரிவித்தார். மாம்பழக் கூழ் தொழிற்சாலை விரைவில் அமைக்கப்படும் என்றும் அவர் உறுதிபடக் கூறியுள்ளார்.

திண்டுக்கல் மாவட்டம், பழனி அருகே உள்ள அ. கலையமுத்தூர் ஊராட்சிக்குட்பட்ட மதுரை வீரன் கோவில் மற்றும் பகவதி அம்மன் கோவில் இடைப்பட்ட பகுதியில் காவிரி குடிநீர் குழாய் உடைப்பு ஏற்பட்டது. இதனால் குடிநீர் வீணாக விவசாய நிலங்களுக்குள் செல்வதாக மாவட்ட ஆட்சியர் திருமதி துர்கா தேவி அவர்களுக்குத் தகவல் தெரிவிக்கப்பட்டது. இந்தத் தகவலைத் தொடர்ந்து, மாவட்ட ஆட்சியர் உடனடியாக களமிறங்கி குழாயைச் சீரமைக்க உத்தரவிட்டார். மாவட்ட நிர்வாகத்தின் இந்த விரைவான நடவடிக்கையை அப்பகுதி பொதுமக்கள் மற்றும் சமூக ஆர்வலர்கள் வெகுவாகப் பாராட்டியுள்ளனர்.

விருதுநகர் மாவட்டம் காரியாபட்டி அருகே உள்ள குறுஞ்சங்குளம் கம்மாய்க்குச் செல்லும் நீர் வரத்து கால்வாய் அடைக்கப்பட்டதை கண்டித்து, அப்பகுதி பொதுமக்கள் இன்று போராட்டத்தில் ஈடுபட்டனர். இந்த கால்வாய் அடைக்கப்பட்டதால் கம்மாய்க்கு தண்ணீர் செல்ல முடியாத நிலை ஏற்பட்டுள்ளது என்றும், இதனால் விவசாயம் மற்றும் நிலத்தடி நீர்மட்டம் கடுமையாக பாதிக்கப்படும் என்றும் பொதுமக்கள் குற்றம்சாட்டியுள்ளனர். மாவட்ட நிர்வாகமும் சம்பந்தப்பட்ட துறையினரும் உடனடியாக கால்வாயைத் திறந்து, தடையின்றி நீர் செல்ல உரிய நடவடிக்கை எடுக்க வேண்டும் என்று போராட்டக்காரர்கள் வலியுறுத்தினர். இந்தப் போராட்டத்தால் அப்பகுதியில் சிறிது நேரம் பரபரப்பு நிலவியது. தகவலறிந்து சம்பவ இடத்திற்கு வந்த அதிகாரிகள் மற்றும் காவல்துறையினர், பொதுமக்களுடன் பேச்சுவார்த்தை நடத்தி உரிய நடவடிக்கை எடுக்கப்படும் என உறுதியளித்ததைத் தொடர்ந்து போராட்டம் கைவிடப்பட்டது.

மதுரை நாகமலை புதுக்கோட்டையில் உள்ள எஸ்.வி.என் கலைக்கல்லூரி மைதானத்தில், வருகிற 19-ஆம் தேதி காமராஜர் பிறந்தநாளை முன்னிட்டு 4,000 மாணவர்கள் பங்கேற்கும் பிரம்மாண்ட அணிவகுப்பு நிகழ்ச்சி நடைபெற உள்ளது. இந்த நிகழ்ச்சியில் மாணவர்கள் அனைவரும் ஒன்றிணைந்து காமராஜரின் உருவம் தெரியும் வண்ணம் அணிவகுத்து நிற்க உள்ளனர். இந்த ஏற்பாடுகளை ஆய்வு செய்வதற்காக தமிழக சுற்றுலாத்துறை அமைச்சர் ராஜேஷ் குமார் கல்லூரிக்கு வருகை தந்தார். செய்தியாளர்களிடம் பேசிய அமைச்சர் ராஜேஷ் குமார், தமிழ்நாடு காங்கிரஸ் கமிட்டி சார்பில் காமராஜர் பிறந்தநாளை ஒட்டி ஜூலை 13 முதல் ஒரு வாரம் 'லஞ்சம் தவிர், நெஞ்சம் நிமிர்' என்ற தலைப்பில் பல்வேறு நிகழ்ச்சிகள் நடைபெறவுள்ளதாகக் குறிப்பிட்டார். இதன்படி, 13-ஆம் தேதி மெரினா கடற்கரையில் காமராஜர் உருவம் பொறித்த மணல் சிற்பம் அமைத்தல், 14-ஆம் தேதி குடியாத்தத்தில் பொதுக்கூட்டம் மற்றும் 19-ஆம் தேதி மதுரை கல்லூரியில் மாணவர்களின் அணிவகுப்பு நிகழ்ச்சி ஆகியவை திட்டமிடப்பட்டுள்ளதாகத் தெரிவித்தார். இத்தகவலை தமிழ்நாடு காங்கிரஸ் கமிட்டி தலைவர் மாணிக்கம் தாகூர் அறிவுறுத்தலின்படி மேற்கொள்வதாக அவர் கூறினார். இதன்போது, பல்வேறு கேள்விகளுக்குப் பதிலளித்த அமைச்சர், கரூர் கூட்ட நெரிசலில் உயிரிழந்தவர்களின் குடும்பத்தினருக்கு அரசு வேலை வழங்கப்பட வேண்டும் என்பது தனது தனிப்பட்ட கருத்து என்றும், இதனை அரசியல் ரீதியாகப் பார்க்கக்கூடாது என்றும் தெரிவித்தார். மேலும், சுற்றுலாத்துறையை மற்ற மாநிலங்களை விட முதன்மை மாநிலமாக மாற்றவும், வெளிநாட்டு மற்றும் வெளிமாநில சுற்றுலாப் பயணிகளை ஈர்க்கும் வகையில் கோயில் சார்ந்த சுற்றுலாவை மேம்படுத்தவும் நடவடிக்கைகள் எடுக்கப்பட்டு வருவதாகக் கூறினார். திருப்பரங்குன்றம் முருகன் கோயில் ரோப் கார் திட்டம் மற்றும் இதர சுற்றுலாத் திட்டங்கள் குறித்து முதலமைச்சரின் கவனத்திற்குக் கொண்டு செல்லப்பட்டுள்ளதாகவும், வரும் பட்ஜெட்டில் சுற்றுலாத்துறை சார்பாக நல்ல அறிவிப்புகள் வெளியாகும் என்றும் அவர் தெரிவித்தார்.

தூத்துக்குடி மாவட்டம் கோவில்பட்டி அருகே உள்ள கட்டாலங்குளத்தில், சுதந்திரப் போராட்ட வீரர் அழகுமுத்துக்கோனின் 316-வது பிறந்தநாள் அரசு விழா பெரும் சர்ச்சையை ஏற்படுத்தியுள்ளது. அரசு விழா என்று அறிவிக்கப்பட்ட இந்த நிகழ்ச்சியில், மாவட்ட ஆட்சியர் ஒரு முறையும், இரண்டு அமைச்சர்கள் தனித்தனியாக இரு முறையும் என மொத்தம் மூன்று முறை மாலை அணிவித்து மரியாதை செலுத்தியது விழாவிற்கு வந்திருந்தவர்களிடையே கடும் அதிர்ச்சியை ஏற்படுத்தியுள்ளது. மணிமண்டபத்தில் உள்ள அழகுமுத்துக்கோனின் திருவுருவச் சிலைக்கு காலை 10:30 மணிக்கு அமைச்சர்கள் ஸ்ரீநாத், மதன் ராஜா மற்றும் மாவட்ட ஆட்சியர் விஷு மகாஜன் ஆகியோர் அரசு சார்பில் மாலை அணிவித்து மரியாதை செலுத்துவதாக அறிவிக்கப்பட்டிருந்தது. ஆனால், அமைச்சர்கள் வரத் தாமதமானதால் முதற்கட்டமாக மாவட்ட ஆட்சியர் விஷு மகாஜன் அரசு சார்பில் தனியாக மாலை அணிவித்து மரியாதை செலுத்தினார். அதன் பின்னர் சிறிது நேரம் கழித்து, குறு, சிறு மற்றும் நடுத்தர தொழில் நிறுவனங்கள் துறை அமைச்சர் மதன்ராஜா ஆட்சியருடன் வந்து மாலை அணிவித்தார். இதனைத் தொடர்ந்து மேலும் சிறிது நேரம் கழித்து, மீன்வளம் மற்றும் மீனவர் நலத்துறை அமைச்சர் ஸ்ரீநாத் ஆட்சியருடன் தனியாக வந்து மாலை அணிவித்து மரியாதை செலுத்தினார். ஒரே நிகழ்ச்சியில் மூன்று முறை தனித்தனியாக நடந்த இந்த நிகழ்வு, அரசு விழா என்பதைத் தாண்டி த. வெ. க கோஷ்டி பூசல் விழாவாக மாறியது போன்ற தோற்றத்தை ஏற்படுத்தியுள்ளது. வழக்கமாக மாவட்ட ஆட்சியர் மற்றும் அமைச்சர்கள் ஒருங்கிணைந்து மாலை அணிவித்து மரியாதை செய்து, அழகுமுத்துக்கோனின் வாரிசுகளை கௌரவப்படுத்தி, நலத்திட்ட உதவிகள் வழங்கும் நிகழ்ச்சிகள் நடைபெறும். ஆனால், இந்த முறை அதுபோன்ற எந்த விழாவும் நடைபெறவில்லை. மேலும், அமைச்சர்கள் வரத் தாமதமானதால் மற்றவர்களைச் சென்று மரியாதை செய்யச் சொல்வதில் காவல்துறையினருக்கும் தயக்கம் ஏற்பட்டது குறிப்பிடத்தக்கது.

தேனி மாவட்டம் தேனி பழனிசெட்டிபட்டி அருகே உள்ள தமிழ்நாடு நுகர்பொருள் வாணிப கிடங்கில் உணவு வழங்கல் துறை அமைச்சர் வெங்கடரமணன் இன்று ஆய்வு மேற்கொண்டார். ரேஷன் கடைகளில் தரம் இல்லாத அரிசி கிடைப்பதாக வந்த புகாரின் அடிப்படையில் இந்த ஆய்வு மேற்கொள்ளப்பட்டதாகக் குறிப்பிட்ட அமைச்சர், ரேஷன் கடைகளுக்கு அனுப்பப்படும் அரிசிகளின் தரம் குறித்து ஆய்வு செய்து, தரமான அரிசிகள் வழங்கப்படுவதை அதிகாரிகள் உறுதி செய்ய வேண்டும் என்று அறிவுறுத்தினார். தொடர்ந்து செய்தியாளர்களைச் சந்தித்த அமைச்சர் வெங்கட்ரமணன், தேனியில் தற்போது 15 தற்காலிக கொள்முதல் நிலையங்கள் செயல்பட்டு வருவதாகவும், தேவைக்கேற்ப நிரந்தர கொள்முதல் நிலையங்கள் அமைக்க நடவடிக்கை எடுக்கப்படும் என்றும் தெரிவித்தார். காலநிலை மாற்றத்திற்கு ஏற்ப திறந்தவெளி குடோன்களில் வைக்கப்படும் அரிசி மற்றும் தானியங்களைப் பாதுகாக்க அறிவியல் பூர்வமான குடோன்கள் தரம் உயர்த்தப்பட்டு கட்டப்பட்டு வருவதாகக் கூறிய அவர், ரேஷன் கடைகளில் தேங்காய் மற்றும் தேங்காய் எண்ணெய் விற்பனை செய்வது குறித்து உரிய ஆலோசனைக்கு பின் நடவடிக்கை எடுக்கப்படும் என்றார். மேலும், மாநில எல்லைகளில் பல்வேறு துறைகள் இணைந்து எந்தவித கடத்தலும், கையூட்டும் பெறாத வகையில் ஒருங்கிணைந்து செயல்படும் என்றும், குடும்ப அட்டைதாரர்களுக்கு சமையல் எரிவாயு விரைவில் கிடைப்பது துரிதப்படுத்தப்பட்டு உள்ளதாகவும் அவர் தெரிவித்தார். இதற்கிடையே, திருச்சி கிழக்கு இடைத்தேர்தல் குறித்துப் பேசிய அமைச்சர், 50 ஆண்டுகால கட்சிகளைத் தவிர்த்துவிட்டு மக்கள் த.வெ.காவிற்கு வாக்களித்துள்ளதாகக் குறிப்பிட்டார். அத்துடன், திருச்சி கிழக்கு இடைத்தேர்தலில் திமுக உள்ளிட்ட எதிர்க்கட்சிகளுக்கு பாடம் புகட்ட மக்கள் தயாராக உள்ளனர் என்றும் அமைச்சர் வெங்கட்ரமணன் தெரிவித்தார்.

திண்டுக்கல் மாவட்டம் ஒட்டன்சத்திரம் சத்திரப்பட்டி அருகே அரசு பேருந்து மற்றும் இருசக்கர வாகனம் ஆகியவை மோதிக்கொள்ளும் பரபரப்பான விபத்து நிகழ்ந்துள்ளது. இந்த விபத்து தொடர்பான பரபரப்பான சிசிடிவி காட்சிகள் தற்போது வெளியாகியுள்ளன.