சென்னை எழும்பூர் பகுதியில் இனிமையான இரவு இசை நிகழ்ச்சி ஏற்பாடு செய்யப்பட்டுள்ளது. மனதை வருடும் இந்த இன்னிசையை கேட்டு ரசிக்க அனைவரும் அழைக்கப்படுகிறார்கள்.

கள்ளக்குறிச்சி மாவட்டம், திருக்கோவிலூர் மற்றும் சுற்றுவட்டாரப் பகுதிகளில் இன்று ஒரு மணி நேரம் கனமழை பெய்தது. இதனால் வெப்பம் தணிந்து விவசாயிகள் மற்றும் பொதுமக்கள் மிகுந்த மகிழ்ச்சி அடைந்தனர்.

திருப்பத்தூர் மாவட்டம் ஆம்பூர் தாலுகா மிட்டாளம் ஊராட்சியைச் சேர்ந்த ராணுவ வீரர், பாகிஸ்தான் தீவிரவாதிகளை துப்பாக்கிச்சூடு நடத்தி வீழ்த்தியதற்காக ஜனாதிபதியின் வீர தீர விருதை பெற்றார். சொந்த ஊர் திரும்பிய அவருக்கு ஆம்பூர் ரயில் நிலையத்தில் பொதுமக்கள் ஆரத்தி எடுத்து, மேளதாளங்களுடன் பிரமாண்ட வரவேற்பு அளித்தனர்.

கடலூர் மாவட்டம் காட்டுமன்னார்கோயில் ராய நல்லூர் அரசு நடுநிலைப்பள்ளி சார்பில் இலவச மருத்துவ மற்றும் உயர் கல்வி வழிகாட்டுதல் முகாம் நடைபெற்றது. சமீபத்தில் மாரடைப்பால் உயிரிழந்த கூலித் தொழிலாளியின் நினைவாக ஏற்பாடு செய்யப்பட்ட இதில், இதய நோய் நிபுணர்கள் கலந்துகொண்டனர். பெற்றோரை இழந்த சில மாணவிகள் உணர்ச்சிவசப்பட்டு அழுதது காண்போரை நெகிழ வைத்தது.

கிருஷ்ணகிரி பர்கூர் அருகே கந்திகுப்பத்தில் வாழ்வை மாற்றும் வேல்மாறல் மற்றும் திருப்புகழ் வழிபாடு நடைபெற்றது. வேல்மாறல் சேவா அறக்கட்டளைத் தலைவர் விஜயகுமார் வேலுக்கு சிறப்பு பூஜைகள் செய்து வழிபாட்டை நடத்தினார். மாலை மற்றும் அர்த்தஜாம பூஜைகளும் அங்கே செய்யப்பட்டன.

தருமபுரி மாவட்டம், பாலக்கோடு அருகே மாரண்டஅள்ளியில் 18 ஆண்டுகளாக செயல்படும் டாஸ்மாக் கடையை மூடக் கோரி பொதுமக்கள் போராட்டம் நடத்தினர். பள்ளி, கடைவீதி அருகில் உள்ளதால் பெண்கள், மாணவிகள் அச்சத்துடன் சென்று வருவதாகவும், மதுப்பிரியர்கள் ஆபாசமாக பேசுவதாகவும் அவர்கள் குற்றம் சாட்டினர். இக்கடையை நிரந்தரமாக மூட அல்லது இடமாற்றம் செய்யக்கோரி மாவட்ட ஆட்சியரிடம் மனுவும் அளிக்கப்பட்டுள்ளது.

தர்மபுரி மாவட்டம் கடத்தூரில் உள்ள புகழ்பெற்ற வாராந்திர வெற்றிலை சந்தையில் நேற்று ஒரே நாளில் ₹10 லட்சத்திற்கு மேல் வெற்றிலை விற்பனையானது. மாவட்டத்தின் பல்வேறு பகுதிகளில் இருந்தும், வெளிமாவட்டங்களிலிருந்தும் வந்த விவசாயிகள், வியாபாரிகள் உற்சாகமாக பங்கேற்றனர். 128 வெற்றிலைக் கட்டுகள் கொண்ட ஒரு மூட்டை ₹12,000 முதல் ₹16,000 வரை விற்பனையாகி, விவசாயிகளுக்கு பெரும் லாபத்தை ஈட்டித் தந்தது.

கிருஷ்ணகிரி மாவட்ட விளையாட்டு மேம்பாட்டு ஆணையம் சார்பில் நடத்தப்பட்ட நீச்சல் பயிற்சி முகாம் வெற்றிகரமாக நிறைவடைந்தது. மூன்று கட்டங்களாக நடைபெற்ற இந்தப் பயிற்சியில் பங்கேற்ற மாணவ, மாணவிகளுக்கு சான்றிதழ்கள் வழங்கப்பட்டன.

தர்மபுரி பாலக்கோடு திருமல்வாடி அரசு மேல்நிலைப் பள்ளியின் 2000-2001 முன்னாள் மாணவர்கள் 25 ஆண்டுகளுக்குப் பிறகு ஒன்றிணைந்தனர். அவர்கள் பழைய நினைவுகளைப் பகிர்ந்து கொண்டு, தங்களுக்கும் தற்போதைய ஆசிரியர்களுக்கும் பொன்னாடை அணிவித்து கௌரவித்தனர்.

சேலம் மாவட்டத்தின் பல்வேறு பகுதிகளில் இன்று பலத்த மழை பெய்தது. பல நாட்களாக வாட்டி வதைத்த வெயில் தணிந்து, திடீர் மழையால் பொதுமக்கள் மகிழ்ச்சியடைந்துள்ளனர்.