কলগাছিয়াৰ সাওঁৰাচৰা গাঁৱত বেঁকী নদীৰ ভয়ংকৰ খহনীয়াই এক ভয়াৱহ পৰিস্থিতিৰ সৃষ্টি কৰিছে। এই খহনীয়াত এটা অংগনবাড়ী কেন্দ্ৰ আৰু এখন প্ৰাথমিক বিদ্যালয় সম্পূৰ্ণৰূপে জাহ গৈছে। বিগত এমাহৰ ভিতৰতে নদীৰ গ্ৰাসত প্ৰায় কুৰিটা পৰিয়ালৰ ঘৰ-দুৱাৰ উটি যোৱাৰ ফলত তেওঁলোক গৃহহাৰা হৈ পৰিছে। বিদ্যালয় গৃহটো নদীয়ে ভাঙি নিয়াত অঞ্চলটোত পাঠদান প্ৰক্ৰিয়াও গুৰুতৰভাৱে ব্যাহত হৈ পৰিছে। এনে জটিল পৰিস্থিতিত ৰাইজে জিঅ' বেগ ব্যৱহাৰ কৰি বিজ্ঞানসন্মতভাৱে খহনীয়া প্ৰতিৰোধৰ ব্যৱস্থা গ্ৰহণ কৰিবলৈ সংশ্লিষ্ট কৰ্তৃপক্ষক দাবী জনাইছে।

কলগাছিয়াৰ বালিকুৰি কে গাওঁত এক অচিন বেমাৰৰ আতংকে বিৰাজ কৰিছে, যাৰ ফলত চিকিৎসাৰ অভাৱত গোধনৰ মৃত্যু হৈছে। এই অচিন বেমাৰে হাজাৰ হাজাৰ গোধনক আক্ৰমণ কৰাৰ ফলত, একমাত্ৰ গো-পালনৰ ওপৰত নিৰ্ভৰ কৰি জীৱিকা নিৰ্বাহ কৰা দৰিদ্ৰ কৃষকসকলৰ মাজত এক হাহাকাৰ পৰিস্থিতিৰ সৃষ্টি হৈছে। অভিযোগ অনুসৰি, পশু চিকিৎসা বিভাগে এই গুৰুতৰ বিষয়ত কোনো কাণ সাৰ দিয়া নাই।

বৰপেটা জিলাৰ কয়াকুছিৰ কুৰিহা গাঁৱত সংঘটিত এক চাঞ্চল্যকৰ ঘটনাত পৰকীয়া সম্পৰ্কৰ অভিযোগক কেন্দ্ৰ কৰি পুনৰ এখন সুখৰ সংসাৰ ছাৰখাৰ হোৱাৰ খবৰ আহিছে। এই ঘটনাত স্বামী ছাইফুল ইছলামৰ বিৰুদ্ধে তেওঁৰ পত্নীক ৪ বছৰীয়া কন্যা সন্তানসহ ঘৰৰ পৰা উলিয়াই দিয়াৰ গুৰুতৰ অভিযোগ উত্থাপন হৈছে।

বৰপেটা জিলাৰ নবগঠিত মন্দিয়া সমষ্টিৰ ডাউকমাৰীৰ পৰা কাছুকাটী হৈ বাংলীপাৰালৈ যোৱা একমাত্ৰ পথটো বিগত ৫-৬ বছৰ ধৰি জৰাজীৰ্ণ হৈ থকাৰ ফলত স্থানীয় ৰাইজে চৰম দুৰ্ভোগ ভুগিবলগীয়া হৈছে। এই গুৰুত্বপূৰ্ণ পথছোৱা সামান্য বৰষুণতেই একাঠু পৰ্যন্ত পানী আৰু বোকাৰে একাকাৰ হৈ পুখুৰী সদৃশ ৰূপ লয়। ফলস্বৰূপে, স্কুল-কলেজৰ ছাত্ৰ-ছাত্ৰীৰ লগতে সাধাৰণ ৰাইজে প্ৰতিদিনে যাতায়াতৰ ক্ষেত্ৰত সীমাহীন কষ্ট ভোগ কৰিবলগীয়া হয়। পথৰ এই শোচনীয় অৱস্থাৰ বাবেই গাঁওখনত কোনো জৰুৰীকালীন সেৱা যেনে এম্বুলেন্স অথবা অগ্নিনিৰ্বাপক বাহিনীৰ বাহন সোমাব নোৱাৰে। ইয়াৰ পৰিণতিত, জৰুৰী সময়ত চিকিৎসাৰ অভাৱত গাঁৱবাসীয়ে গভীৰ সংকটৰ সন্মুখীন হ'বলগীয়া হৈছে। অভিযোগ অনুসৰি, বিগত ৫-৬ বছৰ ধৰি পথটো এনেদৰে জৰাজীৰ্ণ হৈ থকাৰ পিছতো স্থানীয় জনপ্ৰতিনিধি সকলে ইয়াৰ মেৰামতিৰ বাবে কোনো পদক্ষেপ গ্ৰহণ কৰা নাই। ক্ষুব্ধ স্থানীয় ৰাইজ আৰু ছাত্ৰ মুক্তি সংগ্ৰাম সমিতিয়ে অতি শীঘ্ৰে এই জৰাজীৰ্ণ পথটো নিৰ্মাণৰ দাবী জনাইছে। তেওঁলোকে স্থানীয় বিধায়ক, পঞ্চায়ত সভানেত্ৰী আৰু জিলা প্ৰশাসনক অনতিপলমে এই ক্ষেত্ৰত ব্যৱস্থা গ্ৰহণ কৰিবলৈ আহ্বান জনাইছে। অন্যথা, অনাগত দিনত প্ৰশাসনৰ বিৰুদ্ধে তীব্ৰ গণ আন্দোলন গঢ়ি তোলাৰ হুংকাৰ দিছে গাঁৱবাসীয়ে।

বনবাহাৰ গাঁৱত পিএম কিষাণ যোজনাৰ নামত এক বৃহৎ প্ৰতাৰণাৰ অভিযোগ উত্থাপিত হৈছে। খাইৰুল নামৰ এজন লোকৰ বিৰুদ্ধে গাঁৱৰ একাংশ সৰলমনা লোকক পিএম কিষাণ যোজনাৰ ধন উলিয়াই দিয়াৰ প্ৰলোভন দেখুৱাই প্ৰতিজনৰ পৰা ৩ হাজাৰৰ পৰা ৪ হাজাৰ টকা পৰ্যন্ত সংগ্ৰহ কৰাৰ অভিযোগ আনিছে গাঁওবাসীয়ে। অভিযোগ অনুসৰি, অভিযুক্ত খাইৰুলে চৰকাৰী আঁচনিৰ সুবিধা দিয়াৰ নামত বহু লোকৰ পৰা ধন সংগ্ৰহ কৰি পিছত উধাও হৈছিল। ইয়াৰ ফলত গাঁওবাসীৰ মাজত তীব্ৰ ক্ষোভৰ সৃষ্টি হয়। বুধবাৰে বিয়লিৰ ভাগত বনবাহাৰ গাঁৱৰ ৰাইজে খাইৰুলক জবাবদিহি কৰিবলৈ বাধ্য কৰে, যাৰ পাছত অঞ্চলটোত তীব্ৰ প্ৰতিক্ৰিয়াৰ সৃষ্টি হয়। স্থানীয় লোকসকলে ক্ষোভ প্ৰকাশ কৰি কয় যে গাঁৱৰ সহজ-সৰল আৰু দৰিদ্ৰ লোকসকলক লক্ষ্য কৰি এনে প্ৰতাৰণাৰ জাল পতা হৈছে। ৰাইজে চৰকাৰী আঁচনিৰ নামত ধন সংগ্ৰহ কৰা এনে কাৰ্যৰ বিৰুদ্ধে কঠোৰ ব্যৱস্থা গ্ৰহণৰ দাবী জনাইছে। এই ঘটনাৰ পাছত স্থানীয় সচেতন মহলে পিএম কিষাণৰ নামত ধন সংগ্ৰহ কৰা কোনো ব্যক্তিক বিশ্বাস নকৰিবলৈ আৰু সন্দেহজনক কাৰ্যকলাপ দেখা পালে তৎক্ষণাত প্ৰশাসনক অৱগত কৰিবলৈ আহ্বান জনাইছে।

বঙাইগাঁও জিলাৰ গোলাপাৰাত এক দুৰ্ভাগ্যজনক ঘটনা সংঘটিত হৈছে, য'ত এজন ৬০ বছৰীয়া ব্যক্তিৰ ধানকলত মৃত্যু হৈছে।

পাকাবেতবাৰী সমষ্টিৰ অন্তৰ্গত ৰোৱমাৰী মিলন বজাৰৰ উত্তৰ পাৰাৰ পথটো দীৰ্ঘদিন ধৰি ভঙা-ছিঙা অৱস্থাত আছে। পথটো সোনকালে মেৰামতি কৰি ভাল কৰাৰ বাবে সংশ্লিষ্ট কৰ্তৃপক্ষলৈ আহ্বান জনোৱা হৈছে।

পিএম কিষাণ আঁচনিৰ কিস্তিৰ ধন হিতাধিকাৰীৰ একাউণ্টৰ পৰা উলিওৱাই দিয়াৰ নামত ধন সংগ্ৰহ কৰা বুলি এক অভিযোগ উত্থাপন হৈছে।