তামুলপুৰত জিএছপিৰ সংবাদমেল: বিৰোধীৰ অপপ্ৰচাৰক প্ৰত্যাহ্বান জনাই নিৰ্বাচনী স্থিতি স্পষ্ট কৰিলে প্ৰাৰ্থী নৱজিৎ শৰণীয়াই। তামুলপুৰ, ৬ এপ্ৰিল: আগন্তুক বিধানসভা নিৰ্বাচনৰ প্ৰাকক্ষণত ৪৩ নং তামুলপুৰ বিধানসভা সমষ্টিৰ ৰাজনৈতিক পৰিৱেশ উত্তপ্ত হৈ পৰাৰ মাজতে আজি গণ সুৰক্ষা পাৰ্টি চমূকৈ জিএছপিয়ে এক গুৰুত্বপূৰ্ণ সংবাদমেল সম্বোধন কৰি বিৰোধীৰ বিৰুদ্ধে তীব্ৰ ক্ষোভ উজাৰে। সংবাদমেলত সমষ্টিটোৰ জিএছপিৰ প্ৰাৰ্থী নৱজিৎ শৰণীয়াই স্পষ্ট কৰি দিয়ে যে নিৰ্বাচনী বৈতৰণী পাৰ হ’বলৈ বিৰোধী দলসমূহে জিএছপিৰ বিৰুদ্ধে বিভিন্ন অপপ্ৰচাৰত লিপ্ত হৈছে। তেওঁ অভিযোগ কৰে যে জিএছপি দলে আন কোনো দলক সমৰ্থন আগবঢ়োৱা বা আনৰ হৈ কাম কৰা বুলি যি চৰ্চা চলিছে, সেয়া সম্পূৰ্ণ ভিত্তিহীন আৰু কেৱল ৰাইজক বিপথে পৰিচালিত কৰাৰ এক চক্ৰান্তহে। শৰণীয়াই দৃঢ়তাৰে কয় যে জিএছপিৰ প্ৰতি জনসাধাৰণৰ অভূতপূৰ্ব সঁহাৰি দেখি শংকিত হৈ পৰা আন ৰাজনৈতিক দলসমূহে নিজৰ পৰাজয় নিশ্চিত জানি এনে নীচ ৰাজনীতিৰ আশ্ৰয় লৈছে। তেওঁ লগতে সদৰী কৰে যে বিভিন্ন সময়ত তেওঁলোকৰ দললৈ বহু ৰাজনৈতিক প্ৰলোভন বা ‘অফাৰ’ আহিছিল যদিও সমষ্টিটোৰ উন্নয়ন আৰু ৰাইজৰ স্বাৰ্থৰ সৈতে তেওঁলোকে কেতিয়াও আপোচ কৰা নাই আৰু ভৱিষ্যতেও নকৰে। সকলো জাতি-জনগোষ্ঠীৰ লোকৰ মাজত সম-উন্নয়ন আৰু সম-অধিকাৰ প্ৰতিষ্ঠা কৰাৰ যি মূল লক্ষ্য লৈ জিএছপিয়ে নিৰ্বাচনী যুঁজত অৱতীৰ্ণ হৈছে, সেই স্থিতিৰ পৰা দলটো বিন্দুমানো বিচলিত নহয় বুলি তেওঁ ৰাইজক আশ্বস্ত কৰে। একেখন সংবাদমেলতে উপস্থিত থাকি অবড়ো সুৰক্ষা সমিতিৰ নেতা দুলাল পাটোৱাৰীয়ে কয় যে সমগ্ৰ বিটিচি অঞ্চলৰ সকলো শ্ৰেণীৰ লোকৰ অধিকাৰ সুৰক্ষিত কৰাৰ স্বাৰ্থত তেওঁলোকে জিএছপি দলক পূৰ্ণ সমৰ্থন আগবঢ়াইছে। তেওঁ তামুলপুৰ সমষ্টিৰ প্ৰাৰ্থী নৱজিৎ শৰণীয়াৰ লগতে বাক্সা সমষ্টিৰ জিএছপি প্ৰাৰ্থী ৰমেশ দাসক বিধানসভালৈ নিৰ্বাচিত কৰি পঠিয়াবলৈ অবড়ো সুৰক্ষা সমিতিৰ তৰফৰ পৰা জনসাধাৰণক বিপুল ভোটদানৰ আহ্বান জনায়। বিৰোধীৰ কোনো উৰাবাতৰিত ভোল নগৈ এক নিকা আৰু শক্তিশালী জনপ্ৰতিনিধি নিৰ্বাচন কৰিবলৈ জিএছপিৰ নেতৃত্বই ভোটাৰ ৰাইজক পুনৰবাৰ অনুৰোধ জনাইছে।###

NAlive24

Local News Reporter তামুলপুৰ, তামুলপুৰ, অসম•

1 hr ago