சென்னை ஓட்டேரியைச் சேர்ந்த 19 வயதான ஜனனி, வீட்டில் சாமி கும்பிடுவதற்காக கற்பூரம் ஏற்ற முயன்றபோது எதிர்பாராத விதமாக அவரது ஆடையில் தீப்பிடித்தது. இதில் படுகாயமடைந்த அவர், அருகில் இருந்தவர்களால் மீட்கப்பட்டு மருத்துவமனையில் அனுமதிக்கப்பட்டார். மருத்துவமனையில் தீவிர சிகிச்சை பெற்று வந்த ஜனனி, சிகிச்சை பலனின்றி இன்று உயிரிழந்தார். இந்தச் சம்பவம் குறித்து போலீசார் தற்போது விசாரணை நடத்தி வருகின்றனர்.

தர்மபுரி மாவட்டம் பென்னாகரம் தாலுக்கா அச்சனஅள்ளி கிராமத்தைச் சேர்ந்த சக்திவேல் என்பவரின் மகள் நர்மதா (19) மற்றும் அதே பகுதியைச் சேர்ந்த குமாரின் மகன் பெருமாள் (21) ஆகிய இருவரும் கடந்த 4 ஆண்டுகளாகக் காதலித்து வந்துள்ளனர். டிப்ளமோ படித்துள்ள நர்மதாவும், பட்டதாரியான பெருமாளும், பெற்றோர்களின் எதிர்ப்பையும் மீறி இன்று காலை பாலக்கோடு அருகே உள்ள மணியாகரன் கொட்டாய் சிவன் கோயிலில் திருமணம் செய்து கொண்டனர். பெற்றோர்களுக்குப் பயந்து பாதுகாப்பு கோரி இருவரும் பாலக்கோடு காவல் நிலையத்தில் தஞ்சம் அடைந்தனர். காவல்துறையினர் இருவரின் பெற்றோர்களுக்கும் தகவல் தெரிவித்ததையடுத்து, காவல் நிலையம் வந்த பெண்ணின் பெற்றோர் இந்தத் திருமணத்திற்கு எதிர்ப்பு தெரிவித்தனர். இருப்பினும், காதலனுடன்தான் செல்வேன் என்று நர்மதா உறுதியாகக் கூறியதால், காவல்துறையினர் அவரை காதலனுடன் அனுப்பி வைத்தனர். இந்தச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.

தருமபுரி மாவட்டம், காரிமங்கலம் தாலுகா, இருமத்தூர் கிராமத்தில் மக்கள் தொடர்பு திட்ட முகாம் நடைபெற்றது. இந்த முகாமிற்கு மாவட்ட ஆட்சியர் சரவணன் தலைமை தாங்கினார். முகாமின் போது, பொதுமக்களிடமிருந்து கோரிக்கை மனுக்களைப் பெற்றுக்கொண்ட ஆட்சியர், அவற்றின் மீது உரிய நடவடிக்கை எடுக்குமாறு சம்பந்தப்பட்ட துறை அலுவலர்களுக்கு உத்தரவிட்டார். அரூர் சட்டமன்ற உறுப்பினர் சம்பத்குமார் இந்த நிகழ்வில் முன்னிலை வகித்தார். இந்த முகாமில் பல்வேறு துறைகளின் சார்பில் மொத்தம் 114 பயனாளிகளுக்கு 37 லட்சத்து 78 ஆயிரம் ரூபாய் மதிப்பிலான நலத்திட்ட உதவிகளை ஆட்சியர் வழங்கினார். இதில் வருவாய் துறை சார்பில் 41 பேருக்கு 4 லட்சம் ரூபாய் மதிப்பிலான இலவச வீட்டுமனை பட்டாக்களும், சமூக பாதுகாப்பு திட்டம் மூலம் 5 பேருக்கு இயற்கை மரணம் மற்றும் ஈமச் சடங்கு உதவித்தொகையாக 1.82 லட்சம் ரூபாயும் வழங்கப்பட்டது. மேலும், உணவுப் பொருள் வழங்கல் துறையின் சார்பில் 47 பேருக்கு 7.56 லட்சம் ரூபாய் மதிப்பிலான மின்னணு குடும்ப அட்டைகளும், தொழிலாளர் நலன் மற்றும் திறன் மேம்பாட்டு துறையின் சார்பில் 4 பேருக்கு 16 லட்சம் ரூபாய் மதிப்பிலான வீட்டு வசதி திட்ட உதவிகளும் வழங்கப்பட்டன. இந்த நிகழ்ச்சியில் அரூர் உதவி ஆட்சியர் கோவிந்தன், சமூக பாதுகாப்பு திட்ட தனித்துணை ஆட்சியர் செல்வி, மாவட்ட மாற்றுத்திறனாளிகள் நல அலுவலர் சரவணன், கால்நடை பராமரிப்பு துறை மண்டல இணை இயக்குனர் முருக லட்சுமி, தாசில்தார் சிவக்குமார் மற்றும் அரசு அலுவலர்கள் உட்பட பலர் கலந்து கொண்டனர்.

தர்மபுரி மாவட்டம் பாலக்கோட்டில் 20-க்கும் மேற்பட்ட அரசு மதுபானக் கடைகள் செயல்பட்டு வரும் நிலையில், டாஸ்மாக் ஊழியர்கள் இன்று கடையை மூடி போராட்டத்தில் ஈடுபட்டு வருகின்றனர். பாட்டிலுக்கு 10 ரூபாய் கூடுதல் விலை வசூலிக்கப்படுவதால் மதுப்பிரியர்களிடையே பிரச்சனை எழுவதாகவும், இதனால் ஊழியர்கள் பல்வேறு இன்னல்களுக்கு ஆளாவதாகவும் போராட்டக்காரர்கள் தெரிவித்துள்ளனர். ஊழியர்களின் சம்பளத்தை 25 சதவீதம் உயர்த்தியும் அறிவித்த நிலையில், தங்களது செலவுகளை ஈடு செய்ய நிர்வாகம் உரிய நடவடிக்கை எடுக்க வேண்டும் என வலியுறுத்தி இந்த ஆர்ப்பாட்டம் நடைபெறுகிறது. தனியார் மதுக்கடைகளில் அரசு மதுக்கடையை விட பாட்டிலுக்கு 20 முதல் 30 ரூபாய் வரை கூடுதல் விலைக்கு மது விற்பனை செய்யப்படுவதாகவும், கள்ளச்சந்தையில் விற்பனை செய்வதற்காக மொத்தமாக பாட்டில்களை வாங்கிச் செல்வதாகவும் குற்றச்சாட்டுகள் எழுந்துள்ளன. இதனால் மதுப்பிரியர்கள் ஒரு மணி நேரத்திற்கும் மேலாக நீண்ட வரிசையில் காத்திருக்க வேண்டிய சூழல் ஏற்பட்டுள்ளது. மேலும், அரசு கடைகளில் வாங்கப்படும் பாட்டில்களை 10 ரூபாய்க்கு திரும்பப் பெறும் திட்டம் நடைமுறையில் உள்ள நிலையில், தனியார் கடைகள் பாட்டில்களைத் திரும்பப் பெறுவதில்லை என்பதால் மது பாட்டில்கள் ஆங்காங்கே வீசப்படுகின்றன. தமிழக அரசு மதுக்கடைகளைத் தனியாருக்குத் தாரை வார்த்து வருவதாகவும், பொய்யான வாக்குறுதிகளை அளித்து வெற்றி பெற்ற அரசு தொடர்ந்து மக்கள் விரோதத் திட்டங்களைச் செயல்படுத்தி வருவதாகவும் பொதுமக்கள் கடும் அதிருப்தி தெரிவித்துள்ளனர்.

ஒசூர் கெலவரப்பள்ளி அணையின் இடதுபுற பாசனக் கால்வாயில் நடைபெற்று வரும் சீரமைப்புப் பணிகளை வேப்பனஹள்ளி சட்டமன்ற உறுப்பினர் சீனிவாசன் நேரில் சென்று ஆய்வு செய்தார். ஓசூர் தொகுதி ஆளூர் பகுதி முதல் சூளகிரி தொகுதி வரை உள்ள கால்வாய் பகுதிகளை இருசக்கர வாகனத்தில் சென்றே அவர் ஆய்வு மேற்கொண்டார். இந்த ஆய்வுப் பணியின்போது, நான்கு சக்கர வாகனங்கள் செல்ல முடியாத இடங்களிலும் நேரில் சென்று பணிகளின் தரத்தையும் முன்னேற்றத்தையும் அவர் பார்வையிட்டார். கடந்த ஆண்டு முன்னாள் முதலமைச்சர் கவனத்திற்கு கொண்டு செல்லப்பட்டதையடுத்து, இந்தக் கால்வாய் சீரமைப்பிற்காக ₹8.5 கோடி நிதி ஒதுக்கீடு பெறப்பட்டு தற்போது பணிகள் விறுவிறுப்பாக நடைபெற்று வருகின்றன. கால்வாய் சீரமைப்புப் பணிகள் தற்போது 80 விழுக்காடு நிறைவடையும் நிலையில் இருப்பதாகத் தெரிவித்துள்ள சீனிவாசன், மீதமுள்ள பணிகளை விரைந்து முடிக்குமாறு சம்பந்தப்பட்ட துறை சார்ந்த அதிகாரிகளுக்கு அறிவுறுத்தல்களை வழங்கியுள்ளார். விவசாயிகளின் கோரிக்கையை ஏற்று, நடப்பு ஜூலை மாத இறுதிக்குள் அனைத்துப் பணிகளையும் முழுமையாக முடித்து, பாசனத்திற்காகக் கால்வாயில் தண்ணீர் திறந்து விட போர்க்கால அடிப்படையில் நடவடிக்கைகள் எடுக்கப்படும் என அவர் உறுதியளித்தார். இந்த ஆய்வின்போது உள்ளூர் விவசாயப் பிரதிநிதிகள் மற்றும் திமுக நிர்வாகிகள் உடனிருந்தனர்.

நாகப்பட்டினம் மாவட்டம், கீழ்வேளூர் அருகேயுள்ள இரட்டை மதகடி பகுதியைச் சேர்ந்த குமார் (43), நாகை ரயில் நிலையத்தில் அரசு நெல் கொள்முதல் நிலைய காவலராகப் பணியாற்றி வந்துள்ளார். நீண்ட காலமாக பணி நிரந்தரம் கிடைக்காத சூழலில் ஏற்பட்ட கடுமையான மன அழுத்தம் காரணமாக, அவர் திடீரென நெஞ்சு வலியால் பாதிக்கப்பட்டு ஒரத்தூர் அரசு மருத்துவக் கல்லூரி மருத்துவமனையில் அனுமதிக்கப்பட்டுள்ளார். இவரது மனைவி, பல ஆண்டுகளாகியும் பணி நிரந்தரம் செய்யப்படாததே இந்த நிலைக்குக் காரணம் எனக் கூறி மிகுந்த வேதனையுடன் பேட்டியளித்துள்ளார். நாகப்பட்டினம் மாவட்டத்தில் தமிழ்நாடு நுகர்பொருள் வாணிப கழகத்தின் கீழ் செயல்படும் நேரடி நெல் கொள்முதல் நிலையங்கள், சேமிப்பு கிடங்குகள் மற்றும் திறந்தவெளி மையங்களில் பணியாற்றும் 300-க்கும் மேற்பட்ட ஊழியர்கள் இதேபோன்ற வாழ்வாதார சிக்கலை எதிர்கொண்டு வருகின்றனர். மாவட்ட வேலைவாய்ப்பு அலுவலகம் மூலம் 2013-ஆம் ஆண்டில் பட்டியல் எழுத்தர்கள், உதவியாளர்கள் மற்றும் காவலர்களாகச் சேர்ந்த இவர்கள், பத்து ஆண்டுகளைக் கடந்தும் நிரந்தர ஊழியர்களாக ஆக்கப்படவில்லை. 2023-ஆம் ஆண்டில் மூன்று முறை பணி மூப்பு பட்டியல் கோரப்பட்டும், இதுவரை கோப்புகள் நிலுவையிலேயே இருப்பதாக ஊழியர்கள் குற்றம் சாட்டுகின்றனர். நெல் கொள்முதல் காலங்களில் மட்டும் முழுமையான வேலை கிடைப்பதாலும், மற்ற நாட்களில் சுழற்சி முறையில் தினக்கூலி அடிப்படையில் வேலை வழங்கப்படுவதாலும் நிரந்தர வருமானம் இன்றி ஊழியர்கள் பொருளாதார நெருக்கடியிலும் மன உளைச்சலிலும் சிக்கித் தவிக்கின்றனர். பல ஆண்டுகளாகச் சேவை செய்து வரும் தங்களைப் பணி நிரந்தரம் செய்ய தமிழக அரசு உடனடியாகத் தலையிட்டு நடவடிக்கை எடுக்க வேண்டும் என்ற கோரிக்கை வலுத்து வருகிறது.

சேலம் தெற்கு தொகுதி எம்எல்ஏவும், போக்குவரத்து துறை அமைச்சருமான தமிழன் ஆ பார்த்திபன் இன்று தனது சமூக வலைதளப் பக்கத்தில் புதிய வீடியோ ஒன்றை வெளியிட்டுள்ளார்.

நாகை மாவட்டம் கீழையூர் ஒன்றியத்திற்கு உட்பட்ட வாழக்கரை மற்றும் மேலவாழக்கரை ஊராட்சிகளில் அடிப்படை வசதிகளை வலியுறுத்தி, மார்க்சிஸ்ட் கம்யூனிஸ்ட் கட்சி (சிபிஎம்) சார்பில் சாலை மறியல் போராட்டம் நடத்த முயற்சி மேற்கொள்ளப்பட்டது. இந்த போராட்டத்திற்கு எஸ். அன்பழகன், பி. தனபாலன், ஜி. காத்தமுத்து உள்ளிட்ட கிளைச் செயலாளர்கள் தலைமை வகித்தனர். வீ. சுப்ரமணியன், டி. வெங்கட்ராமன், ஏ. முருகையன், ஏ. மீனாட்சி சுந்தரம், கே.டி. முருகையன், ஏ. அரிகிருஷ்ணன் மற்றும் எஸ். தாமரைச்செல்வம் உள்ளிட்டோர் முன்னிலை வகித்தனர். போராட்டக்காரர்கள் புதியதாக செயல்படுத்தப்பட்டு வரும் 125 நாள் வேலை திட்டத்தில், ஜாப் கார்டு கொண்ட அனைவருக்கும் நிபந்தனையின்றி உடனடியாக வேலை வழங்க வேண்டும் என்று கோரிக்கை விடுத்தனர். மேலும், 50 ஆண்டுகளுக்கும் மேலாக வசித்து வரும் மக்களுக்கு வீட்டுமனை பட்டா வழங்க வேண்டும், பல மாதங்களாக குடிநீர் விநியோகம் இல்லாத கீழவாழக்கரை பள்ளித்தெரு பகுதிக்கு குடிநீர் வழங்க வேண்டும், மற்றும் பாப்பன் குளத்திற்கு படித்துறை மற்றும் சுற்றுச்சுவர் அமைக்க வேண்டும் ஆகிய கோரிக்கைகளை வலியுறுத்தினர். சாலை மறியலில் ஈடுபட முயன்றவர்களிடம் திருக்குவளை வட்டாட்சியர் உதயகுமார், கீழையூர் வட்டார வளர்ச்சி அலுவலர் செபஸ்தியம்மாள் மற்றும் தமிழ்நாடு குடிநீர் வடிகால் வாரிய உதவி நிர்வாக பொறியாளர் தியாகராஜன் ஆகியோர் பேச்சுவார்த்தை நடத்தினர். இதில், ஒரு வாரத்திற்குள் அனைத்து கோரிக்கைகளும் நிறைவேற்றப்படும் என அதிகாரிகள் உறுதி அளித்ததையடுத்து, போராட்டம் தற்காலிகமாக வாபஸ் பெறப்பட்டது.

சேலம் மாவட்டம் ஆத்தூர் அரசு மருத்துவமனைக்கு ஆத்தூர் மட்டுமின்றி சுற்றுவட்டாரப் பகுதிகளைச் சேர்ந்த ஆயிரக்கணக்கான நோயாளிகள் புறநோயாளிகளாகவும், ஏராளமானோர் உள்நோயாளிகளாகவும் தினந்தோறும் வந்து சிகிச்சை பெற்று வருகின்றனர். இந்த நிலையில், நேற்று இரவு தொலைக்காட்சியில் நேரடி ஒளிபரப்பு செய்யப்பட்ட கிரிக்கெட் போட்டியை, இந்த மருத்துவமனையின் அவசர சிகிச்சை பிரிவில் அனுமதிச் சீட்டு வழங்கும் கணினியில் பணியாளர்கள் அமர்ந்து ரசித்துப் பார்த்துக் கொண்டிருந்தனர். அவசர சிகிச்சைக்காக வரும் நோயாளிகளுக்கு அனுமதிச் சீட்டு வழங்கும் கணினியில் பணியாளர்கள் கிரிக்கெட் பார்த்த இந்த செயல், நோயாளிகளிடையேயும், அவர்களைப் பார்க்க வந்த உறவினர்களிடையேயும் பெரும் அதிர்ச்சியை ஏற்படுத்தியுள்ளது. மேலும், பணியாளர்கள் கிரிக்கெட் பார்க்கும் இந்த காட்சிகள் தற்போது சமூக வலைதளங்களில் வீடியோவாக வெளியாகி வேகமாக வைரலாகி வருகிறது.

கிருஷ்ணகிரி மாவட்டம், ஊத்தங்கரை வட்டார வளர்ச்சி அலுவலகத்தில் நடைபெற்ற கழிவறை கட்டுமானப் பணிக்கான டெண்டரில் கடும் தள்ளுமுள்ளு ஏற்பட்டது. ஊத்தங்கரை ஒன்றியத்திற்கு உட்பட்ட எட்டு ஊராட்சி ஒன்றிய தொடக்கப்பள்ளிகளில் கழிவறை கட்டிடம் கட்டுவதற்காக, ரூ.4 லட்சத்து 83 ஆயிரம் மதிப்பீட்டில் இந்த ஓபன் டெண்டர் நடத்தப்பட்டது. பிடிஓ மகேஷ்குமரன் தலைமையில் நடைபெற்ற இந்த டெண்டரில், டிஆர்டிஏ-வில் பதிவு செய்த ஒப்பந்ததாரர்கள் மட்டுமே பங்கேற்க அனுமதிக்கப்பட்டனர். இந்த டெண்டரில் குறைந்த மதிப்பீட்டில் கொட்டேஷன் அளித்த மிட்டப்பள்ளியைச் சேர்ந்த பாலகிருஷ்ணன் என்பவரை, ஒப்பந்ததாரர்கள் சங்கத்தைச் சேர்ந்த 50 பேர் கொண்ட கும்பல் சூழ்ந்து கொண்டு தனி அறையில் பூட்டி வைத்தது. அவரை மிரட்டி, டெண்டரை வாபஸ் பெறுமாறு வற்புறுத்தி கையெழுத்திடச் சொல்லி துன்புறுத்தியுள்ளனர். இந்த மிரட்டலால் ஏற்பட்ட பயத்தில் பாலகிருஷ்ணன் மயங்கி விழுந்த நிலையில், அங்கிருந்தவர்கள் அவரை மீட்டு சிகிச்சைக்காக ஊத்தங்கரை அரசு மருத்துவமனைக்கு அழைத்துச் சென்றனர். அரசு அலுவலகத்தில் அலுவலர்கள் இருக்கும்போதே, ஒரு நபரை தனி அறையில் பூட்டி வைத்து மிரட்டிய இந்தச் சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.