કરજણ ફાયર વિભાગની ટીમ દ્વારા સતત બે દિવસથી પાણી નિકાલની કામગીરી કરાઈ કરજણ ફાયર વિભાગની ટીમ દ્વારા કરજણ શહેરમાં વરસાદી પાણીના નિકાલ માટે સતત બે દિવસથી કામગીરી હાથ ધરવામાં આવી હતી. ફાયર વિભાગની ટીમે BSNL ઓફિસની સામે તેમજ જુના બજાર વિસ્તારમાં શ્રી સમૃદ્ધિ ડુપ્લેક્સ અને સંસ્કાર પાર્ક સોસાયટી સહિતના વિસ્તારોમાં ભરાયેલા પાણીનો પંપ દ્વારા નિકાલ કરવાની કામગીરી કરી હતી. ભારે વરસાદના કારણે વિવિધ વિસ્તારોમાં પાણી ભરાતા સ્થાનિકોને મુશ્કેલીનો સામનો કરવો પડ્યો હતો. ત્યારે ફાયર વિભાગની ટીમે સ્થળ પર પહોંચી સતત કામગીરી કરી પાણીનો નિકાલ કરતા સ્થાનિકોને રાહત મળી હતી. ફાયર વિભાગની ટીમની આ કામગીરીને સ્થાનિકો દ્વારા પ્રશંસા કરવામાં આવી હતી.

3 hrs ago

Faij Khatri

સિનોર, વડોદરા, ગુજરાત•

3 hrs ago

સેવા સંકલ્પ અભિયાન અંતર્ગત નર્મદા જિલ્લામાં બાઈક યાત્રાનું ભવ્ય સ્વાગત બિરસા મુંડા ટ્રાયબલ યુનિવર્સિટી ખાતે મહાનુભાવોએ પ્રતિમાને પુષ્પાંજલિ અર્પી વિદ્યાર્થીઓ સાથે કર્યો સંવાદ રાજપીપળા, તા. 14 સપ્ટેમ્બર: વડાપ્રધાન નરેન્દ્રભાઈ મોદીના 25 વર્ષના જાહેર જીવન અને સેવા કાર્યકાળ નિમિત્તે આયોજિત ‘સેવા સંકલ્પ અભિયાન’ અંતર્ગત નવસારી જિલ્લાના ઉનાઈ માતાજી મંદિરેથી 13 સપ્ટેમ્બરે પ્રસ્થાન કરાયેલી બાઈક યાત્રાનું નર્મદા જિલ્લામાં ભવ્ય સ્વાગત કરવામાં આવ્યું હતું. રાજપીપળા સ્થિત બિરસા મુંડા ટ્રાયબલ યુનિવર્સિટી ખાતે યાત્રા પહોંચતા મહાનુભાવો તથા વિદ્યાર્થીઓએ ઉત્સાહભેર સ્વાગત કર્યું હતું. બાઈક યાત્રામાં રાજ્યના નાણામંત્રી કનુભાઈ દેસાઈ, રમતગમત, યુવા અને સાંસ્કૃતિક પ્રવૃત્તિઓ વિભાગના રાજ્યમંત્રી ડૉ. જયરામ ગામીત તથા માંગરોળના ધારાસભ્ય ગણપતભાઈ વસાવા જોડાયા હતા. યુનિવર્સિટી ખાતે યોજાયેલા વિદ્યાર્થીઓ સાથેના સંવાદ કાર્યક્રમમાં નાણામંત્રી કનુભાઈ દેસાઈએ જણાવ્યું હતું કે, નરેન્દ્રભાઈ મોદીના નેતૃત્વમાં ગુજરાત સહિત સમગ્ર દેશે વિકાસની નવી ઊંચાઈઓ હાંસલ કરી છે. ગુજરાતના મુખ્યમંત્રી તરીકેના કાર્યકાળ દરમિયાન અનેક લોકકલ્યાણકારી યોજનાઓ અમલમાં મૂકી વિકાસને વેગ આપવામાં આવ્યો હતો. તેમણે આદિવાસી અને દરિયાકાંઠાના વિસ્તારોના વિકાસ માટે વનબંધુ કલ્યાણ યોજના અને સાગરખેડુ યોજના જેવી યોજનાઓનો ઉલ્લેખ કર્યો હતો. ઉપરાંત, શાળા પ્રવેશોત્સવ અને કન્યા કેળવણી જેવા કાર્યક્રમો દ્વારા શિક્ષણને પ્રાધાન્ય આપવામાં આવ્યું હોવાનું જણાવ્યું હતું. આદિવાસી વિસ્તારના વિદ્યાર્થીઓ શિક્ષણની સાથે રમતગમત ક્ષેત્રે પણ આગળ વધે તે માટે સરકારની વિવિધ યોજનાઓનો લાભ લેવા તેમણે અપીલ કરી હતી. ધારાસભ્ય ગણપતભાઈ વસાવાએ જણાવ્યું હતું કે, રાજપીપળામાં આવેલી બિરસા મુંડા ટ્રાયબલ યુનિવર્સિટી આદિવાસી વિદ્યાર્થીઓના સર્વાંગી વિકાસ માટે મહત્વપૂર્ણ સંસ્થા બની રહી છે. અહીં વિવિધ અભ્યાસક્રમો દ્વારા વિદ્યાર્થીઓની શૈક્ષણિક ક્ષમતાના વિકાસ માટે પ્રયાસો થઈ રહ્યા છે. તેમણે વિદ્યાર્થીઓને પોતાનું લક્ષ્ય નક્કી કરી તેને હાંસલ કરવા સતત મહેનત અને પ્રયત્નો કરવા અનુરોધ કર્યો હતો. સાથે જ ભારતને વિકસિત અને વિશ્વગુરુ બનાવવાના પ્રયાસોમાં યુવાનોને સહભાગી બનવા આહ્વાન કર્યું હતું. યાત્રાના સ્વાગત બાદ મહાનુભાવોએ ભગવાન બિરસા મુંડાની પ્રતિમાને પુષ્પાંજલિ અર્પણ કરી હતી. ત્યારબાદ વિદ્યાર્થીઓ સાથે સંવાદ યોજાયો હતો. બાઈક યાત્રા ત્યારબાદ નિર્ધારિત રૂટ પરથી આગળ વધી ગરૂડેશ્વર તાલુકાના મોટા પીપરિયા ગામે આવેલી આશ્રમશાળા તથા વૃદ્ધાશ્રમ ખાતે પહોંચી હતી. અહીં મહાનુભાવોએ વૃક્ષારોપણ કર્યું હતું તેમજ વૃદ્ધાશ્રમના વડીલો સાથે સંવાદ કરી તેમના આશીર્વાદ મેળવ્યા હતા. આ પ્રસંગે બિરસા મુંડા ટ્રાયબલ યુનિવર્સિટીના કુલપતિ ડૉ. મધુકર પાડવી, ઇન્ચાર્જ રજિસ્ટ્રાર ડૉ. રજનીકાંત પંડ્યા, જિલ્લા સંગઠનના અગ્રણી નીલભાઈ રાવ, અગ્રણી અર્જુનભાઈ ચૌધરી સહિત જિલ્લા અને પ્રદેશ કક્ષાના હોદ્દેદારો, જિલ્લા વહીવટી તંત્રના અધિકારીઓ તથા યુનિવર્સિટીના વિદ્યાર્થીઓ ઉપસ્થિત રહ્યા હતા.

ભાઈલાલભાઈ બારીયા

Farmer તિલકવાડા, નર્મદા, ગુજરાત•

23 hrs ago