সাপ প্ৰেমী পুণ্যলতা ফুকনে চৰাইদেউ জিলাৰ বকতা ১নং কোঁৱৰ গাঁৱত আন এটা সাপ খাই থকা অৱস্থাত প্ৰায় ৩ কেজি ওজনৰ এটা অজগৰ উদ্ধাৰ কৰে। এই বিৰল দৃশ্যই স্থানীয় লোকক আচৰিত কৰি তোলে। পিছত অজগৰটোক শিৱসাগৰৰ বন বিভাগক চমজাই দিয়া হয়।

চৰাইদেউৰ মথুৰাপুৰ বাগিচা প্ৰাথমিক বিদ্যালয়ৰ এজন শিক্ষকে ছাত্ৰ-ছাত্ৰীক গুৰুলাগুৰুলকৈ প্ৰহাৰ কৰাৰ ঘটনাই চাঞ্চল্যৰ সৃষ্টি কৰিছে। এই বৰ্বৰ কাণ্ডৰ বিৰুদ্ধে আছা (ATSA)ই তীব্ৰ প্ৰতিক্ৰিয়া ব্যক্ত কৰি দোষী শিক্ষকৰ ওপৰত উচিত ব্যৱস্থা গ্ৰহণৰ দাবী জনাইছে।

ডিব্ৰুগড় জিলাৰ মৰাণ তিলৈ বাইপাছত পুনৰ এক পথ দুৰ্ঘটনা সংঘটিত হৈছে। এই দুৰ্ঘটনাত এজন লোক গুৰুতৰভাৱে আহত হৈ চিকিৎসাধীন হৈছে।

‘সেউজ ছচাইটী’ৰ উদ্যোগত আন্তঃৰাষ্ট্ৰীয় উদ্ভিদ স্বাস্থ্য দিৱস পালন: শিশু সৰ্প উদ্ধাৰকাৰী ৰাজ সৌৰভ বৰকটকীলৈ ‘সৰ্প কোঁৱৰ’ উপাধি প্ৰদান | আন্তঃৰাষ্ট্ৰীয় উদ্ভিদ স্বাস্থ্য দিৱসৰ সৈতে সংগতি ৰাখি পৰিৱেশ সংৰক্ষণমূলক সংগঠন ‘সেউজ ছচাইটী’ৰ ঢেকিয়াজুলি আঞ্চলিক শাখা আৰু ঢেকিয়াজুলি উচ্চতৰ মাধ্যমিক বিদ্যালয়ৰ উদ্যোগত আজি এক গাম্ভীৰ্যপূৰ্ণ অনুষ্ঠান সম্পন্ন হয়। উক্ত অনুষ্ঠানত ভাৰতবৰ্ষৰ সৰ্ব কনিষ্ঠ সৰ্প উদ্ধাৰকাৰী হিচাপে পৰিচিত তেজপুৰৰ ৫ বছৰীয়া শিশু ৰাজ সৌৰভ বৰকটকীক আনুষ্ঠানিকভাৱে "সৰ্প কোঁৱৰ" উপাধি প্ৰদান কৰা হয়। বিদ্যালয়ৰ অধ্যক্ষ জুৰি ওজা আৰু পৰিচালনা সমিতিৰ সভাপতি নাৰায়ণ বৰাৰ নেতৃত্বত অনুষ্ঠিত এই সভাত কেইবাগৰাকীও বিশিষ্ট ব্যক্তি তথা সেউজ ছচাইটীৰ বিষয়ববীয়াসকলে অংশগ্ৰহণ কৰে। উল্লেখ্য যে, সৰ্পবান্ধৱ সৌৰভ বৰকটকী আৰু কৃষ্ণা কলিতা বৰকটকীৰ পুত্ৰ ৰাজে মাত্ৰ ৪ বছৰ বয়সৰ পৰাই শোণিতপুৰ জিলাৰ বিভিন্ন প্ৰান্তত সৰ্প উদ্ধাৰৰ লগতে গছপুলি ৰোপণ আৰু বন্যপ্ৰাণী সংৰক্ষণৰ কামত নিয়োজিত হৈ ৰাইজৰ দৃষ্টি আকৰ্ষণ কৰিবলৈ সক্ষম হৈছে। তেওঁৰ এই অনন্য প্ৰতিভাক স্বীকৃতি জনাই সংগঠনটোৰ ৰাজ্যিক সভাপতি সঞ্জয় বৰুৱাই শিশু ৰাজক অভিনন্দন জ্ঞাপন কৰে।

শিৱসাগৰ জিলা কংগ্ৰেছে এক সংবাদমেল পাতি অখিল গগৈয়ে মিত্ৰজোঁটৰ পৰাজয়ৰ বাবে গৌৰৱ গগৈক জগৰীয়া কৰা মন্তব্যৰ তীব্ৰ বিৰোধিতা কৰিছে। জিলা কংগ্ৰেছে অখিল গগৈৰ অভিযোগ নস্যাৎ কৰি কয় যে এনে মন্তব্যই কংগ্ৰেছ কৰ্মীসকলৰ মনত যথেষ্ট দুখ দিছে। তেওঁলোকে অদূৰ ভৱিষ্যতে মিত্ৰজোঁটত ৰাইজৰ দল থাকিবনে নাই বুলিও প্ৰশ্ন উত্থাপন কৰিছে।

নগাঁৱৰ ৰূপৰেখা ভূঞাৰ হত্যাকাণ্ডৰ ন্যায় বিচাৰি ডিব্ৰুগড়ত হিন্দু ক্ৰান্তি দলে এক উত্তাল প্ৰতিবাদী সমদল উলিয়াইছে। প্ৰতিবাদকাৰীসকলে অসমৰ এই খিলঞ্জীয়া বোৱাৰীক নৃশংসভাৱে হত্যা কৰা অভিযুক্তক ফাঁচী দিবলৈ দাবী জনাইছে।

তিনিচুকীয়া জিলাৰ ডিগবৈৰ গোপনাৰী হাবি গাঁৱত যোৱা ১০ মে'ৰ পৰা নিৰুদ্দেশ হৈ থকা বিলালুদ্দিন ওৰফে জাকিৰ হুছেইনৰ মৃতদেহ পুতি থোৱা অৱস্থাত উদ্ধাৰ কৰা হৈছে। বিশ্বজিৎ কুৰ্মী নামৰ এজন লোকে তেওঁক হত্যা কৰাৰ কথা স্বীকাৰ কৰাৰ পিছতে আৰক্ষীয়ে মৃতদেহটো উদ্ধাৰ কৰে। এই নৃশংস হত্যাকাণ্ডই অঞ্চলজুৰি তীব্ৰ চাঞ্চল্যৰ সৃষ্টি কৰিছে।

তিনিচুকীয়াৰ বিমলাপ্ৰসাদ চলিহা নগৰ খেলপথাৰত ঐক্যসংঘৰ উদ্যোগত দুদিনীয়া ব’হাগী মেলা আৰম্ভ হৈছে। ইয়াত বিহু নৃত্য, চিত্ৰাংকন আদি বিভিন্ন প্ৰতিযোগিতা অনুষ্ঠিত হোৱাৰ লগতে জুবিন গাৰ্গলৈ শ্ৰদ্ধাঞ্জলি আৰু দিক্ষু-বৰষা দেৱীৰ সংগীতানুষ্ঠানৰ আয়োজন কৰা হৈছে। উদ্যোক্তাসকলে সকলো ৰাইজৰ উপস্থিতি আৰু সহযোগিতা কামনা কৰিছে।

চৰাইদেউ জিলাৰ মথুৰাপুৰ বাগিচা প্ৰাথমিক বিদ্যালয়ৰ এজন শিক্ষকে ছাত্ৰ-ছাত্ৰীক নিৰ্মমভাৱে প্ৰহাৰ কৰাৰ লগতে এজনক প্ৰথম মহলাৰ খিৰিকীয়েদি তললৈ পেলাই দিবলৈ উদ্যত হোৱা এক ভয়ংকৰ ঘটনা সংঘটিত হৈছে। এই সমগ্ৰ ঘটনা চিচি টিভি কেমেৰাত বন্দী হোৱাৰ পিছতে আটছা (ATSA)ই প্ৰশাসনক স্মাৰক পত্ৰ প্ৰদান কৰিছে।