నర్సంపేట పట్టణంలోని ప్రైవేట్ పాఠశాలల్లో చదువుతున్న పిల్లల తల్లిదండ్రులు స్థానిక మండల విద్యా శాఖ అధికారి (ఎం.ఈ.ఓ) కొర్ర. సారయ్యకు వినతి పత్రం అందజేశారు. ప్రైవేట్ పాఠశాలలు ప్రభుత్వ నిబంధనలకు విరుద్ధంగా ఏటా తరగతుల వారీగా ఫీజులను పెంచుతున్నాయని ఆరోపిస్తూ, ఫీజుల భారం తగ్గించి, వాటిని క్రమబద్ధీకరించాలని వారు వేడుకున్నారు. తల్లిదండ్రులు తమ వినతి పత్రంలో, బుక్స్, స్టేషనరీల రేట్లు సైతం చాలా ఎక్కువగా ఉన్నాయని పేర్కొన్నారు. నర్సరీ పిల్లలకు రూ.30వేల ట్యూషన్ ఫీజుతో ప్రారంభమై, ప్రతీ ఏటా రూ.3-5 వేలు పెంచుతున్నారని స్పష్టం చేశారు. వీటికి అదనంగా, బుక్స్ ఫీజు వేలల్లో ఉంటుందని, ముఖ్యంగా ఎల్.కే.జీ పిల్లలకు రూ.2-4 వేల వరకు బుక్స్ ఫీజు ఉండటం పట్ల వారు అభ్యంతరం వ్యక్తం చేశారు. ప్రైవేట్ పాఠశాలలు తమకు నచ్చిన బుక్ స్టాళ్లలో మాత్రమే పుస్తకాలు కొనేలా ఒత్తిడి తెస్తున్నాయని, బయట కొన్న విద్యార్థుల పట్ల వివక్ష చూపిస్తున్నాయని వారు తెలిపారు. బుక్స్, స్టేషనరీలను ఎక్కడైనా కొనుగోలు చేసేలా అనుమతించాలని, అలాగే ఫీజులను క్రమ పద్ధతిలో నియంత్రించేలా తక్షణ చర్యలు చేపట్టాలని కోరుతూ విద్యార్థుల తల్లిదండ్రులు ఈ వినతి పత్రాన్ని సమర్పించారు.

కరీంనగర్ నియోజకవర్గ రైతులకు సాగునీటిని తక్షణమే విడుదల చేయాలని మాజీ మంత్రి, కరీంనగర్ ఎమ్మెల్యే గంగుల కమలాకర్ ప్రభుత్వాన్ని హెచ్చరించారు. లేనిపక్షంలో ఆదివారం నాడు రైతులతో కలిసి మహా ధర్నా చేపడతామని ఆయన స్పష్టం చేశారు. నియోజకవర్గ రైతులతో పాటు ఆయా గ్రామాల ప్రజా ప్రతినిధులతో ఎమ్మెల్యే కార్యాలయంలో ఆయన ప్రత్యేక సమావేశం నిర్వహించారు. ఎల్లంపల్లి ప్రాజెక్ట్ నుండి వరద కాలువ ద్వారా మిడ్ మానేరుకు నీటిని తరలించాలని, వరద కాలువ పైన ఉన్న ఆచంపల్లి తూము ద్వారా కొత్తపల్లి మండలంలోని నాగుల మల్యాల, బావుపేట, కమన్ పూర్, కొండాపూర్, ఎలగంధల్, శ్రీరాములపల్లె గ్రామాలకు చెందిన ఏడు గ్రామాల రైతులకు సాగునీరు విడుదల చేసి చెరువులు నింపాలని గత వారం రోజుల క్రితమే ప్రభుత్వాన్ని హెచ్చరించామని గంగుల కమలాకర్ తెలిపారు. ప్రభుత్వం ఇప్పటివరకు మొద్దు నిద్రలో ఉండి స్పందించకపోవడం వల్ల రైతులు రోడ్డున పడే పరిస్థితి ఏర్పడిందని ఆయన ఆవేదన వ్యక్తం చేశారు. తెలంగాణ నుండి రాజమండ్రికి నీటి తరలింపుపై చూపుతున్న శ్రద్ధ, తెలంగాణ ప్రజలు నీటి కోసం గోస పడుతున్నా పట్టించుకునేవారు కరువయ్యారని మండిపడ్డారు. తెలంగాణ తొలి ముఖ్యమంత్రి కేసిఆర్ నాయకత్వంలోని బిఆర్ఎస్ ప్రభుత్వంలో మేడిగడ్డ ప్రాజెక్ట్ ద్వారా నీటిని తరలించి మండుటెండల్లో కూడా చెరువులను మత్తడులు దుంకించిన విషయాన్ని గంగుల కమలాకర్ గుర్తు చేశారు. ఈ పోరాటం తప్పదని భావించి నీటిని సాధించేందుకు రైతులతో కలిసి మహా ధర్నా చేపడుతున్నామని, ఈ ధర్నాకు రైతులందరూ స్వచ్ఛందంగా తరలిరావాలని ఆయన పిలుపునిచ్చారు. ఈ కార్యక్రమంలో ఎమ్మెల్యే గంగులతో పాటు ఆయా గ్రామాల ప్రజా ప్రతినిధులు, రైతులు, బిఆర్ఎస్ నాయకులు పాల్గొన్నారు.

కరీంనగర్ శాసనసభ్యులు, మాజీమంత్రి గంగుల కమలాకర్ ఆధ్వర్యంలో బిఆర్‌ఎస్ పార్టీ శ్రేణులు శనివారం కరీంనగర్‌లో వినూత్న రీతిలో నిరసన చేపట్టారు. ఎల్ఎండీ జలాశయం అడుగంటడంతో, ప్రభుత్వ నిర్లక్ష్యం కారణంగా ప్రజలకు తాగునీరు, సాగునీరు అందకుండా పోతోందని వారు ఆందోళన వ్యక్తం చేశారు. ఎండిపోయిన ఎల్ఎండీ జలాశయంలో ఆటలు ఆడుతూ ప్రభుత్వానికి కనువిప్పు కలిగేలా నిరసన తెలియజేశారు. కరీంనగర్ నగర ప్రజలు, హుజూరాబాద్, మానకొండూరు నియోజకవర్గ రైతులు సాగునీరు లేక తీవ్ర ఇబ్బందులు పడుతున్నారని వారు పేర్కొన్నారు. ఈ సందర్భంగా ఎమ్మెల్యే గంగుల కమలాకర్ మాట్లాడుతూ, కరువు వచ్చినప్పుడే ఆదుకునే కాళేశ్వరం ప్రాజెక్టును రెండున్నర ఏళ్లలో కెసిఆర్ పూర్తి చేసి ప్రజలకు సాగునీరుతో పాటు తాగునీరు అందించారని గుర్తు చేశారు. అయితే, కాంగ్రెస్ ప్రభుత్వం రెండున్నర ఏళ్లుగా కాళేశ్వరం ప్రాజెక్టుకు మరమ్మత్తులు కూడా చేయలేక చేతగానితనాన్ని ప్రదర్శించిందని ఆయన విమర్శించారు. కేవలం కెసిఆర్‌కు పేరు వస్తుందనే దురుద్దేశంతో కాంగ్రెస్ ప్రభుత్వం ప్రజలకు సాగునీటిని, తాగునీటిని అందించడం లేదని ఆయన ఆరోపించారు. కరీంనగర్ చరిత్రలో రెండు దశాబ్దాలలో జూలై మాసంలో ఎల్ఎండీ నీటి నిల్వలు డేడ్ స్టోరేజ్‌కు పడిపోవడం ఇదే మొదటిసారి అని ఆయన అన్నారు. మేడిగడ్డను మరమ్మత్తు చేయకపోవడం వల్ల ప్రతిరోజు 10 నుంచి 15 వేల క్యూసెక్కుల నీరు రాజమండ్రి ద్వారా సముద్రంలో కలుస్తుందని గంగుల కమలాకర్ తెలిపారు. ఆ నీటిని నిల్వ చేసి, మేడిగడ్డ నుండి కన్నెపల్లి, సుందిళ్ల, అన్నారం, ఎల్లంపల్లిలకు తరలించి, ఎల్లంపల్లిలో మోటార్లను ఆన్ చేసి, వరద కాల్వ ద్వారా మిడ్ మానేరు, ఎల్ఎండీలను నీటితో నింపాలని ఆయన డిమాండ్ చేశారు. అదేవిధంగా, మిడ్ మానేరుపై ఆచంపల్లి దగ్గర ఉన్న తూము ద్వారా నీటిని విడుదల చేసి కొత్తపెళ్లి మండలంలోని బావుపేట, ఎలగందుల, నాగుల మల్యాల, బద్దిపల్లి, కమాన్‌పూర్, శ్రీరాములపల్లి, కాజీపూర్ గ్రామ చెరువులను నింపాలని సూచించారు. ప్రస్తుతం ఎల్ఎండీలో ఐదున్నర టీఎంసీలు మాత్రమే నిల్వ ఉందని, ఇందులో మూడు టీఎంసీలు డెడ్ స్టోరేజ్ కాగా, కేవలం రెండు టీఎంసీల నీటితో కరీంనగర్ ప్రజలకు తాగునీరు అందించలేమని వివరించారు. గత టిఆర్‌ఎస్ ప్రభుత్వ హయాంలో ప్రతిరోజు తాగునీరు అందించిన విషయాన్ని గుర్తు చేస్తూ, కాంగ్రెస్ ప్రభుత్వం నిర్లక్ష్య ధోరణితో ప్రస్తుతం రెండు మూడు రోజులకు ఒకసారి మాత్రమే మంచినీళ్లు అందిస్తోందని ఆయన ఎత్తిచూపారు. పరిస్థితి ఇలాగే కొనసాగితే కరీంనగర్ ప్రజలకు తాగునీటికి, ఎల్ఎండీపై ఆధారపడి వ్యవసాయం చేస్తున్న మానకొండూరు, హుజూరాబాద్ నియోజకవర్గ రైతులకు సాగునీరు లేక ఇబ్బందులు తప్పవని హెచ్చరించారు. టిఆర్‌ఎస్ ప్రభుత్వ హయాంలో కాళేశ్వరం ప్రాజెక్టు నీటిని ఎత్తిపోసి ఏప్రిల్, మే మాసాలలోనే ప్రాజెక్టులన్నింటినీ నింపి, చెరువులకు నీరు తరలించి మత్తడులు దుంకించిన విషయాన్ని గుర్తు చేశారు. బిఆర్‌ఎస్ ప్రభుత్వ హయాంలో ఎల్ఎండీలో ఎప్పుడూ 10.5 టీఎంసీలు నిలువ ఉండేవిధంగా ప్రభుత్వం జీవో విడుదల చేసిన విషయాన్ని ఆయన ప్రస్తావించారు. ఇప్పటికైనా ప్రభుత్వం స్పందించి, కన్నెపల్లిలోని మోటార్లను ఆన్ చేసి, మిడ్ మానేరు, ఎల్ఎండీలను నింపాలని గంగుల కమలాకర్ డిమాండ్ చేశారు. బేషజాలకు పోకుండా ప్రజలకు నీరందించాలని ఆయన కోరారు. ప్రభుత్వం చేతకాదని చేతులెత్తేస్తే, కెసిఆర్ నాయకత్వంలో కెటిఆర్, హరీష్ రావు, ఇతర బిఆర్‌ఎస్ పార్టీ నాయకులతో కలిసి కన్నెపల్లిలో ఉన్న మోటార్లను ఆన్ చేసి ప్రజలకు నీరందిస్తామని ఆయన స్పష్టం చేశారు. ప్రజలకు నీటిని అందించే వరకు పోరాడతామని ఆయన హెచ్చరించారు. ఈ కార్యక్రమంలో ఎమ్మెల్యే గంగులతో పాటు బారాస కార్పొరేటర్లు, ఆయా గ్రామాల సర్పంచులు, మాజీ కార్పొరేటర్లు, మాజీ ప్రజా ప్రతినిధులు, డివిజన్ అధ్యక్షులు, పార్టీ నాయకులు, కార్యకర్తలు తదితరులు పాల్గొన్నారు.

తెలంగాణలోని కరీంనగర్ జిల్లా, గన్నేరువరం మండలం, కాసింపేట గ్రామంలో ఉన్న స్వయంభు మానస దేవాలయంలో ప్రత్యేక పూజలు నిర్వహించారు.

అంతర్జాతీయ మాదక ద్రవ్యాల వ్యతిరేక దినోత్సవం సందర్భంగా, కరీంనగర్ బస్టాండ్ ఆవరణలో డీవైఎఫ్ఐ జిల్లా కమిటీ శుక్రవారం విస్తృత ప్రచార కార్యక్రమాన్ని నిర్వహించింది. ఈ సందర్భంగా ప్రయాణికులు, విద్యార్థులు, యువత, ప్రజలకు డ్రగ్స్ వల్ల కలిగే అనర్థాలపై అవగాహన కల్పిస్తూ కరపత్రాలను పంపిణీ చేశారు. యువత, విద్యార్థులు మాదక ద్రవ్యాలకు దూరంగా ఉండి, ఆరోగ్యకరమైన జీవన విధానాన్ని అలవర్చుకోవాలని డీవైఎఫ్ఐ పిలుపునిచ్చింది. ఈ కార్యక్రమంలో డీవైఎఫ్ఐ జిల్లా కార్యదర్శి డి. నరేష్ పటేల్ మాట్లాడుతూ, నేడు దేశంలో డ్రగ్స్ వినియోగం ఆందోళనకర స్థాయికి చేరిందని, డ్రగ్స్ మాఫియా యువతను లక్ష్యంగా చేసుకుని తమ కార్యకలాపాలను విస్తరిస్తోందని ఆవేదన వ్యక్తం చేశారు. మాదక ద్రవ్యాల వినియోగం వల్ల యువత శారీరక, మానసిక ఆరోగ్యంతో పాటు వారి భవిష్యత్తు కూడా నాశనం అవుతోందని, కుటుంబాలు ఆర్థికంగా, సామాజికంగా తీవ్ర ఇబ్బందులు ఎదుర్కొంటున్నాయని ఆయన అన్నారు. దేశంలో పెరుగుతున్న నిరుద్యోగ సమస్య, యువతకు తగిన ఉద్యోగ, ఉపాధి అవకాశాలు లేకపోవడం కూడా కొంతమంది యువత చెడు అలవాట్ల వైపు మళ్లడానికి కారణమవుతోందని నరేష్ పటేల్ పేర్కొన్నారు. కేంద్ర, రాష్ట్ర ప్రభుత్వాలు యువతకు ఉపాధి అవకాశాలు కల్పించడంతో పాటు క్రీడా, సాంస్కృతిక రంగాలను ప్రోత్సహించాలని డీవైఎఫ్ఐ డిమాండ్ చేసింది. పాఠశాలలు, కళాశాలలు, హాస్టళ్లు, కోచింగ్ సెంటర్ల పరిసర ప్రాంతాల్లో డ్రగ్స్ విక్రయాలు జరుగకుండా పోలీసు, ఎక్సైజ్ శాఖలు నిరంతరం నిఘా ఏర్పాటు చేయాలని, విద్యాసంస్థల్లో డ్రగ్స్ వ్యతిరేక అవగాహన కమిటీలను ఏర్పాటు చేసి విద్యార్థుల్లో చైతన్యం కల్పించాలని కోరారు. సినిమాలు, సోషల్ మీడియా వేదికల ద్వారా మాదక ద్రవ్యాలను గ్లామరైజ్ చేసే ధోరణిని అరికట్టాలని, యువతలో శాస్త్రీయ దృక్పథం, సామాజిక బాధ్యత పెంపొందించే కార్యక్రమాలను ప్రభుత్వాలు చేపట్టాలని డిమాండ్ చేశారు. డ్రగ్స్ నిర్మూలనలో ప్రభుత్వం కఠిన చర్యలు తీసుకోవాలని, మాదక ద్రవ్యాల సరఫరా చేస్తున్న ముఠాలపై ప్రత్యేక నిఘా ఏర్పాటు చేసి కఠిన శిక్షలు అమలు చేయాలని డీవైఎఫ్ఐ డిమాండ్ చేసింది. రాష్ట్ర ప్రభుత్వం ప్రతి జిల్లాలో డీ-అడిక్షన్ (వ్యసన విముక్తి) కేంద్రాలను ఏర్పాటు చేసి డ్రగ్స్ బారిన పడిన యువతకు ఉచిత వైద్య, కౌన్సెలింగ్ సేవలు అందించాలని కోరారు. విద్యార్థులు, యువత చెడు అలవాట్లకు దూరంగా ఉండి విద్య, ఉపాధి, క్రీడలు, సామాజిక కార్యక్రమాల వైపు దృష్టి సారించాలని డీవైఎఫ్ఐ సూచించింది. డ్రగ్స్ రహిత సమాజ నిర్మాణం కోసం డీవైఎఫ్ఐ నిరంతరం అవగాహన కార్యక్రమాలు నిర్వహించడంతో పాటు అవసరమైతే ఉద్యమాలు కూడా చేపడుతుందని స్పష్టం చేసింది. డ్రగ్స్ మహమ్మారిని అరికట్టేందుకు సమాజమంతా కృషి చేయాలని డీవైఎఫ్ఐ జిల్లా కార్యదర్శి డి. నరేష్ పటేల్ పిలుపునిచ్చారు. ఈ కార్యక్రమంలో డీవైఎఫ్ఐ జిల్లా ఉపాధ్యక్షులు శివ కుమార్, కృష్ణ, నాయకులు దినేష్, కౌశిక్, ప్రసాద్, నాగరాజు, మురళి, చిన్ను, జీవన్, సాయి తదితరులు పాల్గొన్నారు.

తెలంగాణ రాజ్యాధికార పార్టీ ఆధ్వర్యంలో జూలై 5న భువనగిరిలో నిర్వహించనున్న తెలంగాణ రాజ్యాధికార సమరభేరి మహాసభ విజయవంతం కోసం గ్రామస్థాయిలో విస్తృత ప్రచారం, ఆహ్వాన కార్యక్రమాలు జోరుగా కొనసాగుతున్నాయి. ఈ మహాసభను తెలంగాణ రాజ్యాధికార పార్టీ అధ్యక్షుడు తీన్మార్ మల్లన్న నాయకత్వంలో నిర్వహిస్తుండగా, యువజన విభాగం రాష్ట్ర అధ్యక్షులు బొడ్డుపెల్లి చంద్రశేఖర్ ఈ కార్యక్రమాలను పర్యవేక్షిస్తున్నారు. ఈ సందర్భంగా నిర్వహించిన సమావేశంలో బొడ్డుపల్లి చంద్రశేఖర్ మాట్లాడుతూ, బీసీలు, ఎస్సీలు, ఎస్టీలు, మైనార్టీలు, ఇతర అణగారిన వర్గాల రాజ్యాధికార సాధన లక్ష్యంగా తెలంగాణ రాజ్యాధికార పార్టీ ఉద్యమిస్తోందని స్పష్టం చేశారు. భువనగిరిలో జరిగే సమరభేరి సభ తెలంగాణ రాజకీయాల్లో ఒక కీలక మలుపు అవుతుందని ఆయన పేర్కొన్నారు. ప్రజలంతా కుటుంబ సమేతంగా తరలివచ్చి సభను విజయవంతం చేయాలని ఆయన పిలుపునిచ్చారు. ఈ ఆహ్వాన కార్యక్రమాల్లో ప్రజలకు సభ ప్రాముఖ్యతను వివరించగా, వారి నుంచి విశేష స్పందన లభించిందని, ఈ సమరభేరి సభ తెలంగాణలో సామాజిక న్యాయం, ఆత్మగౌరవం, రాజ్యాధికార సాధనకు నాంది పలుకుతుందని ఆయన ధీమా వ్యక్తం చేశారు. "బీసీల ఐక్యత – ఆత్మగౌరవం – రాజ్యాధికారమే లక్ష్యం" అనే నినాదంతో భువనగిరి సమరభేరి సభను చారిత్రాత్మకంగా విజయవంతం చేయాలని తెలంగాణ ప్రజలకు బొడ్డుపల్లి చంద్రశేఖర్ విజ్ఞప్తి చేశారు.

దేశం కోసం తన కుటుంబాన్ని వదిలివెళ్తున్న ఒక జవానుకు రైలులో రిజర్వేషన్ లేకపోవడంతో ఆయన డోర్ వద్ద కూర్చున్నారు. ఈ పరిస్థితిని గమనించిన TTE వెంటనే ఆ జవాను వివరాలను పరిశీలించి, ఆయనకు సీటు కేటాయించారు. అంతేకాకుండా, సైనికుడికి మంచినీళ్ల బాటిల్ ఇచ్చి గౌరవించారు. TTE చూపిన ఈ కృతజ్ఞతా భావం నెటిజన్ల హృదయాలను గెలుచుకుంది. ఈ సంఘటనకు సంబంధించిన వీడియో కేవలం 6 గంటల్లోనే 60 లక్షల వీక్షణలు, 4 లక్షలకు పైగా లైక్‌లను పొంది సోషల్ మీడియాలో వైరల్‌గా మారింది. ఈ ఘటన సైనికుల పట్ల గౌరవాన్ని చాటిచెప్పింది.

జయశంకర్ భూపాలపల్లి జిల్లాలోని గణపురం మండలం బుద్ధారం మరియు భూపాలపల్లి రూరల్ మండలం కమలాపూర్ గ్రామాల్లో తెలంగాణ భూ సర్వే, సరిహద్దుల నిర్ధారణపై నిర్వహించిన గ్రామ సభల్లో ఎమ్మెల్యే గండ్ర సత్యనారాయణరావు పాల్గొన్నారు. ఈ సందర్భంగా ఆయన రైతులు భూముల సర్వే, పట్టాల జారీ అవకాశాన్ని సద్వినియోగం చేసుకోవాలని సూచించారు. ప్రభుత్వ ఆదేశాల మేరకు భూముల సర్వే కార్యక్రమాన్ని వేగవంతంగా చేపట్టి, అర్హులైన ప్రతి రైతుకు పట్టాలు అందించేందుకు చర్యలు తీసుకుంటున్నామని ఎమ్మెల్యే తెలిపారు. నియోజకవర్గంలో సుమారు 50 వేల మంది పట్టాదారుల సమస్యల పరిష్కారానికి ప్రభుత్వం ప్రత్యేక వెసులుబాటు కల్పిస్తోందని ఆయన పేర్కొన్నారు.

ఎల్‌ నినో ప్రభావంతో ఆశించిన స్థాయిలో వర్షాలు కురవడం లేదు, దీనివల్ల సాగుబడి ముందుకు సాగక అన్నదాతలు ఆందోళన వ్యక్తం చేస్తున్నారు. ఇలాంటి పరిస్థితుల్లో రాజన్న సిరిసిల్ల జిల్లాలోని ఇల్లంతకుంట మండలంలో ఉపాధి హామీ కూలీలు వర్షాల కోసం వినూత్న పద్ధతిలో వరుణుడిని వేడుకున్నారు. వారు బతుకమ్మ ఆటలతో వర్షాలు కురవాలని, రైతుల పంటలు పండాలని కోరారు. చెరువులు నిండి రైతుల కష్టాలు తీరాలని ప్రత్యేక ప్రార్థనలు చేశారు.

కరీంనగర్ నియోజకవర్గ రైతులకు సాగునీటిని వెంటనే విడుదల చేయాలని మాజీ మంత్రి, ఎమ్మెల్యే గంగుల కమలాకర్ ప్రభుత్వాన్ని హెచ్చరించారు. లేని పక్షంలో ఆదివారం రోజున రైతులతో కలిసి మహా ధర్నా చేపడతామని స్పష్టం చేశారు. శుక్రవారం తన కార్యాలయంలో నియోజకవర్గ రైతులతో పాటు ఆయా గ్రామాల ప్రజా ప్రతినిధులతో నిర్వహించిన ప్రత్యేక సమావేశంలో ఆయన ఈ డిమాండ్‌లు చేశారు. ఎల్లంపల్లి ప్రాజెక్ట్ నుండి వరద కాలువ ద్వారా మిడ్ మానేరుకు నీటిని తరలించాలని, అలాగే వరద కాలువపై ఉన్న ఆచంపల్లి తూము ద్వారా కొత్తపల్లి మండలంలోని ఏడు గ్రామాలైన నాగుల మల్యాల, బావుపేట, కామన్ పూర్, కొండాపూర్, ఎలగంధల్, శ్రీరాములపల్లె రైతులకు సాగునీటిని విడుదల చేసి చెరువులను నింపాలని ఆయన పేర్కొన్నారు. గత వారం రోజుల క్రితమే ప్రభుత్వాన్ని హెచ్చరించినప్పటికీ, ఇప్పటివరకు ప్రభుత్వం మొద్దు నిద్రలో ఉండి స్పందించకపోవడంతో రైతులు రోడ్డున పడే పరిస్థితి ఏర్పడిందని, ఇక పోరాటం తప్పదని భావించి ఈ మహా ధర్నాకు పిలుపునిచ్చినట్లు తెలిపారు. తెలంగాణ నుండి రాజమండ్రికి నీటిని తరలించడంపై చూపే శ్రద్ధ, తెలంగాణ ప్రజలు నీటి కోసం గోస పడుతున్నా పట్టించుకునేవారు కరువయ్యారని ఎమ్మెల్యే గంగుల మండిపడ్డారు. తెలంగాణ తొలి ముఖ్యమంత్రి కేసిఆర్ నాయకత్వంలో బారసా ప్రభుత్వంలో మేడిగడ్డ ప్రాజెక్టు ద్వారా నీటిని తరలించి మండుటెండల్లో చెరువులను మత్తడులు దుంకించిన విషయాన్ని ఈ సందర్భంగా గుర్తు చేసుకున్నారు. ఆదివారం నిర్వహించే ఈ ధర్నాకు రైతులందరూ స్వచ్ఛందంగా తరలి రావాలని ఆయన పిలుపునిచ్చారు. ఈ కార్యక్రమంలో ఎమ్మెల్యే గంగులతో పాటు ఆయా గ్రామాల ప్రజా ప్రతినిధులు, రైతులు, బారస పార్టీ నాయకులు తదితరులు పాల్గొన్నారు.