पातुर येथे झालेल्या निवडणुकीत काँग्रेसचे हिद्दू पैलवान यांनी बहुमताने विजय मिळवला आहे. त्यांनी मोठ्या मताधिक्याने ही निवडणूक जिंकली.

पातुर येथे झालेल्या निवडणुकीत काँग्रेसचे हिद्दू पैलवान यांनी बहुमताने विजय मिळवला आहे. त्यांनी मोठ्या मताधिक्याने ही निवडणूक जिंकली.

डॉ. झीशान हुसैन यांनी म्हटले आहे की, हिंदू-मुस्लिम एकजुटीमुळे काँग्रेसने भाजपला पराभूत केले आहे.

अकोल्यात आंतरराष्ट्रीय योग दिन मोठ्या उत्साहात साजरा करण्यात आला. या निमित्ताने डॉ. पंजाबराव देशमुख कृषी विद्यापीठाच्या दीक्षांत सभागृहात सामूहिक योग प्रात्यक्षिकांचे भव्य आयोजन करण्यात आले होते. या प्रशासनाच्या भव्य उपक्रमात विविध क्षेत्रातील नागरिक, विद्यार्थी, अधिकारी आणि अनेक मान्यवरांनी मोठ्या संख्येने सहभाग घेतला. या हजारोंच्या सहभागातून योगाचा महत्त्वपूर्ण संदेश सर्वत्र पोहोचवण्यात आला.

अकोला जिल्ह्यातील अंदुरा जवळील पानखास पुलाजवळ रविवारी दुपारी २ वाजण्याच्या सुमारास एसटी बस आणि दुचाकी यांच्यात झालेल्या भीषण अपघातात दोन तरुणांचा जागीच मृत्यू झाला. संत गजानन महाराजांच्या दर्शनासाठी शेगाव येथे गेलेले हे तरुण अकोटच्या दिशेने परत येत असताना हा अपघात घडला. प्रत्यक्षदर्शींनी दिलेल्या प्राथमिक अंदाजानुसार, रस्त्यावरील मोठ्या भेगांमुळे चालकाचे नियंत्रण सुटल्याने हा भीषण अपघात झाला, ज्यामुळे परिसरात तीव्र संताप व्यक्त होत आहे. अपघातातील मृत तरुणांची नावे श्रीकांत पुरुषोत्तम बायस्कार (वय २५) आणि कुणाल राजू भोरे (वय २४, दोन्ही रा. गजानन महाराज नगर, अकोट) अशी आहेत. मिळालेल्या माहितीनुसार, श्रीकांत आणि कुणाल हे दोघे एम.एच. ३० बी.ई. ७९७० क्रमांकाच्या दुचाकीने अकोट येथे परत येत असताना अंदुरा गावाजवळ त्यांची दुचाकी समोरून निंबा फाट्याकडे जाणाऱ्या चांदूर बाजार आगाराच्या एम.एच. १४ एम.टी. ०२५३ क्रमांकाच्या एसटी बसशी आदळली. ही बस चांदूर बाजार येथून छत्रपती संभाजीनगरकडे जात होती. या घटनेची माहिती मिळताच उरळ पोलीस ठाण्याचे ठाणेदार जनार्दन खंडेराव आपल्या पथकासह तात्काळ घटनास्थळी पोहोचले. प्रशासनाच्या दिरंगाईमुळे आणि रस्त्याच्या दुरवस्थेमुळेच या दोन्ही निष्पाप तरुणांचा बळी गेल्याचा आरोप करत मृतकांच्या नातेवाईकांनी घटनास्थळी अत्यंत आक्रमक पवित्रा घेतला, ज्यामुळे काही काळ परिसरात तणावाचे वातावरण निर्माण झाले. पोलिसांनी नातेवाईकांची समजूत काढल्यानंतर दोन्ही मृतदेह शवविच्छेदनासाठी अकोट येथे नेण्यात आले. उरळ पोलीस याप्रकरणी पुढील तपास करत आहेत.

गेल्या १५ ते २० वर्षांपासून रखडलेली पेडगाव येथील नळ पाणीपुरवठा योजना अखेर मार्गी लागली असून, उद्यापासून ती प्रत्यक्ष सुरू होणार आहे. या योजनेमुळे पाण्यासाठी संघर्ष करणाऱ्या ग्रामस्थांना मोठा दिलासा मिळाला असून, गावात आनंदाचे वातावरण निर्माण झाले आहे. आता गावकऱ्यांना घरपोच पिण्याचे पाणी मिळणार आहे. अनेक वर्षांपासून पेडगावमधील नागरिकांना पिण्याच्या पाण्याच्या गंभीर समस्येला सामोरे जावे लागत होते. विशेषतः उन्हाळ्यात पाणीटंचाई अधिक तीव्र होत असल्याने महिलांना दूरवरून पाणी आणण्यासाठी पायपीट करावी लागत होती. ज्येष्ठ नागरिक, महिला आणि सर्वसामान्य कुटुंबांना पाण्यासाठी खूप धावपळ करावी लागत असे. पाण्यासारख्या मूलभूत सुविधेसाठी ग्रामस्थांनी अनेकदा प्रशासनाकडे मागणी केली होती, परंतु विविध कारणांमुळे हा प्रश्न प्रलंबित राहिला होता. गावातील या गंभीर समस्येची दखल घेत पत्रकार विश्वास कुटे यांनी पेडगावच्या पाणीप्रश्नासाठी सातत्याने पाठपुरावा केला. त्यांनी ग्रामस्थांच्या अडचणी प्रशासनासमोर मांडल्या आणि संबंधित विभागाकडे पाठपुरावा करून नळ योजना सुरू करण्यासाठी प्रयत्न केले. नागरिकांच्या मूलभूत सोयी-सुविधांचा प्रश्न म्हणून त्यांनी हा विषय लावून धरल्यामुळे अखेर प्रशासनाने सकारात्मक भूमिका घेत नळ योजना सुरू करण्याचा मार्ग मोकळा केला. नळ पाणीपुरवठा योजना सुरू झाल्याने गावातील प्रत्येक घरापर्यंत पिण्याचे पाणी पोहोचेल. यामुळे नागरिकांची पाण्यासाठी होणारी भटकंती थांबणार असून, महिलांच्या श्रमात मोठी बचत होणार आहे. या योजनेचा गावातील आरोग्य, स्वच्छता आणि दैनंदिन जीवनावरही सकारात्मक परिणाम होईल. येत्या २२ जून रोजी सकाळी ८:३० वाजता पेडगाव येथे नळ पाणीपुरवठा सुरू करण्यात येणार असून, सर्व ग्रामस्थांनी वेळेत उपस्थित राहून नळाचे पाणी भरून घ्यावे, असे आवाहन करण्यात आले आहे. ग्रामस्थांनी पत्रकार विश्वास कुटे यांच्या प्रयत्नांचे कौतुक केले असून, अनेक वर्षांपासून प्रलंबित असलेला पाणी प्रश्न मार्गी लावण्यासाठी त्यांनी केलेल्या प्रयत्नांबद्दल समाधान व्यक्त केले आहे. पेडगावच्या विकासाच्या दृष्टीने हा एक ऐतिहासिक टप्पा मानला जात असून, पाण्याचा प्रश्न सुटल्याने गावाच्या प्रगतीला नवी दिशा मिळणार आहे.

आज सकाळी ब्रह्ममुहूर्तावर, 'हेचि व्हावी माझी आस, जन्मोजन्मी तुझा दास...' या संतवचनांचा जयघोष करत, टाळ-मृदंगांच्या निनादात आणि भगव्या पताकांच्या डोलणाऱ्या सागरात, 'जय हरी विठ्ठल, श्री हरी विठ्ठल'च्या अखंड गजरात संतनगरी शेगावातून श्री संत गजानन महाराजांची पवित्र पालखी पंढरपूरच्या दिशेने भक्तिभावाने मार्गस्थ झाली. या सोहळ्यामुळे संपूर्ण परिसर भक्तिरसात न्हाऊन निघाला असून, वारकऱ्यांच्या उत्साहाने शेगाव नगरीत आध्यात्मिक ऊर्जा संचारली आहे. आषाढी एकादशीच्या पवित्र सोहळ्यासाठी श्री क्षेत्र पंढरपूरकडे निघालेला हा पालखी सोहळा यंदा ५७ वे वर्ष साजरा करत आहे. यामध्ये तब्बल ७०० हून अधिक वारकरी, टाळकरी, पताकाधारी आणि अश्वदल सहभागी झाले आहेत. 'गण गण गणात बोते', 'जय गजानन श्री गजानन' आणि 'जय हरी विठ्ठल'च्या अखंड नामघोषात भक्तांची पावले पंढरीच्या दिशेने पडू लागली आहेत. श्रींची पालखी पुढील ३३ दिवसांत ५७० किलोमीटरचे अंतर पायी पार करत २३ जुलै रोजी श्री क्षेत्र पंढरपूर येथे पोहोचणार आहे. पंढरपूरमध्ये २३ ते २८ जुलै या कालावधीत श्री गजानन महाराज संस्थानच्या शाखेत पालखीचा मुक्काम राहणार असून, हजारो भाविकांना श्रींच्या दर्शनाचा लाभ मिळेल. पंढरपूरातील मुक्कामानंतर २९ जुलैपासून पालखीचा परतीचा प्रवास सुरू होईल. पंढरपूर ते शेगाव हा ५५० किलोमीटरचा मार्ग पायी पार करत, येण्या-जाण्याचा एकूण १३०० किलोमीटरचा पायी प्रवास वारकरी पूर्ण करणार आहेत. आधुनिक युगातही एवढ्या मोठ्या प्रमाणात भक्तांनी पायी वारी करणे ही संत परंपरेची आणि श्रद्धेची अद्वितीय ताकद असल्याचे यानिमित्ताने पुन्हा अधोरेखित झाले आहे. शेगावातून प्रस्थान केल्यानंतर आज दुपारी पालखी श्री क्षेत्र नागझरी येथील श्री संत गोमाजी महाराज संस्थानात पोहोचणार आहे. तेथे महाप्रसादानंतर सायंकाळी अकोला जिल्ह्यातील पारस येथे पालखीचा पहिला रात्रीचा मुक्काम असेल. यानंतर २२ जून रोजी दुपारी गायगाव तर रात्री भौरद येथे मुक्काम होणार आहे. पुढे २३ व २४ जून रोजी अकोला येथे दोन दिवसांचा मुक्काम राहणार असून, निश्चित मार्गाने पालखी पुढे पंढरपूरच्या दिशेने वाटचाल करणार आहे. संतांच्या शिकवणुकीवर चालणारी ही वारी केवळ धार्मिक सोहळा नसून, सामाजिक एकात्मता, समता, सेवा आणि अध्यात्माचे विद्यापीठ मानली जाते. जाती-पाती, श्रीमंत-गरीब यांचे भेद विसरून हजारो वारकरी एकाच नामस्मरणात दंग होतात. त्यामुळेच संतनगरीतून निघालेली ही पालखी आजही लाखो भाविकांच्या श्रद्धेचे केंद्रबिंदू ठरत आहे. 'चंद्रभागे स्नान, तुका मागे हेचि दान' या संतवचनांचा ध्यास घेऊन श्रींची पालखी आता विठुरायाच्या भेटीसाठी पंढरीच्या दिशेने भक्तिभावाने मार्गक्रमण करत आहे. गण गण गणात बोते.

आज श्री संत गजानन महाराजांची पवित्र पालखी विठुरायाच्या भेटीसाठी पंढरपूरच्या दिशेने अत्यंत भक्तिमय वातावरणात प्रस्थान झाली आहे. टाळ-मृदंगाच्या गजरात, हरिनामाच्या जयघोषात आणि "गण गण गणात बोते" च्या अखंड निनादात गजानन माऊलींची पालखी पंढरीच्या वाटेने मार्गस्थ झाली. या पालखी प्रस्थान सोहळ्यावेळी हजारो भाविकांनी मोठ्या श्रद्धेने आणि भक्तिभावाने गजानन महाराजांना निरोप दिला. "गण गण गणात बोते", "ज्ञानोबा-तुकाराम" आणि "पांडुरंग हरी" च्या जयघोषाने संपूर्ण परिसर दुमदुमून गेला होता. भाविकांनी पालखीला वाटी लावून माऊलींचे दर्शन घेतले आणि पंढरीच्या वारीसाठी शुभेच्छा दिल्या. हा पालखी सोहळा श्रद्धा, भक्ती आणि वारकरी परंपरेचे जिवंत प्रतीक असून, तो समाजातील ऐक्य, समर्पण आणि अध्यात्मिक भावनेचे दर्शन घडवतो. हजारो वारकरी आणि भक्त विठ्ठल-रखुमाईच्या दर्शनाची आस मनात बाळगून या पवित्र वारीत सहभागी झाले आहेत. "गण गण गणात बोते, पंढरीनाथ महाराज की जय!" आणि "ज्ञानोबा-तुकाराम, गजानन माऊलींचा विजय असो!" अशा जयघोषांनी वातावरण भारले होते. सर्व वारकरी भक्तांना पंढरीच्या वारीसाठी हार्दिक शुभेच्छा देण्यात आल्या असून, विठ्ठल-रखुमाई आणि गजानन माऊलींची कृपा सर्वांवर सदैव राहो, हीच प्रार्थना करण्यात आली.

महाराष्ट्रातील परभणी जिल्ह्यातील एका हनुमान मंदिराच्या हॉलचे छत अचानक कोसळले. या दुर्घटनेवेळी मंदिर परिसरात अनेक भाविक उपस्थित होते, ज्यामुळे अनेक जण जखमी झाले. जखमी झालेल्यांना उपचारासाठी तातडीने रुग्णालयात दाखल करण्यात आले आहे. घटनेनंतर परिसरात एकच गोंधळ आणि अफरा-तफरीचे वातावरण निर्माण झाले असून, प्रशासनाकडून मदत आणि बचाव कार्य युद्धपातळीवर सुरू आहे.