కాకినాడ జిల్లాలోని తుని మండలం తేటగుంట గ్రామానికి చెందిన వడ్లమూరి దేవి, పీజీసెట్‌ పరీక్షలో తెలుగు సబ్జెక్టులో రాష్ట్రస్థాయిలో ఐదో ర్యాంకు సాధించి ఘనత వహించారు. దేవి తన విద్యాభ్యాసాన్ని మొదటి నుండి ప్రభుత్వ పాఠశాలల్లోనే ప్రారంభించి, ప్రభుత్వ డిగ్రీ కళాశాలలో పూర్తి చేశారు. ఈ సందర్భంగా ఆమె మాట్లాడుతూ, డిగ్రీ కళాశాల లెక్చరర్ డాక్టర్ పుష్పలత ఇచ్చిన మార్గదర్శకత్వం, గురువుల ప్రోత్సాహమే తన విజయానికి ప్రధాన కారణమని స్పష్టం చేశారు. తెలుగు భాషపై పరిశోధనలు చేయడమే తన లక్ష్యమని కూడా ఆమె తెలిపారు. రాష్ట్రస్థాయిలో ఈ ప్రతిష్టాత్మక ర్యాంకు సాధించిన దేవిని లెక్చరర్లు, నాయకులు, ఆమె తల్లిదండ్రులు హృదయపూర్వకంగా అభినందించారు.

😭🙏

తూర్పుగోదావరి జిల్లాలో నిర్వహించిన ఇరిగేషన్ అడ్వైజరీ బోర్డ్ సమావేశంలో ఎమ్మెల్యే నల్లమిల్లి రామకృష్ణారెడ్డి ఇరిగేషన్ అధికారుల పనితీరుపై తీవ్ర ఆగ్రహం వ్యక్తం చేశారు. ప్రభుత్వం రేపటి నుంచి నీటి విడుదల చేపట్టనున్న తరుణంలో, ఈరోజు సమావేశం నిర్వహించడం వల్ల ఎలాంటి ప్రయోజనం లేదని ఆయన అధికారులను నిలదీశారు. కాలువల మరమ్మతులు, గట్ల పటిష్టీకరణ, రైతులకు నీటి సరఫరా వంటి కీలక అంశాలపై అధికారులు ఎటువంటి ముందస్తు చర్యలు తీసుకోలేదని ఎమ్మెల్యే తీవ్రంగా మండిపడ్డారు. రైతులు ఎదుర్కొంటున్న ఇబ్బందులను దృష్టిలో పెట్టుకుని ఇరిగేషన్ శాఖ నిర్లక్ష్యంగా వ్యవహరించిందని, అధికారులు మరింత బాధ్యతాయుతంగా పనిచేయాలని ఆయన స్పష్టం చేశారు. ఈ సందర్భంగా, కాటన్ బ్యారేజ్ పరిస్థితి, కాలువల శుభ్రపరిచే పనులు, సాగునీటి సరఫరా అంశాలపై కూడా ఆయన అధికారులను నిశితంగా ప్రశ్నించారు. రైతులకు ఎలాంటి ఇబ్బందులు తలెత్తకుండా, అధికారులు అందరూ సమన్వయంతో పనిచేయాలని ఎమ్మెల్యే నల్లమిల్లి ఆదేశాలు జారీ చేశారు.

పోలవరం జిల్లాలోని అడ్డతీగల సర్కిల్ పరిధిలో గంజాయి నిర్మూలనకు, మహిళల భద్రతకు పోలీసులు అత్యంత ప్రాధాన్యత ఇస్తున్నారని సీఐ స్పష్టం చేశారు. ఈ దిశగా కఠిన చర్యలు తీసుకునేందుకు పోలీసులు సిద్ధంగా ఉన్నారని తెలిపారు. గంజాయి వినియోగాన్ని సమూలంగా అరికట్టేందుకు ప్రభుత్వం, పోలీసు శాఖ సంయుక్తంగా 'రాపిడ్ టెస్ట్' అనే కొత్త విధానాన్ని తీసుకొచ్చాయి. ప్రెగ్నెన్సీ టెస్ట్ మాదిరిగానే మూత్రం నమూనా ద్వారా పనిచేసే ఈ కిట్‌లో, కేవలం 'C' వద్ద ఎర్రటి గుర్తు వస్తే గత ఆరు నెలల వ్యవధిలో గంజాయి సేవించినట్లుగా (పాజిటివ్) నిర్ధారించి, వారిపై సెక్షన్ 27B కింద కేసు నమోదు చేస్తారు. 'C' మరియు 'T' గుర్తు వస్తే నెగిటివ్ అని అర్థం. కొత్తగా అలవాటు పడిన వారికి కౌన్సెలింగ్ ఇచ్చి నిరంతరం పోలీస్ పర్యవేక్షణలో ఉంచుతారు. అడ్డతీగల పోలీస్ స్టేషన్‌కు 25 కిట్లు కేటాయించగా, ఇప్పటికే నిర్వహించిన మూడు పరీక్షల్లోనూ నెగిటివ్ ఫలితాలు వచ్చినట్లు సీఐ తెలిపారు. రానున్న రోజుల్లో గంజాయి విక్రయ, వినియోగ ప్రాంతాల్లో ఈ తనిఖీలను మరింత ముమ్మరం చేయనున్నారు. వీటితో పాటుగా, మహిళలను వేధించడం, లైంగిక దాడులకు పాల్పడటం వంటి మహిళా సంబంధిత కేసులలో నిందితులపై ఎట్టి పరిస్థితుల్లోనూ ఉపేక్షించకుండా కఠిన చర్యలు తీసుకుంటామని సీఐ స్పష్టం చేశారు.

రాష్ట్ర ఎస్టీ కమిషన్ చైర్మన్, క్యాబినెట్ హోదా కలిగిన గౌరవ శ్రీ సోళ్ల బొజ్జిరెడ్డి పోలవరం జిల్లా అధికారులతో నిర్వహించ తలపెట్టిన ఆర్&ఆర్, రెవెన్యూ శాఖల సమీక్షా సమావేశానికి అధికారులు సమయానికి హాజరుకాకపోవడం తీవ్ర వివాదానికి దారితీసింది. రంపచోడవరం ఐ. టి డి.ఎ అధికారులు ఆలస్యంగా వచ్చారు. వారం రోజుల ముందే చైర్మన్ పర్యటన, సమీక్షా సమావేశం షెడ్యూల్ జిల్లా యంత్రాంగానికి అధికారికంగా అందినప్పటికీ, సోమవారం ఉదయం 10:30 గంటలకు చైర్మన్ సోళ్ల బొజ్జిరెడ్డి తన కమిషన్ సభ్యులతో సమావేశ మందిరానికి చేరుకున్నారు. కానీ కీలక శాఖల అధికారులు మధ్యాహ్నం 12 గంటలు దాటినా హాజరుకాలేదు. దీంతో చైర్మన్ దాదాపు రెండు గంటల పాటు వేచి ఉండాల్సి వచ్చింది. ఈ ఘటనపై గిరిజన సంఘాలు తీవ్ర ఆగ్రహం వ్యక్తం చేస్తూ, ఇది గిరిజనుల పట్ల చిన్నచూపు కాదా అని ప్రశ్నించాయి. క్యాబినెట్ హోదా ఉన్న ఎస్టీ కమిషన్ చైర్మన్‌కే అధికారులు ఇంత నిర్లక్ష్యంగా వ్యవహరిస్తే, ఒక సాధారణ గిరిజనుడు 50 కి.మీ దూరం నుంచి తన సమస్య చెప్పుకోవడానికి వస్తే వారి పరిస్థితి ఏంటని గిరిజన నాయకులు ఆందోళన వ్యక్తం చేశారు. మరోవైపు, ఆర్&ఆర్ ప్యాకేజీ అమలు, పునరావాస కాలనీల్లో మౌలిక వసతులు, భూసేకరణ నష్టపరిహారంపై జరగాల్సిన సమీక్షలో అవినీతి, నిర్లక్ష్యం బయటపడుతుందనే భయంతోనే అధికారులు ఉద్దేశపూర్వకంగా సమావేశానికి డుమ్మా కొట్టారనే ఆరోపణలు కూడా వినిపిస్తున్నాయి. సమయపాలన పాటించని అధికారుల తీరుపై చైర్మన్ సోళ్ల బొజ్జిరెడ్డి తీవ్ర అసహనం వ్యక్తం చేశారు. రాజ్యాంగబద్ధ సంస్థకు ఇవ్వాల్సిన గౌరవం ఇదేనా అని ప్రశ్నించిన ఆయన, గిరిజనుల సమస్యలపై చర్చించే సమావేశానికే అధికారులు రాకపోతే, క్షేత్రస్థాయిలో పరిస్థితి ఎలా ఉంటుందో అర్థం చేసుకోవచ్చని వ్యాఖ్యానించారు. నిర్ణీత సమయానికి హాజరుకాని అధికారులపై క్రమశిక్షణ చర్యలు తీసుకోవాలని, ఆర్&ఆర్ అంశంపై ప్రత్యేక విచారణ జరపాలని ఎస్టీ కమిషన్‌ను గిరిజన సంఘాలు కోరుతున్నాయి. ఈ ఘటనపై ప్రభుత్వ ప్రధాన కార్యదర్శికి నివేదిక పంపనున్నట్లు కమిషన్ వర్గాలు తెలిపాయి. ఒక క్యాబినెట్ హోదా కలిగిన కమిషన్ చైర్మన్‌కే అధికారులు విలువ ఇవ్వకపోతే, సామాన్య గిరిజనుడి గోడు వినేదెవరు అనే ప్రశ్న ఇప్పుడు జిల్లా వ్యాప్తంగా చర్చనీయాంశంగా మారింది.

అల్లూరి జిల్లా ఏజెన్సీ అడవుల నుండి లభించే స్వచ్ఛమైన తేనెకు ప్రత్యేక గుర్తింపు లభించింది. కొండలు, లోయలు, దట్టమైన అటవీ ప్రాంతాలలో నివసించే గిరిజనులు సంప్రదాయ పద్ధతులను అనుసరించి ఈ తేనెను సేకరిస్తున్నారు. ఔషధ గుణాలతో పాటు సహజమైన రుచిని కలిగి ఉండటంతో, ఈ అడవి తేనె వినియోగదారులను విశేషంగా ఆకట్టుకుంటోంది. దీనిని ఒకసారి రుచి చూసిన వారు మళ్లీ మళ్లీ తినాలనిపించే ప్రత్యేకత దీనికి ఉందని కొనుగోలుదారులు చెబుతున్నారు. సరైన మార్కెటింగ్ వ్యూహాలు, విక్రయ వేదికలు కల్పిస్తే ఈ అడవి తేనెకు మరింత ఆదరణ లభించడంతో పాటు, తేనె సేకరించే గిరిజనులకు అదనపు ఆదాయం సమకూరుతుందని కొనుగోలుదారులు ఆశాభావం వ్యక్తం చేస్తున్నారు.

😭🙏

😭🙏

😭🙏