মৰাণ কুশল নগৰলৈ অহা লোকসকলক এতিয়াৰে পৰা ৰাস্তাৰ কাষত আৱৰ্জনা নেপেলাবলৈ সাৱধান কৰি দিয়া হৈছে। পথৰ দাঁতিত CCTV কেমেৰা থকাৰ বাবে এনে কাৰ্যৰ ওপৰত নিৰীক্ষণ ৰখা হ'ব।

শিৱসাগৰৰ ৰাজপথত আছুৰ তীব্ৰ প্ৰতিবাদৰ ফলত এক উত্তাল পৰিৱেশ সৃষ্টি হৈছে। ধাৰাবাহিকভাৱে বৃদ্ধি পোৱা ইন্ধনজাত সামগ্ৰীৰ লগতে অত্যাৱশ্যকীয় সামগ্ৰীৰ মূল্যবৃদ্ধিৰ বিৰুদ্ধে শিৱসাগৰ আছুৱে নগৰৰ দলমুখ ছাৰিআলিত এই প্ৰতিবাদ সাব্যস্ত কৰে। প্ৰতিবাদকাৰীসকলে কেন্দ্ৰীয় পেট্ৰলিয়াম মন্ত্ৰী হৰদ্বীপ সিং পুৰিৰ প্ৰতিমূৰ্তি দাহ কৰি মূল্যবৃদ্ধিৰ বিৰুদ্ধে তেওঁলোকৰ ক্ষোভ প্ৰকাশ কৰে। আৰক্ষীৰ কঠোৰ বাধাৰ মাজতো এই প্ৰতিবাদী কাৰ্যসূচী সফলভাৱে সম্পন্ন হয়। প্ৰতিবাদী কাৰ্যসূচীক নেতৃত্ব প্ৰদান কৰা জিলা সভাপতি মানৱ হাজৰিকাই কেন্দ্ৰীয় আৰু ৰাজ্য চৰকাৰৰ ভূমিকাক তীব্ৰ সমালোচনা কৰে।

আজি অসম জাতীয়তাবাদী যুৱ-ছাত্ৰ পৰিষদৰ যোৰহাট জিলা সমিতিয়ে অত্যাৱশ্যকীয় সামগ্ৰীৰ লগতে পেট্ৰ’ল-ডিজেলকে ধৰি ইন্ধনজাত সামগ্ৰীৰ অব্যাহত মূল্যবৃদ্ধিৰ প্ৰতিবাদত যোৰহাট জিলা আয়ুক্ত কাৰ্যালয়ৰ সন্মুখত এক উত্তাল প্ৰতিবাদী কাৰ্যসূচী ৰূপায়ণ কৰে। সংগঠনটোৱে চৰকাৰ বিৰোধী বিভিন্ন শ্ল’গানেৰে পৰিবেশ উত্তাল কৰি তোলে। প্ৰতিবাদস্থলীত কৰ্মীসকলে উল্লেখ কৰে যে নিত্য প্ৰয়োজনীয় খাদ্য সামগ্ৰী, ৰন্ধন গেছ, পেট্ৰ’ল-ডিজেল আদিৰ মূল্যবৃদ্ধিৰ ফলত সাধাৰণ জনতা জীয়াতু ভুগিছে। তেওঁলোকে বিশেষকৈ দৰিদ্ৰ আৰু মধ্যবিত্ত শ্ৰেণীৰ লোকসকল এই মূল্যবৃদ্ধিৰ ফলত অধিক সমস্যাৰ সন্মুখীন হোৱা বুলি দাবী কৰে। পৰিষদৰ নেতাসকলে চৰকাৰক শীঘ্ৰে মূল্যবৃদ্ধি নিয়ন্ত্ৰণ কৰিবলৈ দাবী জনাইছে। তেওঁলোকে হুংকাৰ দিয়ে যে যদি চৰকাৰে এই সমস্যা সমাধানৰ ক্ষেত্ৰত শীঘ্ৰেই গুৰুত্ব আৰোপ নকৰে, তেন্তে আগন্তক দিনত অধিক তীব্ৰ গণআন্দোলন গঢ়ি তোলা হ’ব। এই প্ৰতিবাদী কাৰ্যসূচীৰ পিছতে, সংগঠনটোৰ যোৰহাট জিলা সমিতিয়ে মুখ্যমন্ত্ৰীলৈ প্ৰেৰণ কৰাৰ উদ্দেশ্যে দাবী সম্বলিত এখন স্মাৰক পত্ৰ জিলা প্ৰশাসনৰ জৰিয়তে দাখিল কৰে।

তিনিচুকীয়াত পেট্ৰল-ডিজেলৰ মূল্যবৃদ্ধিৰ বিৰুদ্ধে আছুৱে এক উত্তাল প্ৰতিবাদ সাব্যস্ত কৰে। এই প্ৰতিবাদৰ সময়ত কেন্দ্ৰীয় পেট্ৰ'লিয়াম মন্ত্ৰী হৰদ্বীপ সিং পুৰীৰ পুত্তলিকা দাহ কৰি বিৰোধ প্ৰদৰ্শন কৰা হয়। পুত্তলিকা দাহ কৰাৰ সময়ত আৰক্ষীৰ স’তে হতাহতি হোৱাত এক উত্তপ্ত পৰিস্থিতিৰ সৃষ্টি হয়।

সোমবাৰে তিনিচুকীয়াৰ শদিয়াৰ চেংচাপ আৰক্ষী থানাৰ অন্তৰ্গত ন-পতীয়া গাঁৱত এক শোকাৱহ পথ দুৰ্ঘটনা সংঘটিত হৈছে। এই দুৰ্ঘটনাত এখন তীব্ৰবেগী বাইকৰ খুন্দাত দীপশিখা গুৰুং নামৰ ৩ বছৰীয়া কন্যা শিশুৰ মৃত্যু হোৱাৰ লগতে একে বয়সৰ আন এটি শিশু গুৰুত্বপূৰ্ণভাৱে আহত হয়। এই শোকাৱহ ঘটনাৰ পাছতেই স্থানীয় ৰাইজ ক্ষুব্ধ হৈ পৰে। বাইক আৰোহীক ততাতৈয়াকৈ গ্ৰেপ্তাৰ কৰাৰ দাবীত ক্ষুব্ধ ৰাইজে চেংচাপ আৰক্ষী থানা ঘেৰাও কৰি প্ৰতিবাদ সাব্যস্ত কৰে।

অসমৰ মুখ্যমন্ত্ৰী হিমন্ত বিশ্ব শৰ্মাই জনপ্ৰিয় শিল্পী জুবিন গাৰ্গক সকলোৰে হিয়াৰ আমঠু আৰু প্ৰাণৰ সত্তা বুলি অভিহিত কৰিছে। বিৰোধী মঞ্চলৈ এটা বিশেষ আহ্বান জনাই মুখ্যমন্ত্ৰী শৰ্মাই কয়, "পলিটিক্স নকৰিবা বন্ধু।"

যোৰহাট জিলা সমিতিয়ে অসমীয়া যুৱ মঞ্চৰ এখন কাৰ্য-নিৰ্বাহক সভা অনুষ্ঠিত কৰিছে, য'ত নতুন সমিতি গঠন কৰা হয়। এই সভাৰ জৰিয়তে অসমীয়া যুৱ মঞ্চই অসম চৰকাৰক স্পষ্টভাৱে সকীয়নি দিছে যে মূল্যবৃদ্ধিৰ বাবে তীব্ৰ প্ৰতিবাদ সংঘটিত হ'ব।

অসমৰ দক্ষতা ভিত্তিক শিক্ষাক অধিক জনপ্ৰিয় কৰি তোলাৰ লক্ষ্যৰে অসম স্কিল ইউনিভাৰ্চিটি আৰু ছীড ফাউণ্ডেচনৰ উদ্যোগত কালি শিৱসাগৰ ছোৱালী মহাবিদ্যালয়ত এখন সজাগতা আৰু পৰামৰ্শমূলক কাৰ্যসূচী অনুষ্ঠিত কৰা হয়। এই অনুষ্ঠানত জিলাখনৰ বিভিন্ন বিদ্যালয়ৰ ছাত্ৰ-ছাত্ৰীক দক্ষতা ভিত্তিক শিক্ষা, উদ্যোগ সৃষ্টি, কৰ্মমুখী পাঠ্যক্ৰম আৰু ভৱিষ্যতৰ নিয়োগ সম্ভাৱনাৰ ওপৰত সজাগ কৰা হয়। সমল ব্যক্তি হিচাপে উপস্থিত থকা ৰূপম চেতিয়া বৰাই অসম স্কিল ইউনিভাৰ্চিটিত উপলব্ধ বিভিন্ন পাঠ্যক্ৰম, কাৰিকৰী শিক্ষা আৰু দক্ষতা বিকাশৰ সুযোগসমূহৰ বিষয়ে ছাত্ৰ-ছাত্ৰীসকলক বিতংভাৱে অৱগত কৰে। তেওঁ পাৱাৰ পইণ্ট উপস্থাপনৰ জৰিয়তে দক্ষতা ভিত্তিক শিক্ষাৰ প্ৰয়োজনীয়তা, আত্মনিয়োগৰ সম্ভাৱনা আৰু বিভিন্ন খণ্ডত উদীয়মান কৰ্মসংস্থাপনৰ সুযোগসমূহৰ ওপৰত আলোকপাত কৰে। শিৱসাগৰ বাণিজ্য মহাবিদ্যালয়ৰ অধ্যক্ষ ডঃ সৌমাৰ জ্যোতি মহন্তই এই অনুষ্ঠানটো উদ্বোধন কৰে। অনুষ্ঠানত শিৱসাগৰ ছোৱালী কলেজৰ অধ্যক্ষ ডঃ প্ৰতিম শৰ্মা, বীৰ লাচিত বৰফুকন মহাবিদ্যালয়ৰ অধ্যক্ষ ডঃ পংকজ হাজৰিকা আৰু SEED FOUNDATION ৰ সঞ্চালক আমিনুল হুছেইন আদি গণ্যমান্য ব্যক্তি উপস্থিত থাকে।

ৰাজ্যত শেহতীয়াকৈ সৃষ্টি হোৱা পৰিস্থিতিৰ সুযোগ লৈ কোনো অসাধু ব্যৱসায়ীয়ে যাতে অধিক মুনাফা আদায় কৰিব নোৱাৰে, তাৰ বাবে মুখ্যমন্ত্ৰীৰ নিৰ্দেশত জিলা আয়ুক্তই বিশেষ পদক্ষেপ গ্ৰহণ কৰিছে। এই পদক্ষেপৰ অংশ হিচাপে, তিনিচুকীয়াৰ বজাৰৰ বিভিন্ন পাইকাৰী দোকানত খাদ্য আৰু অসামৰিক যোগান বিভাগৰ এটা দলে বিশেষ অভিযান চলায়। অভিযানৰ সময়ত বিষয়াসকলে খাদ্যৰ দাম, ষ্টক ৰেজিষ্টাৰ, মজুতৰ ব্যৱস্থা আৰু বিক্ৰীৰ ৰেকৰ্ড পুংখানুপুংখভাৱে পৰীক্ষা কৰে। কেইবাজনো দোকানীক তেওঁলোকৰ দোকানৰ বাহিৰত সামগ্ৰীৰ মূল্যৰ তালিকা প্ৰদৰ্শন কৰিবলৈ স্পষ্ট নিৰ্দেশ দিয়া হয়, যাতে গ্ৰাহকে সঠিক মূল্য লাভ কৰে আৰু যিকোনো সম্ভাৱ্য অনিয়ম দূৰ কৰিব পাৰি। লগতে, অত্যাৱশ্যকীয় সামগ্ৰীৰ মূল্য কৃত্ৰিমভাৱে বৃদ্ধি কৰাসকলৰ বিৰুদ্ধে কঠোৰ আইনী ব্যৱস্থা গ্ৰহণ কৰা হ’ব বুলি জিলা প্ৰশাসনে স্পষ্টভাৱে সকীয়নী প্ৰদান কৰিছে।

ৰাইজৰ দলৰ নেতা অখিল গগৈয়ে ভাৰতবৰ্ষৰ লোকসভাত মহিলাৰ প্ৰতিনিধিত্ব বৃদ্ধিৰ বাবে এক স্পষ্ট দাবী উত্থাপন কৰিছে। তেওঁ উল্লেখ কৰিছে যে বৰ্তমান লোকসভাত মহিলাৰ সংখ্যা মাত্ৰ ১৫ শতাংশ। ৰাইজৰ দলে লোকসভাত ৫০ শতাংশ মহিলাৰ আসন সংৰক্ষণ বিচাৰে বুলি গগৈয়ে জনাইছে। তেওঁ এই প্ৰস্তাৱ ভৱিষ্যতে নহয়, বৰং সমষ্টি পুনৰ নিৰ্ধাৰণৰ পূৰ্বেই 'আজিৰে পৰা' গ্ৰহণ কৰিবলৈ চৰকাৰক আহ্বান জনাইছে। গগৈয়ে চৰকাৰক এই সম্পৰ্কে এক সংকল্প প্ৰস্তাৱ গ্ৰহণ কৰিবলৈ অনুৰোধ কৰিছে। এই মন্তব্য ষষ্ঠদশ অসম বিধানসভা অধিৱেশন, ২০২৬ ৰ প্ৰসংগত কৰা হৈছে।