ধিৰাইমাজুলী শংকৰদেৱ শিশু নিকেতনৰ উদ্যোগত আন্তঃৰাষ্ট্ৰীয় যোগ দিৱস উদ্‌যাপন কৰা হয়।

অসমৰ শিল্প-সংস্কৃতিৰ অন্যতম কাণ্ডাৰী কলাগুৰু বিষ্ণু প্ৰসাদ ৰাভাৰ স্মৃতিত প্ৰতি বছৰে ২০ জুনৰ দিনটো ৰাজ্যজুৰি ৰাভা দিৱস হিচাপে পালন কৰা হয়। এই উপলক্ষে আজি বিশ্বনাথৰ ভূপেন্দ্ৰ ভৱন চৌহদত বিশ্বনাথ চাৰিআলি পৌৰসভাৰ ৬ নং ৱাৰ্ডৰ শতৰূপা মহিলা সাংস্কৃতিক মঞ্চৰ উদ্যোগত কলাগুৰু বিষ্ণু প্ৰসাদ ৰাভা দিৱস উলহ-মালহেৰে উদযাপন কৰা হয়। অনুষ্ঠানৰ আৰম্ভণিতে সমাজ সেৱিকা ভানু শৰ্মাই কলাগুৰুৰ প্ৰতিচ্ছবিত বন্তি প্ৰজ্বলন কৰে। ইয়াৰ পিছতে শতৰূপা মহিলা সাংস্কৃতিক মঞ্চৰ সদস্যাসকলে সমবেত সংগীত পৰিৱেশন কৰে, আৰু এক সম্বৰ্ধনা অনুষ্ঠানৰো আয়োজন কৰা হয়। বিষ্ণু প্ৰসাদ ৰাভাৰ গীতৰ আধাৰত বিভিন্ন সাংস্কৃতিক নৃত্য আৰু কবিতা আবৃত্তি আদি কাৰ্যসূচীৰে কলাগুৰুক শ্ৰদ্ধাঞ্জলি জনোৱা এই অনুষ্ঠানত অঞ্চলটোৰ বহু বিশিষ্ট ব্যক্তিৰ লগতে শতৰূপা মহিলা সাংস্কৃতিক মঞ্চৰ সকলো মহিলা উপস্থিত থাকে।

চাপৰত পুনৰ এবাৰ বিলাতী সুৰাৰ দোকান মুকলি কৰাক লৈ এক ভয়ংকৰ প্ৰতিবাদৰ সৃষ্টি হৈছে, য'ত আকাশ-বতাহ কঁপি উঠিছে। বজাৰৰ মাজমজিয়াত অৱস্থিত 'হৃষি ৰেষ্টুৰেণ্ট' নামৰ এই IMFL ON SHOP খন মুকলি কৰাৰ বিৰোধিতাৰে সমগ্ৰ চাপৰ অঞ্চলত এক উত্তপ্ত পৰিস্থিতিৰ সৃষ্টি হৈছে। চাপৰ নাগৰিক মঞ্চ, বিভিন্ন দল-সংগঠন আৰু স্থানীয় ৰাইজে এই বিপনীখন মুকলি কৰাৰ তীব্ৰ বিৰোধিতা কৰি বৃহৎ প্ৰতিবাদ সাব্যস্ত কৰিছে। তেওঁলোকৰ মতে, জনবসতিপূৰ্ণ এলেকাত এনে সুৰাৰ বিপনী স্থাপন কৰাটো সমাজৰ বাবে অতিশয় ভয়াৱহ আৰু ক্ষতিকাৰক। সেয়েহে, চাপৰ নাগৰিক মঞ্চ আৰু অন্যান্য সংগঠনে লগতে ৰাইজে এই সুৰাৰ বিপনীখন স্থায়ীভাৱে বন্ধ কৰাৰ দাবী জনাইছে। উল্লেখযোগ্য যে ইয়াৰ পূৰ্বেও এই বিপনীখনৰ বিৰুদ্ধে প্ৰতিবাদ সাব্যস্ত কৰা হৈছিল, যাৰ ফলত প্ৰশাসনে দুবাৰকৈ ক্ৰমে ৪৮ ঘণ্টা আৰু ৭ দিনৰ বাবে ইয়াক অস্থায়ীভাৱে বন্ধ কৰিছিল। বৰ্তমান পৰিস্থিতি নিয়ন্ত্ৰণ কৰিবলৈ ঘটনাস্থলীত বৃহৎ সংখ্যক আৰক্ষী আৰু প্ৰশাসনৰ লোক উপস্থিত হৈছে। নাগৰিক মঞ্চ, বিভিন্ন দল-সংগঠন আৰু ৰাইজে চাপৰ বজাৰৰ মাজমজিয়াত অৱস্থিত হৃষি ৰেষ্টুৰেণ্ট নামৰ এই বিলাতী সুৰাৰ বিপনীখন স্থায়ীভাৱে বন্ধ কৰিবলৈ কঠোৰ দাবী জনাইছে।

SN india 24 ৰ সত্বাধিকাৰী আব্দুল জলিল আকন্দই তেওঁক হয়বৰ গাঁও আৰক্ষীয়ে গ্ৰেপ্তাৰ কৰা বুলি একাংশ প'ৰ্টেলত প্ৰচাৰিত ভূৱা বাতৰি সন্দৰ্ভত নিজৰ প্ৰতিক্ৰিয়া ব্যক্ত কৰিছে। এই বাতৰিটো ভূৱা বুলি দাবী কৰি আকন্দই ইয়াক মিথ্যাচাৰ আখ্যা দিছে।

মৰিগাঁও জিলাত এক চাঞ্চল্যকৰ চিলনী চোৰৰ ঘটনা সংঘটিত হৈছে, য'ত চাৰি লাখ টকা থপিয়াই নিয়া হৈছে। ভূৰাগাঁৱৰ বাহাদুল আলম নামৰ লোকজনে HDFC বেংকৰ পৰা এই টকাখিনি উলিয়াই আনিছিল। দুজন যুৱকে এখন পালচাৰ বাইকত আহি বাহাদুল আলমৰ হাতৰ পৰা টকাৰ বেগটো থপিয়াই লৈ ঘটনাস্থলীৰ পৰা পলায়ন কৰে। চিলনী চোৰৰ আক্ৰমণত বাহাদুল আলম নিজৰ মটৰচাইকেলৰ পৰা সৰি পৰে আৰু গুৰুতৰভাৱে আঘাতপ্ৰাপ্ত হয়। ঘটনাৰ খবৰ পোৱাৰ লগে লগে আৰক্ষী ঘটনাস্থলীত উপস্থিত হৈছে আৰু সমগ্ৰ ঘটনাটোৰ সন্দৰ্ভত তদন্ত আৰম্ভ কৰিছে।

মৰিগাঁওৰ জাগীৰোডত নগাঁও চিকিৎসা মহাবিদ্যালয়ৰ জ্যেষ্ঠ অধ্যাপক ডা: মনোজ কুমাৰ সিনহাক আটক কৰা হৈছে। ফৰেণচিক বিভাগৰ মুৰব্বী অধ্যাপক ডা: সিনহাৰ বিৰুদ্ধে মৰণোত্তৰ পৰীক্ষাৰ প্ৰতিবেদন সালসলনি কৰাৰ নামত ধন সংগ্ৰহ কৰাৰ অভিযোগ উত্থাপিত হৈছে। এই সন্দৰ্ভত আৰক্ষীয়ে চিকিৎসক গৰাকীৰ AS-01FK-5646 নম্বৰৰ গ্ৰেণ্ড ভিটাৰা বাহনখনো জব্দ কৰিছে।

চতিয়াৰ বৰভেটিৰ দিলদাৰ হুচেইন নামৰ এজন যুৱকে তেওঁৰ ৯ মহীয়া অন্তঃসত্ত্বা পত্নীক এৰি ১৫ বছৰীয়া এগৰাকী নাবালিকাক দ্বিতীয় পত্নী হিচাপে গ্ৰহণ কৰিছে। এই ঘটনাই অসম চৰকাৰে আনিবলগীয়া ইউনিফৰ্ম চিভিল কোড (UCC) আইনক একাংশ লোকে ভৰিৰে মোহাৰি পেলাইছে বুলি তীব্ৰ সমালোচনাৰ সৃষ্টি কৰিছে। দিলদাৰ হুচেইনে দুবছৰ পূৰ্বে তেওঁৰ পৰিয়ালৰ সন্মতিৰে ছাৰ্কেআটি গাঁৱৰ নাচিমান নেছাক সামাজিকভাৱে বিবাহ কৰাইছিল। বিবাহৰ কেইমাহমান পাছত তেওঁ কৰ্মসূত্ৰে কেৰালালৈ গৈছিল আৰু বৰ্তমান তেওঁৰ পত্নী ৯ মাহৰ অন্তঃসত্ত্বা। অভিযোগ অনুসৰি, দিলদাৰ হুচেইনৰ পত্নী নাচিমান নেছাক তেওঁৰ শহুৰ আৰু শাহুৱেকে মানসিক আৰু শাৰীৰিক নিৰ্যাতন চলাই আহিছে। নাহমৰ অন্তঃসত্ত্বা পত্নীৰ কোনো খবৰ নোলোৱা এইগৰাকী স্বামী কিছুদিন পূৰ্বে কেৰালাৰ পৰা নিজ গৃহলৈ ঘূৰি আহিছিল যদিও তেওঁ পিতৃগৃহত থকা পত্নীৰ খবৰ লোৱা নাছিল। বৰঞ্চ, তেওঁৰ পিতৃ-মাতৃৰ সহযোগত বিশ্বনাথৰ পৰা এগৰাকী ১৫ বছৰীয়া নাবালিকাক বিবাহ কৰাই গোপনে কেৰালালৈ পঠিয়াই দিয়ে। এই ঘটনা গম পোৱাৰ পাছতে দিলদাৰ হুচেইনৰ প্ৰথম পত্নী নাচিমান নেছাই চতিয়া আৰক্ষী থানাত এক এজাহাৰ দাখিল কৰিছে। অসম চৰকাৰে প্ৰথমখন বিধানসভা অধিৱেশনতে UCC বিধেয়ক গ্ৰহণ কৰিছিল যদিও একাংশ লোকে ইয়াক গুৰুত্বহীন জ্ঞান কৰি গাৰ কাপোৰ সলনি কৰাৰ দৰে পত্নী সলনি কৰিছে আৰু নাবালিকাক পত্নী হিচাপে গ্ৰহণ কৰিছে। এই নতুন আইনৰ জৰিয়তে এনে লম্পট আৰু ধুরন্ধৰ ব্যক্তিয়ে আইনগত শাস্তি পাবনে নাই, সেয়া সময়তহে জানিব পৰা যাব বুলি কোৱা হৈছে।

আজি মৰিগাঁও জিলা আয়ুক্তৰ কাৰ্যালয়ত কলাগুৰু বিষ্ণু প্ৰসাদ ৰাভাৰ জীৱন আৰু কৰ্মৰাজীক স্মৰণ কৰি বিষ্ণু ৰাভা দিৱস পালন কৰা হয়। এই উপলক্ষে অতিৰিক্ত জিলা আয়ুক্ত শ্ৰীমতী অনসূয়া শৰ্মা আৰু শ্ৰীমতী নীতিশা বৰাকে ধৰি কাৰ্যালয়ৰ সকলো বিষয়ববীয়া আৰু কৰ্মচাৰীয়ে প্ৰখ্যাত শিল্পী, সাহিত্যিক আৰু সমাজ সংস্কাৰক বিষ্ণু প্ৰসাদ ৰাভালৈ গভীৰ শ্ৰদ্ধাঞ্জলি জ্ঞাপন কৰে। অনুষ্ঠানৰ অংশ হিচাপে সকলোৱে সমবেত কণ্ঠত বিষ্ণু প্ৰসাদ ৰাভাৰ গীত পৰিবেশন কৰি অসমীয়া শিল্প, সংস্কৃতি, সাহিত্য, সংগীত আৰু সমাজলৈ তেওঁৰ অতুলনীয় অৱদানক সোঁৱৰণ কৰে।

ছিপাঝাৰৰ দুমুনিচকীত সংঘটিত হৈছে এক চুৰিকাণ্ড। দুমুনিচকীৰ এক দৰিদ্ৰ পৰিয়ালৰ ঘৰত চোৰে অভিযান চলাইছিল। চোৰসমূহে ঘৰখনৰ পৰা এটা ভৰ্তি গেছ চিলিণ্ডাৰ আৰু সাঁচতীয়া ধন লৈ পলায়ন কৰে।

ছিপাঝাৰত ১৫ নং ৰাষ্ট্ৰীয় ঘাইপথত এক অঘটন সংঘটিত হৈছে, য'ত পথৰ কাষৰ বহু পুৰণি এজোপা বিশাল আহঁত গছ এখন ৰখাই থোৱা চাৰিচকীয়া বাহনৰ ওপৰত বাগৰি পৰে। ইয়াৰ ফলত পথচলাচল সম্পূৰ্ণৰূপে বন্ধ হৈ পৰে। সৌভাগ্যক্ৰমে এই ঘটনাত কোনো লোক হতাহত হোৱা নাই যদিও চাৰিচকীয়া বাহনখনৰ যথেষ্ট ক্ষতি হয়। আৰক্ষী প্ৰশাসন আৰু দুৰ্যোগ প্ৰশমন বিভাগৰ লোকসকলে বৰ্তমান গছ কাটি পথ মোকলোৱাৰ কামত ব্যস্ত আছে।