মাকুম মা পৰিবাৰৰ উদ্যোগত মাকুমত এক বিশাল ধৰ্মীয় শোভাযাত্ৰা উলিওৱা হয়। এই আধ্যাত্মিক আৰু বৰ্ণিল শোভাযাত্ৰাত অঞ্চলটোৰ বহু সংখ্যক ভক্তই অংশগ্ৰহণ কৰে। ধৰ্মীয় পৰম্পৰা, নাম-কীৰ্তন আৰু ভক্তিমূলক পৰিৱেশৰ মাজেৰে শোভাযাত্ৰাটিয়ে মাকুমৰ মূল পথসমূহ পৰিভ্ৰমণ কৰে।

আজি ১০ দিনৰ ভিতৰত চতুৰ্থবাৰলৈ পেট্ৰল-ডিজেলৰ মূল্যবৃদ্ধি হোৱাত সাধাৰণ জনতাৰ ওপৰত ইয়াৰ ব্যাপক প্ৰভাৱ পৰিছে। এই মূল্যবৃদ্ধিৰ ফলত তিনিচুকীয়াত আজি পুনৰ পেট্ৰলৰ দাম ২.৭২ টকা আৰু ডিজেলৰ দাম ২.৮৩ টকা বৃদ্ধি পাইছে। পেট্ৰল-ডিজেলৰ মূল্যবৃদ্ধিৰ লগে লগে অত্যাৱশ্যকীয় সামগ্ৰীসমূহৰ দাম আৰু যাত্ৰীৰ ভাড়াও বৃদ্ধি পোৱাৰ দিশে গতি কৰিছে। এই পৰিস্থিতিত জনসাধাৰণে চৰকাৰক অতি সোনকালে পেট্ৰল-ডিজেলৰ লগতে আন অত্যাৱশ্যকীয় সামগ্ৰীৰ মূল্যবৃদ্ধি নিয়ন্ত্ৰণৰ বাবে পদক্ষেপ ল’বলৈ আহ্বান জনাইছে।

তিনিচুকীয়া জিলাৰ ডিগবৈ আৰক্ষী থানাৰ অধীনৰ নাজিৰাটিং তামুলী পৰ্যটনস্থলীত ২০২৫ চনৰ ১৫ আগষ্টত সংঘটিত হোৱা লোহীয়া কলেজৰ ছাত্ৰ আনিন বৰুৱাৰ মৃত্যুৰ ৰহস্য আজিও উন্মোচন হোৱা নাই। জিলাখনৰ ডুমডুমা আৰক্ষী থানাৰ অধীনৰ ১ নং চোটাহাপজানৰ নিবাসী নিলু বৰুৱাই দাবী কৰিছে যে তেওঁৰ ২০ বছৰীয়া পুত্ৰ আনিন বৰুৱাৰ সলিল সমাধিৰ বাবে ভাৰতীয় তেল নিগম জগৰীয়া। নিলু বৰুৱাই জনোৱা মতে, ২০২৫ চনৰ ১৫ আগষ্টত আনিন বৰুৱা আঠজন সতীৰ্থৰ সৈতে নাজিৰাটিং তামুলী পৰ্যটনস্থলীত পিকনিক খাবলৈ গৈছিল। বিয়লি ৪ বজাত পৰ্যটনস্থলীৰ জলপ্ৰপাতত ভাৰতীয় তেল নিগমে ব্যৱহাৰ কৰা পানী নিষ্কাশন মেচিনত লাগি মূৰত আঘাতপ্ৰাপ্ত হৈ আনিন বৰুৱাৰ সলিল সমাধি ঘটে। ঘটনাৰ পিছদিনাই নিলু বৰুৱাই ডিগবৈ আৰক্ষী থানাত এজাহাৰ দাখিল কৰিছিল, যাৰ ২৪ ঘণ্টাৰ পাছত এছডিআৰএফৰ দলে ঘটনাস্থলীৰ পৰা ২০০ মিটাৰ নিলগত আনিনৰ মৃতদেহ উদ্ধাৰ কৰে। নিলু বৰুৱাৰ এজাহাৰৰ ভিত্তিত ডিগবৈ থানাত ০৯/২০২৫ নম্বৰত এটা গোচৰ ৰুজু কৰা হৈছিল আৰু আৰক্ষীয়ে আনিন বৰুৱাৰ মৃতদেহ মৰণোত্তৰ পৰীক্ষাৰ বাবে তিনিচুকীয়া চিকিৎসা মহাবিদ্যালয় চিকিৎসালয়লৈ প্ৰেৰণ কৰিছিল। চিকিৎসা মহাবিদ্যালয় চিকিৎসালয়ৰ ফৰেনছিক মেডিচিন বিভাগৰ ডাঃ উজ্জ্বল চুতীয়াই দাখিল কৰা আনিন বৰুৱাৰ মৰণোত্তৰ পৰীক্ষাৰ প্ৰতিবেদনত কেইবাটাও বিস্ফোৰক তথ্য পোহৰলৈ অহাৰ পিছতো আৰক্ষীয়ে ভাৰতীয় তেল নিগমৰ বিৰুদ্ধে কোনো ব্যৱস্থা নোলোৱাৰ অভিযোগ উত্থাপন কৰিছে নিলু বৰুৱাই। পুত্ৰৰ মৃত্যুৰ সঠিক তদন্ত বিচাৰি নিলু বৰুৱাই ডুমডুমাৰ বিধায়ক ৰূপেশ গোৱালা, ডিগবৈৰ বিধায়ক সুৰেন ফুকন আৰু কেন্দ্ৰীয় মন্ত্ৰী সৰ্বানন্দ সোনোৱালক পত্ৰ প্ৰেৰণ কৰিছিল যদিও আজি পৰ্যন্ত ন্যায় লাভ নকৰাত দুৰ্ভগীয়া পৰিয়ালটোৱে ক্ষোভ প্ৰকাশ কৰিছে। ন্যায়পালিকাৰ ওপৰত আস্থা আৰু বিশ্বাস ৰাখি নিলু বৰুৱাই আজিও পুত্ৰ আনিন বৰুৱাৰ মৃত্যুৰ ন্যায়ৰ বাবে আশা পালি আছে।

আজি অসম জাতীয়তাবাদী যুৱ-ছাত্ৰ পৰিষদৰ যোৰহাট জিলা সমিতিয়ে অত্যাৱশ্যকীয় সামগ্ৰীৰ লগতে পেট্ৰ’ল-ডিজেলকে ধৰি ইন্ধনজাত সামগ্ৰীৰ অব্যাহত মূল্যবৃদ্ধিৰ প্ৰতিবাদত যোৰহাট জিলা আয়ুক্ত কাৰ্যালয়ৰ সন্মুখত এক উত্তাল প্ৰতিবাদী কাৰ্যসূচী ৰূপায়ণ কৰে। সংগঠনটোৱে চৰকাৰ বিৰোধী বিভিন্ন শ্ল’গানেৰে পৰিবেশ উত্তাল কৰি তোলে। প্ৰতিবাদস্থলীত কৰ্মীসকলে উল্লেখ কৰে যে নিত্য প্ৰয়োজনীয় খাদ্য সামগ্ৰী, ৰন্ধন গেছ, পেট্ৰ’ল-ডিজেল আদিৰ মূল্যবৃদ্ধিৰ ফলত সাধাৰণ জনতা জীয়াতু ভুগিছে। তেওঁলোকে বিশেষকৈ দৰিদ্ৰ আৰু মধ্যবিত্ত শ্ৰেণীৰ লোকসকল এই মূল্যবৃদ্ধিৰ ফলত অধিক সমস্যাৰ সন্মুখীন হোৱা বুলি দাবী কৰে। পৰিষদৰ নেতাসকলে চৰকাৰক শীঘ্ৰে মূল্যবৃদ্ধি নিয়ন্ত্ৰণ কৰিবলৈ দাবী জনাইছে। তেওঁলোকে হুংকাৰ দিয়ে যে যদি চৰকাৰে এই সমস্যা সমাধানৰ ক্ষেত্ৰত শীঘ্ৰেই গুৰুত্ব আৰোপ নকৰে, তেন্তে আগন্তক দিনত অধিক তীব্ৰ গণআন্দোলন গঢ়ি তোলা হ’ব। এই প্ৰতিবাদী কাৰ্যসূচীৰ পিছতে, সংগঠনটোৰ যোৰহাট জিলা সমিতিয়ে মুখ্যমন্ত্ৰীলৈ প্ৰেৰণ কৰাৰ উদ্দেশ্যে দাবী সম্বলিত এখন স্মাৰক পত্ৰ জিলা প্ৰশাসনৰ জৰিয়তে দাখিল কৰে।

ধেমাজিৰ নিলখ মিচামাৰী চাপৰি গাঁৱৰ বিকাশ দত্ত নামৰ এজন যুৱক বহিঃৰাজ্য ঝাৰখণ্ডৰ টাটা নগৰ ৰেলৱে ষ্টেচনৰ পৰা নিৰুদ্দেশ হৈছে। তেওঁ যোৱা ১৮ মে' তাৰিখে গাঁৱৰ কেইবাজনো বন্ধুৰ সৈতে ধেমাজিৰ পৰা চেন্নাইলৈ কাম কৰিবলৈ ৰেলেৰে গৈ আছিল। ১৯ মে' তাৰিখে সন্ধিয়া ৫ বজাত বিকাশ দত্তই ফোনযোগে পৰিয়ালৰ সৈতে শেষবাৰৰ বাবে যোগাযোগ কৰিছিল। সেই সময়ত তেওঁ পৰিয়ালক জনাইছিল যে কোনো দুৰ্বৃত্তই তেওঁক আক্ৰমণ কৰিছে। এই ফোনকলৰ পিছৰে পৰা যোৱা ৬ দিনে বিকাশ দত্তৰ সৈতে কোনো যোগাযোগ স্থাপন কৰিব পৰা নাই পৰিয়ালৰ লোকে, যাৰ ফলত তেওঁলোক দিশহাৰা হৈ পৰিছে। পৰিয়ালৰ লোকে ইতিমধ্যে ধেমাজি আৰক্ষী অধীক্ষকৰ কাৰ্যালয়ত এই সন্দৰ্ভত এজাহাৰ দাখিল কৰিছে। বিকাশ দত্তৰ পত্নীয়ে অসমৰ মুখ্যমন্ত্ৰী ডঃ হিমন্ত বিশ্ব শৰ্মাক তেওঁৰ স্বামীক বিচাৰি উলিওৱাত সহায় কৰিবলৈ বিনম্ৰ আহ্বান জনাইছে।

ডিমৌৰ ত্ৰিনয়ন মডাৰ্ণ ডাঞ্চ একাডেমিৰ বিৰিঞ্চি কাকতিৰ তত্বাৱধানত ২৪ মে’ দেওবাৰে ডিমৌৰ জ্যোতি-বিষ্ণু সাংস্কৃতিক প্ৰকল্পত অনুষ্ঠিত হোৱা “Assam Talent Show” (Season 1) ত শিৱসাগৰ নগৰৰ ABCEE স্কুলৰ কণমানি ছাত্ৰী ৰিপান্সী শৰ্মা ভৰদ্বাজে উল্লেখনীয় সাফল্য লাভ কৰিছে। নৃত্য আৰু গীতৰ এই প্ৰতিযোগিতাত ৰিপান্সী শৰ্মা ভৰদ্বাজে যুটীয়াভাৱে প্ৰথম স্থান আৰু দলীয়ভাৱে দ্বিতীয় স্থান অধিকাৰ কৰি শিৱসাগৰলৈ গৌৰৱ কঢ়িয়াই আনিছে। ডিমৌৰ ত্ৰিনয়ন মডাৰ্ণ ডাঞ্চ একাডেমিৰ “ASSAM TALENT SHOW” SEASON-1 ত এই শিশুশিল্পীগৰাকীৰ প্ৰদৰ্শন আছিল প্ৰশংসনীয়।

লখিমপুৰ জিলাৰ আনন্দ বাগানত অনুষ্ঠিত সাপ্তাহিক সোমবৰীয়া বজাৰত মুকলিকৈ মদৰ বজাৰ চলোৱাক লৈ প্ৰতিক্ৰিয়াৰ সৃষ্টি হৈছে। এই সন্দৰ্ভত সাংবাদিকৰ পৰা পোৱা তথ্যৰ ভিত্তিত আবকাৰী বিভাগে এক অভিযান চলায়। আনহাতে, মদৰ বেপাৰৰ দৃশ্যগ্ৰহণ কৰিবলৈ যোৱাৰ সময়ত এগৰাকী গাহৰি বেপাৰীয়ে বাধা প্ৰদান কৰে।

যোৰহাটৰ চিনামৰা স্থিত সন্মিলন কেন্দ্ৰত ২৪ মে' তাৰিখে সদৌ অসম জিলা প্ৰশাসন কৰ্মচাৰী সন্থাৰ কেন্দ্ৰীয় সমিতিৰ দ্বিতীয় কাৰ্যনিৰ্বাহক সভা অনুষ্ঠিত হয়। বন্তি প্ৰজ্বলনেৰে আৰম্ভ হোৱা এই সভাত ৰাজ্যৰ বিভিন্ন জিলাৰ প্ৰতিনিধিসকলে অংশগ্ৰহণ কৰে। সভাত কৰ্মচাৰীসকলৰ দীৰ্ঘদিনীয়া সমস্যা, প্ৰশাসনিক ক্ষেত্ৰত সন্মুখীন হোৱা বিভিন্ন অসুবিধা আৰু কৰ্মচাৰীৰ অধিকাৰ সুৰক্ষাৰ বিষয়কে ধৰি কেইবাটাও সাংগঠনিক তথা কৰ্মচাৰী সমস্যাৰ ওপৰত বিস্তৃত আলোচনা অনুষ্ঠিত হয়। সভাৰ অন্তত অনুষ্ঠিত এক সংবাদমেলৰ জৰিয়তে সন্থাই চৰকাৰৰ ওচৰত কেইবাটাও দাবী উত্থাপন কৰি কৰ্মচাৰীসকলৰ সমস্যাসমূহ অগ্ৰাধিকাৰ ভিত্তিত সমাধান কৰিবলৈ আহ্বান জনায়।

লখিমপুৰ জিলাৰ চাউলধোৱা আৰক্ষী চকীৰ অধীনস্থ কণানদী আৰু থেকেৰাগুৰি অঞ্চলত সংঘটিত এক পথ দুৰ্ঘটনাত এগৰাকী লোক আহত হৈছে। এই দুৰ্ঘটনাৰ পিছতে চাউলধোৱা আৰক্ষীয়ে ঘটনাস্থলীৰ পৰা দুৰ্ঘটনাগ্ৰস্ত দুয়োখন বাহন জব্দ কৰিছে।

ৰাজ্যত 'সবকা সাথ, সৱকা বিকাশ'ৰ শ্লোগানেৰে উন্নয়নৰ ফটা ঢোল বজাই তৃতীয় বাৰৰ বাবে শাসনত অধিষ্ঠিত তথাকথিত উন্নয়নকামী বিজেপি নেতৃত্বাধীন ৰাজ্য চৰকাৰৰ দিনত উন্নয়নৰ বাস্তৱ ছবিখন লখিমপুৰৰ দীৰ্ঘা মাজ গাঁৱত স্পষ্ট হৈ পৰিছে। স্বাধীনতাৰ পূৰ্বেই গঠিত, অথচ আজি পৰ্যন্ত উন্নয়নৰ মুখ নেদেখা, বৃহৎ জনবসতিপূৰ্ণ এই গাঁওখন লখিমপুৰ বিধানসভা সমষ্টিৰ বগীনদী উন্নয়ন খণ্ডৰ অন্তৰ্গত চিয়াজুলি পঞ্চায়তত অৱস্থিত। জনপ্ৰতিনিধি আৰু বিভাগীয় কৰ্তৃপক্ষৰ দ্বাৰা অৱহেলিত এই গাঁওখনত আজিও এখন ভাল পথ নাই। মেৰামতিৰ অভাৱত পথৰ ওপৰত সৃষ্টি হোৱা পুখুৰীসদৃশ গাঁতবোৰৰ ফলত বাৰিষাৰ বতৰত বোকা আৰু কদৰ্যময় পথেৰে যাতায়াত কৰিবলৈ গাঁওবাসী বাধ্য হৈ পৰে। চৰকাৰৰ তথাকথিত উন্নয়নৰ আশা বাদ দি, গাঁওবাসীয়ে নিজৰ গাঁঠিৰ ধন আৰু শ্ৰম দান কৰি নিজৰ পথ নিজেই নিৰ্মাণ কৰিছে। এই ঘটনাই চৰকাৰী তথাকথিত উন্নয়নৰ বিপৰীতে এখন গাঁৱৰ দুৰৱস্থা উন্মোচন কৰিছে, য'ত দীৰ্ঘা মাজ গাঁৱৰ ৰাইজে চুবুৰীয়ে চুবুৰীয়ে নিজৰ ধন আৰু শ্ৰম দানেৰে বাট-পথ মেৰামতি কৰিবলৈ বাধ্য হৈছে।