दिल्लीत विद्यार्थ्यांवर झालेल्या कथित लाठीमाराच्या विरोधात महाराष्ट्र बंद दरम्यान नाशिक येथील गरवारे पॉईंटवर जोरदार निदर्शने करण्यात आली. मार्शल ग्रुप आणि संघर्षयोद्धा प्रशांत भाऊ खरात यांच्या नेतृत्वाखाली पार पडलेल्या या आंदोलनात प्रदर्शनकर्त्यांनी केंद्र सरकारविरोधात जोरदार घोषणाबाजी केली व विद्यार्थ्यांसाठी न्यायाची मागणी केली. या रास्ता रोको आंदोलनादरम्यान पोलिसांनी प्रशांत भाऊ खरात यांच्यासह अनेक आंदोलनकर्त्यांना ताब्यात घेतले आहे.

नाशिक येथील नवीन नाशिक सेंटर पार्क येथे स्वर्गीय अजित दादा पवार यांची जयंती मोठ्या उत्साहात साजरी करण्यात आली आहे. दिनांक 22 जुलै 2026 रोजी पार पडलेल्या या कार्यक्रमात मंत्री छगन भुजबळ यांची विशेष उपस्थिती होती. नवीन नाशिक परिसरातील सेंटर पार्कमध्ये मंत्री छगन भुजबळ यांच्या उपस्थितीत हा जयंती सोहळा अत्यंत उत्साही वातावरणात पार पडला.

दिल्लीतील जंतर-मंतरपासून ते बिहारपर्यंत NEET पेपर लीक आणि परीक्षा व्यवस्थेबाबत विद्यार्थ्यांचे आंदोलन अत्यंत तीव्र झाले आहे. या मुद्द्यावरून विद्यार्थ्यांचे विरोध प्रदर्शन सातत्याने सुरूच आहे. या दरम्यान पंतप्रधान नरेंद्र मोदी यांचे मोठे विधान समोर आले आहे. या घडामोडींनंतर आता सरकार याप्रकरणी काही मोठी कारवाई करण्यास जात आहे का, याकडे सर्वांचे लक्ष लागले आहे.

नाशिक दौऱ्यादरम्यान मंत्री छगन भुजबळ यांनी राष्ट्रवादी काँग्रेसमधील कोणाचेही नाव न घेता अप्रत्यक्ष शब्दांत जोरदार टीका केली आहे. स्व. अजितदादांच्या निधनानंतर सत्तेची पोकळी निर्माण झाली असताना अनेकांनी त्यात स्थान मिळवण्याचा प्रयत्न केला, मात्र पक्षाने ते होऊ दिले नाही आणि पक्ष ठाम राहिला, असे छगन भुजबळ यांनी स्पष्ट केले. पुढे बोलताना त्यांनी सांगितले की, सुनेत्रा पवार यांना उपमुख्यमंत्री व पक्षाच्या राष्ट्रीय अध्यक्षपदाची जबाबदारी अत्यंत सन्मानाने देण्यात आली आहे. अनुभवातूनच नेतृत्व घडते, त्यामुळे त्यांच्या नेतृत्वाला सर्वांनी पाठबळ द्यावे, असे आवाहनही भुजबळ यांनी केले.

संगमनेर तालुक्यातील उपविभागीय अधिकारी कार्यालयावर सकल मातंग समाजाच्या विविध मागण्या आणि अनुसूचित जाती आरक्षणाचे (अ, ब, क, ड) वर्गीकरण करण्याच्या संदर्भात भव्य जनआक्रोश मोर्चा काढण्यात आला. या मोर्चात संगमनेर तालुक्यातील मातंग समाजाचे नेते आणि आंदोलक मोठ्या संख्येने सहभागी झाले होते. आंदोलनात एकत्र आलेल्या लोकांनी विविध मागण्यांवरून सरकारला थेट जाब विचारला. या जनआक्रोश मोर्च्यादरम्यान उपविभागीय अधिकाऱ्यांना निवेदन देण्यात आले. या निवेदनाद्वारे महाराष्ट्र राज्याचे मुख्यमंत्री देवेंद्र फडणवीस यांनी या संपूर्ण विषयाची दखल घेऊन योग्य तो पाठपुरावा करावा, अशी आग्रही मागणी सकल मातंग समाजाच्या वतीने करण्यात आली आहे.

नाशिकच्या जयभवानी रोड परिसरात कोयत्याचा धाक दाखवून दहशत माजवणारा सराईत गुन्हेगार विजय उर्फ छंगा बेहनवाल आणि त्याच्या टोळीतील तिघांना गुन्हे शाखेच्या गुंडा विरोधी पथकाने पुणे जिल्ह्यातील नारायणगाव येथून अटक केली आहे. २० जुलै रोजी रात्री जुन्या वादातून फिर्यादीच्या भावावर कोयत्याने हल्ला करण्यात आला होता. त्यानंतर घरावर कोयत्याने वार करून आणि सार्वजनिक रस्त्यावर शस्त्रांचे प्रदर्शन करत परिसरात दहशत निर्माण करण्यात आली होती. या प्रकरणी २१ जुलै रोजी उपनगर पोलीस ठाण्यात गुन्हा दाखल करण्यात आला होता. गुन्ह्यानंतर आरोपी शहरातून फरार झाले होते. पोलीस आयुक्त संदीप कर्णिक, गुन्हे शाखेचे पोलीस उपायुक्त किरणकुमार चव्हाण आणि सहाय्यक पोलीस आयुक्त संदीप मिटके यांच्या मार्गदर्शनाखाली गुंडा विरोधी पथकाने तपास सुरू केला. पोलिसांनी सिन्नर, संगमनेर मार्गे नारायणगावपर्यंत आरोपींचा पाठलाग केला. सिन्नरमधील दोन कला केंद्रांवर छापे टाकल्यानंतर अखेर नारायणगाव येथील एका कला केंद्रात आरोपी लपल्याची खात्रीशीर माहिती मिळताच पोलिसांनी वेढा घातला. तेथून विजय उर्फ छंगा सरजित बेहनवाल (२८), योगेश उर्फ काका प्रल्हाद आहेर (४३), प्रदीप उर्फ गणेश विठ्ठल काळे (२६) आणि सचिन उर्फ अन्नू राधेकिशन गवंडर (३२) या चौघांना ताब्यात घेण्यात आले. चौकशीत आरोपींनी सिन्नरहून पुण्याकडे जाताना संगमनेरमधील एका बारमध्ये "आम्ही नाशिकचे भाई आहोत, आम्हाला फुकट दारू द्या" अशी दमदाटी करून बारचालकाला शिवीगाळ केल्याचे निष्पन्न झाले, ज्याप्रकरणी संगमनेर शहर पोलीस ठाण्यात स्वतंत्र गुन्हा दाखल आहे. पोलिसांच्या माहितीनुसार, विजय उर्फ छंगा आणि त्याच्या साथीदारांवर नाशिकरोड व उपनगर पोलीस ठाण्यांत तोडफोड, मारामारी आणि दहशत माजविणे यांसारखे १० ते १२ गंभीर गुन्हे नोंद आहेत. ही टोळी फर्नाडीस वाडी परिसरातील बेरोजगार तरुणांना हाताशी धरून गुन्हेगारी करत होती. गुंडा विरोधी पथकाचे पोलीस उपनिरीक्षक संदीप पवार व त्यांच्या पथकाने केलेल्या या कारवाईमुळे जयभवानी रोड, नाशिकरोड आणि उपनगर परिसरातील नागरिक व व्यापाऱ्यांनी सुटकेचा श्वास सोडला असून अटक केलेल्या चौघांना पुढील तपासासाठी उपनगर पोलिसांच्या ताब्यात देण्यात आले आहे.

गेल्या दोन ते तीन दिवसांपासून सुरू असलेल्या मुसळधार पावसामुळे गोदावरी नदीला यंदाचा दुसरा पूर आला आहे. धरण पाणलोट क्षेत्रात पावसाचा जोर कायम असल्याने नदीच्या पाणीपातळीत झपाट्याने वाढ झाली आहे. निफाड तालुक्यातील चांदोरी गावचे ग्रामदैवत असलेल्या श्री खंडेराव महाराज मंदिराला पुराच्या पाण्याचा वेढा पडला आहे. तसेच चांदोरी आणि सायखेडा गावाला जोडणाऱ्या पुलाजवळ मोठ्या प्रमाणात पानवेल अडकल्याने नदीच्या प्रवाहात अडथळा निर्माण झाला असून परिसरातील शेती आणि पुलाच्या पायांना धोका निर्माण होण्याची शक्यता व्यक्त होत आहे. या परिस्थितीचे गांभीर्य लक्षात घेऊन निफाड प्रशासन तातडीने अलर्ट मोडवर आले आहे. चांदोरी व गोदाकाठच्या सर्व सरपंचांसह चांदोरी आणि सायखेडा येथील प्रशासकीय अधिकारी व समाजसेवकांनी पानवेल काढण्यासाठी केलेल्या पाठपुराव्याला यश आले असून प्रशासनाने पानवेल काढण्याचे काम सुरू केले आहे. सर्व प्रशासकीय अधिकारी सध्या घटनास्थळी उपस्थित राहून परिस्थितीवर लक्ष ठेवून आहेत. प्रशासनाने नागरिकांना नदीकाठच्या परिसरात न जाण्याचे आवाहन केले असून आज चांदोरी-सायखेडा पूल दोन तासांसाठी बंद ठेवण्यात येणार आहे.

नाशिकरोड परिसरात दुपारच्या वेळी घरात एकट्या असलेल्या महिलांना लक्ष्य करून विनयभंग करणाऱ्या 'सायको' आरोपीला गुन्हेशाखा युनिट-२ ने अवघ्या दोन दिवसांत अटक केली आहे. या प्रकरणी नाशिकरोड पोलीस ठाण्यात भारतीय न्याय संहिता कलम ७४, ३३३ आणि ३५१(२) अन्वये गुन्हा दाखल करण्यात आला होता. महिलांच्या सुरक्षेशी संबंधित संवेदनशील गुन्हा असल्याने गुन्हेशाखा युनिट-२ ने तातडीने तपास सुरू केला. तपासादरम्यान घटनास्थळ व परिसरातील तब्बल ७५ सीसीटीव्ही फुटेजची बारीक पडताळणी करण्यात आली. याद्वारे काळ्या रंगाच्या मोटारसायकलवर फिरणाऱ्या संशयिताचा माग काढण्यात पोलिसांना यश आले. तांत्रिक विश्लेषण आणि गोपनीय माहितीच्या आधारे आरोपीची ओळख अभिलाष अंकुश थोरात (वय ३५, रा. संजयगांधी नगर, उपनगर, नाशिकरोड) अशी पटली. गुन्हेशाखेला मिळालेल्या माहितीच्या आधारे विहीतगाव येथील आण्णा गणपती पुलाजवळ सापळा रचून आरोपीला ताब्यात घेण्यात आले. पोलीस चौकशीत आरोपीने गुन्ह्याची कबुली दिली असून त्याच्याकडून गुन्ह्यात वापरलेली सुमारे ५० हजार रुपये किमतीची काळ्या रंगाची होंडा मोटारसायकल जप्त करण्यात आली आहे. आरोपीला पुढील तपासासाठी नाशिकरोड पोलीस ठाण्याच्या ताब्यात देण्यात आले आहे. ही कारवाई पोलीस आयुक्त संदीप कर्णिक, पोलीस उपायुक्त (गुन्हे) किरणकुमार चव्हाण आणि सहायक पोलीस आयुक्त संदीप मिटके यांच्या मार्गदर्शनाखाली गुन्हेशाखा युनिट-२ चे प्रभारी अधिकारी हेमंत तोडकर, डॉ. समाधान हिरे, संजय सानप, शंकर काळे व त्यांच्या पथकाने केली.