హనుమకొండ జిల్లాలోని సుబేదారి పోలీస్ స్టేషన్ పరిధిలో టాస్క్‌ఫోర్స్ పోలీసులు పేకాట స్థావరంపై ఆకస్మికంగా దాడి నిర్వహించారు. విశ్వసనీయ సమాచారం మేరకు, హంటర్ రోడ్డులోని డీ-లైట్ హోటల్‌లో పేకాట ఆడుతున్న ఎనిమిది మందిని అదుపులోకి తీసుకున్నారు. నిందితుల వద్ద నుంచి రూ.33,430 నగదు, 10 మొబైల్ ఫోన్లు, పేక ముక్కలు, స్కోర్ స్లిప్, అలాగే TS24H6663 నంబర్ గల క్రెటా కారును టాస్క్‌ఫోర్స్ బృందం స్వాధీనం చేసుకుంది. పట్టుబడిన వ్యక్తులను, స్వాధీనం చేసుకున్న వస్తువులతో కలిసి తదుపరి చట్టపరమైన చర్యల కోసం సుబేదారి పోలీస్ స్టేషన్‌కు అప్పగించినట్లు టాస్క్‌ఫోర్స్ అధికారులు వెల్లడించారు. ఈ దాడిలో ఏసీపీ ఎ. మధుసూదన్, ఇన్‌స్పెక్టర్లు కె. శ్రీధర్, టీ. వీరస్వామి, ఇతర టాస్క్‌ఫోర్స్ సిబ్బంది పాల్గొన్నారు.

హనుమకొండ జిల్లాలోని సుబేదారి పోలీస్ స్టేషన్ పరిధిలో టాస్క్‌ఫోర్స్ పోలీసులు పేకాట స్థావరంపై ఆకస్మికంగా దాడి నిర్వహించారు. విశ్వసనీయ సమాచారం మేరకు, హంటర్ రోడ్డులోని డీ-లైట్ హోటల్‌లో పేకాట ఆడుతున్న ఎనిమిది మందిని అదుపులోకి తీసుకున్నారు. నిందితుల వద్ద నుంచి రూ.33,430 నగదు, 10 మొబైల్ ఫోన్లు, పేక ముక్కలు, స్కోర్ స్లిప్, అలాగే TS24H6663 నంబర్ గల క్రెటా కారును టాస్క్‌ఫోర్స్ బృందం స్వాధీనం చేసుకుంది. పట్టుబడిన వ్యక్తులను, స్వాధీనం చేసుకున్న వస్తువులతో కలిసి తదుపరి చట్టపరమైన చర్యల కోసం సుబేదారి పోలీస్ స్టేషన్‌కు అప్పగించినట్లు టాస్క్‌ఫోర్స్ అధికారులు వెల్లడించారు. ఈ దాడిలో ఏసీపీ ఎ. మధుసూదన్, ఇన్‌స్పెక్టర్లు కె. శ్రీధర్, టీ. వీరస్వామి, ఇతర టాస్క్‌ఫోర్స్ సిబ్బంది పాల్గొన్నారు.

నిజామాబాద్ రూరల్ పరిధిలోని ఇందల్వాయి మండలంలోని ఎల్లారెడ్డిపల్లి గ్రామంలో చిరుతపులి సంచారం స్థానికులలో తీవ్ర కలకలం రేపింది. మంగళవారం అర్ధరాత్రి సమయంలో, రైతు ధర్మాయి శ్రావణ్‌కు చెందిన కోళ్ల ఫారం వద్ద చిరుత సంచరించింది. ఈ దృశ్యాలు ఫారంలో ఏర్పాటు చేసిన సీసీ కెమెరాల్లో స్పష్టంగా రికార్డు అయ్యాయి. స్థానికుల కథనం ప్రకారం, చిరుత కోళ్ల ఫారంలోకి ప్రవేశించేందుకు ప్రయత్నించింది, అయితే అక్కడ ఉన్న కుక్కలు గట్టిగా మొరగడంతో అది వెనుదిరిగినట్లు తెలుస్తోంది. ఈ ఘటనతో గ్రామస్థులు తీవ్ర భయాందోళనలకు గురయ్యారు. చిరుత గ్రామ శివార్లలో సంచరిస్తోందన్న సమాచారం వ్యాపించడంతో రైతులు, ఇతర గ్రామ ప్రజలు అప్రమత్తమయ్యారు. ముఖ్యంగా రాత్రి వేళల్లో పొలాలకు వెళ్లడం మరియు పశువుల సంరక్షణ చేపట్టడం పట్ల వారు తీవ్ర ఆందోళన వ్యక్తం చేస్తున్నారు. గ్రామస్థులు అటవీ శాఖ అధికారులను తక్షణమే స్పందించాలని కోరుతున్నారు. చిరుత జాడను వెంటనే గుర్తించి బోన్లు ఏర్పాటు చేయాలని, గ్రామ పరిసర ప్రాంతాల్లో అటవీ శాఖ అధికారులు నిరంతర గస్తీ నిర్వహించాలని, ప్రజల భద్రత కోసం అవసరమైన చర్యలు వెంటనే చేపట్టాలని వారు విజ్ఞప్తి చేశారు. అలాగే, ప్రజలు అప్రమత్తంగా ఉండాలని, రాత్రి వేళల్లో ఒంటరిగా బయటకు వెళ్లకుండా తగిన జాగ్రత్తలు పాటించాలని అధికారులు సూచించాలని గ్రామస్థులు కోరుతున్నారు.

వర్ధన్నపేట మండలం ఇల్లంద గ్రామంలో లూమినిస్ హాస్పిటల్, బాల వికాస సంస్థల ఆధ్వర్యంలో ఒక ఉచిత మహిళా ఆరోగ్య శిబిరం నిర్వహించారు. డాక్టర్ సంధ్యారాణి పర్యవేక్షణలో వైద్య బృందం మహిళలకు ఆరోగ్య పరీక్షలు నిర్వహించి, వారికి అవసరమైన సూచనలు అందించింది. ఈ శిబిరానికి గ్రామ మహిళల నుంచి విశేష స్పందన లభించింది. ఈ కార్యక్రమంలో వైద్య సిబ్బంది, స్థానిక సర్పంచ్ బేతి సాంబయ్య, కాంగ్రెస్ మండల అధ్యక్షుడు పోశాల వెంకన్న గౌడ్, బీఆర్‌ఎస్ మండల అధ్యక్షుడు తూళ్ల కుమారస్వామి తదితరులు పాల్గొన్నారు. గ్రామీణ ప్రాంత మహిళలకు ఇలాంటి ఆరోగ్య శిబిరాలు ఎంతో ఉపయోగకరమని ఈ సందర్భంగా పలువురు పేర్కొన్నారు.

నర్సంపేట మాజీ ఎమ్మెల్యే పెద్ది సుదర్శన్ రెడ్డి ఉమ్మడి వరంగల్ జిల్లాలో నెలకొన్న కరువు పరిస్థితులు, దేవాదుల ప్రాజెక్టు నిర్వహణపై మీడియాతో మాట్లాడుతూ రాష్ట్ర ప్రభుత్వం సాగునీటి ప్రాజెక్టుల నిర్వహణలో పూర్తిగా విఫలమైందని ఆరోపించారు. సాంకేతిక నిపుణుల పర్యవేక్షణ లేకుండానే దేవాదుల ప్రాజెక్టు మోటార్లను ప్రారంభించడం వల్ల అనేక సమస్యలు తలెత్తాయని ఆయన స్పష్టం చేశారు. రైతులకు సాగునీరు అందించి, కరువు పరిస్థితులను నివారించాలని ప్రభుత్వాన్ని డిమాండ్ చేసిన పెద్ది సుదర్శన్ రెడ్డి, దేవాదుల ప్రాజెక్టును తక్షణమే వినియోగంలోకి తీసుకురావాలని నొక్కి చెప్పారు.

సిద్దిపేట జిల్లాలోని హుస్నాబాద్‌లో ఉమ్మడి ఆంధ్రప్రదేశ్ మాజీ ముఖ్యమంత్రి, దివంగత డాక్టర్ వై.ఎస్. రాజశేఖర్ రెడ్డి జయంతి వేడుకలను కాంగ్రెస్ పార్టీ నాయకులు, అభిమానులు అత్యంత ఘనంగా నిర్వహించారు. ఈ సందర్భంగా వారు వై.ఎస్. రాజశేఖర్ రెడ్డి చిత్రపటానికి పూలమాలలు వేసి నివాళులర్పించారు. ఈ కార్యక్రమంలో పాల్గొన్న కాంగ్రెస్ పార్టీ సీనియర్ నాయకుడు కేడం లింగమూర్తి మాట్లాడుతూ, ముఖ్యమంత్రిగా వై.ఎస్. రాజశేఖర్ రెడ్డి నాడు ప్రవేశపెట్టిన పథకాలు నేటికీ కొనసాగుతున్నాయని అన్నారు. ఆయన దుర్మరణం చెంది 17 సంవత్సరాలు గడుస్తున్నా, నేటికీ ఉమ్మడి రాష్ట్ర ప్రజల గుండెల్లో చిరస్థాయిగా నిలిచిపోయారని లింగమూర్తి గుర్తుచేశారు. హుస్నాబాద్ మెట్ట ప్రాంతానికి వరప్రదాయినిగా భావించే గౌరవెల్లి, గండిపల్లి ప్రాజెక్ట్‌లకు ఆయన కాలంలోనే శంకుస్థాపనలు జరిగాయని వివరించారు. ప్రస్తుత ప్రజా పాలన ప్రభుత్వం, ముఖ్యమంత్రి రేవంత్ రెడ్డి వై.ఎస్. రాజశేఖర్ రెడ్డి ఆశయాలను స్ఫూర్తిగా తీసుకొని ముందుకు సాగుతున్నారని లింగమూర్తి పేర్కొన్నారు.

కరీంనగర్ జిల్లాలోని చిగురుమామిడి మండలం రేకొండ గ్రామంలో బిఆర్ఎస్ పార్టీ ఆధ్వర్యంలో గ్రామస్తులు తీవ్ర నిరసన చేపట్టారు. రేకొండ గ్రామం నుండి ఎగ్లాస్పూర్ గ్రామానికి వెళ్లే తొక్కుడు బండల వాగుపై బ్రిడ్జి నిర్మించాలని డిమాండ్ చేస్తూ టెంటు వేసుకొని ఆందోళన వ్యక్తం చేశారు. గ్రామం చుట్టూ ఉన్న లో లెవెల్ రహదారులపై కూడా బ్రిడ్జిలను నిర్మించాలని వారు కోరారు. స్థానిక ఎమ్మెల్యే, మంత్రి పొన్నం ప్రభాకర్ ఎన్నికల ప్రచారంలో ఇచ్చిన హామీ మేరకు వాగుపై బ్రిడ్జిని నిర్మించాలని గ్రామస్తులు డిమాండ్ చేశారు. వర్షాకాలంలో వాగు ప్రవాహం పెరిగి, వాగుకు అవతలి వైపు ఉన్న ఊర్లకు, పంట పొలాలకు వెళ్లడానికి ఇబ్బందిగా మారుతోందని రైతులు, గ్రామస్తులు ఆవేదన వ్యక్తం చేశారు. వాగులో ఉన్న బండలు నీటి ప్రవాహానికి పాకురు పడుతుండడంతో వాటిపై నుండి వెళ్లే వాహనదారులు, రైతులు జారిపడి తీవ్ర గాయాల పాలవుతున్నారని తెలిపారు. వాగు ప్రవాహం పెరిగిన సమయంలో అవతలి వైపు వెళ్లాలంటే 10 నుండి 15 కిలోమీటర్ల దూరం తిరిగి ప్రయాణించాల్సి వస్తోందని పేర్కొన్నారు. గత బిఆర్ఎస్ ప్రభుత్వ హయాంలో బ్రిడ్జిల నిర్మాణానికి నిధులు మంజూరైనప్పటికీ, ఇంతవరకు నిర్మాణం చేపట్టలేదని బిఆర్ఎస్ నాయకులు ఆరోపించారు. ఈ విషయమై వెంటనే మంత్రి పొన్నం ప్రభాకర్ స్పందించి బ్రిడ్జిల నిర్మాణం చేపట్టి తమ ఇబ్బందులను తొలగించాలని విజ్ఞప్తి చేశారు. బ్రిడ్జిల నిర్మాణం వెంటనే చేపట్టకుంటే తీవ్ర ఆందోళనలు చేపడతామని, ఉద్యమాన్ని మరింత ఉధృతం చేస్తామని వారు హెచ్చరించారు.

ములుగు జిల్లా కేంద్రంలోని జిల్లా పరిషత్ బాలుర ఉన్నత పాఠశాలలో సీపీఎస్ ఉద్యోగుల సంఘం (TSCPSEU) ఆధ్వర్యంలో జనజాగరణ యాత్రకు సంబంధించిన వాల్ పోస్టర్‌ను ఆవిష్కరించారు. ఈ సందర్భంగా ఉద్యోగులు సీపీఎస్ (కాంట్రిబ్యూటరీ పెన్షన్ స్కీమ్)ను తక్షణమే రద్దు చేసి, ఓపీఎస్ (పాత పెన్షన్ విధానం)ను పునరుద్ధరించాలని తమ డిమాండ్‌ను గట్టిగా వినిపించారు. జూలై 28న ములుగు జిల్లాకు చేరుకోనున్న ఈ జనజాగరణ యాత్రను విజయవంతం చేయడానికి ఉద్యోగులు, ఉపాధ్యాయులు పెద్ద సంఖ్యలో పాల్గొనాలని సంఘం నాయకులు పిలుపునిచ్చారు.

నర్సంపేట మాజీ శాసనసభ్యులు పెద్ది సుదర్శన్ రెడ్డి మీడియాతో మాట్లాడుతూ, తెలంగాణ రాష్ట్ర రైతులను రేవంత్ సర్కార్ నట్టేట ముంచే పని చేస్తోందని తీవ్ర ఆరోపణలు చేశారు. కాంగ్రెస్ పార్టీ ప్రభుత్వం ఏర్పడినప్పటి నుండి నేటి వరకు రైతులకు కేవలం మోసాలే మిగిలాయని ఆయన అన్నారు. రాష్ట్రంపై 'లెనినో ప్రభావం' ఉందని సంవత్సరం నుండి ముందస్తు హెచ్చరికలు ఉన్నప్పటికీ, రాష్ట్ర ప్రభుత్వంలో సాగునీటి ప్రాజెక్టులపై ఎలాంటి చలనం లేదని ఆయన విమర్శించారు. గత కేసీఆర్ ప్రభుత్వం ఉమ్మడి వరంగల్ జిల్లా జలప్రధాయిని అయిన దేవాదుల ప్రాజెక్టులోని ఫేస్ వన్, ఫేస్ టూ, ఫేస్ త్రీలను అద్భుతంగా పూర్తి చేసిందని, నాలుగు ఐదు సంవత్సరాల పాటు రెండు పంటలకు సమృద్ధిగా సాగునీరు అందించిందని, భూగర్భ జలాలను నింపిందని పెద్ది సుదర్శన్ రెడ్డి గుర్తుచేశారు. ప్రస్తుతం, దేవాదుల ప్రాజెక్టులో ఫేస్ వన్ లో రెండు మోటార్లు, ఫేస్ టూ లో రెండు మోటార్లు, ఫేస్ త్రీ లో ఆరు మోటార్లు, మొత్తంగా 10 మోటార్లను ప్రారంభించాల్సిన అవసరం ఉందని ఆయన పేర్కొన్నారు. అయితే, నిన్న హరీష్ రావు గారి పి.పి.టి. ప్రజెంటేషన్ తర్వాత రాష్ట్ర ప్రభుత్వం దేవాదుల మోటార్లను ఆన్ చేసే ప్రయత్నం చేసిందని, ఇంజనీర్లకు, టెక్నికల్ ఎక్స్పర్ట్‌లకు ముందస్తు సమాచారం ఇవ్వకుండా మోటార్లను ఆన్ చేయడంతో పవర్ సప్లై పూర్తిగా దెబ్బతిందని ఆయన వెల్లడించారు. ముందుచూపులేని, ఇలాంటి అనాలోచిత నిర్ణయాలతో సాగునీటి ప్రాజెక్టులను ముందుకు సాగకుండా కుట్రలు చేస్తున్నారని ఆయన ఆరోపించారు. ఉమ్మడి జిల్లా రైతులను అరిగోస పెడుతున్నారని, ఈరోజు నార్లు పోసుకునే పరిస్థితి లేదని, పత్తికి నీళ్లు అందే పరిస్థితి లేదని పెద్ది సుదర్శన్ రెడ్డి ఆవేదన వ్యక్తం చేశారు. అధికార పార్టీ ఎమ్మెల్యే కడియం శ్రీహరి కూడా నిన్న హరీష్ రావు గారు దేవాదుల ప్రాజెక్టు గురించి చెప్పిన విషయాన్ని సమర్థిస్తూ, ప్రాజెక్టును ఉపయోగించి రైతులకు నీళ్లు ఇవ్వాలని చెప్పిన విషయాన్ని ఆయన ప్రస్తావించారు. ఈ జిల్లాకు ప్రాతినిధ్యం వహిస్తున్న మంత్రులకు, ఎమ్మెల్యేలకు రైతులకు నీళ్లు ఇవ్వాలన్న కనీస సోయి, ప్రాజెక్టుల పైన అవగాహన లేకపోవడం దురదృష్టకరమని ఆయన అన్నారు. ఉమ్మడి వరంగల్ జిల్లా (ఆరు జిల్లాలలో) ఎక్కడ కూడా వర్షబావా పరిస్థితుల పైన, సాగునీటి ప్రాజెక్టుల పైన ఒక్క సమీక్ష కూడా నిర్వహించలేదని ఆయన విమర్శించారు. లక్షలాది మంది రైతుల పంట పొలాలకు సాగునీరు అందించే దేవాదుల ప్రాజెక్టు మోటార్లను హడావుడిగా పంపులు ఆన్ చేయడంతో, అవి పాడైపోయి భవిష్యత్తులో పనికిరాకుండా మారే ప్రమాదం ఉందని పెద్ది సుదర్శన్ రెడ్డి హెచ్చరించారు. సాగునీటి ప్రాజెక్టుల పైన అవగాహన లేని ముఖ్యమంత్రి, ఇరిగేషన్ మంత్రి, అధికారులతో రైతులు కరువును ఎదుర్కొనే పరిస్థితి వచ్చిందని ఆయన అన్నారు. రైతులకు సాగునీరు ఇస్తే బోనస్, రైతు భరోసా, యూరియా, పంటల కొనుగోలు చేయాల్సి వస్తుందని కావాలని కుట్రతోనే రేవంత్ సర్కార్ సాగునీటి ప్రాజెక్టులను ఉపయోగించడం లేదని ఆయన తీవ్ర ఆరోపణ చేశారు. ఉమ్మడి జిల్లాలో కరువుకు కాంగ్రెస్ పార్టీనే కారణమని, రైతులకు జరిగే పంట నష్టానికి ముఖ్యమంత్రి, ఈ జిల్లా మంత్రులు, ఎమ్మెల్యేలు, అధికారులు పూర్తి బాధ్యత వహించాలని, భవిష్యత్తులో కాంగ్రెస్ ప్రభుత్వం దీనికి తగిన మూల్యం చెల్లించుకోక తప్పదని పెద్ది సుదర్శన్ రెడ్డి స్పష్టం చేశారు.