ডিগবৈৰ যোগেন পাটোৱাৰীয়ে শাৰীৰিক প্ৰতিবন্ধকতাবোৰ নেওচি বিশ্ব মঞ্চত নিজৰ প্ৰতিভা প্ৰদৰ্শন কৰিবলৈ সাজু হৈছে। তেওঁ ৰাষ্ট্ৰীয় পৰ্যায়ৰ এক প্ৰতিযোগিতাত তিনিটা সোণৰ পদককে ধৰি মুঠ চাৰিটা পদক জয়েৰে জাপানত অনুষ্ঠিত হ'বলগীয়া বিশ্ব পাঞ্জা প্ৰতিযোগিতালৈ যোগ্যতা অৰ্জন কৰিছে। অৱশ্যে, বৰ্তমান আৰ্থিক সহায়ৰ অভাৱে যোগেন পাটোৱাৰীক ক্ষোভিত কৰি তুলিছে। এই সন্দৰ্ভত, টাই আহোম যুৱ পৰিষদে চৰকাৰৰ ক্ৰীড়া বিভাগক শীঘ্ৰে হস্তক্ষেপ কৰিবলৈ দাবী জনাইছে যাতে তেওঁৰ বিশ্ব প্ৰতিযোগিতাত অংশগ্ৰহণ সুনিশ্চিত হয়।

ভাৰত চৰকাৰৰ পেট্ৰ’লিয়াম আৰু প্ৰাকৃতিক গেছ মন্ত্ৰী শ্ৰদ্ধেয় হৰদীপ সিং পুৰী দুলীয়াজানত উপস্থিত হয়। তেওঁ দুলীয়াজানত অৱস্থিত অইলৰ মুখ্য কাৰ্যালয় পৰিদৰ্শন কৰাৰ লগতে বিভিন্ন আন ঠাইতো ভ্ৰমণ কৰে। এই ভ্ৰমণকালত মন্ত্ৰী ৰামেশ্বৰ তেলীয়ে পেট্ৰ’লিয়াম আৰু প্ৰাকৃতিক গেছ মন্ত্ৰী শ্ৰদ্ধেয় হৰদীপ সিং পুৰীৰ সৈতে সাক্ষাৎকাৰ কৰে।

চৰাইদেউ জিলাৰ সোণাৰিৰ ১৫ নং ৱাৰ্ডৰ টিয়ক ৰজাবাৰীত নিশা এক পথ দুৰ্ঘটনা সংঘটিত হৈছে, য'ত এজন বাইক আৰোহী গুৰুতৰভাৱে আহত হৈছে। এই দুৰ্ঘটনাটো ৰাষ্টাত গৰাকীবিহীন গৰুৰ বাবে সংঘটিত হৈছিল। বাইক আৰোহীজনে পথত থকা গৰুটোক খুন্দা মৰাৰ ফলত গৰুটোৰ থিতাতে মৃত্যু হয়। দুৰ্ঘটনাত গুৰুতৰভাৱে আঘাটপ্ৰাপ্ত ব্যক্তিজনক স্থানীয় লোকসকলে চিকিৎসালয়লৈ প্ৰেৰণ কৰে।

ভাৰতীয় জনতা পাৰ্টীৰ মৰাণ মণ্ডলৰ উদ্যোগত আন্তঃৰাষ্ট্ৰীয় যোগদিৱস উদযাপন কৰা হয়। এই উদযাপন কাৰ্যসূচীত মাহমৰা সমষ্টিৰ বিধায়ক সুৰুজ দিহিঙীয়াই অংশগ্ৰহণ কৰে।

চৰাইদেউ জিলা প্ৰশাসনৰ উদ্যোগত আৰু জিলা স্বাস্থ্য বিভাগৰ সহযোগত আজি সোণাৰি ৰাজহুৱা খেলপথাৰত দ্বাদশ আন্তঃৰাষ্ট্ৰীয় যোগ দিৱস সফলতাৰে উদযাপন কৰা হয়। পুৱা ৬ বজাত বন্তি প্ৰজ্বলনেৰে আৰম্ভ হোৱা এই কাৰ্যসূচীত ৰাজ্যসভাৰ সাংসদ যোগেন মহনে মুখ্য অতিথি হিচাপে অংশগ্ৰহণ কৰে। সাংসদ যোগেন মহনে ভাষণ প্ৰসংগত যোগক ভাৰতৰ প্ৰাচীন ঐতিহ্য আৰু বিশ্ববাসীক উপহাৰ দিয়া এক অমূল্য জীৱনশৈলী বুলি অভিহিত কৰে, যিয়ে শাৰীৰিক সুস্থতা, মানসিক স্থিৰতা আৰু আধ্যাত্মিক উন্নয়নৰ পথ প্ৰদৰ্শন কৰে। তেওঁ বৰ্তমানৰ ব্যস্ত জীৱনত সুস্থ আৰু সুষম জীৱন-যাপনৰ বাবে যোগচৰ্চাৰ গুৰুত্ব বৃদ্ধি পোৱাৰ কথা উল্লেখ কৰি, সুস্থ, সবল আৰু সচেতন সমাজ গঢ়াৰ লক্ষ্যৰে সকলোকে দৈনন্দিন জীৱনত যোগক অন্তৰ্ভুক্ত কৰিবলৈ আহ্বান জনায়। এই দিৱস উপলক্ষে তেওঁ উপস্থিত সকলো যোগসাধক, অংশগ্ৰহণকাৰী, জিলা প্ৰশাসনৰ বিষয়া-কৰ্মচাৰী আৰু আয়োজকসকলক অভিনন্দন জ্ঞাপন কৰে। অনুষ্ঠানত সোণাৰি সমষ্টিৰ বিধায়ক ধৰ্মেশ্বৰ কোঁৱৰ আৰু চৰাইদেউ জিলা আয়ুক্ত ড° নেহা যাদৱেও যোগাভ্যাস আৰু যোগৰ গুৰুত্ব সম্পৰ্কে বক্তব্য আগবঢ়ায়। কাৰ্যসূচীৰ অংশ হিচাপে ছাত্ৰ-ছাত্ৰীসকলে যোগাসনক মূল বিষয় হিচাপে লৈ এটি মনোমোহা সাংস্কৃতিক নৃত্য প্ৰদৰ্শন কৰে। ইয়াৰ পাছতে ইতিমধ্যে অনুষ্ঠিত হৈ যোৱা যোগাসন প্ৰতিযোগিতাৰ বঁটা বিতৰণী অনুষ্ঠানেৰে অনুষ্ঠানৰ সামৰণি পৰে। 'ক' শাখাত (১০ বছৰলৈকে) প্ৰথম অৱনীশ গগৈ, দ্বিতীয় বাৰ্লিনা মোহন আৰু তৃতীয় কৰ্ণৱ কৃত গগৈয়ে পুৰস্কাৰ লাভ কৰে। 'খ' শাখাত (১০-১৮ বছৰ) সাগৰ নেৱাৰ প্ৰথম, বৰ্ণিল হাজৰিকা দ্বিতীয় আৰু লখিমী তামুলী তৃতীয় স্থানত থাকে। 'গ' শাখাত (১৮-৩৫ বছৰ) কস্তুৰী শইকীয়া প্ৰথম, বৰ্ণালী গায়ন দ্বিতীয় আৰু কবিতা গগৈ তৃতীয় হয়। আনহাতে 'ঘ' শাখাত (৩৫ বছৰ ঊৰ্ধ্ব) মৌচুমী বৰা হাজৰিকা, পৱন দিহিঙীয়া আৰু তুলুমণি কাকতিয়ে ক্ৰমে প্ৰথম, দ্বিতীয় আৰু তৃতীয় পুৰস্কাৰ লাভ কৰিবলৈ সক্ষম হয়। এই অনুষ্ঠানত জিলাখনৰ অন্যান্য বিষয়া-কৰ্মচাৰীকে ধৰি দুই শতাধিক ৰাইজ উপস্থিত থাকে। উল্লেখযোগ্য যে, চৰাইদেউ জিলাৰ মাহমৰা মহকুমাৰ মৰাণ মহাবিদ্যালয়ৰ আন্তঃ ষ্টেডিয়ামত জিলাখনৰ বিষয়াবৰ্গ, ছাত্ৰ-ছাত্ৰী আৰু শতাধিক ৰাইজৰ উপস্থিতিত আন্তঃৰাষ্ট্ৰীয় যোগ দিৱস উদযাপন কৰা হয়।

পুৱাৰে পৰা হোৱা মুষলধাৰ বৰষুণৰ ফলত নাজিৰা নগৰৰ কেইবাটাও ৱাৰ্ডত ভয়াবহ জলাবদ্ধতাৰ সৃষ্টি হৈছে। নিষ্কাশন ব্যৱস্থাৰ দুৰ্বলতাৰ বাবে বহু এলেকা কৃত্ৰিম বানৰ কবলত পৰাত জনসাধাৰণৰ দৈনন্দিন জীৱন ব্যাহত হৈছে।

আজি অসম চাহ জনজাতি ছাত্ৰ সন্থা (ATTSA) তালাপ শাখা আৰু খোবাং গাখীৰভেটী উপশাখাৰ উদ্যোগত খোবাং চাহ বাগিছাৰ বিভিন্ন লাইনত চুলাই বিৰোধী অভিযান চলোৱা হয়। অভিযানকাৰীসকলে ঘৰে ঘৰে সোমাই অবৈধ চুলাই মদ বিক্ৰী কৰাসকলক চূড়ান্ত সকীয়নি প্ৰদান কৰিছে, আৰু স্পষ্ট কৰি দিছে যে এতিয়াৰ পৰা বাগিছাত এটোপালো চুলাই বিক্ৰী হ'বলৈ দিয়া নহ'ব। আট্‌ছাই বাৰে বাৰে অভিযোগ দিয়াৰ পিছতো তিনিচুকীয়া আৰু ডুমডুমা চক্ৰৰ আবকাৰী বিভাগে এই বিষয়ত চকু মুদি থকাৰ অভিযোগ উত্থাপন কৰিছে। তেওঁলোকে জনোৱা অনুসৰি, খোবাং বাগিছাৰ প্ৰতিটো লাইনত দিন-দুপৰতে চুলাইৰ ভাটী চলে যাৰ ফলত শ্ৰমিকৰ ঘৰ-সংসাৰ ধ্বংস হৈছে, ল'ৰা-ছোৱালীৰ পঢ়া-শুনা নষ্ট হৈছে, আৰু সামাজিক পৰিৱেশ বিনষ্ট হৈছে। চুলাইৰ প্ৰভাৱত কাজিয়া-মাৰপিট নিত্য ঘটনা হৈ পৰিছে আৰু কম বয়সীয়া যুৱকসকলৰ অকাল মৃত্যু ঘটিছে, যাৰ ফলত মহিলাসকল কম বয়সতে বিধৱা হৈছে আৰু শিশুসকল মাউৰা হৈছে। এই পৰিস্থিতিৰ প্ৰতি লক্ষ্য ৰাখি আট্‌ছাই আবকাৰী বিভাগৰ ওচৰত কেইবাটাও দাবী উত্থাপন কৰিছে। তেওঁলোকৰ দাবীসমূহ হৈছে: সাত দিনৰ ভিতৰত খোবাং বাগিছাৰ প্ৰতিটো লাইনত আবকাৰী বিভাগে অভিযান চলাব লাগিব; চুলাই বিক্ৰী কৰা দোকানী আৰু ভাটীৰ মালিকক গ্ৰেপ্তাৰ কৰিব লাগিব; আৰু বাগিছাত এটা স্থায়ী আবকাৰী চকী স্থাপন কৰিব লাগিব। আট্‌ছাই স্পষ্টভাৱে সকীয়নি দিছে যে যদি অনাগত সাত দিনৰ ভিতৰত বিভাগীয় কৰ্তৃপক্ষই কঠোৰ ব্যৱস্থা গ্ৰহণ নকৰে, তেন্তে অসম চাহ জনজাতি ছাত্ৰ সন্থাই (ATTSA) তিনিচুকীয়া জিলা আবকাৰী অধীক্ষকৰ কাৰ্যালয় ঘেৰাও কৰি এক তীব্ৰ গণতান্ত্ৰিক আন্দোলন গঢ়ি তুলিবলৈ বাধ্য হ'ব। এই অভিযানৰ জৰিয়তে বাগিছাৰ ৰাইজলৈ একত্ৰিত হৈ চুলাই মুক্ত সমাজ গঢ়াৰ আহ্বান জনোৱা হৈছে।

মন্ত্ৰী ৰামেশ্বৰ তেলীয়ে মাননীয় প্ৰধানমন্ত্ৰী নৰেন্দ্ৰ মোদী ডাঙৰীয়াক যোগক বিশ্বব্যাপী জনআন্দোলনলৈ ৰূপান্তৰিত কৰাৰ বাবে আন্তৰিক কৃতজ্ঞতা জ্ঞাপন কৰিছে। লগতে, তেওঁ সুস্থ জীৱনৰ বাবে যোগক দৈনন্দিন অভ্যাস হিচাপে গ্ৰহণ কৰিবলৈও আহ্বান জনাইছে।

ধেমাজি সদৰত অৱস্থিত বাল্যবিদ্যাপীঠ প্ৰাথমিক বিদ্যালয়খন যোৱা এসপ্তাহ ধৰি কৃত্ৰিম বানৰ কবলত পৰিছে। এই কৃত্ৰিম বানৰ বাবেই বিদ্যালয়খনত অনুষ্ঠিত হ'বলগীয়া পৰীক্ষাসমূহ স্থগিত ৰখা হৈছে। বৰ্ণনাতীত পৰিৱেশৰ মাজতো বিদ্যালয়ত পাঠদান চলি আছে, যাৰ ফলত প্ৰতিদিনে অৰ্ধছুটি দিবলৈ বাধ্য হৈছে কৰ্তৃপক্ষ। বন্যাৰ ফলত শ্ৰেণীকোঠাসমূহ সম্পূৰ্ণৰূপে পানীৰে ভৰি পৰিছে, মধ্যাহ্ন ভোজনৰ ঘৰতো পানী সোমোৱাৰ বাবে সমস্যাৰ সৃষ্টি হৈছে। ছাত্ৰ-ছাত্ৰীৰ লগতে শিক্ষক-শিক্ষয়িত্ৰীসকলো শৌচ-প্ৰস্ৰাৱ কৰিবলৈ উপাই নোহোৱাত ভীষণ অসুবিধাৰ সন্মুখীন হৈছে। বাৰিষাৰ এই সময়ছোৱাত কৃত্ৰিম বানত ডুব যোৱা বিদ্যালয়খনত দিনক দিনে ছাত্ৰ-ছাত্ৰীৰ সংখ্যা হ্ৰাস পাইছে। বিগত পাঁচ বছৰ ধৰি বিদ্যালয়খনত একেই সমস্যাৰ পুনৰাবৃত্তি ঘটি আছে। বাল্যবিদ্যাপীঠ বিদ্যালয়ৰ শিক্ষয়িত্ৰীসকলে এই সমস্যাৰ তৎকালীন সমাধানৰ বাবে চৰকাৰক আহ্বান জনাইছে। এই পৰিস্থিতিৰ বাবে ধেমাজি পৌৰসভাৰ ওপৰত অভিযোগ উত্থাপন হৈছে, কিয়নো তেওঁলোকে এই কৃত্ৰিম বানৰ পৰা বিদ্যালয়খনক মুক্ত কৰিবলৈ কোনো ব্যৱস্থা গ্ৰহণ কৰা নাই।

দুৰ্ঘটনাত পতিত হৈ ষ্টেট বেংক অফ ইণ্ডিয়া (SBI) ৰ দুজন বিষয়াৰ প্ৰাণহানি হৈছে। মাজ নিশা ধেমাজি জিলাৰ হাঁহচৰা অঞ্চলত এই ভয়ংকৰ ঘটনাটো সংঘটিত হয়, য'ত এখন গ্ৰেণ্ড ভিট্ৰা গাড়ী দুৰ্ঘটনাগ্ৰস্ত হৈ পথৰ পৰা পানীৰ ভিতৰত সোমাই পৰে। এই কৰুণ দুৰ্ঘটনাত SBIৰ ধেমাজি মূল শাখাৰ কেচিয়াৰ হিৰক জ্যোতি মিলি আৰু একাউটেন্ট ৰাতুল কোঁৱৰৰ মৃত্যু হয়। ঘটনা সন্দৰ্ভত নিহত বিষয়া দুগৰাকীৰ পৰিয়ালৰ লোকে প্ৰতিক্ৰিয়া প্ৰকাশ কৰিছে।