মৰিগাঁও জিলাৰ লাহৰীঘাটৰ ধূপগুৰিত এক ভয়ংকৰ পথ দুৰ্ঘটনা সংঘটিত হৈছে, য’ত এগৰাকী পথচাৰীৰ লগতে চাৰিজন বাইক আৰোহী গুৰুতৰভাৱে আঘাতপ্ৰাপ্ত হৈছে। AS 21 Q 0857 নম্বৰৰ এখন বাইকেৰে চাৰিজন যুৱকে তীব্ৰ গতিত আহি পথৰ কাষেৰে খোজকাঢ়ি গৈ থকা এজন পথচাৰীক প্ৰচণ্ড জোৰে খুন্দা মৰাৰ ফলত এই দুৰ্ঘটনা সংঘটিত হয়। স্থানীয় ৰাইজে ততাতৈয়াকৈ আটাইকে লাহৰীঘাট আদৰ্শ চিকিৎসালয়লৈ প্ৰেৰণ কৰে, যদিও চিকিৎসকে উন্নত চিকিৎসাৰ বাবে দুজনক নগাঁৱলৈ পঠিয়ায়।

মৰিগাঁও ডায়েটত অনুষ্ঠিত এক সংবাদমেলযোগে জিলা শিক্ষা আৰু প্ৰশিক্ষণ প্ৰতিষ্ঠান (ডায়েট), মৰিগাঁৱৰ উদ্যোগত কটন বিশ্ববিদ্যালয় আৰু বড়োলেণ্ড বিশ্ববিদ্যালয়ৰ সহযোগত অহা ৫ আৰু ৬ জুনত দুদিনীয়া আন্তৰ্জাতিক আলোচনা চক্ৰ অনুষ্ঠিত হোৱাৰ কথা ঘোষণা কৰা হৈছে। বিশ্ব পৰিৱেশ দিৱসৰ সৈতে সংগতি ৰাখি আয়োজন কৰা এই আলোচনা চক্ৰ অনলাইন আৰু অফলাইন দুয়োটা পদ্ধতিৰে অনুষ্ঠিত হ'ব। ইয়াৰ মূল বিষয়বস্তু হৈছে— "Environment at the Crossroads: Balancing Development with Sustainability" (সংকট ক্ষণত পৰিৱেশ: বহনক্ষমতাৰ সৈতে উন্নয়নৰ ভাৰসাম্য ৰক্ষা)। এই দুদিনীয়া কাৰ্যসূচীৰ মুখ্য উদ্দেশ্য হৈছে বৰ্ধিত উন্নয়ন আৰু পৰিৱেশ ধ্বংসৰ ফলত হ'ব পৰা সাম্ভাব্য পৰিৱৰ্তনসমূহৰ বিষয়ে বিস্তৃত আলোচনা কৰা আৰু এই সন্দৰ্ভত সুচিন্তিত গৱেষণাক উৎসাহিত কৰা। অনুষ্ঠানৰ বিষয়ববীয়াসকলে জনোৱা অনুসৰি, এই আলোচনা চক্ৰত অংশগ্ৰহণৰ বাবে বহিঃৰাষ্ট্ৰৰ লগতে ভাৰতৰ বিভিন্ন প্ৰান্তৰ, বিশেষকৈ উত্তৰ-পূৰ্বাঞ্চল আৰু অসমৰ বিভিন্ন বিশ্ববিদ্যালয়ৰ বহু সমল ব্যক্তিক আমন্ত্ৰণ জনোৱা হৈছে।

মৰিগাঁও জিলাৰ কৰটিপাম বিদ্যা বিকাশ ইউনিটি এছচিয়েচনৰ উদ্যোগত গড়জান প্ৰাথমিক বিদ্যালয়ত এক গাম্ভীৰ্যপূৰ্ণ অনুষ্ঠানৰ মাজেৰে হাইস্কুল শিক্ষান্ত (HSLC) আৰু উচ্চতৰ মাধ্যমিক (HS) চূড়ান্ত পৰীক্ষাত উত্তীৰ্ণ হোৱা প্ৰায় ৩৫ গৰাকী কৃতী ছাত্ৰ-ছাত্ৰীক সম্বৰ্ধনা জনোৱা হয়। এই অনুষ্ঠানত গড়জান প্ৰাথমিক বিদ্যালয়ৰ প্ৰধান শিক্ষক আইনুদ্দিন আহমেদে সভাপতিত্ব কৰে। বিশিষ্ট অতিথি হিচাপে ‘বৰ অসম’ সাপ্তাহিক কাকতৰ সম্পাদক বিৰিঞ্চি কুমাৰ শৰ্মা, প্ৰতিদিন টাইমৰ জ্যেষ্ঠ সাংবাদিক নজৰুল ইছলাম আৰু Voice 365-ৰ মৰিগাঁও জিলাৰ যুৱ সাংবাদিক মহেশ কুমাৰ দাস উপস্থিত থাকে। সভাত শিক্ষাৰ গুৰুত্ব, অধ্যৱসায় আৰু ভৱিষ্যৎ জীৱনত সফলতা অৰ্জনৰ বাবে শিক্ষাৰ্থীসকলক উৎসাহব্যঞ্জক বক্তব্য আগবঢ়োৱা হয়, লগতে অতিথিসকলে সমাজ আৰু জাতি গঠনত শিক্ষাৰ ভূমিকা সম্পৰ্কে আলোকপাত কৰে। সম্বৰ্ধনা অনুষ্ঠানত কৃতী শিক্ষাৰ্থীসকলক ফুলাম গামোচা, মানপত্ৰ আৰু উপহাৰেৰে সম্বৰ্ধনা জনোৱা হয়। গড়জান প্ৰাথমিক বিদ্যালয়ৰ শিক্ষক-শিক্ষয়িত্ৰীসকল, কৰটিপাম বিদ্যা বিকাশ ইউনিটি এছচিয়েচনৰ বিষয়ববীয়াসকল, অভিভাৱক আৰু বহু গণ্যমান্য ব্যক্তি এই অনুষ্ঠানত উপস্থিত থাকে। ইয়াৰ জৰিয়তে কৃতী শিক্ষাৰ্থীসকলক সন্মান জনোৱাৰ লগতে আন শিক্ষাৰ্থীসকলকো অধ্যয়নত অধিক মনোযোগী হ'বলৈ উৎসাহিত কৰা হয়। উপস্থিত সকলোৱে এনে উদ্যোগক শলাগ লৈ ভৱিষ্যতেও ধাৰাবাহিকভাৱে অব্যাহত ৰখাৰ আহ্বান জনায়।

এজন যুৱ উদ্যোগীয়ে সোনাইঘাটত ‘চাই আড্ডা’ নামৰ এখন নতুন ৰেষ্টুৰেণ্ট আৰম্ভ কৰিছে। এই প্ৰচেষ্টা বিশেষকৈ GenZ সকলক লক্ষ্য কৰি লোৱা হৈছে বুলি ৰেষ্টুৰেণ্টখনৰ স্বত্বাধিকাৰীয়ে জানিবলৈ দিয়ে। ইয়াত গ্ৰাহকসকলে একাপ চাহ উপভোগ কৰাৰ লগতে বন্ধুবৰ্গৰ সৈতে আড্ডা দিব পাৰিব। এই নতুন ৰেষ্টুৰেণ্টখনে সোনাইঘাটত ছাত্ৰ-ছাত্ৰীসকলৰ জিৰণিৰ বাবে থকা ঠাইৰ অভাৱ পূৰণ কৰাত সহায় কৰিব।

ৰূপহীহাটৰ কাছখাইটীত মডাৰ্ণ আদৰ্শ ছিনিয়ৰ ছেকেণ্ডাৰী স্কুল নামৰ ব্যক্তিগত খণ্ডৰ বিদ্যালয়খনত নিশা প্ৰায় ১১ বজাত এক ভয়ংকৰ অগ্নিকাণ্ড সংঘটিত হয়। এই অগ্নিকাণ্ডৰ ফলত বিদ্যালয়খনৰ কেইবা লাখ টকাৰ স্কুলীয়া সামগ্ৰীৰ লগতে গুৰুত্বপূৰ্ণ নথি-পত্ৰ নিমিষতে জুইত জাহ যায়, যাৰ ফলত সমগ্ৰ বিদ্যালয়খন সম্পূৰ্ণৰূপে ভস্মীভূত হৈ ছাৰখাৰ হয়। অগ্নিকাণ্ডৰ কাৰণ হিচাপে স্হানীয় ৰাইজে দুষ্ট চক্ৰৰ কাণ্ড অথবা বিদ্যুতৰ শ্বৰ্ট চাৰ্কিটৰ ফলত জুইৰ সুত্ৰপাত হোৱাৰ সন্দেহ প্ৰকাশ কৰিছে। এই ঘটনাৰ লগে লগে অঞ্চলজুৰি তীব্ৰ চাঞ্চল্যই বিৰাজ কৰে। যদিও সোণাৰিবালী আৰু আমবাগানৰ অগ্নি নিৰ্বাপক বাহিনীৰ লোক ঘটনা স্থলীত উপস্থিত হৈছিল, তথাপি তেওঁলোকে জুই সম্পূৰ্ণৰূপে নিয়ন্ত্ৰণ কৰিবলৈ সক্ষম নোহোৱাৰ পূৰ্বেই বিদ্যালয়খন সম্পূৰ্ণৰূপে ভস্মীভূত হয়। স্হানীয় ৰাইজে জুই নুমুৱাবলৈ আপ্ৰাণ চেষ্টা চলোৱাৰ পিছতো বিদ্যালয়খনক ৰক্ষা কৰিব পৰা নগল। এই মৰ্মান্তিক ঘটনাক কেন্দ্ৰ কৰি স্হানীয় ৰাইজে চৰকাৰৰ ওচৰত ৰূপহী, লাইলুৰী আৰু কাৱৈমাৰী আদি অঞ্চলত তৎকালীনভাৱে অগ্নি নিৰ্বাপক কেন্দ্ৰ স্থাপনৰ বাবে দাবী জনাইছে।

মৰিগাঁও জিলা আয়ুক্তৰ কাৰ্যালয়ৰ সভাকক্ষত জিলা পথ সুৰক্ষা সমিতিৰ এখন গুৰুত্বপূৰ্ণ সভা জিলা আয়ুক্ত অনামিকা তেৱাৰীৰ সভাপতিত্বত অনুষ্ঠিত হয়। এই সভাত জিলা আইন সেৱা প্ৰাধিকৰণৰ সচিব কুমাৰী আৰতি, অতিৰিক্ত জিলা আয়ুক্ত নীতিশা বৰা, অতিৰিক্ত আৰক্ষী অধীক্ষক অনিতা হাজৰিকা, সহকাৰী আয়ুক্ত সন্তোষ বুঢ়াগোহাঁই, জিলা পথ সুৰক্ষা সমিতিৰ সদস্য-সচিব জিন্নত আহমেদকে ধৰি বিভিন্ন বিভাগৰ বিষয়াসকল উপস্থিত আছিল। সভাৰ আৰম্ভণিতে সদস্য-সচিবগৰাকীয়ে পূৰ্বৰ সিদ্ধান্তসমূহৰ ৰূপায়ণৰ অগ্ৰগতি আৰু জিলাখনত চলি থকা বিভিন্ন পথ সুৰক্ষা কাৰ্যসূচীৰ পৰ্যালোচনা কৰে। সভাৰ অন্যতম মূল আলোচনা আছিল ৰাষ্ট্ৰীয় ঘাইপথত সুৰক্ষা ব্যৱস্থা শক্তিশালী কৰা আৰু পথ দুৰ্ঘটনাজনিত মৃত্যুৰ সংখ্যা হ্ৰাস কৰাৰ লক্ষ্যৰে উচ্চতম ন্যায়ালয়ে জাৰি কৰা শেহতীয়া নিৰ্দেশনাসমূহ। এই সন্দৰ্ভত বক্তব্য ৰাখি জিলা আইন সেৱা প্ৰাধিকৰণৰ সচিব কুমাৰী আৰতিয়ে সংশ্লিষ্ট সকলো বিভাগ আৰু সংস্থাক ন্যায়ালয়ৰ নিৰ্দেশনাসমূহ কঠোৰভাৱে পালন কৰিবলৈ আহ্বান জনায়। সভাত ৰাষ্ট্ৰীয় ঘাইপথৰ কাষত নিৰ্ধাৰিত পাৰ্কিং স্থান, লে'-বাই বা ৱে'ছাইড এমেনিটিৰ বাহিৰে গধুৰ আৰু বাণিজ্যিক বাহন পাৰ্কিং বা ৰখোৱাত নিষেধাজ্ঞা সম্পৰ্কীয় ন্যায়ালয়ৰ নিৰ্দেশনাৰ ওপৰত বিস্তৃত আলোচনা কৰা হয়। ইয়াৰ উপৰি, Advanced Traffic Management System, জি পি এছ ভিত্তিক নিৰীক্ষণ, ই-চালান ব্যৱস্থা আৰু নিয়মীয়া তহলদাৰীৰ জৰিয়তে আইন প্ৰয়োগ অধিক শক্তিশালী কৰাৰ বিষয়েও আলোচনা কৰা হয়। ৰাষ্ট্ৰীয় ঘাইপথৰ নিৰ্ধাৰিত এলেকাৰ ভিতৰত থকা বেদখল আৰু অনুমোদন নোহোৱাকৈ স্থাপন কৰা বাণিজ্যিক প্ৰতিষ্ঠানসমূহ উচ্ছেদ সম্পৰ্কীয় ন্যায়ালয়ৰ নিৰ্দেশনাৰ ওপৰতো সভাত বিশেষ গুৰুত্ব সহকাৰে আলোচনা কৰা হয়। নিৰ্দেশনা অনুসৰি, ঘাইপথ কৰ্তৃপক্ষৰ অনুমোদন অবিহনে অনুজ্ঞাপত্ৰ প্ৰদান, আপত্তিবিহীনতাৰ প্ৰমাণপত্ৰ বা ব্যৱসায়িক অনুমতি প্ৰদান বা নবীকৰণ কৰিব নোৱাৰিব বুলিও আলোচনা কৰা হয়। আন আন আলোচনাৰ ভিতৰত জিলা ঘাইপথ সুৰক্ষা টাস্ক ফ’ৰ্চ গঠন, দুৰ্ঘটনাপ্ৰৱণ স্থানসমূহ চিনাক্তকৰণ আৰু সংশোধন, কেমেৰা আৰু জৰুৰীকালীন সঁহাৰি ব্যৱস্থা স্থাপন, লগতে গধুৰ বাহন চালকসকলৰ বাবে নিৰাপদ বিশ্ৰাম আৰু পাৰ্কিঙৰ সুবিধা নিশ্চিত কৰিবলৈ ট্ৰাক লে'-বাই আৰু ৱে'ছাইড এমেনিটি বিকাশৰ বিষয়েও আলোচনা কৰা হয়। সভাৰ শেষত জিলা আয়ুক্তগৰাকীয়ে সকলো সংশ্লিষ্ট বিভাগক সমন্বয়েৰে কাম কৰি উচ্চতম ন্যায়ালয়ৰ নিৰ্দেশনাসমূহৰ কাৰ্যৰূপায়ণ নিশ্চিত কৰাৰ নিৰ্দেশ দিয়ে। তেওঁ জিলাখনত পথ সুৰক্ষা ব্যৱস্থা অধিক শক্তিশালী কৰি পথ দুৰ্ঘটনা হ্ৰাস কৰাৰ ক্ষেত্ৰত সকলোৱে মিলি কাম কৰাৰ ওপৰত গুৰুত্ব আৰোপ কৰে।

নগাঁৱৰ ৰাইডঙীয়া সোনাই নদী উত্তৰ আঞ্চলিক শংকৰদেৱ শিশু বিদ্যা নিকেতনত এক গাম্ভীৰ্যপূৰ্ণ অভিনন্দন আৰু সম্বৰ্ধনা অনুষ্ঠান অনুষ্ঠিত কৰা হয়। এই অনুষ্ঠানত ২০২৫-২৬ বৰ্ষৰ হাইস্কুল শিক্ষান্ত পৰীক্ষাত কৃতিত্বৰে উত্তীৰ্ণ হোৱা ছাত্ৰ-ছাত্ৰীসকলক বিদ্যালয় কৰ্তৃপক্ষই সম্বৰ্ধনা জনায়। বিদ্যালয়খনে ১০০ শতাংশ উত্তীৰ্ণৰ সফলতাৰে বৃহত্তৰ অঞ্চলটোলৈ গৌৰৱ কঢ়িয়াই অনাৰ বাবে কৃতী ছাত্ৰ-ছাত্ৰীসকলক বিশেষভাৱে সম্বৰ্ধনা জ্ঞাপন কৰা হয়। অনুষ্ঠানত অঞ্চলটোৰ বহুকেইজন শিক্ষাবিদ আৰু বিশিষ্ট ব্যক্তিয়ে অংশগ্ৰহণ কৰি শিক্ষাৰ্থীসকলৰ এই সফলতাক অভিনন্দন জনায়। বিদ্যালয় কৰ্তৃপক্ষই কৃতী শিক্ষাৰ্থীসকলক ফুলাম গামোচা, মানপত্ৰ আৰু একোটাকৈ মমেণ্টো প্ৰদান কৰি আদৰণি জনায়। উপস্থিত বক্তাসকলে আশা প্ৰকাশ কৰে যে এই সফলতাই আগন্তুক প্ৰজন্মক শিক্ষাৰ ক্ষেত্ৰত অধিক অনুপ্ৰাণিত কৰিব। উল্লেখ্য যে ৰাইডঙীয়া সোনাই নদী উত্তৰ আঞ্চলিক শংকৰদেৱ শিশু বিদ্যা নিকেতনৰ এই সফলতাই সমগ্ৰ অঞ্চলজুৰি আনন্দৰ বতৰা কঢ়িয়াই আনিছে।

নগাঁও জিলাৰ বটদ্ৰৱা শিক্ষা খণ্ডৰ অধীনৰ বেচামাৰী এম.আই. উচ্চতৰ মাধ্যমিক বিদ্যালয়ত চৰকাৰী আঁচনিসমূহৰ ৰূপায়ণত বিভিন্ন অনিয়ম সংঘটিত হোৱাৰ গুৰুতৰ অভিযোগ উত্থাপন হৈছে। ইউনিফৰ্ম বিতৰণ, মধ্যাহ্ন ভোজন আঁচনি আৰু হোষ্টেল ব্যৱস্থাপনাক কেন্দ্ৰ কৰি অভিভাৱক, শিক্ষাৰ্থী আৰু স্থানীয় ৰাইজৰ মাজত ব্যাপক অসন্তুষ্টি দেখা গৈছে। বিদ্যালয়ৰ অধ্যক্ষ ছাদিক আনোৱাৰৰ বিৰুদ্ধে চৰকাৰী নিৰ্দেশনা নামানি ইউনিফৰ্ম বিতৰণ ব্যৱস্থাত স্বচ্ছতাৰ অভাৱ থকাৰ অভিযোগ উঠিছে। বহু শিক্ষাৰ্থীয়ে সময়মতে চৰকাৰী ইউনিফৰ্ম লাভ কৰা নাই, আনহাতে কিছুমানে পুৰণি বা নিম্নমানৰ কাপোৰ লাভ কৰিছে বুলিও অভিযোগ কৰা হৈছে। বিদ্যালয়খনৰ প্ৰাক্তন ছাত্ৰ আৰু বৰ্তমান কৰ্মৰত কনিষ্ঠ সহায়ক জাকিৰ হুছেইনে এই সকলো অভিযোগ সন্দৰ্ভত মুখ খুলিছে। এই সকলো অনিয়মৰ অভিযোগৰ সৈতে বিদ্যালয়ৰ অধ্যক্ষ ছাদিক আনোৱাৰৰ নাম জড়িত হৈ পৰিছে। স্থানীয় ৰাইজে শিক্ষা বিভাগৰ উচ্চপদস্থ বিষয়াসকলক শীঘ্ৰে এই বিষয়টোত নিৰপেক্ষ তদন্ত চলাই প্ৰকৃত সত্য উদঘাটন কৰিবলৈ দাবী জনাইছে।

শনিবাৰে সন্ধিয়া ধিং পৌৰসভাই ধিং চহৰত এক বৃহৎ উচ্ছেদ অভিযান চলাইছে, য'ত পৌৰসভাৰ বিষয়াসকল 'একচন মোড'ত দেখা গৈছিল। এই অভিযানত অবৈধভাৱে সজা দোকান-পোহাৰ এফালৰ পৰা ভাঙি পেলোৱা হয়। ধিং চহৰত একাংশ লোকে ভূমি বেদখল কৰি নিজৰ ইচ্ছামতে অবৈধ ব্যৱসায়িক প্ৰতিষ্ঠান নিৰ্মাণ কৰিছিল। পৌৰসভাৰ বিষয়াসকলে জেচিবি ব্যৱহাৰ কৰি এই অবৈধ ব্যৱসায়িক প্ৰতিষ্ঠানসমূহ উচ্ছেদ কৰাৰ লগতে অবৈধভাৱে মজুত ৰখা বহু সামগ্ৰীও জব্দ কৰে।