Looking for Job Job Title : Operator Machine Job Field : All Expected Salary : 15000 City / Locality : Botad Experience Level : 1-2 Years Job Type : Full Time Education Qualification : 10th Pass ITI

આજે સમગ્ર દેશમાં 12મા આંતરરાષ્ટ્રીય યોગ દિવસની ઉત્સાહભેર ઉજવણી કરવામાં આવી હતી, જેના ભાગરૂપે બોટાદ શહેરમાં પણ સરકારી હાઈસ્કૂલ ખાતે જિલ્લા વહીવટી તંત્ર દ્વારા એક ભવ્ય કાર્યક્રમનું આયોજન કરવામાં આવ્યું હતું. આ કાર્યક્રમમાં મોટી સંખ્યામાં જનપ્રતિનિધિઓ, અધિકારીઓ અને વિદ્યાર્થીઓએ ઉત્સાહભેર ભાગ લીધો હતો અને યોગના મહત્વ અંગેનો સંદેશ સૌને પહોંચાડ્યો હતો.

બોટાદ જિલ્લામાં ફોરેસ્ટ વિભાગ સામે ગેરકાયદેસર પાણીના વપરાશનો આક્ષેપ કરવામાં આવ્યો છે. આ મામલે સત્તાવાળાઓ દ્વારા કલેક્ટરને રજૂઆત પણ કરવામાં આવી છે.

સુરેન્દ્રનગર જિલ્લાના સમલા ગામે ગંજીપાનાનો જુગાર રમી રહેલા કુલ નવ શખ્સોને ઝડપી પાડવામાં આવ્યા છે.

સુરેન્દ્રનગર SOG (સ્પેશિયલ ઑપરેશન્સ ગ્રુપ) એ ચુડા તાલુકાના છલાળા ગામમાંથી માનવ આરોગ્ય સાથે ચેડાં કરતા એક બોગસ ડોક્ટરને દબોચી લીધો છે. પોલીસે આરોપી પાસેથી ₹12,082 થી વધુની કિંમતનો એલોપેથીક દવાઓનો જથ્થો જપ્ત કરી કાયદેસરની કાર્યવાહી શરૂ કરી છે. SOG શાખાની ટીમ ચુડા પોલીસ સ્ટેશન વિસ્તારમાં પેટ્રોલિંગ કરી રહી હતી તે દરમિયાન પોલીસ કોન્સ્ટેબલ કુલદીપસિંહ ગોહિલ અને સુરેશભાઈ ખરગીયાને ગુપ્ત બાતમી મળી હતી. બાતમી અનુસાર, ચુડા તાલુકાના છલાળા ગામે રામદેવપીરના મંદિર પાછળ આવેલી શેરીમાં રહેતો પ્રતુલ અનંત બિશ્વાસ નામનો વ્યક્તિ કોઈ પણ માન્ય તબીબી ડિગ્રી વગર એલોપેથીક સારવાર કરતો હતો. આ બાતમીના આધારે SOGની ટીમે કંથારિયા PHCના મેડિકલ ઓફિસર ડૉ. ભવેશભાઈ માલકીયાને સાથે રાખી સ્થળ પર દરોડો પાડ્યો હતો. દરોડા દરમિયાન, મૂળ ઝારખંડનો અને હાલ છલાળા ગામે ભાડાના મકાનમાં રહેતો 38 વર્ષીય પ્રતુલ અનંત વિશ્વાસ ગેરકાયદેસર રીતે મેડિકલ પ્રેક્ટિસ કરતા રંગે હાથે ઝડપાઈ ગયો હતો. તેની પાસેથી તપાસ દરમિયાન કુલ 68 પ્રકારની એલોપેથીક દવાઓ મળી આવી હતી, જેની કુલ કિંમત રૂપિયા 12,082 થાય છે. પોલીસે તમામ દવાઓ કબજે કરી આરોપી પ્રતુલ અનંત વિશ્વાસ વિરુદ્ધ મેડિકલ પ્રેક્ટિશનર એક્ટની કલમ 30 હેઠળ ચુડા પોલીસ સ્ટેશનમાં ગુનો નોંધાવ્યો છે. પોલીસે આરોપીની ધરપકડ કરી લીધી છે અને આ મામલે વધુ તપાસ તથા કાયદેસરની કાર્યવાહી હાથ ધરી છે.

અમદાવાદ જિલ્લાના ધોળકા તાલુકાના ભોળાદ પ્રાથમિક શાળાની આસપાસના વિસ્તારમાં છેલ્લા એક સપ્તાહથી એક તોફાની વાનર સ્થાનિક લોકો અને વિદ્યાર્થીઓને સતત પજવી રહ્યું હોવાની ફરિયાદો સામે આવી હતી. આ વાનરના ત્રાસથી ગ્રામજનો અને વિદ્યાર્થીઓ ભારે પરેશાન હતા. આ અંગે સ્થાનિક લોકો અને શાળા તંત્ર દ્વારા સંબંધિત વિભાગને જાણ કરવામાં આવતા ધોળકા વન વિભાગની ટીમ અને વાઇલ્ડલાઇફ કન્સર્વેશન સેલ (WCC)ની ટીમ સંયુક્ત રીતે તાત્કાલિક સ્થળ પર પહોંચી હતી. ટીમો દ્વારા અત્યંત સાવચેતીપૂર્વક કામગીરી હાથ ધરવામાં આવી હતી, જેના પરિણામે આ તોફાની વાનરનું સફળતાપૂર્વક રેસ્ક્યુ કરવામાં આવ્યું. વન વિભાગની આ સમયસરની અને સરાહનીય કામગીરીને કારણે ભોળાદના સ્થાનિક રહેવાસીઓ અને શાળાના વિદ્યાર્થીઓએ મોટી રાહત અનુભવી હતી. આ ઘટના બાદ અધિકારીઓએ લોકોને જંગલી પ્રાણીઓને ખોરાક ન આપવા કે તેમને ઉશ્કેરવા નહીં તેવી અપીલ કરી છે. સાથે જ, આવી કોઈ પણ ઘટના બને તો તાત્કાલિક વન વિભાગને જાણ કરવા પણ અનુરોધ કર્યો છે.

ગુજરાતમાં એક કિસાન આલુનો વેપાર કરીને કરોડો રૂપિયાની કંપની સફળતાપૂર્વક ચલાવી રહ્યા છે.

ચોટીલાના નાયબ કલેક્ટર અને સબ ડિવિઝનલ મેજિસ્ટ્રેટ એચ. ટી. મકવાણા દ્વારા ભારતીય નાગરિક સુરક્ષા સંહિતા, ૨૦૨૩ની કલમ ૧૯૪ હેઠળ હાથ ધરાયેલી મેજિસ્ટ્રેરીયલ ઇન્કવાયરી પૂર્ણ કરવામાં આવી છે. આ પ્રક્રિયાના ભાગરૂપે છેલ્લા છ મહિના દરમિયાન ચોટીલા સબ-ડિવિઝન હેઠળના ચોટીલા, મુળી અને થાનગઢ તાલુકાના કુલ ૫૩ અકસ્માત મોતના કેસોનો કાયદેસરનો નિકાલ કરવામાં આવ્યો છે. આ કાર્યવાહીમાં પોલીસે અદાલત સમક્ષ રજૂ કરેલા કેસોની જુદી જુદી તારીખો નક્કી કરીને સુનાવણી હાથ ધરવામાં આવી હતી. આ ઇન્કવાયરીમાં અકસ્માતજન્ય અથવા શંકાસ્પદ સંજોગોમાં થયેલ મૃત્યુના બનાવોમાં પોલીસ તંત્ર દ્વારા તૈયાર કરવામાં આવેલ ઇન્ક્વેસ્ટ પેપર્સ, પોસ્ટમોર્ટમ રિપોર્ટ, પંચનામા, સાક્ષીઓના નિવેદનો અને અન્ય સંબંધિત દસ્તાવેજોની ઝીણવટભરી તપાસ કરવામાં આવી હતી. મેજિસ્ટ્રેરીયલ તપાસ હાથ ધરવાની જોગવાઈ અનુસાર, મૃત્યુનું કારણ અકસ્માતજન્ય છે કે કોઈ ગુનાહિત કૃત્યના પરિણામે થયું છે, તેની તપાસ કરવામાં આવી. આ માટે મૃતકના વારસદારો તથા સંબંધિત વ્યક્તિઓને નોટિસ આપી, તેમની હાજરીમાં રજૂઆતો અને નિવેદનો નોંધવામાં આવ્યા હતા. કેસને લગતા તમામ દસ્તાવેજી પુરાવાઓ, પોલીસ તપાસના અહેવાલો, મૃત્યુની પરિસ્થિતિઓ અને અન્ય સંબંધિત હકીકતોનું તટસ્થ અને વિગતવાર પરીક્ષણ કરવામાં આવ્યું. તપાસ દરમિયાન, જે કેસોમાં વધુ તપાસની આવશ્યકતા અથવા શંકાસ્પદ સંજોગો જણાયા, તે સંબંધિત પોલીસ અધિકારીને વધુ તપાસ અને અહેવાલ માટે પરત મોકલવામાં આવ્યા. જ્યારે અન્ય કેસોમાં, ઉપલબ્ધ પુરાવા, દસ્તાવેજો અને તપાસના આધારે કોઈ ગુનાહિત કૃત્ય કે શંકાસ્પદ તત્વ પ્રકાશમાં ન આવતા, મૃત્યુ અકસ્માતજન્ય હોવાનું પ્રતિપાદિત થયું હતું. આ રીતે કલમ-૧૯૪ હેઠળની કાર્યવાહી પૂર્ણ કરી, સંબંધિત અકસ્માત મોતના કેસોનો કાયદેસરનો નિકાલ કરવામાં આવ્યો.

અમદાવાદ જિલ્લાના ધોળકા શહેરમાં આવેલી એક શાળામાંથી એક અત્યંત શરમજનક ઘટના પ્રકાશમાં આવી છે. પ્રાપ્ત માહિતી અનુસાર, શાળાના એક શિક્ષકે સગીર વિદ્યાર્થી સાથે અશ્લીલ હરકતો કરી હતી, જેને પગલે સમગ્ર ઘટનાએ ખળભળાટ મચાવ્યો છે. આ મામલાની જાણ થતા જ પોલીસે તાત્કાલિક કાર્યવાહી કરીને ગુનેગાર શિક્ષકને પોતાની જાળમાં ઝડપી લીધો છે.

અમદાવાદ જિલ્લાના સાણંદ તાલુકાના મોરૈયા ગામે નજીવી બાબતે બે જૂથો વચ્ચે હિંસક અથડામણ થઈ હતી. આ લોહિયાળ ઝડપમાં ગામના મહિલા સરપંચના પતિ ભીખાભાઈ અને તેમના પુત્ર મયુરભાઈ પર કેટલાક શખ્સો દ્વારા જીવલેણ હુમલો કરવામાં આવ્યો હોવાની ઘટના સામે આવી છે. ઉલ્લેખનીય છે કે ભીખાભાઈ ગામના મહિલા સરપંચના પતિ છે, જ્યારે તેમના પુત્ર મયુરભાઈના પત્ની તાલુકા પંચાયતના ડેલીગેટ સભ્ય છે. આ હિંસક ઝડપ દરમિયાન બંને પક્ષે સામસામે પથ્થરમારો અને હુમલો કરવામાં આવ્યો હતો. જેમાં ભીખાભાઈ અને મયુરભાઈ ગંભીર રીતે ઈજાગ્રસ્ત થયા હતા, જ્યારે સામા પક્ષે પણ બે લોકોને ઈજાઓ પહોંચી હોવાના અહેવાલ છે. બનાવની જાણ થતાં જ ચાંગોદર પોલીસનો મોટો કાફલો તાત્કાલિક ઘટનાસ્થળે દોડી ગયો હતો અને પરિસ્થિતિ પર કાબૂ મેળવ્યો હતો. ઈજાગ્રસ્તોને તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યા છે. આ મામલે બંને પક્ષો દ્વારા એકબીજા વિરુદ્ધ ચાંગોદર પોલીસ સ્ટેશનમાં ક્રોસ ફરિયાદ સામસામે ગુનો નોંધાવવામાં આવ્યો છે.