ସୁନ୍ଦରଗଡ଼ ଜିଲ୍ଲା ତଳସରା ଅନ୍ତର୍ଗତ ମହୁଲଗାଁ ହେଣ୍ଡୁଅଶୁଖା ଗ୍ରାମରେ ଏକ ଅଭାବନୀୟ ଘଟଣା ଘଟିଛି। ବିଲରେ ଟ୍ରାକ୍ଟର ଯୋଗେ ହଳ କରୁଥିବା ବେଳେ ଟ୍ରାକ୍ଟରଟି ଓଲଟି ପଡ଼ିଥିଲା। ଏହି ଦୁର୍ଘଟଣାରେ ବିଲ ମାଲିକଙ୍କର ମୃତ୍ୟୁ ହୋଇଥିବା ବେଳେ ଗାଡ଼ି ଚାଳକ ଗୁରୁତର ଆହତ ହୋଇଛନ୍ତି।

ଗତକାଲି ବୁଧବାର, ଜୁନ ୧୭, ୨୦୨୬ ତାରିଖରେ ପବିତ୍ର ଶୀତଳ ଷଷ୍ଠୀ ଅବସରରେ ଝାରସୁଗୁଡା ଜିଲ୍ଲାର ଲଖନପୁର ଅନ୍ତର୍ଗତ ସିଂଘାରପୁରରେ ଥିବା ଶ୍ରୀ ଶ୍ରୀ ଝାଡେଶ୍ୱର ବାବା ଧାମ ମନ୍ଦିରରେ ନିର୍ବନ୍ଧ (ପିନ୍ଧାଣି) ମହୋତ୍ସବ ଅନୁଷ୍ଠିତ ହୋଇଯାଇଛି।

ଝାରସୁଗୁଡ଼ା ଜିଲ୍ଲାର ବେଲପାହାଡ଼ ରେଳ ଫାଟକ ନିକଟରେ ତା’ ୧୭.୦୬.୨୬ ତାରିଖରେ ନୂତନ ସାଇ ହେଲ୍-ଥ କେୟାର ଘରୋଇ ହସ୍ପିଟାଲର ଉଦଘାଟନୀ ସମାରୋହ ଅନୁଷ୍ଠିତ ହୋଇଯାଇଛି। ବେଲପାହାଡ଼ର ବର୍ଷିୟାନ୍ ଡାକ୍ତର ଲତିକା ପଟେଲ ମୁଖ୍ୟ ଅତିଥି ଭାବେ ଯୋଗଦେଇ ଫିତା କାଟି ଏହାର ଶୁଭ ଉଦଘାଟନ କରିଥିଲେ। ଏହି ଅବସରରେ ଡାକ୍ତରଖାନାର ପ୍ରତିଷ୍ଠାତା ସତ୍ୟ ପ୍ରକାଶ ମହାନ୍ତି ଓ ଅନେକ ଗଣ୍ୟମାନ୍ୟ ବ୍ୟକ୍ତି ଉପସ୍ଥିତ ଥିଲେ। ଉଦଘାଟନୀ ଦିନ ଏକ ମାଗଣା ସ୍ୱାସ୍ଥ୍ୟ ଶିବିର ମଧ୍ୟ ଅନୁଷ୍ଠିତ ହୋଇଥିଲା, ଯାହାର ଲାଭ ଅନେକ ଲୋକ ନେଇଥିଲେ। ଏହି ଡାକ୍ତରଖାନାରେ ଡ଼ା. ଅମର କୁମାର ଧଳ, ଡ଼ା. ଇଶାନ ପ୍ରଧାନ, ଡ଼ା. ଚିରଞ୍ଜିବୀ ଖଟୁଆ ପ୍ରମୁଖ ବିଭିନ୍ନ ବିଶେଷଜ୍ଞ ଡାକ୍ତର ଭାବେ ଚିକିତ୍ସା ସେବା ଯୋଗାଇବେ। ରୋଗୀମାନଙ୍କୁ ସ୍ୱଳ୍ପ ମୂଲ୍ୟରେ ଜରୁରୀକାଳୀନ ସ୍ୱାସ୍ଥ୍ୟ ସେବା ଯୋଗାଇ ଦିଆଯିବାର ବ୍ୟବସ୍ଥା ରହିଛି। ଏଥିସହ ପ୍ରତ୍ୟେକ ଦିନ ସକାଳ ୭ଟାରୁ ସନ୍ଧ୍ୟା ୮ଟା ପର୍ଯ୍ୟନ୍ତ କମ୍ପ୍ୟୁଟର ଦ୍ୱାରା ରକ୍ତ ପରୀକ୍ଷା, ମଳ, ମୂତ୍ର, ଧାତୁ ଏବଂ ଗର୍ଭ ପରୀକ୍ଷା ପାଇଁ ସେବା ଉପଲବ୍ଧ ହେବ। ଡାକ୍ତରଖାନାର ପ୍ରତିଷ୍ଠାତା ସତ୍ୟ ପ୍ରକାଶ ମହାନ୍ତି କହିଛନ୍ତି ଯେ, ଆଗାମୀ ଦିନରେ ବିଭିନ୍ନ ବିଶିଷ୍ଟ ପରୀକ୍ଷା ପାଇଁ ସେବା ଉପଲବ୍ଧ କରାଯିବ ଏବଂ ଆମ୍ବୁଲାନ୍ସ ସେବା ମଧ୍ୟ ଯୋଗାଇ ଦିଆଯିବ। ଭବିଷ୍ୟତରେ ବିଭିନ୍ନ ବିଶେଷଜ୍ଞ ଡାକ୍ତରଙ୍କ ଦ୍ୱାରା ଲୋକଙ୍କୁ ଉନ୍ନତମାନର ଚିକିତ୍ସା ଯୋଗାଇ ଦେବା ପାଇଁ ଆବଶ୍ୟକ ପଦକ୍ଷେପ ନିଆଯିବ।

ସମ୍ବଲପୁର ଜିଲ୍ଲା ଜମନକିରା ବ୍ଲକ ଅନ୍ତର୍ଗତ ସୁବର୍ଣ୍ଣପାଲି ଗ୍ରାମପଞ୍ଚାୟତର ନାଗ୍ରାବାହାଲ (ମଦନ ଢ଼ିପା)ରେ ରହୁଥିବା ୭୪ ବର୍ଷୀୟା ବୃଦ୍ଧା ବୈଦେହୀ ମିଞ୍ଜ ଏକ ଭଙ୍ଗାଦଦରା ଘରେ ଅସହାୟ ଅବସ୍ଥାରେ ଜୀବନ ବିତାଉଛନ୍ତି। ସରକାର ଗରିବ ଏବଂ ଅସହାୟଙ୍କ ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଥିବା ଆବାସ ଯୋଜନାରେ ବୈଦେହୀ ସମ୍ପୂର୍ଣ୍ଣ ଯୋଗ୍ୟ ହୋଇ ମଧ୍ୟ ସେଥିରୁ ବଞ୍ଚିତ ହୋଇଛନ୍ତି। ଗତ ଦଶ ବର୍ଷ ଧରି ସେ ଘର ଖଣ୍ଡିଏ ପାଇଁ ସ୍ଥାନୀୟ ସରପଞ୍ଚ, ବ୍ଲକ ପ୍ରଶାସନ ଏବଂ ନେତାମାନଙ୍କୁ ବାରମ୍ବାର ଗୁହାରି, ଦରଖାସ୍ତ ଓ ଅନୁରୋଧ କରିଥିଲେ ମଧ୍ୟ କୌଣସି ସୁଫଳ ମିଳିନାହିଁ। ଏହି ଘଟଣାଟି ପଞ୍ଚାୟତିରାଜ ଓ ଗ୍ରାମ୍ୟ ଉନ୍ନୟନ ବିଭାଗର ମନ୍ତ୍ରୀଙ୍କ ନିର୍ବାଚନ ମଣ୍ଡଳୀରେ ଘଟିଛି। ବୈଦେହୀଙ୍କ ପରିବାରରେ ପୂର୍ବରୁ ତାଙ୍କ ସ୍ୱାମୀ ଓ ଦୁଇ ପୁଅ ଥିଲେ। ପୁଅମାନଙ୍କ ବିବାହ ପରେ ଓ ପିଲାଛୁଆ ଜନ୍ମ ହେବା ପରେ ସେମାନେ ନିଜ ନିଜ ସ୍ତ୍ରୀ ଓ ପିଲାଛୁଆଙ୍କୁ ଧରି ଅଲଗା ଅଲଗା ଘର କରି ରହୁଛନ୍ତି। ସ୍ୱାମୀଙ୍କ ମୃତ୍ୟୁ ପରେ ବୈଦେହୀ ସମ୍ପୂର୍ଣ୍ଣ ବେସାହାରା ହୋଇପଡ଼ିଛନ୍ତି। ତାଙ୍କୁ ଦେଖାଶୁଣା କରିବାକୁ କେହି ନାହାନ୍ତି ଏବଂ ଖରା, ବର୍ଷା, ଶୀତ ସବୁ ସମୟରେ ସେ ସେହି ଭଙ୍ଗା ଦଦରା ଘରେ ରହିବାକୁ ବାଧ୍ୟ ହେଉଛନ୍ତି, ଯାହା କେତେବେଳେ ବି ଭାଙ୍ଗିଯାଇପାରେ। ବୈଦେହୀଙ୍କୁ ସରକାରୀ ସହାୟତା ଭାବରେ କେବଳ ଗ୍ରାମପଞ୍ଚାୟତରୁ ମାସକୁ ୫ କିଲୋ ଚାଉଳ ଓ ବାର୍ଦ୍ଧକ୍ୟ ଭତ୍ତା ମିଳୁଛି। ଏହି ଭତ୍ତା ଟଙ୍କାରେ ଘର ତିଆରି କରିବା ଅସମ୍ଭବ ବୋଲି ସେ କହିଛନ୍ତି। ଏଭଳି ଅସହାୟ ଅବସ୍ଥାରେ ଜୀବନ ବିତାଉଥିବା ବୈଦେହୀଙ୍କ ଘରକୁ ଉପଯୁକ୍ତ ତଦନ୍ତ କରି ଯଥାଶୀଘ୍ର ଏକ ପକ୍କା ଘର ଯୋଗାଇ ଦେବାକୁ ଦାବି କରାଯାଉଛି।

କେନ୍ଦୁଝର ଜିଲ୍ଲାର ଭଦ୍ରାସାହି ପଞ୍ଚାୟତ ଅନ୍ତର୍ଗତ ଝାଡ଼ଗାଁ ଅଞ୍ଚଳରେ ବହୁଚର୍ଚ୍ଚିତ ଅନିତା ମହାକୁଡ଼ ହତ୍ୟା ମାମଲାରେ ପୋଲିସ ମୁଖ୍ୟ ଅଭିଯୁକ୍ତଙ୍କ ସମେତ ଅନ୍ୟ ସମ୍ପୃକ୍ତ ଅପରାଧୀଙ୍କୁ ଗିରଫ କରିବା ପରେ ଅନିତାଙ୍କ ପରିବାର କିଛିଟା ଆଶ୍ୱସ୍ତ ହୋଇଛନ୍ତି। ଏହି ପରିପ୍ରେକ୍ଷୀରେ ଅନିତା ମହାକୁଡ଼ଙ୍କ ଏକାଦଶ କାର୍ଯ୍ୟ ଅନୁଷ୍ଠିତ ହୋଇଥିବା ବେଳେ ତାଙ୍କୁ ଶ୍ରଦ୍ଧାଞ୍ଜଳି ଜଣାଇବା ପାଇଁ ଭରସା ଟିମ୍‌ ପହଞ୍ଚିଥିଲା। ଅନିତା ନିଖୋଜ ହେବା ଦିନଠାରୁ ତାଙ୍କ ପରିବାର ନ୍ୟାୟ ପାଇଁ ସଂଘର୍ଷ କରୁଥିଲେ। ଏହି ସମୟରେ ଭରସା ଟିମ୍‌ ପରିବାର ପାଖରେ ଛିଡ଼ା ହୋଇ କେନ୍ଦୁଝର ଜିଲ୍ଲା ଏସ୍‌ପିଙ୍କୁ ଭେଟି ଘଟଣାର ସଠିକ୍ ତଦନ୍ତ ଓ ଦୋଷୀଙ୍କ ଗିରଫ ଦାବି କରିଥିଲେ। ପରବର୍ତ୍ତୀ ସମୟରେ ପୋଲିସ ତଦନ୍ତ କରି ଅଭିଯୁକ୍ତମାନଙ୍କୁ ଗିରଫ କରିଥିଲା। ଏକାଦଶ କାର୍ଯ୍ୟରେ ଭରସା ଟିମ୍‌ର ଗୋପୀନାଥ ରାମ, ଲମ୍ବାଧର ମହାନ୍ତ, ସୁବାସିନୀ ମହାକୁଡ଼, ଦିଲୀପ କୁମାର ମୁଣ୍ଡା, ରତ୍ନମଣି ସେଠୀ, ବୈଶାଖୀ ମହାନ୍ତ, ଶଙ୍କର ଚାଟମ୍ବା, ଦୀପକ ପ୍ରସାଦ ନାଏକ, ମମତା ମହାନ୍ତ, କରଣ, ପୂର୍ଣ୍ଣିମା ଭଦ୍ର ଓ ପାପୁ ଘଣା ଉପସ୍ଥିତ ରହି ଅନିତା ମହାକୁଡ଼ଙ୍କ ଫଟୋଚିତ୍ରରେ ପୁଷ୍ପାଞ୍ଜଳି ଅର୍ପଣ କରିଥିଲେ। ସେମାନେ ମୃତ ଆତ୍ମାର ସଦ୍‌ଗତି କାମନା କରି ଶୋକସନ୍ତପ୍ତ ପରିବାରକୁ ସମବେଦନା ଜଣାଇଥିଲେ। ଭରସା ଟିମ୍‌ର ସଦସ୍ୟମାନେ କହିଛନ୍ତି ଯେ, ଅପରାଧୀମାନେ ଧରାପଡ଼ିଥିଲେ ମଧ୍ୟ ମାମଲାରେ ପରିବାରକୁ ସମ୍ପୂର୍ଣ୍ଣ ନ୍ୟାୟ ନମିଳିବା ପର୍ଯ୍ୟନ୍ତ ସେମାନଙ୍କ ଲଢ଼େଇ ଜାରି ରହିବ। ଦୋଷୀମାନଙ୍କୁ କଠୋର ଦଣ୍ଡ ମିଳିଲେ ହିଁ ଅନିତାଙ୍କ ଆତ୍ମାକୁ ପ୍ରକୃତ ଶାନ୍ତି ମିଳିବ ବୋଲି ସେମାନେ ମତ ଦେଇଥିଲେ। ଏହି ଏକାଦଶ କାର୍ଯ୍ୟରେ ବହୁ ସଂଖ୍ୟକ ଗ୍ରାମବାସୀ, ସମାଜସେବୀ ଓ ଶୁଭେଚ୍ଛୁମାନେ ଯୋଗଦେଇ ଅନିତାଙ୍କ ଅମର ଆତ୍ମା ପ୍ରତି ଶ୍ରଦ୍ଧାଞ୍ଜଳି ଜଣାଇବା ସହ ଏପରି ଘଟଣାର ପୁନରାବୃତ୍ତି ରୋକିବା ପାଇଁ ଆଇନ କଠୋର ବାର୍ତ୍ତା ଦେବା ଆବଶ୍ୟକ ବୋଲି ମତବ୍ୟକ୍ତ କରିଥିଲେ।

ସୁନ୍ଦରଗଡ଼ ଜିଲ୍ଲା ତଳସରା ଅନ୍ତର୍ଗତ ମହୁଲଗାଁ ହେଣ୍ଡୁଅଶୁଖା ଗ୍ରାମରେ ଏକ ଅଭାବନୀୟ ଘଟଣା ଘଟିଛି। ବିଲରେ ଟ୍ରାକ୍ଟର ଯୋଗେ ହଳ କରୁଥିବା ବେଳେ ଟ୍ରାକ୍ଟରଟି ଓଲଟି ପଡ଼ିଥିଲା। ଏହି ଦୁର୍ଘଟଣାରେ ବିଲ ମାଲିକଙ୍କର ମୃତ୍ୟୁ ହୋଇଥିବା ବେଳେ ଗାଡ଼ି ଚାଳକ ଗୁରୁତର ଆହତ ହୋଇଛନ୍ତି।