पुण्यात काँग्रेस आणि पोलिस प्रशासनात तणाव वाढताना दिसतो आहे. काँग्रेस शहराध्यक्ष अरविंद शिंदे यांनी पोलीस आयुक्त कार्यालयावर मोर्चा काढण्याचा इशारा दिला आहे. पोलीस आयुक्त अमितेश कुमार यांच्या बदलीची मागणी करत काँग्रेस आक्रमक झाली आहे. अरविंद शिंदे यांनी आरोप केला आहे की, पोलीस आयुक्तांच्या सांगण्यावरून काँग्रेस कार्यकर्त्यांची नावे एफआयआरमध्ये टाकण्यात आली. मात्र, याच प्रकरणात महापौरांचे नाव तक्रारीतून वगळण्यात आल्याचा आरोप त्यांनी केला आहे. काँग्रेसकडून लवकरच पुणे स्टेशन येथील डॉ. बाबासाहेब आंबेडकर पुतळ्यापासून पोलीस आयुक्त कार्यालयापर्यंत पायी मोर्चा काढण्यात येणार आहे. या आंदोलनात मोठ्या संख्येने काँग्रेस कार्यकर्ते सहभागी होणार असल्याचे सांगण्यात आले आहे. “पोलीस आयुक्तांच्या सांगण्यावरून आमची नावे एफआयआरमध्ये टाकण्यात आली आहेत. आमच्यावर अन्याय होत आहे. महापौरांचे नाव मात्र तक्रारीतून वगळण्यात आले. या अन्यायाविरोधात आम्ही लवकरच मोर्चा काढणार असून पोलीस आयुक्तांची बदली होईपर्यंत आमचा लढा सुरू राहील.” दरम्यान, काँग्रेसचे प्रदेशाध्यक्ष हर्षवर्धन सपकाळ हे लवकरच पुणे दौऱ्यावर येणार असून या आंदोलनाची पुढील दिशा ठरवली जाणार असल्याची माहिती देण्यात आली आहे. या पार्श्वभूमीवर पुण्यातील राजकीय वातावरण तापण्याची शक्यता आहे. काँग्रेसच्या या इशाऱ्यानंतर पोलीस प्रशासन काय भूमिका घेणार, याकडे सर्वांचे लक्ष लागले आहे.

Pimpri Chinchwad City News

Media company पिंपरी चिंचवड, पुणे, महाराष्ट्र•

20 hrs ago