నర్సంపేట మున్సిపాలిటీ పరిధిలోని ముత్తోజిపేట పోస్టాఫీస్‌లో పోస్టుమాస్టర్ వ్యవహారశైలిపై పింఛన్దారులు తీవ్ర అసంతృప్తి వ్యక్తం చేస్తున్నారు. పింఛన్ పొందాలంటే పాన్‌కార్డు, ఆర్‌డీ ఖాతాలకు దరఖాస్తు చేసుకోవాలని పోస్టుమాస్టర్ సూచిస్తున్నారని వారు ఆరోపించారు. ఇతర ప్రాంతాల్లో లేని నిబంధనలను ముత్తోజిపేటలో అమలు చేస్తున్నారని పింఛన్దారులు స్పష్టం చేశారు. కొంతమంది పింఛన్దారులు ఆర్‌డీ ఖాతా కోసం ఇప్పటికే నాలుగుసార్లు ఒక్కొక్కరు రూ.100 చొప్పున చెల్లించినప్పటికీ, ఇప్పటివరకు వారికి పాస్‌బుక్కులు ఇవ్వలేదని వాపోయారు. ఈ సమస్యపై ఉన్నతాధికారులు వెంటనే స్పందించి పరిష్కరించాలని పింఛన్దారులు విజ్ఞప్తి చేస్తున్నారు.

ఖమ్మం నగరంలోని శ్రీస్తంబాద్రి లక్ష్మి నరసింహ స్వామి ఆలయ ప్రాంగణంలో, ఆలయ గుట్టపై అకస్మాత్తుగా మంటలు చెలరేగాయి. ఈ మంటలను గమనించిన భక్తులు తక్షణమే ఫైర్ సిబ్బందికి సమాచారం అందించారు. సమాచారం అందిన వెంటనే, అగ్నిమాపక సిబ్బంది సకాలంలో స్పందించి మంటలను అదుపులోకి తెచ్చారు. అదే సమయంలో, చుట్టుపక్కల ఇళ్ళలోని ప్రజలు కూడా బకెట్లతో నీళ్ళు చల్లి మంటలను ఆర్పేందుకు సహాయపడ్డారు. మంటలు పూర్తిగా అదుపులోకి రావడంతో చుట్టుపక్కల ప్రజలు ఊపిరి పీల్చుకున్నారు. కాగా, ఈ మంటలకు గల కారణాలు ఇంకా తెలియాల్సి ఉంది.

కరీంనగర్ జిల్లా కలెక్టర్ చిత్రా మిశ్రా సంబంధిత శాఖల అధికారులకు కీలక ఆదేశాలు జారీ చేశారు. ప్రజావాణి దరఖాస్తులకు అధిక ప్రాధాన్యత ఇవ్వాలని, వాటిని క్షేత్రస్థాయిలో పరిశీలించి సత్వరం పరిష్కరించేందుకు కృషి చేయాలని ఆమె స్పష్టం చేశారు. సోమవారం కలెక్టరేట్ ఆడిటోరియంలో అదనపు కలెక్టర్ (రెవెన్యూ) శ్రీనివాస్ రెడ్డితో కలిసి ప్రజల నుంచి నేరుగా అర్జీలు స్వీకరించిన కలెక్టర్, ఈ సందర్భంగా వచ్చిన మొత్తం 188 దరఖాస్తులలో కొన్నింటిని అక్కడికక్కడే పరిష్కరించారు. ప్రజావాణి కార్యక్రమాన్ని ముఖ్యమంత్రి కార్యాలయ (సీఎంఓ) అధికారులు పర్యవేక్షిస్తున్నారని కలెక్టర్ చిత్రా మిశ్రా పేర్కొన్నారు. సిబ్బంది విధిగా నిబంధనలను పాటిస్తూ, ప్రతి అర్జీని క్షేత్రస్థాయిలో పరిశీలించి పరిష్కారానికి కృషి చేయాలని ఆమె నొక్కి చెప్పారు. లోకాయుక్త, ఎన్.హెచ్.ఆర్.సి.తో పాటు వివిధ కోర్టు కేసులకు సంబంధించిన శాఖల వారీగా పెండింగ్ లో ఉన్న కేసులను పరిష్కరించడానికి తక్షణ చర్యలు చేపట్టాలని అధికారులను ఆదేశించారు.

టీఆర్ఎస్ అధ్యక్షురాలు కల్వకుంట్ల కవిత ఆదివారం నాడు ఉమ్మడి జిల్లాలో ముగ్గురు మంత్రులు ఉన్నప్పటికీ కనీసం వైద్య సేవలు కూడా అందించలేని దయనీయ స్థితి ఉందని తీవ్రంగా విమర్శించారు. ఆమె మాట్లాడుతూ, డబ్బులు లేని కారణంగా ప్రభుత్వ ఆసుపత్రికి వెళ్లిన ఒక చిన్నారి, అక్కడ వైద్యుల నిర్లక్ష్యం వల్ల రక్తం ఎక్కించే క్రమంలో అంగవైకల్యానికి గురయ్యాడని ఆవేదన వ్యక్తం చేశారు. ఈ ఘటనపై ముఖ్యమంత్రి స్పందించి, బాధిత బాలుడి కుటుంబానికి రూ.25 లక్షల నష్టపరిహారం అందించాలని కవిత గట్టిగా డిమాండ్ చేశారు.

కరీంనగర్ జిల్లా గన్నేరువరం మండలంలోని చాకలి వానిపల్లి అనుబంధ గ్రామమైన కూన వానిపల్లికి చెందిన రైతు కూన యాదగిరి, తన పిల్లల ఈత సరదాను తీర్చడానికి ఒక అద్భుతమైన ఆలోచన చేశారు. తన వద్ద ఉన్న ట్రాక్టర్ ట్రాలీని ఉపయోగించి, దానిలో టార్పాలిన్ కవర్‌ను అమర్చి, నీటితో నింపి చిన్నపాటి స్విమ్మింగ్ పూల్‌ను తయారుచేశారు. పనికిరాని వస్తువు అంటూ ఏదీ ఉండదని, ఒక ఐడియా జీవితాన్నే మార్చగలదని నిరూపిస్తూ, ఈ తండ్రి తన పిల్లల కోసం ఈ సృజనాత్మక ఏర్పాటు చేశారు.

జయశంకర్ భూపాలపల్లి జిల్లాలోని కాటారం మండలం ధన్వాడలో 20 లక్షల రూపాయల వ్యయంతో నిర్మించిన నూతన గ్రామ పంచాయతీ భవనాన్ని మంత్రి శ్రీధర్ బాబు సమక్షంలో కలెక్టర్ రాహుల్ శర్మ ప్రారంభించారు. అనంతరం, ధన్వాడ, పరికిపల్లె గ్రామాలలో ఇందిరమ్మ పథకం కింద నిర్మించిన కొత్త ఇళ్లకు మంత్రి రిబ్బన్ కట్ చేసి గృహప్రవేశాలు నిర్వహించారు. ఈ కార్యక్రమాలలో అదనపు కలెక్టర్ విజయలక్ష్మి, ఎస్పీ సిరిశెట్టి సంకీర్త్ తదితరులు కూడా పాల్గొన్నారు.

జనసేన అధినేత పవన్ కళ్యాణ్ పై ప్రొఫెసర్ నాగేశ్వరరావు అనుచిత వ్యాఖ్యలు చేశారంటూ కరీంనగర్ లో జనసేన కార్యకర్తలు తీవ్ర ఆందోళనకు దిగారు. తెలంగాణ చౌక్ లో ప్రొఫెసర్ నాగేశ్వరరావు చిత్రపటాలను ప్రదర్శించి, చెప్పులతో కొట్టి, అనంతరం దహనం చేశారు. నాగేశ్వరరావుపై కఠిన చర్యలు తీసుకోవాలని, వెంటనే అరెస్ట్ చేయాలని నిరసనకారులు డిమాండ్ చేశారు. పవన్ కళ్యాణ్ పై వివాదాస్పద వ్యాఖ్యలు మానుకోకపోతే రాష్ట్రవ్యాప్త ఆందోళనలు చేపడతామని జనసేన పార్లమెంట్ నియోజకవర్గ కో ఆర్డినేటర్ బేతి మహేందర్ రెడ్డి ఈ సందర్భంగా హెచ్చరించారు.

బండి’’ కోసం మండు టెండలో ‘‘సైకిల్ బండి యాత్ర* *బండి సంజయ్ కు మంచి జరగాలని కోరుతూ పెరుగు వెంకటేశ్వర్లు జాతీయవాది సైకిల్ యాత్ర* *తిరుపతి నుండి హైదరాబాద్ దాకా 680 కి.మీల సైకిల్ యాత్ర* *హైదరాబాద్ లో బండి సంజయ్ నివాసానికి చేరుకున్న పెరుగు వెంకటేశ్వర్లు* *వెంకటేశ్వర్లుకు ఆతిథ్యమిచ్చి యాత్ర విశేషాలు తెలుసుకున్న కేంద్ర మంత్రి* *జాతీయ వాది బండి సంజయ్ ఈ దేశానికి అవసరమని చెప్పిన వెంకటేశ్వర్లు* *బండి సంజయ్ బాగుండాలని, కుట్రలను చేధించే శక్తిని ప్రసాదించాలని కోరుతూ సైకిల్ యాత్ర చేపట్టినట్లు వెల్లడి* కేంద్ర హోంశాఖ సహాయ మంత్రి బండి సంజయ్ కుమార్ ను రాజకీయంగా దెబ్బతీసేందుకు జరుగుతున్న కుట్రల నుండి కాపాడటంతోపాటు ఆయనకు మానసిక ప్రశాంతత కల్పించాలని కోరుతూ తిరుపతికి చెందిన 46 ఏళ్ల జాతీయ వాది పెరుగు వెంకటేశ్వర్లు ‘‘సైకిల్ యాత్ర’’ చేపట్టారు. తిరుపతి అలిపిరి వద్ద గంగమ్మకు మొక్కులు చెల్లించుకుని ‘‘శక్తి సంకల్ప యాత్ర’’ పేరుతో గత నెల 25న సైకిల్ యాత్ర ప్రారంభించారు. తిరుపతి మీదుగా మొదలైన సైకిల్ యాత్ర ఒంటిమిట్ట, కడప, నంద్యాల, మైదుకూరు, కర్నూలు మీదుగా తెలంగాణలో అడుగుపెట్టారు. అలంపూర్ మీదుగా పెబ్బేరు, జడ్చర్ల, బాలానగర్, షాద్ నగర్, శంషాబాద్ మీదుగా హైదరాబాద్ చేరుకున్నారు. ప్రతిరోజు సగటున 85 కి.మీల చొప్పున సైకిల్ తొక్కుకుంటూ ఈరోజు హైదరాబాద్ కు చేరుకున్నారు. వాస్తవానికి తిరుపతి నుండి కరీంనగర్ వరకు ‘‘శక్తి సంకల్ప యాత్ర’’ చేపట్టిన పెరుగు వెంకటేశ్వర్లు... బండి సంజయ్ కుమార్ హైదరాబాద్ లోనే ఉన్నారని సమాచారం రావడంతో నేరుగా బంజారాహిల్ష్ లోని కేంద్ర మంత్రి బండి సంజయ్ నివాసానికి చేరుకున్నారు. పెరుగు వెంకటేశ్వర్లు సైకిల్ యాత్ర గురించి బీజేపీ కార్యకర్తల నుండి సమాచారం అందుకున్న బండి సంజయ్ పెరుగు వెంకటేశ్వర్లును తన నివాసానికి సాదరంగా ఆహ్వానించారు. తాను జాతీయ వాదినని, జాతీయ వాదులకు ఏ కష్టం వచ్చినా అండగా ఉండాలనే సంకల్పంతో ఈ యాత్ర చేపట్టానని ఈ సందర్భంగా పెరుగు వెంకటేశ్వర్లు సంజయ్ కు తెలిపారు. మండుటెండను లెక్క చేయకుండా జాతీయ వాదులకు అండగా నిలుస్తూ పెరుగు వెంకటేశ్వర్లు చేస్తున్న ‘‘శక్తి సంకల్ప యాత్ర’’ అభినందనీయమన్నారు. అనంతరం పెరుగు వెంకటేశ్వర్లును శాలువాతో సన్మానించడంతోపాటు భోజన ఆతిథ్యమిచ్చారు. ఈ సందర్భంగా పెరుగు వెంకటేశ్వర్లు మాట్లాడుతూ దేశం కోసం, ధర్మం కోసం, హిందుత్వం కోసం జాతీయవాది బండి సంజయ్ చేస్తున్న పోరాటాన్ని చూసి ఆయన అభిమానిగా మారాననన్నారు. ఇటీవల కాలంలో బండి సంజయ్ పై జరుగుతున్న దుష్ప్రచారాన్ని చూసి తీవ్ర కలత చెందానని వాపోయారు. బండి సంజయ్ లాంటి జాతీయ వాది ఈ దేశానికి ఎంతో అవసరమని, అందుకే బండి సంజయ్ బాగుండాలని ఆయనకు జాతీయ వాదులంతా అండగా నిలవాలని కోరుతూ ‘‘శక్తి సంకల్ప యాత్ర’’ పేరుతో తిరుపతి నుండి హైదరాబాద్ వరకు సైకిల్ యాత్ర చేపట్టినట్లు తెలిపారు. సైకిల్ యాత్రలో భాగంగా ప్రతిరోజు రాత్రి దేవాలయంలో బస చేసేవాడనని, మరుసటి రోజు ఆలయంలో బండి సంజయ్ బాగుండాలని పూజ చేసిన అనంతరం సైకిల్ యాత్ర చేసేవాడనని చెప్పుకొచ్చారు.

జగిత్యాల జిల్లాలో ఐపీఎల్ మ్యాచ్‌పై ఉన్న అభిమానం, మ్యాచ్ చూస్తూ కారు నడపడం ఒక యువకుడి ప్రాణాన్ని తీసింది. మరో ఇద్దరు యువకులు తృటిలో ప్రాణాలతో బయటపడ్డారు. ఈ విషాద ఘటన జగిత్యాల రూరల్ మండలం తాటిపల్లి సమీపంలో చోటుచేసుకుంది. వివరాల్లోకి వెళ్తే, మోతె గ్రామానికి చెందిన అశ్విన్, బోగ నివేశ్, అరుణ్ అనే యువకులు మోరపల్లిలోని స్నేహితుని ఇంట్లో విందులో పాల్గొని కారులో బయల్దేరారు. తాటిపల్లి సమీపంలోకి రాగానే, సెల్ ఫోన్‌లో ఐపీఎల్ మ్యాచ్ చూస్తూ కారు నడుపుతుండటంతో అదుపుతప్పి వ్యవసాయ బావిలోకి దూసుకెళ్లింది. కారు నడుపుతున్న అరుణ్ సీటు బెల్టు ధరించి ఉండటంతో కారులోంచి బయటపడలేక అందులోనే మృతి చెందాడు. అశ్విన్, నివేశ్‌లు కారు నుంచి బయటకు వచ్చి కేకలు వేయడంతో స్థానిక రైతులు గమనించి పోలీసులకు సమాచారం అందించారు. తాడుల సహాయంతో అశ్విన్, నివేశ్‌లను సురక్షితంగా బయటకు లాగారు. ప్రమాదం గురించి సమాచారం అందుకున్న పోలీసులు, అగ్నిమాపక సిబ్బంది, స్థానికులు దాదాపు మూడు గంటల పాటు సహాయక చర్యలు చేపట్టి, బావిలోంచి కారుతో పాటు అరుణ్ మృతదేహాన్ని వెలికి తీశారు. ఐపీఎల్ ఫైనల్ మ్యాచ్‌ను మొబైల్ ఫోన్‌లో చూస్తూ డ్రైవింగ్ చేయడమే ఈ ప్రమాదానికి కారణమని స్థానికులు చెబుతున్నారు.