ধেমাজিৰ চিচি চাৰিআলি উচ্চতৰ মাধ্যমিক বিদ্যালয়ত বিদ্যালয়ৰ সামগ্ৰী চুৰি কৰি হাতে লোটে ধৰা পৰিল বিদ্যালয়খনৰ চকীদাৰ দিলিন ভূঞা। স্থানীয় ৰাইজে বিদ্যালয়খনৰ পৰা ইটা চুৰি কৰি নিয়াৰ সময়তে দিলিন ভূঞাক ধৰিবলৈ সক্ষম হয়। এই ঘটনাৰ পাছত চিচি চাৰিআলি উচ্চতৰ মাধ্যমিক বিদ্যালয়ৰ অধ্যক্ষা গৰাকীয়ে চকীদাৰ দিলিন ভূঞাৰ বিৰুদ্ধে চিচিবৰগাওঁ আৰক্ষী চকীত এখন এজাহাৰ দাখিল কৰে। বিদ্যালয়ৰ সামগ্ৰী চুৰিৰ অভিযোগত চতুৰ্থ বৰ্গৰ কৰ্মচাৰী দিলিন ভূঞা বৰ্তমান ৰঙাঘৰৰ আলহী হৈছে।

বৰপেটাৰোডৰ বালাভিঠাৰ বিশিষ্ট সমাজকৰ্মী তথা বালাভিঠা গাওঁ পঞ্চায়তৰ আঞ্চলিক সদস্য আব্দুল হালিমক আগন্তুক ইছলাম ধৰ্মাৱলম্বী লোকসকলৰ পবিত্ৰ ঈদ উল আজহা উপলক্ষে বালাভিঠা আব্দুল ৰৌফ ফ্ৰেণ্ড ক্লাৱৰ তৰফৰ পৰা সম্বৰ্ধনা জনোৱা হৈছে। কংগ্ৰেছ দলৰ এজন নেতা হিচাপেও পৰিচিত আব্দুল হালিমক বালাভিঠা গাৱঁৰ এজন বিশিষ্ট সমাজকৰ্মী হিচাপে এই সম্বৰ্ধনা জ্ঞাপন কৰা হয়। এই অনুষ্ঠানত বালাভিঠা আব্দুল ৰৌফ ফ্ৰেণ্ড ক্লাৱৰ সভাপতি জাহিদুল ইছলাম, মুখ্য উপদেষ্টা মতিয়াৰ ৰহমান আৰু সাধাৰণ সম্পাদক মনিৰুজ জামানে আব্দুল হালিমক ফুলাম গামোচা আৰু জাপিৰে সম্বৰ্ধনা জনায়। তেওঁলোকে আব্দুল হালিমক অসম চৰকাৰৰ নীতি নিৰ্দেশনা মানি পবিত্ৰ বকৰী ঈদ পালন কৰিবলৈ ইছলাম ধৰ্মাৱলম্বী লোকসকলক আহ্বান জনাবলৈ অনুৰোধ জনায়। ইফালে, আব্দুল হালিমেও সমূহ ইছলাম ধৰ্মাৱলম্বী লোকসকলক পবিত্ৰ ঈদ উপলক্ষে আন্তৰিক শুভেচ্ছা জ্ঞাপন কৰে।

লখিমপুৰ জিলাৰ চাউলধোৱা আৰক্ষী চকীৰ অধীনস্থ কণানদী আৰু থেকেৰাগুৰি অঞ্চলত সংঘটিত এক পথ দুৰ্ঘটনাত এগৰাকী লোক আহত হৈছে। এই দুৰ্ঘটনাৰ পিছতে চাউলধোৱা আৰক্ষীয়ে ঘটনাস্থলীৰ পৰা দুৰ্ঘটনাগ্ৰস্ত দুয়োখন বাহন জব্দ কৰিছে।

বিধায়ক মেহেবুব মুক্তাৰে মুঠ ৬ খন পথ নিৰ্মাণৰ বাবে আধাৰশিলা স্থাপন কৰিছে।

অখিল গগৈয়ে মন্ত্ৰী পিযুঁজ হাজৰিকালৈ এক গুৰুত্বপূৰ্ণ প্ৰশ্ন উত্থাপন কৰিছে। তেওঁ সোধিছে যে অসমত এতিয়াও ছিণ্ডিকেট চলি আছে নেকি।

সোমবাৰে তিনিচুকীয়াৰ শদিয়াৰ চেংচাপ আৰক্ষী থানাৰ অন্তৰ্গত ন-পতীয়া গাঁৱত এক শোকাৱহ পথ দুৰ্ঘটনা সংঘটিত হৈছে। এই দুৰ্ঘটনাত এখন তীব্ৰবেগী বাইকৰ খুন্দাত দীপশিখা গুৰুং নামৰ ৩ বছৰীয়া কন্যা শিশুৰ মৃত্যু হোৱাৰ লগতে একে বয়সৰ আন এটি শিশু গুৰুত্বপূৰ্ণভাৱে আহত হয়। এই শোকাৱহ ঘটনাৰ পাছতেই স্থানীয় ৰাইজ ক্ষুব্ধ হৈ পৰে। বাইক আৰোহীক ততাতৈয়াকৈ গ্ৰেপ্তাৰ কৰাৰ দাবীত ক্ষুব্ধ ৰাইজে চেংচাপ আৰক্ষী থানা ঘেৰাও কৰি প্ৰতিবাদ সাব্যস্ত কৰে।

আজি ১০ দিনৰ ভিতৰত চতুৰ্থবাৰলৈ পেট্ৰল-ডিজেলৰ মূল্যবৃদ্ধি হোৱাত সাধাৰণ জনতাৰ ওপৰত ইয়াৰ ব্যাপক প্ৰভাৱ পৰিছে। এই মূল্যবৃদ্ধিৰ ফলত তিনিচুকীয়াত আজি পুনৰ পেট্ৰলৰ দাম ২.৭২ টকা আৰু ডিজেলৰ দাম ২.৮৩ টকা বৃদ্ধি পাইছে। পেট্ৰল-ডিজেলৰ মূল্যবৃদ্ধিৰ লগে লগে অত্যাৱশ্যকীয় সামগ্ৰীসমূহৰ দাম আৰু যাত্ৰীৰ ভাড়াও বৃদ্ধি পোৱাৰ দিশে গতি কৰিছে। এই পৰিস্থিতিত জনসাধাৰণে চৰকাৰক অতি সোনকালে পেট্ৰল-ডিজেলৰ লগতে আন অত্যাৱশ্যকীয় সামগ্ৰীৰ মূল্যবৃদ্ধি নিয়ন্ত্ৰণৰ বাবে পদক্ষেপ ল’বলৈ আহ্বান জনাইছে।

“কথাৰে নহয়, কামেৰে পৰিচয়”— এই বাক্যশাৰীকে বাস্তৱ ৰূপ দি ৫৫ নং ধিং বিধানসভা সমষ্টিৰ ৰাইজৰ দলৰ নব-নিৰ্বাচিত বিধায়ক মেহেবুব মুক্তাৰে আজি দ্বিতীয় দিনৰ বাবে সমষ্টিটোত মুঠ ৬ খনকৈ পথ নিৰ্মাণৰ আধাৰশিলা স্থাপন কৰে। শপত গ্ৰহণ কৰাৰ পাছতেই বিধায়কগৰাকীয়ে ধিং সমষ্টিত উন্নয়নৰ গতি তীব্ৰ কৰাৰ লক্ষ্যৰে একেৰাহে বিভিন্ন পদক্ষেপ গ্ৰহণ কৰিছে। উল্লেখ্য যে, বিগত প্ৰায় বিশ বছৰে ধিং সমষ্টিবাসীয়ে উন্নয়নৰ মুখ নেদেখাৰ অভিযোগ উত্থাপন হৈ আহিছিল, বিশেষকৈ জৰাজীৰ্ণ পথ-ঘাটৰ সমস্যাই ৰাইজক দীৰ্ঘদিন ধৰি জুৰুলা কৰি আহিছিল। সদ্য সমাপ্ত বিধানসভা নিৰ্বাচনত উন্নয়নৰ আশাত ধিংবাসীয়ে মেহেবুব মুক্তাৰক ৭১ হাজাৰতকৈ অধিক ভোটৰ ব্যৱধানত বিজয়ী কৰাইছিল। সাংবাদিকতা জীৱনৰ পৰা ৰাজনীতি ক্ষেত্ৰলৈ অহা বিধায়কগৰাকীয়ে নিৰ্বাচনী প্ৰচাৰৰ সময়ত দিয়া প্ৰতিশ্ৰুতিসমূহ আখৰে আখৰে পালন কৰাৰ দিশে আগবঢ়া দেখা গৈছে। আজি দুপৰীয়া প্ৰায় ১২ বজাত SOPD-G আঁচনিৰ অধীনত ধিং সমষ্টিৰ মৈৰাধ্বজ গাঁও পঞ্চায়তৰ অন্তৰ্গত শালমাৰাবড়ী-বানেবিহাৰ পথৰ নিৰ্মাণ কাৰ্যৰো শুভাৰম্ভ কৰা হয়। স্থানীয় ৰাইজে আশা ব্যক্ত কৰিছে যে নতুন বিধায়কৰ নেতৃত্বত ধিং সমষ্টিয়ে আগন্তুক দিনত উন্নয়নৰ এক নতুন দিশ লাভ কৰিব।

অৰুণাচল প্ৰদেশ এণ্টি ড্ৰাগ ৱাৰিয়ৰ সংস্থাৰ সভাপতি গুমিন মিজেক গ্ৰেপ্তাৰ কৰা সন্দৰ্ভত ছ’চিয়েল মিডিয়া আৰু সংবাদ মাধ্যমত বিয়পি পৰা বিভ্ৰান্তিকৰ তথ্যৰ প্ৰতি লক্ষ্য ৰাখি লখিমপুৰ আৰক্ষীয়ে এক স্পষ্টীকৰণ জাৰি কৰিছে। এই গোচৰৰ ভুক্তভোগী ৰূপম কাকতি, শ্ৰী বাবু কাকতিৰ পুত্ৰ আৰু লক্ষীমপুৰ জিলাৰ বিহপুৰীয়া থানাৰ অন্তৰ্গত চেছা ৰাজগড় গাঁৱৰ বাসিন্দা। তেওঁ পলি কাকতিৰ স্বামী আৰু পেছাত এজন চাহ খেতিয়ক। ২০২৪ চনৰ পৰা তেওঁ ড্ৰাগছ আসক্ত হৈ আছিল আৰু বৰ্তমান ডিটক্সিফিকেশ্যন পৰ্যায়ত আছে। প্ৰথম ঘটনাটো ০৬-০২-২০২৬ তাৰিখে সংঘটিত হৈছিল যেতিয়া দুপৰীয়া প্ৰায় ৩:০০ বজাত অৰুণাচল প্ৰদেশৰ পৰা অহা ৫/৬ জন অসামৰিক পোছাক পৰিহিত ব্যক্তিয়ে তেওঁৰ চাহ বাগিচাত কাম কৰি থকা সময়তে তেওঁৰ বাসগৃহত প্ৰৱেশ কৰিছিল। তেওঁলোকে ৰূপম কাকতিক বলপূৰ্বকভাৱে তেওঁৰ ব'লেৰ' বাহনৰ সৈতে লৈ গৈ ডইপুং অঞ্চলত গাড়ী ৰখাইছিল। তাত তেওঁলোকে ৭ লাখ টকা দাবী কৰিছিল আৰু ধন নিদিলে অৰুণাচল প্ৰদেশত ড্ৰাগছৰ গোচৰত জড়িত কৰাৰ ভাবুকি দিছিল। ৰূপম কাকতিৰ অভিযোগ অনুসৰি, দাবী কৰা ধন পৰিশোধ কৰাৰ পাছতো তেওঁলোকেই ৫১ গ্ৰাম নিষিদ্ধ সামগ্ৰী তেওঁৰ ওপৰত জাপি দি বান্দৰদেৱা আৰক্ষী থানাত গতাই দিছিল। ইয়াৰ ভিত্তিত ০৬-০২-২০২৬ তাৰিখে সন্ধিয়া ৭:১০ বজাত বান্দৰদেৱা আৰক্ষী থানাত NDPS Act-ৰ বিভিন্ন ধাৰাত বান্দৰদেৱা পি.এছ. কেছ নং ০৮/২০২৬ ৰুজু হৈছিল। ৰূপম কাকতিক ন্যায়িক জিম্মালৈ প্ৰেৰণ কৰা হৈছিল আৰু পিছত ১০-০৪-২০২৬ তাৰিখে জামিন লাভ কৰিছিল। উক্ত গোচৰটোত ০৪-০৫-২০২৬ তাৰিখে C.S. No. ১২/২০২৬ যোগে চাৰ্জশ্বীট দাখিল কৰা হৈছে। ১৫-০৫-২০২৬ তাৰিখে দুপৰীয়া প্ৰায় ১:৩০ বজাত আন এটা দলে পুনৰ ৰূপম কাকতিৰ বাসগৃহত উপস্থিত হয়। অভিযোগকাৰীয়ে প্ৰথমে ১০/১২ জন ব্যক্তি বুলি উল্লেখ কৰিছিল যদিও তদন্তত ৮ জন লোক আছিল বুলি নিশ্চিত হৈছে। এই দলটোত গুমিন মিজে, টোলে এতে, কালিং তালাম, গল’ তালাম, চুম্পা আৰু সুমেশ্বৰ বসুমতাৰীকে ধৰি চিনাক্ত কৰা ৬ জন ব্যক্তি আছিল। দলটো এখন নম্বৰপ্লেটবিহীন ব'লেৰ', এখন টয়োটা টাইচৰ (পঞ্জীয়ন নং AR09E0525) আৰু এখন নম্বৰপ্লেটবিহীন মাৰুতি সুজুকি বাহনেৰে আহিছিল। অভিযুক্তসকলে বলপূৰ্বকভাৱে তেওঁৰ ঘৰত সোমাই ৰূপম কাকতিক ধৰি নিয়াৰ চেষ্টা কৰে। পূৰ্বৰ অভিজ্ঞতাৰ বাবে ৰূপম কাকতি চাহ বাগিচাৰ মাজেৰে পলাই যায়। অভিযুক্তসকলে তেওঁক খেদি যায় আৰু দুটা গুলী চলায়, কিন্তু তেওঁক ধৰিবলৈ সক্ষম নহয়। পিছদিনা একেই দল পুনৰ তেওঁৰ বাসগৃহত উপস্থিত হৈছিল যদিও স্থানীয় গাঁওবাসীয়ে একত্ৰিত হৈ তেওঁলোকক বাধা দিয়ে। জনসমাগম দেখি অভিযুক্তসকল ঘটনাস্থলৰ পৰা পলাই যায় আৰু তেওঁলোকে অহা দুখন গাড়ী আৰু তিনিখন মটৰচাইকেলৰ ভিতৰত AR01U6417 নম্বৰৰ এখন মটৰচাইকেল স্থানীয় লোকসকলে জব্দ কৰে। প্ৰাথমিক তদন্তত পোহৰলৈ আহে যে এই দলটোৰ নেতৃত্ব দিছিল অৰুণাচল প্ৰদেশৰ পূব ছিয়াং জিলাৰ পাছিঘাট থানাৰ চিবুট গাঁৱৰ বাসিন্দা, স্বৰ্গীয় টাগেন মিজেৰ পুত্ৰ ৪৩ বছৰীয়া গুমিন মিজেই। তেওঁ নিজকে “Arunachal Pradesh Anti-Drug Warrior” নামৰ এটা অপঞ্জীভুক্ত এন.জি.অ’.ৰ সভাপতি বুলি দাবী কৰে। তদন্তত ১৫-০৫-২০২৬ তাৰিখে ৰূপম কাকতিক ধৰিবলৈ চেষ্টা কৰাৰ সময়ত গুমিন মিজেই নিজৰ .২২ ৰিভলভাৰৰ পৰা দুটা গুলী চলোৱাটো নিশ্চিত হৈছে। ভুক্তভোগী, অভিযুক্ত আৰু স্থানীয় লোকসকলৰ জেৰা আৰু অৰুণাচল প্ৰদেশ আৰক্ষীৰ পৰা সংগ্ৰহ কৰা তথ্যৰ ভিত্তিত গুমিন মিজে এজন সন্দেহজনক স্বভাৱৰ ব্যক্তি বুলি আৰক্ষীয়ে মন্তব্য কৰিছে। তেওঁ প্ৰায়ে আদি আৰু গাল’ জনগোষ্ঠীৰ প্ৰভাৱশালী সাংসদ আৰু বিধায়কৰ নাম ব্যৱহাৰ কৰি অৰুণাচল প্ৰদেশ আৰক্ষী প্ৰশাসনক হাৰাশাস্তি কৰাৰ অভিযোগ আছে আৰু তেওঁৰ ছ’চিয়েল মিডিয়াৰ জনপ্ৰিয়তাৰ বাবে স্থানীয় আৰক্ষীয়ে তেওঁৰ বিৰুদ্ধে কঠোৰ ব্যৱস্থা ল’বলৈ সংকোচ বোধ কৰে বুলি তথ্য পোৱা গৈছে। লখিমপুৰ আৰক্ষীয়ে স্পষ্ট কৰিছে যে অভিযুক্তসকলে অসম বা অৰুণাচল প্ৰদেশৰ আৰক্ষী প্ৰশাসনক কোনো ধৰণে অৱগত নকৰাকৈ বা সমন্বয় নকৰাকৈ অসমৰ এখন ব্যক্তিগত বাসগৃহত বলপূৰ্বক প্ৰৱেশ কৰিছিল, এজন ব্যক্তিক অপহৰণৰ চেষ্টা কৰিছিল আৰু আগ্নেয়াস্ত্ৰ ব্যৱহাৰ কৰি গুলী চলাইছিল। তেওঁলোকৰ এই কাৰ্যসমূহে তথাকথিত ড্ৰাগছ বিৰোধী অভিযানৰ আৱৰণত অপহৰণ, ভয়-ভাবুকি আৰু চাঁদাবাজিৰ দৰে অপৰাধমূলক উদ্দেশ্য স্পষ্টভাৱে প্ৰতিফলিত কৰে। লক্ষীমপুৰ আৰক্ষীৰ সৈতে যোগাযোগ কৰাৰ লগে লগে অৰুণাচল প্ৰদেশ আৰক্ষীয়ে তৎপৰতাৰে সঁহাৰি জনাই অভিযুক্তক আটক কৰে আৰু পিছত লক্ষীমপুৰ আৰক্ষীয়ে তেওঁক ইটানগৰ আৰক্ষী থানাৰ পৰা নিজৰ জিম্মালৈ আনে। এই ঘটনাৰ সন্দৰ্ভত বিহপুৰীয়া আৰক্ষী থানাত Bihpuria PS Case No. ৭২/২০২৬ ৰুজু কৰা হৈছে, য'ত BNS-ৰ ৩২৯(১)/৩২৯(২)/১১৭(১)/১১৭(২)/১০৯/৩১২/৩২৪/৭৪/৩(৫) ধাৰা আৰু Arms Act-ৰ ২৭(১)/২৭(২) ধাৰা প্ৰয়োগ কৰা হৈছে। তদন্ত অব্যাহত আছে আৰু গুমিন মিজেক দুদিনীয়া আৰক্ষী জিম্মাৰ অন্তত ন্যায়িক জিম্মালৈ প্ৰেৰণ কৰা হৈছে। লখিমপুৰ আৰক্ষীয়ে পুনৰ উল্লেখ কৰিছে যে গুমিন মিজেৰ কোনো বৈধ ক্ষমতা নাছিল যে তেওঁ এটা অপঞ্জীভুক্ত এন.জি.অ’.ৰ নামত অসমৰ ভিতৰত একপক্ষীয়ভাৱে অভিযান চলাব পাৰে, আৰু এই ঘটনাই অপহৰণ, ভয়-ভাবুকি, চাঁদাবাজি, অবৈধ অনুপ্ৰৱেশ আৰু আগ্নেয়াস্ত্ৰৰ অবৈধ ব্যৱহাৰৰ দৰে অপৰাধ সংঘটিত হোৱাৰ প্ৰাথমিক প্ৰমাণ দাঙি ধৰিছে।

ষষ্ঠদশ অসম বিধানসভা অধিৱেশন-২০২৬ৰ সময়ত ৰাজ্যপালৰ ধন্যবাদসূচক ভাষণ সন্দৰ্ভত বিধায়ক অখিল গগৈয়ে নিজৰ ফালৰ পৰা এক সংশোধনী প্ৰস্তাৱ উত্থাপন কৰিছে।