విజయనగరం కలెక్టరేట్ ఆడిటోరియంలో నిర్వహించిన ప్రపంచ బాల కార్మిక వ్యతిరేక దినోత్సవ కార్యక్రమంలో రాష్ట్ర బాలల హక్కుల కమిషన్ చైర్మన్ వేటుకూరి సూర్యనారాయణ రాజు పాల్గొన్నారు. ఈ సందర్భంగా ఆయన బాల కార్మిక వ్యవస్థను నిర్మూలించడం సమాజంలోని ప్రతి ఒక్కరి బాధ్యత అని ఉద్ఘాటించారు. అన్ని బాలలను పాఠశాలలకు పంపాలని ఆయన గట్టి పిలుపునిచ్చారు. చిన్నారులతో భిక్షాటన చేయిస్తున్నా లేదా వారిని బాల కార్మికులుగా పనిచేయిస్తున్నా వెంటనే 1098 చైల్డ్ హెల్ప్‌లైన్‌కు సమాచారం ఇవ్వాలని ప్రజలకు సూచించారు. ఈ కార్యక్రమంలో బాల్య వివాహాల నివారణపై ప్రతిజ్ఞ చేయించారు. అంతేకాకుండా, "బాలలను పనిలో కాదు.. బడిలో ఉంచాలి" అనే సందేశంతో ఒక పోస్టర్‌ను ఆవిష్కరించారు. బాల కార్మిక వ్యవస్థ నిర్మూలనకు సమాజంలోని ప్రతి ఒక్కరూ కృషి చేయాలని చైర్మన్ వేటుకూరి మరోసారి స్పష్టం చేశారు.

జూన్ 12న నవోదయం–2.0 కార్యక్రమంలో భాగంగా, ప్రొహిబిషన్ అండ్ ఎక్సైజ్ శాఖ అధికారులు ఒడిశా రాష్ట్రంలో ప్రత్యేక అంతర్రాష్ట్ర దాడులు నిర్వహించి భారీ మొత్తంలో అక్రమ మద్యం తయారీ సామగ్రిని స్వాధీనం చేసుకుని ధ్వంసం చేశారు. ప్రొహిబిషన్ అండ్ ఎక్సైజ్ డైరెక్టర్, మంగళగిరి ఆదేశాలు మరియు జిల్లా ప్రొహిబిషన్ అండ్ ఎక్సైజ్ అధికారి సూచనల మేరకు, పార్వతీపురం అసిస్టెంట్ ప్రొహిబిషన్ అండ్ ఎక్సైజ్ సూపరింటెండెంట్ ఎ. సంతోష్ ఆధ్వర్యంలో శుక్రవారం ఈ దాడులు చేపట్టారు. ఒడిశాలోని కోరాపుట్ జిల్లా బండుగం బ్లాక్ పరిధిలోని గ్రామాల్లో గుణుపూర్ పోలీసుల సహకారంతో జరిగిన ఈ ఆపరేషన్‌లో పార్వతీపురం ప్రొహిబిషన్ అండ్ ఎక్సైజ్ స్టేషన్, ఈఎస్టీఎఫ్ పార్వతీపురం, ఎన్‌ఫోర్స్‌మెంట్ విజయనగరం బృందాలు పాలుపంచుకున్నాయి. ఈ దాడుల సందర్భంగా అధికారులు 4,000 లీటర్ల బెల్లం ఊట (ఎఫ్‌జే వాష్), 50 లీటర్ల నాటు సారా, 100 కిలోల అమ్మోనియా, మరియు 1,000 కిలోల నల్ల బెల్లాన్ని గుర్తించి ధ్వంసం చేశారు. దీంతో అక్రమ మద్యం తయారీ ముఠాలకు గట్టి ఎదురుదెబ్బ తగిలిందని అధికారులు వెల్లడించారు. ఆంధ్ర–ఒడిశా సరిహద్దు ప్రాంతాల్లో అక్రమ మద్యం తయారీ, రవాణా, విక్రయాలపై ప్రత్యేక నిఘా కొనసాగుతుందని వారు పేర్కొన్నారు. అక్రమ మద్యం నిర్మూలన కోసం ఇలాంటి అంతర్రాష్ట్ర సంయుక్త దాడులను మరింత విస్తృతంగా నిర్వహిస్తామని అసిస్టెంట్ ప్రొహిబిషన్ అండ్ ఎక్సైజ్ సూపరింటెండెంట్ ఎ. సంతోష్ స్పష్టం చేశారు. ఈ చర్యలు ఆంధ్ర–ఒడిశా సరిహద్దులో అక్రమ మద్యం ముఠాలకు గట్టి దెబ్బగా నిలిచి, అక్రమ మద్యం నిర్మూలనకు దోహదపడతాయని అధికారులు తెలిపారు.

మాజీ ఎమ్మెల్యే వాసుపల్లి గణేష్ కుమార్ 'గుణపాం పార్టీ'పై తీవ్రస్థాయిలో మండిపడ్డారు. పథకాల పేరుతో ప్రజలను మోసం చేసి, వారికి గుణపం దించిన పార్టీ 'గుణపాం పార్టీ' అని ఆయన ఆగ్రహం వ్యక్తం చేశారు. ఈ 'వెన్నుపోటుకు రెండేళ్లు' కార్యక్రమం కింద వైసీపీ శ్రేణులతో కలిసి జగదాంబ జంక్షన్ నుంచి భారీ ర్యాలీ నిర్వహించారు. ఈ సందర్భంగా నినాదాలు చేస్తూ పార్టీ శ్రేణుల్లో ఉత్సాహాన్ని నింపిన ఆయన, కూటమి నేతల అక్రమాలు, అవినీతిని ఎండగట్టారు. వచ్చే ఎన్నికల్లో 'గుణపాం పార్టీ'కి ప్రజలే చరమగీతం పాడతారని, బుద్ధి చెబుతారని వాసుపల్లి గణేష్ కుమార్ హెచ్చరించారు. అన్ని వర్గాల ప్రజలకు గుణపం దించినందున, ప్రజలే ఈ పార్టీకి తగిన గుణపాఠం చెబుతారని ఆయన స్పష్టం చేశారు.

శుక్రవారం, సీతంపేట ఐటీడీఏ ప్రాజెక్ట్ ఆఫీసర్ శ్రీ పవార్ స్వప్నిల్, పట్టణ మార్కెట్లకు పైనాపిల్ విక్రయాల కోసం బయలుదేరిన వాహనాన్ని జెండా ఊపి ప్రారంభించారు. ఈ కార్యక్రమంలో, సీతంపేట ఐటీడీఏ కార్యాలయం వద్ద నుంచి విశాఖపట్నం, రాజమండ్రి, కాకినాడ వంటి ప్రధాన నగరాలకు తరలించేందుకు గిరిజన రైతులు సుమారు 4 వేల పైనాపిల్ పండ్లను అందించారు. ఈ సందర్భంగా పీవో పవార్ స్వప్నిల్ మాట్లాడుతూ, ఐటీడీఏ పరిధిలోని గిరిజన రైతులు సహజ పద్ధతుల్లో అధిక నాణ్యత కలిగిన పైనాపిల్ పంటను సాగు చేస్తున్నారని తెలిపారు. గిరిజన రైతులు పండిస్తున్న వ్యవసాయ, అటవీ ఉత్పత్తులకు మెరుగైన మార్కెటింగ్ సదుపాయాలు కల్పించి వారి ఆదాయాన్ని పెంచడమే తమ ప్రధాన లక్ష్యమని ఆయన స్పష్టం చేశారు. గిరిజన ప్రాంతాల్లో పండుతున్న పైనాపిల్‌కు రాష్ట్రవ్యాప్తంగా మంచి డిమాండ్ ఉందని, ఐటీడీఏ సీతంపేట లక్ష్యం గిరిజనుల ఆదాయాన్ని పెంచడమేనని వివరించారు.

అల్లూరి జిల్లాలోని హుకుంపేట మండలం, చీకుమద్దుల పంచాయితీ పరిధిలోని ముసిరిపాడు గ్రామంలో నెలకొన్న తాగునీటి సమస్యకు ఎట్టకేలకు మోక్షం లభించింది. గ్రామ ప్రజలు ఈ సమస్యను హుకుంపేట వైస్ ఎంపీపీ సూడిపల్లి కొండలరావుకు తెలియజేయగా, ఆయన అల్లూరి జిల్లా కలెక్టర్ నిశాంతి దృష్టికి తీసుకెళ్లి బోర్ వెల్ మంజూరు చేయించారు. ఈ బోర్ వెల్ నిర్మాణం ఆర్ డబ్ల్యూ ఎస్ శాఖ ఏఈ జగదీశ్ ఆధ్వర్యంలో విజయవంతంగా పూర్తయింది. ఈ కార్యక్రమాన్ని ఉద్దేశించి మాట్లాడిన గ్రామ పెద్దలు కొండ తాబేలి నారాయణ రావు మరియు కొండ తాబేలి ఆనంద్ రాయుడు, తమ గ్రామానికి తాగునీటి పరిష్కారం లభించినందుకు ఆనందం వ్యక్తం చేశారు. ఈ సందర్భంగా వారు ముసిరిపాడు గ్రామ ప్రజల తరపున జిల్లా కలెక్టర్, ఐటీడీఏ పీఓ, హుకుంపేట వైస్ ఎంపీపీ, ఎంపీడీఓ, డిప్యుటీ ఎంపీడీఓ, స్పెషల్ ఆఫీసర్, అలాగే మండలంలోని ప్రింట్ అండ్ ఎలక్ట్రానిక్ మీడియా విలేకరులకు ప్రత్యేక కృతజ్ఞతలు తెలిపారు. అంతేకాకుండా, బోర్ వెల్‌కు విద్యుత్ మోటార్ ఏర్పాటు చేస్తే తాగునీటి సమస్యకు శాశ్వత పరిష్కారం లభిస్తుందని గ్రామ పెద్దలు అభిప్రాయపడ్డారు. ఈ బోర్ వెల్ నిర్మాణ కార్యక్రమంలో గ్రామీణ తాగునీటి సరఫరా శాఖ వర్క్ ఇన్‌స్పెక్టర్ సత్యనారాయణ, ఎంపీడీఓ సిబ్బంది బాకూరు రామ రాజు, గ్రామ పెద్దలు కొండ తాబేలి ఆనంద్ రాయుడు, వంతాల రంగారావు, వార్డు మెంబర్‌లు నాగేశ్వర్ రావు, సురేష్, గ్రామస్తులు చిట్టిబాబు, భీమన్న, రవిబాబు, మహిళలు వంతాల కాంతామ్మ, చిలకమ్మ, రోజా, జ్యోతి సహా పెద్ద సంఖ్యలో గ్రామ ప్రజలు పాల్గొన్నారు. ముసిరిపాడులో బోర్ వెల్ నిర్మాణం పట్ల గ్రామ ప్రజలు హర్షం వ్యక్తం చేశారు.

అంతర్జాతీయ బాల కార్మిక వ్యతిరేక దినోత్సవం సందర్భంగా జూన్ 12న విజయనగరం జిల్లా పోలీసు కార్యాలయంలో 'ఆట, పాట పిల్లలకు పని, పాట పెద్దలకు' అనే వాల్ పోస్టరును జిల్లా ఎస్పీ ఎ.ఆర్.దామోదర్ ఆవిష్కరించారు. డిస్ట్రిక్ట్ ఫోరం ఫర్ చైల్డ్ రైట్స్ మరియు ఎపి ప్రో చైల్డ్ గ్రూపు ఆధ్వర్యంలో రూపొందించిన ఈ పోస్టరును ఆవిష్కరించిన అనంతరం ఎస్పీ దామోదర్ మాట్లాడుతూ, బాలలు పనుల్లో కాకుండా బడిలో మాత్రమే ఉండాలని, బాల కార్మిక వ్యవస్థను నిర్మూలించేందుకు ప్రతీ ఒక్కరూ సామాజిక బాధ్యతతో కృషి చేయాలని పిలుపునిచ్చారు. బాలలను పనుల్లో వినియోగిస్తే చట్టపరమైన చర్యలు తప్పవని జిల్లా ఎస్పీ హెచ్చరించారు. పిల్లలను బాల కార్మికులుగా వినియోగిస్తున్నట్లు సమాచారం ఉంటే వెంటనే డయల్ 100/112కు అందించాలని కోరారు. చిట్టి చేతులతో పనులు చేయించడం దుర్మార్గమైన చర్య అని, ఆట, పాటలతో ఆనందంగా గడపాల్సిన బాలలను పనుల్లో వినియోగించడం నేరమన్నారు. బాలల ఉజ్వల భవిష్యత్తుకు తల్లిదండ్రులు పునాదులు వేయాలని, వారిని చదివించే ఆర్థిక స్థితి లేకుంటే ప్రభుత్వ హాస్టల్‌లో చేర్పించాలని సూచించారు. బాలల సంరక్షణకు కృషి చేసే ఎన్.జి.ఓ.ల సహకారం తీసుకోవాలని, బాలలను పనుల్లో పెట్టినా, వారితో పనులు చేయించినా బాధ్యులైన వ్యక్తులపై చట్టపరమైన చర్యలు చేపట్టేందుకు జిల్లా పోలీసుశాఖ ఎల్లప్పుడూ సంసిద్ధంగా ఉంటుందని ఎస్పీ స్పష్టం చేశారు. ప్రతీ పోలీసు స్టేషనులో ఒక సబ్ ఇన్‌స్పెక్టరు స్థాయి అధికారి బాలల హక్కులను పరిరక్షించేందుకు కృషి చేస్తున్నారని ఎస్పీ ఎ.ఆర్.దామోదర్ వెల్లడించారు. అనంతరం, జిల్లా ఎస్పీ బాలలకు పుస్తకాలను పంపిణీ చేశారు. 18 సం. లోపు బాలల హక్కులు ఉల్లంఘించినా, బాల కార్మికులు కనిపించినా, బాల్య వివాహాలకు సంబంధించిన సమాచారాన్ని టోల్ ఫ్రీ నంబర్లు 1098, 100/112కు లేదా స్థానిక పోలీసులకు అందించాలని ఆయన ప్రజలను కోరారు. ఈ సందర్భంగా డిస్ట్రిక్ట్ ఫోరం ఫర్ చైల్డ్ రైట్స్ అధ్యక్షులు పి.చిట్టిబాబు మాట్లాడుతూ, అంతర్జాతీయ కార్మిక సంస్థ (ఐ.ఎల్.ఓ) 1992లో జూన్ 12ను అంతర్జాతీయ బాల కార్మిక వ్యతిరేక దినోత్సవంగా ప్రకటించిందని తెలిపారు. కార్మికులుగా ఉన్న బాలలకు విద్యను అందించడం, వారి కుటుంబాలకు శిక్షణ, ఉపాధి అవకాశాలు కల్పించి బాల కార్మిక వ్యవస్థను నిర్మూలించాలని ఐ.ఎల్.ఓ. అన్ని దేశాలను ఆదేశించిందన్నారు. ఇందులో భాగంగా దేశంలో అమలవుతున్న బాల కార్మిక నిషేధ చట్టాన్ని సక్రమంగా అమలు చేయాలని ఆయన కోరారు. ఈ కార్యక్రమంలో అదనపు ఎస్పీ పి. సౌమ్యలత, డిస్ట్రిక్ట్ చైల్డ్ రైట్స్ ఫోరం కన్వీనరు పి.చిట్టిబాబు, డి.వి.ఎస్.యు. రాష్ట్ర కో-ఆర్డినేటరు కే.సిహెచ్.బంగారురాజు, ఇతర అధికారులు మరియు బాలలు పాల్గొన్నారు.

వైఎస్సార్ కాంగ్రెస్ పార్టీ జాతీయ అధ్యక్షులు, మాజీ ముఖ్యమంత్రి వై.ఎస్. జగన్మోహన్ రెడ్డి ఆదేశాల మేరకు జూన్ 4 నుండి 12 వరకు రాష్ట్రవ్యాప్తంగా నిర్వహించిన “వెన్నుపోటుకు రెండేళ్లు" నిరసన కార్యక్రమాలు విజయనగరం జిల్లా బొబ్బిలి నియోజకవర్గంలో అత్యంత విజయవంతంగా ముగిశాయి. ఈ తొమ్మిది రోజుల కార్యక్రమాలు బొబ్బిలి మాజీ శాసనసభ్యులు శంబంగి వెంకట చిన్న అప్పలనాయుడు ఆధ్వర్యంలో జరిగాయి. ఈ నిరసనల పరంపరలో భాగంగా, జూన్ 4న బొబ్బిలి గాంధీ బొమ్మ సెంటర్ వద్ద ఎన్నికల ముందు కూటమి ప్రభుత్వం ఇచ్చిన "బాబు షూరిటీ - భవిష్యత్తు గ్యారెంటీ" బాండ్ పేపర్లను దగ్ధం చేశారు. అనంతరం నియోజకవర్గంలోని నాలుగు మండలాల్లో నిరసనలు తెలిపారు. జూన్ 9న శ్రీ సూర్య రెసిడెన్సీలో రైతులు, మహిళలు, యువకులు, పార్టీ శ్రేణులతో విస్తృత స్థాయి ఇండోర్ మీటింగ్ నిర్వహించి, కూటమి ప్రభుత్వ రెండేళ్ల పాలనను ప్రశ్నించారు. అలాగే, శుక్రవారం బొబ్బిలి మాజీ శాసనసభ్యులు శంబంగి వెంకట చిన్న అప్పలనాయుడు ఆధ్వర్యంలో ఓంకార్ థియేటర్ జంక్షన్ నుండి తాండ్రపాపారాయుడు విగ్రహం వరకు భారీ ఊరేగింపు నిరసన ర్యాలీ నిర్వహించారు. ప్రభుత్వ అధికారులు అడుగడుగునా ఆంక్షలు విధించినప్పటికీ, వాటిని లెక్కచేయకుండా నాలుగు మండలాల ప్రజా ప్రతినిధులు, వైఎస్సార్‌సీపీ నాయకులు, కార్యకర్తలు మరియు ప్రజలు భారీ ఎత్తున తరలివచ్చి ఈ కార్యక్రమాన్ని విజయవంతం చేశారు. ఈ సందర్భంగా మాజీ ఎమ్మెల్యే శంబంగి వెంకట చిన్న అప్పలనాయుడు కూటమి ప్రభుత్వంపై తీవ్ర విమర్శలు గుప్పించారు. కూటమి ప్రభుత్వం అధికారంలోకి వచ్చి రెండేళ్లు అవుతున్నా, ఇచ్చిన హామీలను నెరవేర్చలేదని ఆయన అన్నారు. దీనిపై ప్రశ్నించిన వారిపై, సోషల్ మీడియాలో పోస్టులు పెట్టిన వారిపై అక్రమ కేసులు బనాయించి మానసికంగా వేధిస్తున్నారని ఆరోపించారు. మెగా డీఎస్సీ అని చెప్పి అర్హులైన నిరుద్యోగులకు ఉద్యోగాలు ఇవ్వకుండా, బ్యాక్ డోర్ పద్ధతిలో తమ వారికి ఉద్యోగాలు ఇచ్చుకుంటున్నారని విమర్శించారు. ప్రతి మహిళకు నెలకు ₹1500 రూపాయలు ఇస్తామని చెప్పి, ఇప్పుడు ఆ ఊసే ఎత్తడం లేదని అన్నారు. విద్యార్థులకు ప్రభుత్వం నుండి రావలసిన ఫీజు రీయింబర్స్‌మెంట్ బకాయిలను వెంటనే కాలేజీలకు విడుదల చేయాలని డిమాండ్ చేశారు. అధికారుల తీరుపై మాట్లాడుతూ, "మీరు ఎన్ని ఆంక్షలు విధించినా మేం వెనక్కి తగ్గేదే లేదు. మేం గోడకు కొట్టిన బంతి లాంటి వాళ్లం, ప్రజా సమస్యలపై మరింత దీటుగా ప్రజల తరుపున పోరాడుతాము" అని శంబంగి స్పష్టం చేశారు. ఈ కార్యక్రమంలో స్టేట్ ఎగ్జిక్యూటివ్ కమిటీ నెంబర్ ఇంటి గోపాలరావు, జిల్లా వైఎస్సార్సీపీ పార్టీ ప్రధాన కార్యదర్శి శంబంగి వేణు గోపాల్ నాయుడు, మాజీ మున్సిపల్ చైర్మన్ సావు వెంకట మురళీ కృష్ణారావు, బొబ్బిలి మండల పార్టీ అధ్యక్షుడు తమ్మిరెడ్డి దామోదర రావు, బొబ్బిలి పట్టణ పార్టీ అధ్యక్షులు చోడిగంజి రమేష్ నాయుడు, తెర్లాం మండలం పార్టీ అధ్యక్షులు తెంటు సత్యం నాయుడు, బాడంగి మండల పార్టీ అధ్యక్షులు యమల శివప్రసాద్, తెర్లాం మండల అధ్యక్షులు ఉమా లక్ష్మీ, మాజీ సర్పంచ్లు, మాజీ ఎంపీటీసీలు, జెడ్పీటీసీలు, వార్డు ఇన్చార్జిలు, ప్రజా ప్రతినిధులు, మాజీ ప్రజాప్రతినిధులు, ఇతర ముఖ్య నాయకులు, నియోజకవర్గ సోషల్ మీడియా కార్యకర్తలు, మండలాల యువజన అధ్యక్షులు, వైఎస్ఆర్సిపి అభిమానులు, కార్యకర్తలు మరియు నాలుగు మండలాల & పట్టణ ప్రజలు పెద్ద ఎత్తున పాల్గొన్నారు.