વાવ થરાદના સનેસડા ગામે નાયબ DPO કે કે પટેલ સાહેબ દ્વારા વાલીઓ અને વિદ્યાર્થીઓને સરકારી વિવિધ યોજનાઓથી વાકેફ કરવામાં આવ્યા છે. તેમણે સનેસડા ગામના વાલીઓ અને વિદ્યાર્થીઓને સરકારની વિવિધ યોજનાઓ અંગે માહિતી આપીને માહિતગાર કર્યા હતા.

વાવ થરાદના સનેસડા ગામે નાયબ DPO કે કે પટેલ સાહેબ દ્વારા વાલીઓ અને વિદ્યાર્થીઓને સરકારી વિવિધ યોજનાઓથી વાકેફ કરવામાં આવ્યા છે. તેમણે સનેસડા ગામના વાલીઓ અને વિદ્યાર્થીઓને સરકારની વિવિધ યોજનાઓ અંગે માહિતી આપીને માહિતગાર કર્યા હતા.

બનાસકાંઠા જિલ્લાના દિયોદરના જાહેર મુક્તિધામ ખાતે પુનમેશ્વર મહાદેવ મંદિરના નિર્માણ માટે ખાતમુહૂર્ત અને શિવલિંગ સ્થાપના નિમિત્તે ભૂમિપૂજન વિધિ સંપન્ન થઈ હતી. આ મુક્તિધામ પૂનમિયા હનુમાનજી મંદિર પાછળ અને જૂની કોર્ટ નજીક આવેલું છે. આ ધાર્મિક વિધિ પૂ. રમેશભાઈ શાસ્ત્રીજીના વૈદિક મંત્રોચ્ચાર સાથે કરવામાં આવી હતી. આ પ્રસંગે વિવિધ આગેવાનો, દાતાઓ, સમાજના વડીલો તેમજ મોટી સંખ્યામાં સ્થાનિક નગરજનો અને શિવભક્તો ઉપસ્થિત રહ્યા હતા.

પાટણના રાધનપુર એપીએમસી ખાતે ગુજરાત વિધાનસભાના અધ્યક્ષ શ્રી શંકરભાઈ ચૌધરી અને કૃષિ-સહકાર મંત્રી શ્રી જીતુભાઈ વાઘાણીના હસ્તે ત્રિવિધ લોકાર્પણ કરવામાં આવ્યું છે.

પાટણ જિલ્લાના હારીજ તાલુકામાં UGVCLની ચોથી લોક અદાલત યોજાઈ હતી, જેમાં જલીયાણ ગ્રુપ દ્વારા ગરીબ અને જરૂરિયાતમંદ ગ્રાહકોના બાકી વીજ બિલ ભરીને એક ઉત્કૃષ્ટ અને માનવતાભર્યું કાર્ય કરવામાં આવ્યું છે. વીજ બિલ બાકી હોવાના કારણે જે ગ્રાહકોના વીજ જોડાણો કાપી નાખવામાં આવ્યા હતા, તેમના બાકી નાણાં લોક અદાલતના માધ્યમથી ચૂકવીને જલીયાણ ગ્રુપના મિતેશભાઈ ઠક્કર, શૈલેષભાઈ ઠક્કર અને નિલેશભાઈ ઠક્કર દ્વારા આ પરિવારોના ઘરોમાં ફરી અજવાળું પાથરવાનું ખૂબ જ પ્રશંસનીય કામ કરવામાં આવ્યું છે. હારીજ કોર્ટ ખાતે યોજાયેલી આ ચોથી લોક અદાલત અંતર્ગત કુલ ૧૪૩ ગ્રાહકોને નોટિસ મોકલવામાં આવી હતી. જેમાંથી હાજર રહેલા ૬૦ ગ્રાહકો સાથે સમાધાન પ્રક્રિયા હાથ ધરીને તેમના રૂ. ૧.૪૩ લાખના બાકી નાણાં જલીયાણ ગ્રુપ દ્વારા ભરપાઈ કરવામાં આવ્યા હતા. સામાન્ય રીતે લાંબા સમયથી બિલ ન ભરી શકતા ગ્રાહકો પર વ્યાજ અને પેનલ્ટીનો મોજ વધી જાય છે અને UGVCL દ્વારા કેસ તથા નોટિસો જારી કરાય છે, ત્યારે દર ત્રણ મહિને યોજાતી આ લોક અદાલતમાં સમાધાન પ્રક્રિયા દ્વારા દંડ અને પેનલ્ટી માફ કરી ગ્રાહકોને રાહત આપવામાં આવે છે. જલીયાણ ગ્રુપ દ્વારા આ અગાઉ યોજાયેલી ત્રણેય લોક અદાલતોમાં પણ આ જ પ્રકારે ઉમદા સહયોગ આપવામાં આવ્યો હતો. અગાઉ ૧૧ જુલાઈના રોજ યોજાયેલી લોક અદાલતમાં ૬૦ ગ્રાહકોના રૂ. ૧.૪૦ લાખ, ૧૩ સપ્ટેમ્બરના રોજ યોજાયેલી અદાલતમાં ૪૧ વીજ ગ્રાહકોના રૂ. ૩.૬૦ લાખ અને ૧૩ ડિસેમ્બરના રોજ ૯ ગ્રાહકોના રૂ. ૨૫ હજાર ચૂકવવામાં આવ્યા હતા. આમ, ચોથી લોક અદાલતના રૂ. ૧.૪૩ લાખ સહિત ચારેય તબક્કામાં કુલ મળીને અંદાજે રૂ. ૮ લાખ જેટલી માતબર રકમ ચૂકવીને જરૂરિયાતવાળા પરિવારોના આંગણે અજવાળા પાથરવાનું સરાહનીય કાર્ય કરવામાં આવ્યું છે.

બનાસકાંઠા જિલ્લાના થરાદ તાલુકાના ઈઢાટા સીમ વિસ્તારમાં એક આખલો ઢીમા બ્રાંચમાં ખાબક્યો હતો. આ ઘટના સામે આવ્યા બાદ સ્થાનિક ગૌ ભક્તોએ તાત્કાલિક ભારે મહેનત હાથ ધરીને આ આખલાને સુરક્ષિત રીતે બહાર કાઢી તેનો જીવ બચાવી લીધો હતો.

બુલંદશહરના ખુર્જા જંક્શન ચોકી વિસ્તારમાં ફ્લાયઓવર પાસે રહેતા દીપક નામના યુવકનું શંકાસ્પદ સંજોગોમાં મોત નીપજ્યું છે. દીપકના આ રહસ્યમય મોત બાદ તેના સગા ભાઈ અને માતા પર જ તેની હત્યા કરવાનો આરોપ લાગ્યો છે. આ ઘટના બાદ પોલીસે મૃતદેહને પોસ્ટમોર્ટમ માટે મોકલી આપ્યો છે, પરંતુ ચોંકાવનારી બાબત એ રહી કે પોસ્ટમોર્ટમ હાઉસ પર છોકરા પક્ષ તરફથી કોઈ પણ સભ્ય હાજર નહોતું. બીજી તરફ, યુવતી પક્ષના લોકો અને અન્ય સંબંધીઓ ત્યાં પહોંચી ગયા હતા. મૃતક દીપક પોતાની પત્ની રાજકુમારી અને બે બાળકો અવિ (6 વર્ષ) તથા મેઘના (4 વર્ષ) સાથે રહેતો હતો. આ ઘટનાના અંદાજે 15 દિવસ પહેલા દીપકની પત્ની રાજકુમારી પોતાના બંને બાળકોને લઈને અનૂપશહર સ્થિત પોતાના પિયર ગામ એચૌરા જતી રહી હતી. આ દરમિયાન આશરે 10 દિવસ પહેલા બંને ભાઈઓએ પોતાની જમીન પણ વેચી દીધી હતી. જમીન વેચ્યા બાદ ગત રાત્રે દારૂ પીવા દરમિયાન ભાઈઓ વચ્ચે આપસમાં મોટો વિવાદ થયો હોવાનું સામે આવી રહ્યું છે. હાલમાં પોલીસ આ સમગ્ર મામલાની ગંભીરતાથી તપાસ કરી રહી છે. આ મામલામાં મૃતક દીપકની પત્ની રાજકુમારી અને તેની સાળી રશ્મિના નિવેદનો પણ સામે આવ્યા છે.

ગુજરાતમાં દારૂબંધીના કડક અમલ વચ્ચે સ્ટેટ મોનિટરિંગ સેલ (એસએમસી)ની ટીમે વાવ-થરાદ જિલ્લાના સુઈગામ પોલીસ સ્ટેશન વિસ્તારમાં ભારત માલા નેશનલ હાઇવે પર મોટી કાર્યવાહી હાથ ધરી છે. રામપુરા-એટા રોડ પર થરાદ-ભાભર પટ્ટા વિસ્તારમાં પાડવામાં આવેલા આ દરોડા દરમિયાન રૂ. ૧૪,૫૯,૩૪૨ની કિંમતનો ભારતીય તેમજ આયાતી વિદેશી દારૂની કુલ ૪,૫૫૮ બોટલો જપ્ત કરવામાં આવી છે. આ દારૂની હેરાફેરીમાં ઉપયોગમાં લેવાયેલા રૂ. ૫૦ લાખની કિંમતના ટોયોટા ઇનોવા ક્રિસ્ટા, ટોયોટા ફોર્ચ્યુનર અને સ્કોર્પિયો સહિતના ત્રણ લક્ઝુરિયસ વાહનો, એક મોબાઈલ ફોન અને અન્ય દસ્તાવેજો મળી કુલ રૂ. ૬૪,૫૯,૮૪૨નો મુદ્દામાલ એસએમસીએ જપ્ત કર્યો છે. આ સમગ્ર મામલે ગુજરાત દારૂબંધી અધિનિયમ હેઠળ સુઈગામ પોલીસ સ્ટેશનમાં ગુનો નોંધીને તપાસ હાથ ધરાઈ છે. આ સફળ રેડની કાર્યવાહી એસએમસીના પી.એસ.આઈ. શ્રી કે.ડી. રવિયાના માર્ગદર્શન હેઠળ પાર પાડવામાં આવી છે. પોલીસની પ્રાથમિક તપાસમાં દારૂ ભરેલી ઇનોવા ક્રિસ્ટા અને ફોર્ચ્યુનરના ડ્રાઇવર તેમજ ક્લીનર, પાયલટિંગ કરી રહેલી સ્કોર્પિયોના ડ્રાઇવર તેમજ ક્લીનર, દારૂનો જથ્થો મોકલનાર તથા મંગાવનાર વ્યક્તિઓ અને ત્રણેય વાહનોના માલિકો સહિત કુલ આઠ આરોપીઓને વોન્ટેડ જાહેર કરાયા છે. હાલ પોલીસ દ્વારા આ તમામ આરોપીઓની શોધખોળ અને વધુ તપાસ હાથ ધરવામાં આવી રહી છે. એસએમસીની આ કાર્યવાહી બાદ સ્થાનિક વાવ-થરાદ જિલ્લા પોલીસની કામગીરી સામે ગંભીર સવાલો ઊભા થયા છે. આંતરરાજ્ય રાજસ્થાન અને આંતરરાષ્ટ્રીય ભારત-પાક સરહદ પર આવેલા વાવ-થરાદ જિલ્લામાં નવા એસ.પી. દ્વારા દારૂબંધીની ઝુંબેશ હેઠળ માત્ર ગ્રામીણ વિસ્તારોમાં દેશી દારૂના ભઠ્ઠા પર રેઇડ કરી નજીવો દારૂ પકડી પોલીસ સંતોષ માની લે છે. પરંતુ ભારત માલા હાઈવે પર થરાદના વાંતડાઉ નજીક પોલીસ ચોકી હોવા છતાં તેમજ એસઓજી અને એલસીબી જેવી સ્પેશિયલ ટીમો કાર્યરત હોવા છતાં વિદેશી દારૂ ભરેલા આ લક્ઝુરિયસ વાહનો ગુજરાતમાં કેવી રીતે ઘૂસી ગયા, તે મોટો સણસણતો સવાલ છે. આ પરિસ્થિતિ 'ખાળે ડૂચા અને દરવાજા મોકળા' જેવો ઘાટ દર્શાવે છે. પ૦ ગ્રામ ડ્રગ્સ પકડનારી પોલીસને આ લક્ઝરી વાહનો ન દેખાયા હોવાથી લોકોમાં ભારે ચર્ચા છે કે સ્થાનિક પોલીસની મહેરબાની અને આંખ આડા કાનના કારણે જ આ દારૂ ગુજરાતમાં ઘૂસી રહ્યો છે, જે વાત એસએમસીના આ દરોડાથી સાબિત થઈ રહી છે.