लातूर शहरातून धाराशिवकडे शेतीसाठी बैल खरेदी करून पायी जाणाऱ्या एका शेतकऱ्यावर थेट पोलीस गुन्हा दाखल करण्यात आला आहे. दारू पिऊन धिंगाणा घालणाऱ्या गोरक्षक आणि बजरंग दलाच्या कार्यकर्त्यांनी या शेतकऱ्याला नाहक त्रास दिल्याचा आरोप आहे. ही घटना मंगळवार, दिनांक 26 मे 2026 रोजी घडली. धाराशिव जिल्ह्यातील अरजखेडा येथील भीमराव सूर्यवंशी आणि त्यांचा मुलगा महेश सूर्यवंशी यांनी पाटोदा येथील बाजारातून शेतीसाठी बैलजोडी खरेदी केली होती. त्यांच्याकडे ग्रामपंचायतीचा अधिकृत जनावर खरेदी-विक्रीचा दाखला हातात असतानाही, खोपेगाव परिसरात बजरंग दलाच्या काही पदाधिकाऱ्यांनी त्यांना अडवून “बैल कुठे नेताय?” “कशासाठी नेताय?” अशी चौकशी करत बराच वेळ रोखून धरले. शेतकऱ्यांनी सर्व कागदपत्रे दाखवूनही त्यांना सोडण्यात आले नसल्याचे सांगितले जात आहे. यानंतर राजीव गांधी चौकात पुन्हा त्यांना अडवण्यात आले. वाढता तणाव पाहून महेश सूर्यवंशी यांनी पोलीस हेल्पलाईनला फोन केला, त्यानंतर विवेकानंद पोलीस स्टेशनचे कर्मचारी घटनास्थळी दाखल झाले. मात्र, कारवाई अडवणाऱ्यांवर न होता, पोलिसांनी बैलजोडी घेऊन जाणाऱ्या शेतकऱ्यांवरच गुन्हा दाखल केला आणि जनावरे गोरक्षणात पाठवण्यात आल्याचा आरोप करण्यात येत आहे. या घटनेमुळे “शेतीसाठी बैल खरेदी करणाऱ्या शेतकऱ्यांनाच गुन्हेगार ठरवलं जात असेल, तर सामान्य शेतकऱ्यांनी जगायचं कसं?” असा संतप्त सवाल उपस्थित होत आहे. दरम्यान, शिवसेनेचे कुलदीप सूर्यवंशी यांनी या प्रकरणावर प्रतिक्रिया दिली की, जर शेतकऱ्यांवर नाहक गोरक्षकांकडून त्रास होत असेल, तर तो सहन केला जाणार नाही आणि या प्रकरणावर आवाज उठवला जाईल.

शहाद्याकडून धुळे जात असताना सावळदा गावाजवळ, नुराणी पेट्रोल पंपाजवळ एका चालत्या आयशर ट्रकला (क्र. एमएच १८ एए १८५०) वायरच्या स्पार्किंगमुळे आग लागल्याची घटना घडली. प्रसंगावधान राखत चालक व सहचालकाने तात्काळ गाडीतून सुरक्षित ठिकाणी धाव घेत आपले जीव वाचवले. हा ट्रक जुने टायर घेऊन जात होता. चालत्या ट्रकमधून अचानक धूर निघत असल्याचे लक्षात येताच, काही कळण्याच्या आतच समोरील केबिनमध्ये आग लागली. यामुळे चालकाने गाडीचा वेग कमी करून खाली उडी घेतली. चालकाला पाहून सोबत असलेल्या सहचालकानेही गाडीतून उडी घेतली. मात्र, काही वेळातच आगीचा भडका अधिकच वाढला आणि पाहता पाहता संपूर्ण ट्रकला आग लागून तो पूर्णतः जळून खाक झाला. या घटनेत कोणतीही जीवितहानी झाली नसली तरी, महामार्गावरील वाहतूक ठप्प झाली होती. वाहतूक सुरळीत करण्यासाठी पोलिसांना दोन तासांचा कालावधी लागला. ट्रकला आग लागल्याची माहिती मिळताच शहादा पोलिसांनी घटनास्थळी धाव घेतली, परंतु आग विझवण्यासाठी तात्काळ कोणतीही यंत्रणा उपलब्ध नव्हती. काही तासांनी अग्निशमन दलाची गाडी बोलवण्यात आली, मात्र तोपर्यंत ट्रक अर्धा जळून खाक झाला होता. अखेरीस, शहादा नगरपालिकेच्या अग्निशामक दलाने आगीवर नियंत्रण मिळविण्यात यश मिळवले.

मान्सूनपूर्व शेती मशागतीची कामे वेगात सुरू असताना, डिझेल मिळत नसल्याने संतप्त झालेल्या शेतकऱ्यांनी मुखेड-लातूर महामार्गावर काही काळ रास्ता रोको आंदोलन केले. या अचानक झालेल्या आंदोलनामुळे महामार्गावरील वाहतूक काही काळ विस्कळीत झाली होती. सध्या पावसाळ्यापूर्वी शेतकरी मशागतीची कामे, पेरणीपूर्व तयारी आणि इतर शेती कामांमध्ये व्यस्त आहेत. ट्रॅक्टर, पंपसेट आणि शेती अवजारे चालवण्यासाठी मोठ्या प्रमाणात डिझेलची आवश्यकता असते. मात्र, डिझेलचा पुरवठा सुरळीत होत नसल्याने शेतकऱ्यांना पेट्रोलपंपावर तासनतास रांगा लावाव्या लागत आहेत. यामुळे शेतीच्या कामासाठी महत्त्वाचा वेळ वाया जात असून मशागतीची कामे खोळंबत असल्याची नाराजी शेतकऱ्यांनी व्यक्त केली आहे.

महाराष्ट्र नवनिर्माण सेना (मनसे) ने शासनाच्या निर्णयांचे उल्लंघन करून नियमबाह्य पद्धतीने एअर कंडिशनर (एसी) लावणाऱ्या अधिकाऱ्यांना 'दणका' देणार असल्याचे म्हटले आहे.

परभणी शहरात तरुणांमध्ये नशा करण्याचे प्रमाण लक्षणीयरीत्या वाढले असल्याची माहिती समोर आली आहे. न्यू मराठीचे परभणी प्रतिनिधी मोहसीन खान यांनी दिलेल्या वृत्तानुसार, या गंभीर स्थितीवर सामाजिक कार्यकर्ते सय्यद फादर यांनी चिंता व्यक्त केली असून, त्यांनी पोलीस अधीक्षक यांना या प्रकरणी तातडीने कठोर कारवाई करण्याची मागणी केली आहे.

परभणी जिल्ह्यात, दि. २५ रोजी परभणी-परळी रेल्वे दुहेरीकरण व बाह्य वळण प्रकल्पामुळे बाधित होणाऱ्या गंगाखेड व सुरळवाडी शिवारातील शेतकरी, प्लॉटधारक आणि कुटुंबीयांच्या विविध मागण्यांसाठी दक्षिण मध्य रेल्वे, सिकंदराबाद येथील महाप्रबंधकांना एक सविस्तर निवेदन सादर करण्यात आले. यावेळी किसान सभेचे राष्ट्रीय अध्यक्ष कॉ. राजन क्षीरसागर यांनी आरोप केला की, गंगाखेड उपविभागीय कार्यालयाकडून शेतकऱ्यांची दिशाभूल करून जमीन संपादनाचा प्रयत्न सुरू आहे. त्यांनी स्पष्ट इशारा दिला की, शेतकऱ्यांच्या संमतीशिवाय जमीन संपादन मान्य नसून, या प्रकल्पासाठी शेतकरी एक इंचही जमीन देणार नाहीत. सरकारने आपली अन्यायकारक भूमिका कायम ठेवल्यास असहकार आंदोलन छेडण्यात येईल, असेही त्यांनी नमूद केले. निवेदनात बाधितांच्या अनेक प्रमुख मागण्या मांडण्यात आल्या आहेत. यामध्ये बाजारभावाच्या पाचपट मोबदला देणे, बाधित कुटुंबातील सदस्यांना भारतीय रेल्वेमध्ये नोकरी देणे, संयुक्त मोजणी अमान्य असल्याने करण्यात आलेले मोजमाप रद्द करणे, तसेच गुंठेवारी कायद्याअंतर्गत संपादित प्लॉटधारकांना ताबेदारीच्या आधारे योग्य मोबदला देण्याची मागणी समाविष्ट आहे. याशिवाय, वक्फ बोर्डाच्या जमिनी, झोपडपट्टीधारकांचे प्लॉट, बांधकाम पूर्ण झालेली घरे, अकृषक प्लॉट, महाराष्ट्र गुंठेवारी अधिनियम २००१ अंतर्गत बगर नोंदणी प्लॉट तसेच महाराष्ट्र इरिगेशन अॅक्ट १९७६ अंतर्गत कमांड क्षेत्रातील ओलीताच्या जमिनींसह सर्व प्रकारच्या प्रकल्पग्रस्तांना संपूर्ण मोबदला देण्याची मागणीही निवेदनात करण्यात आली. महाप्रबंधकांसोबत झालेल्या चर्चेदरम्यान बाधितांच्या समस्या व मागण्यांवर सविस्तर चर्चा करण्यात आली. यावेळी किसान सभेचे अध्यक्ष कॉ. राजन क्षीरसागर, जिल्हा सचिव कॉ. ओंकार पवार, भाई गोपीनाथ भोसले यांच्यासह अनेक बाधित शेतकरी व प्लॉटधारक उपस्थित होते.

महाराष्ट्र सरकारच्या प्रस्तावित “महाराष्ट्र देवस्थान इनाम निर्मूलन अधिनियम २०२६” या कायद्याविरोधात मंगळवारी (दि. २६) बीड शहरात सकल वारकरी समाज व मंदिर संरक्षण समितीने जोरदार आंदोलन छेडले. वारकरी, भाविक, श्रद्धाळू आणि हिंदू धर्मप्रेमींनी छत्रपती शिवाजी महाराज चौक ते जिल्हाधिकारी कार्यालय अशी भव्य वारकरी दिंडी काढत, हा प्रस्तावित कायदा तात्काळ रद्द करण्याची प्रमुख मागणी केली. या दिंडीनंतर बीड जिल्हाधिकारी यांच्यामार्फत मुख्यमंत्री देवेंद्र फडणवीस यांना निवेदन सादर करण्यात आले. आंदोलनकर्त्यांनी आरोप केला की, हा प्रस्तावित कायदा हिंदू धर्मातील पुरातन मंदिरे, देवस्थान, मठ, गड आणि संस्थानांच्या जमिनी संपुष्टात आणण्याचा सरकारचा डाव आहे. त्यांनी स्पष्ट केले की, देवस्थान इनाम जमिनी केवळ मालमत्ता नसून त्या धार्मिक, सामाजिक व ऐतिहासिक व्यवस्थेचा आधारस्तंभ आहेत. देवस्थाने ही केवळ पूजा-अर्चा करण्याची ठिकाणे नसून धर्मप्रसार, संस्कृती संवर्धन, समाजजागृती आणि सामाजिक एकात्मतेची केंद्रे आहेत. प्रस्तावित अधिनियमामुळे देवस्थानांच्या मालमत्तेवर अतिक्रमण, अनाधिकृत हस्तांतरण आणि व्यापारीकरण वाढण्याची शक्यता असून भविष्यात प्रभावशाली पुढारी व धनदांडग्यांच्या ताब्यात या जमिनी जाण्याचा धोका असल्याचेही यावेळी नमूद करण्यात आले. टाळ-मृदुंगाच्या गजरात आणि विठ्ठल नामाच्या जयघोषात निघालेल्या या दिंडीने शहराचे वातावरण भक्तिमय झाले होते. आंदोलनकर्त्यांनी “देवस्थान जमीन वाचवा” आणि “हिंदू धर्मावरील अन्याय बंद करा” अशा घोषणा देत शासनाचा निषेध नोंदवला. या वेळी सादर केलेल्या निवेदनात “महाराष्ट्र देवस्थान इनाम निर्मूलन अधिनियम २०२६” हा प्रस्तावित कायदा तात्काळ मागे घेण्याची, पुरातन मंदिरे, देवस्थान, मठ, गड आणि संस्थानांच्या जमिनींचे संरक्षण करण्याची, देवस्थान जमिनींचे डिजिटल अभिलेखीकरण करण्याची, तसेच इनामी आणि देवस्थान जमिनींवरील अतिक्रमण हटवण्यासाठी विशेष मोहीम राबवण्याची मागणी करण्यात आली. याव्यतिरिक्त, देवस्थानांच्या पारदर्शक व्यवस्थापनासाठी आणि उत्पन्नवाढीसाठी स्वतंत्र धोरण राबवावे आणि देवस्थान जमिनींसंदर्भात कोणताही निर्णय घेण्यापूर्वी भाविक, विश्वस्त आणि पुजारी यांची सुनावणी घ्यावी, अशा मागण्याही आंदोलनकर्त्यांनी शासनाकडे केल्या. या वारकरी दिंडीत महंत ह.भ.प. लक्ष्मण महाराज मेंगडे (बंकट स्वामी संस्थान, नेकनूर आळंदी पंढरपुरी), महंत ह.भ.प. संभाजी महाराज (उत्तराधिकारी, श्रीक्षेत्र नारायणगड), महंत ह.भ.प. तुकाराम महाराज भारती (बेलेश्वर संस्थान, बेलगाव), रामायणाचार्य ह.भ.प. नाना महाराज कदम, ह.भ.प. सुरेश महाराज जाधव, ह.भ.प. त्रिंबक महाराज मातकर, ह.भ.प. रामेश्वर महाराज जाधव, ह.भ.प. श्रीकृष्ण महाराज उबाळे, ह.भ.प. गोकुळ महाराज उबाळे यांसारख्या अनेक महंतांची लक्षणीय उपस्थिती होती. त्यांच्यासह पांडुरंग महाराज शिंदे, लोखंडे महाराज, ओमतात्या खवतड, सिताराम महाराज, गजानन जोशी, मुकुंदराव खडकीकर, रविंद्र कुलकर्णी, शरद कुलकर्णी, प्रणव राखे, स्वामी महाराज हातळे, श्रीकृष्ण खोसे, महेश मुळीक, जनार्दन महाराज ढेरे, विष्णु घोलप, सुंदर नांगरे, रामहरी घोडके, लग्न महाराज गाडे, अक्षय महाराज मस्के, शरद घोलप, सामाजिक कार्यकर्ते गणेश ढवळे, रामनाथ खोड, शेख युनुस, बाजीराव ढाकणे, राजेंद्र आमटे, संजय शिंदे यांच्यासह मोठ्या संख्येने वारकरी, हिंदू प्रेमी, श्रद्धाळू आणि भाविक सहभागी झाले होते.

लातूर शहर महानगरपालिकेचे माजी आयुक्त बाबासाहेब मनोहरे यांची हिंगोली जिल्हाधिकारी कार्यालयात सहआयुक्त गट अ (डीएओ) या पदावर बदली करण्यात आली आहे. नगरविकास विभागाने २२ मे २०२६ रोजी हा आदेश जारी केला, ज्यानंतर त्यांनी आज नवीन पदाचा पदभार स्वीकारल्याचे वृत्त आहे. बाबासाहेब मनोहरे यांनी २१ ऑक्टोबर २०२२ ते ९ एप्रिल २०२५ या कालावधीत लातूर शहर महानगरपालिकेचे आयुक्त व प्रशासक म्हणून कार्यभार सांभाळला होता. या कार्यकाळात ५ एप्रिल २०२५ रोजी त्यांनी लातूर येथील महापालिकेच्या निवासस्थानी रात्रीच्या वेळी स्वतःच्या डोक्यात गोळी मारून घेतली होती. ही गोळी त्यांच्या डोक्यातून आरपार गेली होती, ज्यामुळे त्यांची प्रकृती गंभीर बनली होती. त्यांची प्रकृती चिंताजनक असताना, मुंबईला जात असलेले प्रसिद्ध डॉ. हनुमंत किनीकर तात्काळ परतले आणि त्यांनी मनोहरे यांच्यावर उपचार केले. बराच काळ त्यांची प्रकृती चिंताजनक होती, परंतु अनेक डॉक्टरांच्या उपचारांनंतर आता त्यांच्या प्रकृतीत सुधारणा झाली आहे.

सिरपूर येथील शेत सर्वे क्रमांक ५६ ची भूमिअभिलेख कार्यालयाकडून मोजणी करण्यात आली आहे. या मोजणीच्या कार्यवाहीनंतर संबंधित शेतकरी आवरगंड यांनी प्रशासनाचे आभार मानले.

परभणी जिल्ह्यातील गंगाखेड तालुक्यातील गुंजेगाव येथील शेतकऱ्यांनी पीक विमा मंजुरीच्या मागणीसाठी गंगाखेड तहसील कार्यालयासमोर लाक्षणिक उपोषण केले. मोहसीन खान यांनी न्यूज मराठीसाठी परभणी येथून या घटनेचे वृत्तांकन केले असून, धनंजय धबाले व्हिडिओ जनरलिस्ट म्हणून उपस्थित होते.