இசை உலகையே பெரும் சோகத்தில் ஆழ்த்தும் வகையில் புகழ்பெற்ற பின்னணி பாடகி எஸ். ஜானகி காலமானார். இந்த அதிர்ச்சியான செய்தி ஒட்டுமொத்த இசை உலகையும் அதிர்ச்சியில் உறைய வைத்துள்ளது. அவரது மறைவுக்கு சமூக வலைத்தளங்களில் #RIPSJanaki மற்றும் #TributeToSJanaki போன்ற ஹேஷ்டேக்குகளுடன் தங்களது ஆழ்ந்த இரங்கல்களும் அஞ்சலிகளும் செலுத்தப்பட்டு வருகின்றன.

பாட்டாளி மக்கள் கட்சியின் முன்னாள் மாநில இணை பொது செயலாளரும், சேலம் மேற்கு சட்டமன்றத் தொகுதி உறுப்பினருமான அருள் வெளியிட்டுள்ள திடீர் வீடியோ செய்தி, சேலம் மாவட்ட பாமகவில் பெரும் பரபரப்பை ஏற்படுத்தியுள்ளது. பாமக நிறுவனர் டாக்டர் ராமதாஸ் மற்றும் அவரது மகனும் முன்னாள் மத்திய அமைச்சருமான அன்புமணிக்கு இடையே இருந்த பிரச்சனைகள் முடிவுக்கு வந்து இருவரும் தற்போது ஒற்றுமையாகிவிட்டனர். ஆனால், மருத்துவர் ராமதாசை நம்பிச் சென்ற தங்களைப் போன்றவர்கள் தற்போது நிற்கதி இல்லாமல் தவித்து வருவதாக அருள் தனது வீடியோவில் ஆதங்கம் தெரிவித்துள்ளார். தங்களின் அடுத்தகட்ட நடவடிக்கை குறித்து ஆலோசிப்பதற்காக, வருகின்ற 16ஆம் தேதி வியாழக்கிழமை சேலம் இரும்பாலை சாலையில் உள்ள பிசிசி திருமண மண்டபத்தில் சிறப்பு ஆலோசனைக் கூட்டம் நடைபெற உள்ளது. இக்கூட்டத்தில் தமிழ்நாடு முழுவதும் உள்ள அருளின் ஆதரவாளர்கள் மற்றும் ராமதாஸின் அதிருப்தியாளர்கள் பங்கேற்க உள்ளனர். இந்த ஆலோசனைக் கூட்டத்தில் அவர்கள் தெரிவிக்கும் முடிவின்படியே தனது அடுத்தகட்ட செயல்பாடுகள் அமையும் என்று முன்னாள் எம்எல்ஏ அருள் திட்டவட்டமாகத் தெரிவித்துள்ளார்.

தாரமங்கலம் அருள்மிகு கைலாசநாதர் திருக்கோவிலில் பிரதோஷ தினத்தை முன்னிட்டு சிவபெருமானுக்கு சிறப்பு பூஜைகளும் வழிபாடுகளும் சிறப்பாக நடைபெற்றன. இதனைத் தொடர்ந்து, அலங்கரிக்கப்பட்ட காளை வாகனத்தில் சிவபெருமானும் பார்வதி தேவியாரும் ஒருங்கே அமர்ந்து பக்தர்களுக்கு அருள் பாலித்தனர். சிவமேளம் முழங்க, பக்தர்களின் 'சிவாய நம' கோஷம் விண்ணை எட்ட, அம்மையப்பன் திருக்கோவிலைச் சுற்றி திரு வீதி உலா வந்து பக்தர்களுக்கு காட்சியளித்தார். இந்த பிரதோஷ வழிபாட்டில் ஏராளமான பக்தர்கள் கலந்து கொண்டு அம்மையப்பனை தரிசித்து வழிபட்டனர். வழிபாட்டின் நிறைவாக பக்தர்கள் அனைவருக்கும் பிரசாதம் வழங்கப்பட்டது. பிரதோஷத்தையொட்டி அருள்மிகு கைலாசநாதர் திருக்கோவிலில் ஏராளமான பக்தர்கள் திரண்டு சுவாமி தரிசனம் செய்தனர்.

திருப்பத்தூர் மாவட்டம் ஜோலார்பேட்டை நகராட்சி சோலையூர் பகுதியில் எழுந்தருளியிருக்கும் ஸ்ரீ செல்வவிநாயகர், ஸ்ரீ கெங்கையம்மன், ஸ்ரீ மாரியம்மன் மற்றும் நவகிரக மூர்த்திகள் ஆலய அஷ்டபந்த மஹா கும்பாபிஷேக விழா மிகச் சிறப்பாக நடைபெற்றது. இவ்விழாவின் போது காலையில் சுவாமிக்கு மகா அஷ்டபந்த ஹோமம் மற்றும் திருமாங்கல்யதாரணம் ஆகிய வழிபாடுகள் சிறப்பாக நடைபெற்றன. இந்த ஆன்மீக வழிபாட்டு நிகழ்வில் சிறப்பு அழைப்பாளர்கள், முக்கிய பிரமுகர்கள் மற்றும் ஏராளமான பொதுமக்கள் நேரில் கலந்து கொண்டு சுவாமி தரிசனம் செய்தனர். அதனைத் தொடர்ந்து, கும்பாபிஷேக விழாவில் பங்கேற்ற பக்தர்கள் அனைவருக்கும் சிறப்பான அறுசுவை அன்னதானம் வழங்கப்பட்டது.

தமிழகத்தில் அரசியல் கட்சி நிர்வாகிகள் யாரும் அரசுப் பள்ளிகளுக்குள் நுழைந்து ஆய்வு செய்யக்கூடாது என்ற பள்ளிக்கல்வித்துறை அமைச்சர் ராஜமோகனின் கடுமையான உத்தரவை மீறி, திருவிடைமருதூர் அருகே தமிழக வெற்றிக்கழக நிர்வாகிகள் அரசுப் பள்ளிக்குள் புகுந்து ஆய்வு நடத்தியுள்ளனர். தஞ்சாவூர் மாவட்டம் திருவிடைமருதூர் அருகே உள்ள திருமலைராஜபுரம் ஊராட்சி அரசு ஆதிதிராவிடர் நல உயர்நிலைப் பள்ளியில் இச்சம்பவம் நடந்துள்ளது. இப்பள்ளியில் உள்ள கழிவறைகள் பழுதடைந்து, மாணவர்கள் பயன்படுத்த முடியாத அவல நிலையில் இருப்பது குறித்து ஊடகங்களில் செய்தி வெளியானது. இதையடுத்து, தமிழக வெற்றிக்கழகத்தின் திருவிடைமருதூர் மத்திய கிழக்கு ஒன்றிய செயலாளர் ரத்னவேல் தலைமையில் அக்கட்சியின் நிர்வாகிகள் அங்கு நேரில் சென்று பழுதடைந்த கழிவறைகளை ஆய்வு செய்தனர். மேலும், திருவிடைமருதூர் துணை வட்டார வளர்ச்சி அலுவலரை (BDO) உடனடியாக பள்ளிக்கு வரவழைத்து, கழிவறைகளை உடனடியாகச் சீரமைக்க வேண்டும் என உத்தரவு போடும் பாணியில் அறிவுறுத்தல்களை வழங்கியுள்ளனர். அரசுப் பள்ளிக்குள் நுழைந்து ஆய்வு நடத்தியது மட்டுமின்றி, தாங்கள் ஆய்வு செய்த புகைப்படங்களை தவெக நிர்வாகிகள் தங்களது வாட்ஸ்அப் குழுக்களிலும் பகிர்ந்துள்ளனர். அமைச்சரின் தடையையும் மீறி தவெக நிர்வாகிகள் அரசுப் பள்ளியில் ஆய்வு மேற்கொண்ட இச்சம்பவம், அரசுத்துறை அதிகாரிகளிடையே அதிர்ச்சியை ஏற்படுத்தியதோடு அரசியல் வட்டாரத்திலும் பெரும் பரபரப்பை ஏற்படுத்தியுள்ளது.

சேலம் மாவட்டம் ஓமலூர் அருகே உள்ள காமலாபுரம் காட்டூர் பகுதியைச் சேர்ந்த கூலி தொழிலாளி செல்வம் என்பவர் நள்ளிரவில் சின்ன ஏரிக்கு மீன் பிடிக்கச் சென்றுள்ளார். அப்போது எதிர்பாராதவிதமாக அவர் தண்ணீரில் மூழ்கியதால், பயத்தில் "காப்பாற்றுங்கள்" என சத்தமிட்டுள்ளார். அலறல் சத்தம் கேட்டு ஓடிவந்த அவரது மகன் மற்றும் உறவினர்கள் அவரை காப்பாற்ற தீவிர முயற்சி மேற்கொண்டனர். எனினும், அவர்களின் முயற்சி தோல்வியில் முடிந்தது. இதையடுத்து ஓமலூர் போலீசாருக்கு தகவல் தெரிவிக்கப்பட்டது. சம்பவ இடத்திற்கு வந்த தீயணைப்பு வீரர்கள் ஏரியில் பல மணி நேரம் தீவிரமாகத் தேடி செல்வத்தின் உடலை மீட்டனர். இச்சம்பவம் தொடர்பாக ஓமலூர் போலீசார் வழக்குப்பதிவு செய்து விசாரணை நடத்தி வருகின்றனர். மேலும், உயிரிழந்த செல்வத்தின் உடல் பிரேத பரிசோதனைக்காக ஓமலூர் அரசு மருத்துவமனைக்கு அனுப்பி வைக்கப்பட்டுள்ளது.

சேலம் மாவட்டம் கெங்கவல்லி அருகே உள்ள ஒதியத்தூர் ஊராட்சியில், இரண்டாவது நாளாக ஐந்து மாவட்டங்களைச் சேர்ந்த போலீசார் குவிக்கப்பட்டு தீவிர பாதுகாப்புப் பணியில் ஈடுபட்டு வருவதால் அப்பகுதியில் பரபரப்பு நிலவி வருகிறது. அசம்பாவிதங்கள் ஏதும் ஏற்படாமல் தடுப்பதற்காக, பகல் மற்றும் இரவு முழுவதும் பலத்த போலீஸ் பாதுகாப்புப் பணி தொடர்ந்து மேற்கொள்ளப்பட்டு வருகிறது. இதற்கிடையில், சிலைகள் மூடப்பட்டிருந்த இடத்தை ஆத்தூர் கோட்டாட்சியர் தமிழ்மணி தலைமையில் அதிகாரிகள் நேரில் பார்வையிட்டு ஆய்வு செய்தனர். சட்டம் ஒழுங்கு பிரச்சனை ஏதும் ஏற்படாமல் தடுக்கவே இந்த பலத்த போலீஸ் பாதுகாப்பு போடப்பட்டுள்ளது.