ডিব্ৰুগড় জিলাৰ টেঙাখাত মহাবিদ্যালয়লৈ যোৱা পথটোৰ শোচনীয় অৱস্থা সন্দৰ্ভত উদ্বেগ প্ৰকাশ পাইছে। তথ্য অনুসৰি, এই পথটো বছৰৰ বাৰমাহেই পানীৰে ভৰি থাকে আৰু তাৰ পৰা বেয়া গোন্ধ ওলায়। এই সমস্যা সমাধানৰ বাবে কি পদক্ষেপ ল'ব পাৰি আৰু এই পথ মেৰামতিৰ দায়িত্ব কাৰ, সেই বিষয়ে ৰাইজৰ পৰা জানিব বিচৰা হৈছে।

ভাৰত চৰকাৰৰ পেট্ৰ’লিয়াম আৰু প্ৰাকৃতিক গেছ মন্ত্ৰী শ্ৰদ্ধেয় হৰদীপ সিং পুৰী দুলীয়াজানত উপস্থিত হয়। তেওঁ দুলীয়াজানত অৱস্থিত অইলৰ মুখ্য কাৰ্যালয় পৰিদৰ্শন কৰাৰ লগতে বিভিন্ন আন ঠাইতো ভ্ৰমণ কৰে। এই ভ্ৰমণকালত মন্ত্ৰী ৰামেশ্বৰ তেলীয়ে পেট্ৰ’লিয়াম আৰু প্ৰাকৃতিক গেছ মন্ত্ৰী শ্ৰদ্ধেয় হৰদীপ সিং পুৰীৰ সৈতে সাক্ষাৎকাৰ কৰে।

মৰাণৰ জনসাধাৰণৰ বাবে এক সুখবৰ আহিছে যি তেওঁলোকৰ দীৰ্ঘদিনীয়া সমস্যা সমাধান কৰিব। মৰাণত এটা ৫০০ আসনযুক্ত অত্যাধুনিক প্ৰেক্ষাগৃহ নিৰ্মাণ কৰা হ'ব।

চৰাইদেউ জিলাৰ সোণাৰিত পুনৰ এক চুৰিকাণ্ড সংঘটিত হৈছে। এই ঘটনা সোণাৰি পৌৰ এলেকাৰ ১২ নং ৱাৰ্ডত থকা গীতা ফুকন চেতিয়াৰ ঘৰত সংঘটিত হয়। ঘৰত কোনো নথকাৰ সুযোগ লৈ চোৰৰ দলটোৱে ঘৰৰ গ্ৰিল আৰু দুৱাৰৰ তলা কাটি ভিতৰত প্ৰৱেশ কৰে আৰু নগদ ধনসহ বহু মূল্যবান সামগ্ৰী লুটি লৈ যায়।

ডিগবৈৰ যোগেন পাটোৱাৰীয়ে শাৰীৰিক প্ৰতিবন্ধকতাবোৰ নেওচি বিশ্ব মঞ্চত নিজৰ প্ৰতিভা প্ৰদৰ্শন কৰিবলৈ সাজু হৈছে। তেওঁ ৰাষ্ট্ৰীয় পৰ্যায়ৰ এক প্ৰতিযোগিতাত তিনিটা সোণৰ পদককে ধৰি মুঠ চাৰিটা পদক জয়েৰে জাপানত অনুষ্ঠিত হ'বলগীয়া বিশ্ব পাঞ্জা প্ৰতিযোগিতালৈ যোগ্যতা অৰ্জন কৰিছে। অৱশ্যে, বৰ্তমান আৰ্থিক সহায়ৰ অভাৱে যোগেন পাটোৱাৰীক ক্ষোভিত কৰি তুলিছে। এই সন্দৰ্ভত, টাই আহোম যুৱ পৰিষদে চৰকাৰৰ ক্ৰীড়া বিভাগক শীঘ্ৰে হস্তক্ষেপ কৰিবলৈ দাবী জনাইছে যাতে তেওঁৰ বিশ্ব প্ৰতিযোগিতাত অংশগ্ৰহণ সুনিশ্চিত হয়।

চৰাইদেউ জিলাৰ সদৰ নগৰী সোনাৰি নগৰত কৃত্ৰিম বানৰ সমস্যা আজিও অব্যাহত আছে। নগৰখনত সু পৰিকল্পিত নলাৰ ব্যৱস্থা নথকাৰ ফলত এজাক বৰষুণতেই কৃত্ৰিম বানৰ সমস্যাই দেখা দিয়ে। আজি হোৱা এজাক বৰষুণৰ পাছতে নগৰখনৰ বহু অঞ্চলৰ পথ আৰু উপ-পথ কৃত্ৰিম বানত ডুব যায়। বিশেষকৈ ২ নং ৱাৰ্ডৰ পদ্মাৱতী বৰুৱা পথ, বিমলা প্ৰসাদ চলিহা পথ, বৰুৱা আলি, ধোদৰ‌আলি আদিৰ লগতে ৫ নং ৱাৰ্ডো বানৰ কৱলত পৰে। দেওবৰীয়া সাপ্তাহিক বজাৰ চলি থকাৰ সময়তে কৃত্ৰিম বানে ব্যৱসায়ীসকলক যথেষ্ট ক্ষতিগ্ৰস্ত কৰে।

চৰাইদেউ জিলা প্ৰশাসনৰ উদ্যোগত আৰু জিলা স্বাস্থ্য বিভাগৰ সহযোগত আজি সোণাৰি ৰাজহুৱা খেলপথাৰত দ্বাদশ আন্তঃৰাষ্ট্ৰীয় যোগ দিৱস সফলতাৰে উদযাপন কৰা হয়। পুৱা ৬ বজাত বন্তি প্ৰজ্বলনেৰে আৰম্ভ হোৱা এই কাৰ্যসূচীত ৰাজ্যসভাৰ সাংসদ যোগেন মহনে মুখ্য অতিথি হিচাপে অংশগ্ৰহণ কৰে। সাংসদ যোগেন মহনে ভাষণ প্ৰসংগত যোগক ভাৰতৰ প্ৰাচীন ঐতিহ্য আৰু বিশ্ববাসীক উপহাৰ দিয়া এক অমূল্য জীৱনশৈলী বুলি অভিহিত কৰে, যিয়ে শাৰীৰিক সুস্থতা, মানসিক স্থিৰতা আৰু আধ্যাত্মিক উন্নয়নৰ পথ প্ৰদৰ্শন কৰে। তেওঁ বৰ্তমানৰ ব্যস্ত জীৱনত সুস্থ আৰু সুষম জীৱন-যাপনৰ বাবে যোগচৰ্চাৰ গুৰুত্ব বৃদ্ধি পোৱাৰ কথা উল্লেখ কৰি, সুস্থ, সবল আৰু সচেতন সমাজ গঢ়াৰ লক্ষ্যৰে সকলোকে দৈনন্দিন জীৱনত যোগক অন্তৰ্ভুক্ত কৰিবলৈ আহ্বান জনায়। এই দিৱস উপলক্ষে তেওঁ উপস্থিত সকলো যোগসাধক, অংশগ্ৰহণকাৰী, জিলা প্ৰশাসনৰ বিষয়া-কৰ্মচাৰী আৰু আয়োজকসকলক অভিনন্দন জ্ঞাপন কৰে। অনুষ্ঠানত সোণাৰি সমষ্টিৰ বিধায়ক ধৰ্মেশ্বৰ কোঁৱৰ আৰু চৰাইদেউ জিলা আয়ুক্ত ড° নেহা যাদৱেও যোগাভ্যাস আৰু যোগৰ গুৰুত্ব সম্পৰ্কে বক্তব্য আগবঢ়ায়। কাৰ্যসূচীৰ অংশ হিচাপে ছাত্ৰ-ছাত্ৰীসকলে যোগাসনক মূল বিষয় হিচাপে লৈ এটি মনোমোহা সাংস্কৃতিক নৃত্য প্ৰদৰ্শন কৰে। ইয়াৰ পাছতে ইতিমধ্যে অনুষ্ঠিত হৈ যোৱা যোগাসন প্ৰতিযোগিতাৰ বঁটা বিতৰণী অনুষ্ঠানেৰে অনুষ্ঠানৰ সামৰণি পৰে। 'ক' শাখাত (১০ বছৰলৈকে) প্ৰথম অৱনীশ গগৈ, দ্বিতীয় বাৰ্লিনা মোহন আৰু তৃতীয় কৰ্ণৱ কৃত গগৈয়ে পুৰস্কাৰ লাভ কৰে। 'খ' শাখাত (১০-১৮ বছৰ) সাগৰ নেৱাৰ প্ৰথম, বৰ্ণিল হাজৰিকা দ্বিতীয় আৰু লখিমী তামুলী তৃতীয় স্থানত থাকে। 'গ' শাখাত (১৮-৩৫ বছৰ) কস্তুৰী শইকীয়া প্ৰথম, বৰ্ণালী গায়ন দ্বিতীয় আৰু কবিতা গগৈ তৃতীয় হয়। আনহাতে 'ঘ' শাখাত (৩৫ বছৰ ঊৰ্ধ্ব) মৌচুমী বৰা হাজৰিকা, পৱন দিহিঙীয়া আৰু তুলুমণি কাকতিয়ে ক্ৰমে প্ৰথম, দ্বিতীয় আৰু তৃতীয় পুৰস্কাৰ লাভ কৰিবলৈ সক্ষম হয়। এই অনুষ্ঠানত জিলাখনৰ অন্যান্য বিষয়া-কৰ্মচাৰীকে ধৰি দুই শতাধিক ৰাইজ উপস্থিত থাকে। উল্লেখযোগ্য যে, চৰাইদেউ জিলাৰ মাহমৰা মহকুমাৰ মৰাণ মহাবিদ্যালয়ৰ আন্তঃ ষ্টেডিয়ামত জিলাখনৰ বিষয়াবৰ্গ, ছাত্ৰ-ছাত্ৰী আৰু শতাধিক ৰাইজৰ উপস্থিতিত আন্তঃৰাষ্ট্ৰীয় যোগ দিৱস উদযাপন কৰা হয়।

পুৱাৰে পৰা হোৱা মুষলধাৰ বৰষুণৰ ফলত নাজিৰা নগৰৰ কেইবাটাও ৱাৰ্ডত ভয়াবহ জলাবদ্ধতাৰ সৃষ্টি হৈছে। নিষ্কাশন ব্যৱস্থাৰ দুৰ্বলতাৰ বাবে বহু এলেকা কৃত্ৰিম বানৰ কবলত পৰাত জনসাধাৰণৰ দৈনন্দিন জীৱন ব্যাহত হৈছে।

মন্ত্ৰী ৰামেশ্বৰ তেলীয়ে মাননীয় প্ৰধানমন্ত্ৰী নৰেন্দ্ৰ মোদী ডাঙৰীয়াক যোগক বিশ্বব্যাপী জনআন্দোলনলৈ ৰূপান্তৰিত কৰাৰ বাবে আন্তৰিক কৃতজ্ঞতা জ্ঞাপন কৰিছে। লগতে, তেওঁ সুস্থ জীৱনৰ বাবে যোগক দৈনন্দিন অভ্যাস হিচাপে গ্ৰহণ কৰিবলৈও আহ্বান জনাইছে।