விருதுநகர் மாவட்டம் காரியாபட்டி பகுதியில் இன்று (18.06.2026) மாலை சுமார் 3.50 மணியளவில் வெயில் சுட்டெரித்துக் கொண்டிருந்த வேளையில் திடீரென சாரல் மழை பெய்தது. கடந்த சில நாட்களாக நிலவி வந்த வெப்பமான சூழலுக்கு மத்தியில் பெய்த இந்த எதிர்பாராத மழை பொதுமக்களை ஆச்சரியத்தில் ஆழ்த்தியது. வெயிலும் மழையும் ஒரே நேரத்தில் காணப்பட்டதால், வெப்பநிலை சற்று தணிந்து குளிர்ச்சியான சூழல் நிலவியது. காரியாபட்டி மற்றும் அதைச் சுற்றியுள்ள பகுதிகளில் சில நிமிடங்கள் நீடித்த இந்த சாரல் மழையால் பொதுமக்கள் மற்றும் வாகன ஓட்டிகள் மகிழ்ச்சியடைந்தனர்.

விருதுநகர் மாவட்டம் காரியாபட்டி பகுதியில் இன்று (18.06.2026) மாலை சுமார் 3.50 மணியளவில் வெயில் சுட்டெரித்துக் கொண்டிருந்த வேளையில் திடீரென சாரல் மழை பெய்தது. கடந்த சில நாட்களாக நிலவி வந்த வெப்பமான சூழலுக்கு மத்தியில் பெய்த இந்த எதிர்பாராத மழை பொதுமக்களை ஆச்சரியத்தில் ஆழ்த்தியது. வெயிலும் மழையும் ஒரே நேரத்தில் காணப்பட்டதால், வெப்பநிலை சற்று தணிந்து குளிர்ச்சியான சூழல் நிலவியது. காரியாபட்டி மற்றும் அதைச் சுற்றியுள்ள பகுதிகளில் சில நிமிடங்கள் நீடித்த இந்த சாரல் மழையால் பொதுமக்கள் மற்றும் வாகன ஓட்டிகள் மகிழ்ச்சியடைந்தனர்.

மதுரை மாவட்டம் திருமங்கலத்தில் ஸ்ரீ விநாயகர் கோயில் மகா கும்பாபிஷேக விழா விமர்சையாக நடைபெற்றது. இந்த விழா மூன்று நாட்கள் நடைபெற்றது. விழாவின் ஒரு பகுதியாக அர்ச்சனை மற்றும் அன்னதானம் வழங்கப்பட்டது.

அ.தி.மு.க. முன்னாள் அமைச்சர் ஆர்.பி. உதயகுமார், தமிழக சட்டமன்றக் கூட்டத்தொடர் மக்களுக்கு ஏற்றம் தருமா அல்லது ஏமாற்றம் தருமா என்று கேள்வி எழுப்பியுள்ளார். ஜூன் 18 அன்று அவர் வெளியிட்ட வீடியோவில், கடன்கள் தள்ளுபடி செய்யப்படும் என்ற எதிர்பார்ப்புடன் காத்திருந்த மக்கள், அரசு வாக்குறுதிகளைத் தள்ளுபடி செய்துவிடுமோ என்று கவலையுடன் இருப்பதாகக் கடுமையாகக் குற்றம் சாட்டினார்.

விருதுநகர் மாவட்டம் ஸ்ரீவில்லிபுத்தூருக்கு அருகேயுள்ள நத்தம்பட்டியில் புதிதாக திறக்கப்பட்டுள்ள சுங்கச்சாவடியை அகற்ற வலியுறுத்தி, ஐந்து மாவட்டங்களைச் சேர்ந்த வாகன ஓட்டுநர்கள் மற்றும் உரிமையாளர்கள் கூட்டமைப்பு சார்பில் வரும் 23ஆம் தேதி கண்டன ஆர்ப்பாட்டம் நடத்த முடிவு செய்யப்பட்டுள்ளது. ஸ்ரீவில்லிபுத்தூர் - மதுரை நான்கு வழிச்சாலையில் நத்தம்பட்டியில் அமைக்கப்பட்டுள்ள இந்த சுங்கச்சாவடியில் நேற்று முதல் கட்டணம் வசூலிக்கப்பட்டு வருகிறது. நெடுஞ்சாலை போக்குவரத்து விதிகளின்படி, ஒரு சுங்கச்சாவடிக்கும் அடுத்த சுங்கச்சாவடிக்கும் இடையே 60 கி.மீ தூரம் இருக்க வேண்டும். ஆனால், மதுரை மாவட்டம் கப்பலூரில் இருந்து 48 கி.மீ தூரத்திலேயே இந்த இரண்டாவது சுங்கச்சாவடி அமைக்கப்பட்டுள்ளதாக வாகன ஓட்டுநர்கள் குற்றம் சாட்டுகின்றனர். மேலும், அதிகாரிகள் வடுகப்பட்டியிலிருந்து ராஜபாளையம் வரையிலான சாலைக்கு மட்டும் கட்டணம் வசூலிப்பதாக கூறியுள்ள நிலையில், இந்த இரண்டு ஊர்களுக்கும் இடையே 35 கி.மீ மட்டுமே இருப்பதால் இதை ஏற்றுக்கொள்ள முடியாது என நான்கு சக்கர வாகன ஓட்டுநர்கள் மற்றும் உரிமையாளர்கள் தெரிவித்துள்ளனர். இந்த சுங்கச்சாவடியை அகற்ற வலியுறுத்தி விருதுநகர் மாவட்டம் ராஜபாளையம் டாக்ஸி வேன் ஓட்டுநர்கள் சங்கத்தில் ஆலோசனை கூட்டம் நடைபெற்றது. இக்கூட்டத்தில் சிஐடியு, ஏஐடியுசி டாக்ஸி வேன் ஓட்டுநர்கள் சங்கம், லாரி உரிமையாளர்கள் சங்கம், அண்ணா தொழிற்சங்கம், தொமுச தொழிற்சங்கம், சரக்கு வாகன உரிமையாளர்கள் சங்கம், ஸ்ரீவில்லிபுத்தூர், தளவாய்புரம், முரம்பு சுற்றுலா வாகன ஓட்டுநர்கள் சங்கம், தென்காசி, நெல்லை மற்றும் மதுரை மாவட்டங்களைச் சேர்ந்த நான்கு சக்கர வாகன ஓட்டுநர்கள் மற்றும் உரிமையாளர்கள் சங்க நிர்வாகிகள் பலர் கலந்து கொண்டனர். சட்ட விதிகளுக்கு புறம்பாக அமைக்கப்பட்டுள்ள இந்த சுங்கச்சாவடியை அகற்றி, சட்ட விதிகளுக்கு உட்பட்டு வேறு இடத்திற்கு மாற்ற வலியுறுத்தி வரும் 23ஆம் தேதி செவ்வாய்க்கிழமை சுங்கச்சாவடி அருகே கண்டன ஆர்ப்பாட்டம் நடத்தப்படும் என இக்கூட்டத்தில் ஒருமனதாக முடிவு செய்யப்பட்டது.

தேனி மாவட்டம் பெரியகுளம் புதிய பேருந்து நிலையப் பிரிவு வரையிலான சாலை, பாரதியார் பள்ளிக்குச் செல்லும் சாலை, மற்றும் ரெங்ககிருஷ்ணா பள்ளிக்குச் செல்லும் சாலைகள் நீண்ட நாட்களாக மோசமான நிலையில் இருந்ததால் வாகன ஓட்டிகள் சிரமப்பட்டு வந்தனர். இதுகுறித்து பொதுமக்கள் புதிய தார் சாலை அமைக்கக் கோரி நகராட்சி நிர்வாகத்திடம் கோரிக்கை விடுத்திருந்தனர். இதன் பேரில் நகராட்சி நிர்வாகம் சாலை அமைக்க ஒப்பந்தம் செய்தது. தற்போது இந்தச் சாலைகளில் புதிய தார் சாலை அமைக்கும் பணிகள் நடைபெற்று வருகின்றன. இருப்பினும், இரவு நேரத்தைப் பயன்படுத்தி அவசர அவசரமாக, தரமற்ற முறையில் இந்தச் சாலைகள் அமைக்கப்படுவதாகப் புகார்கள் எழுந்துள்ளன. அதிக வாகனப் போக்குவரத்து உள்ள இந்தச் சாலை, தரமற்ற முறையில் அமைக்கப்பட்டால் மீண்டும் குண்டும் குழியுமாக மாறும் அபாயம் உள்ளதாக சமூக ஆர்வலர்கள் கவலை தெரிவித்துள்ளனர். எனவே, மாவட்ட நிர்வாகம் உடனடியாக தலையிட்டு, அமைக்கப்படும் புதிய சாலையை ஆய்வு செய்து, தரமான முறையில் பணிகளை மேற்கொள்ள நடவடிக்கை எடுக்க வேண்டும் என்று அப்பகுதி பொதுமக்கள் மற்றும் சமூக ஆர்வலர்கள் கோரிக்கை விடுத்துள்ளனர்.

தமிழகம் மற்றும் கேரள எல்லையில் அமைந்துள்ள முல்லைப்பெரியாறு அணையின் நீர்ப்பிடிப்புப் பகுதிகளில் மழை பெய்ய வேண்டும் என வலியுறுத்தி தேக்கடியில் கம்பம் பள்ளத்தாக்கு விவசாயிகள் மும்மதப் பிரார்த்தனை வழிபாட்டு நிகழ்ச்சியை நடத்தினர். தேனி, திண்டுக்கல், மதுரை, ராமநாதபுரம், சிவகங்கை ஆகிய ஐந்து மாவட்ட மக்களின் குடிநீர் மற்றும் விவசாயத்திற்கான முக்கிய நீராதாரமாக முல்லைப்பெரியாறு அணை விளங்குகிறது. இந்த அணை நீரை நம்பி இப்பகுதியில் விவசாயம் நடைபெற்று வருகிறது. தேனி மாவட்டத்தில் உள்ள 14,707 ஏக்கர் இருபோக சாகுபடி நிலங்கள் பெரியாறு அணை நீரையே சார்ந்துள்ளன. இந்த நிலங்களுக்கு பெரியாறு அணையிலிருந்து முதல் போக விவசாயத்திற்காக ஒவ்வொரு ஆண்டும் ஜூன் முதல் வாரத்தில் தண்ணீர் திறக்கப்படுவது வழக்கம். ஆனால், இந்த ஆண்டு ஜூன் ஒன்றாம் தேதி தமிழகப் பகுதிக்கு தண்ணீர் திறக்கப்பட வேண்டிய நிலையில், தண்ணீர் திறக்கப்படவில்லை. ஜூன் மாதத்தில் தொடங்க வேண்டிய பருவமழை ஏமாற்றி வருவதால், முதல் போகத்திற்கு போதுமான தண்ணீர் திறக்கப்படுமா என்ற கேள்வி எழுந்துள்ளது. அணையின் நீர்ப்பிடிப்புப் பகுதிகளில் மழை இல்லாததால், அணையின் நீர்மட்டம் தொடர்ந்து குறைந்து வருகிறது. தற்போது முல்லைப்பெரியாறு அணையின் நீர்மட்டம் 113.55 அடியாக உள்ளது. இதன் காரணமாக, தேனி மாவட்டம் குமுளி அருகே உள்ள தேக்கடியில் உள்ள பொதுப்பணித்துறை அலுவலகப் பகுதியில், தமிழகத்திற்கு தண்ணீர் திறந்துவிடப்படும் ஷட்டர் பகுதியில் கம்பம் பள்ளத்தாக்கு விவசாயிகள் மற்றும் மேலூர் பகுதி விவசாயிகள் ஒன்றிணைந்து மழை வேண்டி மும்மதப் பிரார்த்தனை வழிபாட்டு நிகழ்ச்சியை நடத்தினர். அங்குள்ள ஜெயதுர்க்கை கோவிலில் இந்து மதத்தினர் வருண பகவானுக்கு சிறப்பு பூஜை செய்து, பூஜை செய்யப்பட்ட கலச நீரை பெரியாறு அணையிலிருந்து தமிழகத்திற்கு தண்ணீர் வரும் தேக்கடியிலுள்ள ஷட்டர் பகுதியில் பெரியாற்று நீரில் கலந்தனர். இதேபோல், கிறிஸ்தவ மதத்தினரும் இஸ்லாமிய மதத்தினரும் ஷட்டர் அருகே தங்கள் முறைப்படி மழை வேண்டி பிரார்த்தனைகளை மேற்கொண்டனர். இந்நிகழ்ச்சியில் பொதுப்பணித்துறை அதிகாரிகள், விவசாய சங்கத்தினர் உள்ளிட்ட ஏராளமான விவசாயிகள் மற்றும் மும்மதக் குருமார்கள் கலந்து கொண்டனர்.

திண்டுக்கல் மாவட்டம் ஆத்தூர் ஒன்றியம் சித்தரேவு ஊராட்சிக்குட்பட்ட கதிர் நாயக்கன்பட்டி பிரிவு அருகே செயல்பட்டு வரும் அரசு மதுபானக் கடையை அகற்றக்கோரி சித்தரேவு மற்றும் அதனைச் சுற்றியுள்ள பகுதிகளைச் சேர்ந்த சுமார் 300-க்கும் மேற்பட்ட பொதுமக்கள் போராட்டத்தில் ஈடுபட்டுள்ளனர். சித்தையன் கோட்டை, அய்யம்பாளையம் செல்லும் சாலையில் அமர்ந்து அவர்கள் இந்த சாலை மறியல் போராட்டத்தை நடத்தினர். தகவல் அறிந்து சம்பவ இடத்திற்கு விரைந்து வந்த பட்டிவீரன்பட்டி காவல்துறையினர், போராட்டத்தில் ஈடுபட்ட பொதுமக்களுடன் சமரசப் பேச்சுவார்த்தையில் ஈடுபட்டனர். இந்த சாலை மறியல் போராட்டத்தால் சுமார் 2 மணி நேரத்திற்கும் மேலாக போக்குவரத்து பாதிக்கப்பட்டுள்ளது.

விருதுநகர் மாவட்டம் ராஜபாளையத்தில் உள்ள ஜவஹர் மைதானம் எதிரே, நெசவாளர் கூட்டுறவு சங்கங்களுக்கு உடனடியாக நூல் வழங்க வலியுறுத்தி, ஏ ஐ டி யு சி கைத்தறி சம்மேளனம் சார்பில் ஆர்ப்பாட்டம் நடைபெற்றது. கடந்த 15 நாட்களாக நூல் இல்லாமல் வேலை இழந்து தவித்து வரும் நெசவாளர்களின் பிரச்சினைகளை முன்னிறுத்தி இந்த ஆர்ப்பாட்டத்தில் நூற்றுக்கும் மேற்பட்டோர் கலந்து கொண்டனர். இதில் ஏ ஐ டி யு சி கைத்தறி சம்மேளன உறுப்பினர்கள், இந்திய கம்யூனிஸ்ட் கட்சியினர், மற்றும் கைத்தறி, பெடல் தறி நெசவாளர்கள் ஆகியோர் பங்கேற்றனர். இந்த ஆர்ப்பாட்டத்தில், நெசவாளர் கூட்டுறவு சங்கங்களுக்கு உடனடியாக நூல் விநியோகம் செய்ய வேண்டும், கைத்தறி நெசவாளர்களுக்கு வழங்குவது போலவே பெடல் தறி நெசவாளர்களுக்கும் ஆண்டுக்கு ஒரு முறை கூலி உயர்வு வழங்க வேண்டும், வேலை இல்லாமல் சிரமப்படும் நெசவாளர்களின் வாழ்வாதாரத்தைப் பாதுகாக்க, மீனவர்களுக்கு வழங்குவது போல் நிவாரணத் தொகை வழங்க வேண்டும், கூட்டுறவு சங்கங்கள் மூலம் தரமான நூல் விநியோகிக்கப்பட வேண்டும், நெசவாளர் ஓய்வூதியத்தை ₹5 ஆயிரமாக உயர்த்தி வழங்க வேண்டும், மற்றும் கைத்தறி நெசவாளர்களுக்கான சேமிப்பு மற்றும் பாதுகாப்பு திட்டத்தின் கீழ் மருத்துவ காப்பீட்டு அட்டை திட்டத்தை மீண்டும் செயல்படுத்த வேண்டும் என்பன உள்ளிட்ட கோரிக்கைகளை வலியுறுத்தி முழக்கங்கள் எழுப்பப்பட்டன.