धनादेश न वाटल्यामुळे लातूरच्या बांधकाम व्यावसायिकास सहा महिने कारावास; १० लाख ६८ हजार नुकसानभरपाईचा आदेश लातूर (प्रतिनिधी) : बँकांची विश्वासार्हता कायम टिकून राहिली पाहिजे, या दृष्टीने धनादेश अनादराच्या प्रकरणांमध्ये आता न्यायव्यवस्था देखील कठोर भूमिका घेऊ लागले आहेत. अशाच एका धनादेश अनादरणाच्या प्रकरणात लातूर येथील न्यायालयाने महत्त्वपूर्ण निकाल देत लातूर तालुक्यातील धनेगाव येथील बांधकाम व्यावसायिक शंकर सूर्यकांत चामले यांना सहा महिने साध्या कारावासाची शिक्षा सुनावली आहे. तसेच १० लाख ६८ हजार रुपयांची नुकसानभरपाई फिर्यादीस देण्याचे आदेश दिले आहेत. बांधकाम साहित्य भाड्याने देणारे व्यावसायिक बालाजी विरप्पा होनराव यांनी आरोपीविरुद्ध न्यायालयात दावा दाखल केला होता. फिर्यादीकडून आरोपीने विविध बांधकाम साहित्य भाडेतत्त्वावर घेतले होते. त्या बदल्यात देय असलेल्या रकमेपोटी आरोपीने धनादेश दिला; मात्र संबंधित धनादेश बँकेत सादर केल्यानंतर खात्यात अपुरी शिल्लक असल्याने तो अनादरित झाला. त्यानंतर फिर्यादीने कायद्यानुसार आरोपीस नोटीस बजावून ठरावीक कालावधीत रक्कम अदा करण्याची मागणी केली; परंतु आरोपीकडून कोणताही समाधानकारक प्रतिसाद न मिळाल्याने प्रकरण न्यायालयात दाखल करण्यात आले. सुनावणीदरम्यान फिर्यादीकडील कागदपत्रे, बँकेचे परताव्याचे मेमो, नोटीसची प्रत तसेच इतर पुरावे न्यायालयासमोर सादर करण्यात आले. दोन्ही बाजूंचा युक्तिवाद ऐकल्यानंतर न्यायदंडाधिकारी सौ. एस. पी. केस्तगीकर (नलगे) यांनी आरोपीस दोषी ठरवत सहा महिन्यांच्या साध्या कारावासाची शिक्षा सुनावली. तसेच फिर्यादीस १० लाख ६८ हजार रुपये नुकसानभरपाई दोन महिन्यांच्या आत अदा करण्याचे आदेश दिले. ही रक्कम मुदतीत न भरल्यास आरोपीस अतिरिक्त दोन महिने साधी कैद भोगावी लागेल, असे न्यायालयाने स्पष्ट नमूद केले आहे. या प्रकरणात फिर्यादीची बाजू ॲड. राहुल पांडे यांनी प्रभावीपणे मांडली. त्यांना ॲड. सुशील मोरे आणि ॲड. प्रकाश कुलकर्णी यांनी सहकार्य केले. या निकालामुळे चेक अनादरणाच्या प्रकरणांमध्ये न्यायालयाकडून कठोर भूमिका घेतली जात असल्याचे स्पष्ट झाले असून व्यावसायिक व्यवहार करताना आर्थिक शिस्त पाळण्याचा संदेश या निकालातून देण्यात आला आहे.

Laxman Ugile

उदगीर, लातूर, महाराष्ट्र•

10 hrs ago