ଆଦିବାସୀ ମାନଙ୍କ ଉପରେ ଦମନ ବଦଂ କର ନଚେତ ଆଦୋଂଲନ ହେବ --------------------------------------- ରାୟଗଡା, ଗୁଣପୁର ,ତା ୭/୦୪: ଆଜି ସକାଳୁ ସିଜମାଳି ଅଞ୍ଚଳରୁ ଖବର ମିଳିଛି ଗତକାଲି ରାତି ପ୍ରାୟ ୩ଟା (୭ ଅପ୍ରେଲ ଭୋର୍ ସମୟରେ) ସମୟରେ ସଶସ୍ତ୍ର ପୋଲିସ୍ ବାହିନୀ କଣ୍ଟାମାଳ ଗାଁଘେରାଉକରି,ଇଲେକ୍ଟି ସଂଯୋଗ ବିଚ୍ଛିନ୍ନ କରି ଲୁହବୁହା ଗ୍ୟାସ୍ ପ୍ରୟୋଗ କରିଛନ୍ତି, କିଛି ଘରଦ୍ୱାର ଭାଙ୍ଗିଛନ୍ତି, ବ୍ଲାକ ଫାୟାରିଙ୍ଗ କରିଛନ୍ତି ଓ କେତେକ ପୁରୁଷ ମହିଳାଙ୍କ ଉପରେ ଆକ୍ରମଣ କରିଛନ୍ତି।। ଟିଅର୍ ଗ୍ୟାସ୍ ପକାଇବା ଫଳରେ ଗୋଟିଏ ଗାଇ ମଧ୍ୟ ମରିଯାଇଛି । ଏହା ଅତ୍ୟନ୍ତ ନିନ୍ଦନୀୟ ଘଟଣା।ବେଦାନ୍ତ କମ୍ପାନୀ ସ୍ୱାର୍ଥରେ ରାସ୍ତା ନିର୍ମାଣ ପାଇଁ ରାୟଗଡ଼ା ଜିଲ୍ଲାର କାଶୀପୁର ବ୍ଲକର ସୁଙ୍ଗେର ଗ୍ରାମ ପଞ୍ଚାୟତରେ ଜିଲ୍ଲା ପ୍ରଶାସନ ନିଷେଧାଦେଶ ଜାରି କରିଛନ୍ତି। ଏହା ରାୟଗଡ଼ା ଭଳି ଅନୁସୂଚିତ ଅଞ୍ଚଳରେ ସାମ୍ବିଧାନିକ ଅଧିକାର ଓ ମାନବିକ ଅଧିକାରର ସ୍ପଷ୍ଟ ଉଲ୍ଲଂଘନ । ଏପରି ଅଗଣତାନ୍ତ୍ରିକ ନିଷେଧାଦେଶ ଅବିଳମ୍ବେ ପ୍ରତ୍ୟାହାର କରିବା ଆବଶ୍ୟକ। ପ୍ରକାଶ ଥାଉକି ଗତ ୩ ଅପ୍ରେଲ ସନ୍ଧ୍ୟା ସମୟରେ ରାୟଗଡ଼ା ଉପ-ଜିଲ୍ଲାପାଳଙ୍କ ଆଦେଶ ଅନୁଯାୟୀ ଭାରତୀୟ ନାଗରିକ ସଂହିତା ଧାରା ୧୬୩ ତଥା ପୂର୍ବରୁ ଥିବା ଭାରତୀୟ ଦଣ୍ଡବିଧି ନିୟମର ଧାରା ୧୪୪ ଅନୁଯାୟୀ ଏକ ନିଷେଧାଦେଶ ଜାରି କରାଯାଇଛି । ଡାକବାଜି ଯନ୍ତ୍ରରେ ଘୋଷଣା କରି ଏଥିରେ କୁହାଯାଇଛି ଯେ ରାଜ୍ୟ ସରକାର ସିଜିମାଳିକୁ ଏକ ରାସ୍ତା ନିର୍ମାଣ କରିବାକୁ ଯାଉଛନ୍ତି । ରାସ୍ତା ଠାରୁ ୧୦୦ ମିଟର ଦୂରତା ମଧ୍ୟରେ ୪ଜଣରୁ ଅଧିକ ଲୋକ ଏକତ୍ରିତ ହୋଇପାରିବେ ନାହିଁ । ଏହି ଆଦେଶଟି ୩ ଅପ୍ରେଲ ସଂଧ୍ୟା ୬ରୁ ଏକ ମାସ ପର୍ଯ୍ୟନ୍ତ ବଳବତ୍ତର ରହିବ । ଆଦେଶକୁ ଅମାନ୍ୟ କଲେ ଆଇନ ଅନୁଯାୟୀ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ମଧ୍ୟ ଧମକ ଦିଆଯାଇଛି । ସ୍ଥାନୀୟ ସିଜମାଳି ଅଞ୍ଚଳବାସୀ ଜାଣନ୍ତି ଯେ ଏହି ରାସ୍ତା ସେମାନଙ୍କର କୌଣସି ସୁବିଧା ପାଇଁ ନିର୍ମାଣ କରାଯାଉନାହିଁ, ବରଂ ବେଦାନ୍ତ କମ୍ପାନୀର ବକ୍‌ସାଇଟ ଖଣି ପାଇଁ ଏହା ନିର୍ମାଣ କରାଯାଉଛି । ରାୟଗଡ଼ା ଜିଲ୍ଲା ପୁଲିସ ଓ ପ୍ରଶାସନ ଯେ କମ୍ପାନୀର ସ୍ୱାର୍ଥରେ ଲାଗିଛନ୍ତି ଏହା ନିଷେଧାଦେଶରୁ ତାହା ଅଧିକ ସ୍ପଷ୍ଟ ହୋଇଯାଉଛି । କିନ୍ତୁ ସମଗ୍ର ରାୟଗଡ଼ା ଜିଲ୍ଲା ଏକ ଅନୁସୂଚୀତ ଅଞ୍ଚଳ ହୋଇଥିବା ବେଳେ ସେ ଅଞ୍ଚଳରେ ଯେକୌଣସି ବିକାଶମୂଳକ କାମ ପାଇଁ ଗ୍ରାମସଭାର ଅନୁମୋଦନ ଜରୁରୀ ଅଟେ, ଯାହା ଏହି ରାସ୍ତା ନିର୍ମାଣ ଘୋଷଣାରେ ଉଲଂଘନ କରାଯାଇଛି। ଆଦିବାସୀ ସମାଜରେ ଚାଷକାମ ଠାରୁ ଆରମ୍ଭ କରି ଜଙ୍ଗଲରୁ ଜାଳେଣି ସଂଗ୍ରହ ହେଉ ବା ଅନ୍ୟ ବନ୍ୟଜାତ ଦ୍ରବ୍ୟ ସଂଗ୍ରହ ହେଉ ପ୍ରତିଟି କାର୍ଯ୍ୟ ଗୋଷ୍ଠୀଗତ ଭାବେ କରାଯାଏ । ଗୋଷ୍ଠୀବଦ୍ଧ ସମାଜ ହୋଇଥିବା କାରଣରୁ ସେମାନଙ୍କ ଜୀବନ ଜୀବିକା ଓ ଦୈନନ୍ଦିନ ଚାଲିଚଳଣୀ, ଚାଷବାସ, ଗୋପାଳନ, ଭୋଜିଭାତ, ଖେଳକୂଦ ପାଇଁ ପ୍ରତିଟି କ୍ଷେତ୍ରରେ ଏହି ନିଷେଧାଦେଶ ମାନବାଧିକାର ଉଲ୍ଲଂଘନ କରିବ। ରାୟଗଡ଼ା ଜିଲ୍ଲା ପ୍ରଶାସନ ଉକ୍ତ ନିଷେଧାଦେଶ ସେମାନଙ୍କର ନିତିଦିନିଆ ଜୀବନ-ଜୀବିକାକୁ ଭୟଙ୍କର ଭାବେ କ୍ଷତିଗ୍ରସ୍ତ କରିବ । ସିଜିମାଳିର ସାଧାରଣ ଜନତା ସେମାନଙ୍କ ଅଞ୍ଚଳରେ ହେଉଥିବା ରାସ୍ତା ନିର୍ମାଣକୁ ତୀବ୍ର ବିରୋଧ କରୁଛନ୍ତି। ଏହି ରାସ୍ତା ସାଧାରଣ ଲୋକଙ୍କ ଉନ୍ନତି ପାଇଁ ନୁହେଁ, ବରଂ ସିଜିମାଳି ଅଞ୍ଚଳର ଜଳ, ଜମି, ଜଙ୍ଗଲ, ଖଣିଜ ସମ୍ପଦ ଓ ଆଦିବାସୀମାନଙ୍କ ଜୀବନ- ଜୀବିକାର ଲୁଣ୍ଠନ ପାଇଁ ନିର୍ମାଣ କରାଯାଉଛି। ଏହା ସହିତ, ଗତ ୧୧ ମାର୍ଚ୍ଚରେ ତଳ ତଳ ଆମପଦର ଗାଁ ର ୨୧ ଜଣ, ଯେଉଁମାନଙ୍କ ମଧ୍ୟରେ ଜଣେ ଗର୍ଭବତୀ ମହିଳାଙ୍କ ସମେତ ୧୦ ଜଣ ମହିଳା ଅଛନ୍ତି ସେମାନଙ୍କୁ ଗିରଫ୍ କରାଯାଇଛି। ସେହିପରି ବିସ୍ଥାପନ ବିରୋଧୀ ଜନ ଆନ୍ଦୋଳନର ନେତା ଲିଙ୍ଗରାଜ ଆଜାଦ ଓ ତାଙ୍କ ସାଥୀ ସଂଗ୍ରାମୀ ସୁରେଶଙ୍କୁ ପୋଲିସ ମିଥ୍ୟା ମାମଲାରେ ଗତ ମାର୍ଚ୍ଚ ୨୭ ତାରିଖରେ ଗିରଫ କରି ଜେଲ୍ ରେ ରଖିଥିବା ଘଟଣା ଗୁରୁତର ଚିନ୍ତାର ବିଷୟ। ଏହାରୁ ସ୍ପଷ୍ଟ ଯେ ବେଦାନ୍ତ ଓ ଆଦାନୀ ପରି କମ୍ପାନୀମାନଙ୍କ ପକ୍ଷରେ ସିଜିମାଳି ଓ ଅନ୍ୟାନ୍ୟ ମାଳି ଅଞ୍ଚଳକୁ ହସ୍ତାନ୍ତର କରିବା ପାଇଁ ରାଜ୍ୟ ସରକାର ଓ ଜିଲ୍ଲା ପ୍ରଶାସନ ଯୋଜନାବଦ୍ଧ ଭାବରେ ପଦକ୍ଷେପ ନେଉଛନ୍ତି। ପୋଲିସ ଓ ପ୍ରଶାସନ ଦ୍ୱାରା କମ୍ପାନୀ ପକ୍ଷରେ ସାଧାରଣ ଆଦିବାସୀମାନଙ୍କ ଉପରେ ଚାଲିଥିବା ଏହି ଜନବିରୋଧୀ, ଅଗଣତାନ୍ତ୍ରିକ ଓ ଅସାଂବିଧାନିକ କାର୍ଯ୍ୟକଳାପକୁ ସି ପି ଆଇ (ଏମଏଲ) ଲିବରେସନ ରାୟଗଡା ଜିଲ୍ଲା କମିଟି ଦୃଢ଼ ଭାବରେ ନିନ୍ଦା କରୁଛୁ ଏବଂ ନିମ୍ନଲିଖିତ ଦାବି କରୁଛୁ । ୧. ରାୟଗଡା ଉପଜିଲ୍ଲାପାଳଙ୍କ କାର୍ଯ୍ୟାଳୟ ଦ୍ୱାରା ଜାରି କରାଯାଇଥିବା ଧାରା ୧୬୩(ବି.ଏନ୍.ଏସ୍) ଓ ଧାରା ୧୪୪(ଭାରତୀୟ ଦଣ୍ଡବିଧି ସଂହିତା)ଧାରାକୁ ତୁରନ୍ତ ପ୍ରତ୍ୟାହାର କରାଯାଉ। ୨. ସିଜିମାଳି ଅଞ୍ଚଳରେ ଆଦିବାସୀମାନଙ୍କ ଜଳ, ଜମି, ଜଙ୍ଗଲ ଓ ଜୀବନ ଜୀବିକାର ସୁରକ୍ଷା ସୁନିଶ୍ଚିତ କରାଯାଉ ଓ ଗ୍ରାମସଭାର ଅନୁମତି ବିନା ଖଣି ଖନନ ପାଇଁ ଜାରି ପ୍ରକ୍ରିୟା ବନ୍ଦ କରାଯାଉ। ୩. ବେଦାନ୍ତ କମ୍ପାନୀ ପାଇଁ ହେଉଥିବା ରାସ୍ତା ନିର୍ମାଣ କାମକୁ ତୁରନ୍ତ ବନ୍ଦ କରାଯାଉ। ୪. ସିଜିମାଳି ଅଞ୍ଚଳରେ ମୁତୟନ ହୋଇଥିବା ପୋଲିସ୍ ପ୍ରତ୍ୟାହାର ବନ୍ଦ କରାଯାଉ ଏବଂ ପୋଲିସ୍ ପ୍ରଶାସନଙ୍କ ଜୋର-ଜୁଲୁମକୁ ବନ୍ଦ କରାଯାଉ। ୫. ସାଥୀ ଲିଙ୍ଗରାଜ ଆଜାଦ ଓ ସିଜିମାଳିର ଜଳ ଜମି ଓ ଜଙ୍ଗଲ ସୁରକ୍ଷା ପାଇଁ ବେଦାନ୍ତ କମ୍ପାନୀ ବିରୋଧୀ ଆନ୍ଦୋଳନରେ ସମସ୍ତ ସାଥୀମାନଙ୍କ ନାମରେ ଥିବା ମିଥ୍ୟା ମକଦ୍ଦମା ପ୍ରତ୍ୟାହାର କରାଯାଉ ଏବଂ ଜେଲ୍ ରେ ଥିବା ସମସ୍ତ ସାଥୀ ମାନଙ୍କୁ ତୁରନ୍ତ ମୁକ୍ତ କରାଯାଉ। ୬. ପଞ୍ଚମ ଅନୁସୂଚିତ ଅଞ୍ଚଳରେ ଆଦିବାସୀମାନଙ୍କ ଅଧିକାର ରକ୍ଷା ପାଇଁ ପେଶା (PESA) ଓ ଜଙ୍ଗଲ ଅଧିକାର ଆଇନ (FRA) କଡ଼ାକଡ଼ି ଭାବେ କାର୍ଯ୍ୟକାରୀ କରାଯାଉ। ୭) ରାୟଗଡ଼ା ଜିଲ୍ଲା ତଥା ସିଜମାଳି ଅଞ୍ଚଳ ସମ୍ବିଧାନର ୫ମ ଅନୁଚ୍ଛେଦ ଅନୁସାରେ ଅନୁସୂଚିତ କ୍ଷେତ୍ର ହୋଇଥିବାରୁ ଏବଂ ରାଜ୍ୟପାଳ ଅନୁସୂଚିତ କ୍ଷେତ୍ରର ମୁଖ୍ୟ ହୋଇଥିବାରୁ ଓଡ଼ିଶାର ମାନ୍ୟବର ରାଜ୍ୟପାଳ ଅବିଳମ୍ବେ ଏହି ଘଟଣାରେ ହସ୍ତକ୍ଷେପ କରି ଓ ତାଙ୍କର ବିଶେଷ କ୍ଷମତା ପ୍ରୟୋଗ କରି ଗ୍ରାମସଭାର ସାମ୍ବିଧାନିକ ମାନ୍ୟତା କୁ ସ୍ୱୀକୃତି ଦିଅନ୍ତୁ। ନିବେଦକ ତ୍ରିପତି ଗମାଙ୍ଗ ଜିଲ୍ଲା ସମ୍ପାଦକ ସି ପି ଆଇ (ଏମଏଲ) ଲିବରେସନ ରାୟଗଡା, ଓଡିଶା

Tuna Behera

କାଶୀପୁର, ରାୟଗଡା, ଓଡ଼ିଶା•

2 hrs ago