કડી નજીક જેતપુર ગામના બસ સ્ટેન્ડ પાસે મોડી રાત્રે એક ભયંકર અકસ્માત સર્જાયો હતો.

પાટણના સાંતલપુર ખાતે આવેલી નૈમિષ ગેસ સર્વિસ કથિત કાળા કારોબારને લઈને ચર્ચામાં છે, જ્યાં ગ્રાહકો પાસેથી બિલ કરતાં વધુ રકમ વસૂલવામાં આવતી હોવાનો આક્ષેપ કરતો એક વીડિયો વાયરલ થયો છે. આ વીડિયો વાયરલ થતાં સમગ્ર પંથકમાં ચકચાર મચી ગઈ છે. આક્ષેપો અનુસાર, ગ્રાહકો પાસેથી ₹965ની રસીદ સામે ₹1000 સુધીની રકમ વસૂલવામાં આવી રહી છે. આથી, દરેક ગેસ બાટલા પાછળના વધારાના ₹35 કોના ખિસ્સામાં જાય છે, તેવા સવાલો ઉઠી રહ્યા છે. ચર્ચા છે કે અનેક ગ્રાહકો પાસેથી લાખો રૂપિયાની કથિત વધારાની વસૂલાત કરવામાં આવી છે. આ મામલે ગ્રાહકોમાં ભારે રોષ જોવા મળી રહ્યો છે અને પુરવઠા વિભાગની કામગીરી સામે પણ પ્રશ્નચિહ્ન ઉભા થયા છે. વાયરલ વીડિયો બાદ સમગ્ર મામલે નિષ્પક્ષ તપાસની માંગ ઉઠી છે. જો આક્ષેપો સાચા સાબિત થાય તો જવાબદારો સામે કડક કાર્યવાહી કરવાની માંગ પણ કરવામાં આવી રહી છે. લોકોમાં એવી પણ ચર્ચા છે કે આનાથી ગરીબ અને મધ્યમવર્ગીય પરિવારોના ખિસ્સા પર ડાકો પડી રહ્યો છે. આ વાયરલ વીડિયોએ સાંતલપુર પંથકમાં અનેક સવાલો ઉભા કર્યા છે.

ગુજરાત સરકારના શિક્ષણ વિભાગ દ્વારા સરકારી શાળાઓમાં શિક્ષણનું સ્તર સુધારવા અને ૧૦૦% નામાંકન સુનિશ્ચિત કરવાના આશય સાથે આયોજિત 'શાળા પ્રવેશોત્સવ'ની આ વર્ષે પણ ઉત્સાહભેર ઉજવણી કરવામાં આવી. આ અંતર્ગત, સાણંદ તાલુકાના ઝોલાપુર, લીલાપુર અને મેલાસણા ગામની પ્રાથમિક અને માધ્યમિક શાળાઓમાં નવીન શૈક્ષણિક સત્રના પ્રારંભે એક ઉત્સવ જેવો માહોલ જોવા મળ્યો હતો. શાળા પરિસરને રંગબેરંગી ફુગ્ગાઓ, આસોપાલવના તોરણ અને આકર્ષક રંગોળીઓથી સજાવવામાં આવ્યું હતું. પ્રથમ વખત શાળાના પગથિયાં ચડી રહેલા ભૂલકાઓ અને માધ્યમિક શાળામાં પ્રવેશ મેળવતા વિદ્યાર્થીઓનું શાળાના આચાર્ય, શિક્ષકો અને ગ્રામજનો દ્વારા કુમકુમ તિલક અને પુષ્પગુચ્છ આપીને ભાવભીનું સ્વાગત કરવામાં આવ્યું. આ પ્રસંગે, પ્રવેશ મેળવનાર તમામ ગણવેશધારી બાળકોને આમંત્રિત મહાનુભાવોના હસ્તે શૈક્ષણિક કીટ અને પાઠ્યપુસ્તકોનું વિતરણ કરવામાં આવ્યું હતું.

Post by Pankaj Parmar

શ્રદ્ધાળુઓને શ્રીકષ્ટભંજનદેવ સાળંગપુર હનુમાનજી મહારાજના દર્શન કર્યા બાદ પોતાના દૈનિક કામધંધાની શરૂઆત કરવાની પ્રેરણા આપવામાં આવી છે.

વાવ-થરાદ જિલ્લાના દિયોદર ન્યાય મંદિરમાં આજથી આકસ્મિક આરોગ્ય સેવા કેન્દ્રનો પ્રારંભ કરવામાં આવ્યો છે. આ સુવિધા હેઠળ, હવે કોર્ટ સંકુલમાં જ વકીલો, પક્ષકારો અને સ્ટાફને તાત્કાલિક પ્રાથમિક સારવાર મળી રહેશે. જિલ્લા પ્રિન્સીપલ ડિસ્ટ્રિક્ટ એન્ડ સેશન્સ જજશ્રીના વરદ્દ હસ્તે આ સેવાનો શુભારંભ કરવામાં આવ્યો હતો. દિયોદર સિવિલ કોર્ટ સંકુલમાં શુભારંભ કરાયેલ આ કેન્દ્રનું ઉદ્ઘાટન વાવ-થરાદ જિલ્લા તેમજ બનાસકાંઠા પ્રિન્સીપલ ડિસ્ટ્રિક્ટ એન્ડ સેશન્સ જજશ્રી દ્વારા કરવામાં આવ્યું હતું. આ પ્રસંગે દિયોદર કોર્ટના પ્રિન્સીપલ સિનિયર સિવિલ જજશ્રી, વકીલ મંડળના પ્રમુખ, સિનિયર વકીલો, સરકારી વકીલ તેમજ કોર્ટ સ્ટાફ મોટી સંખ્યામાં ઉપસ્થિત રહ્યા હતા. આરોગ્ય વિભાગની ટીમ હવે ન્યાય સંકુલમાં ખડેપગે રહી વકીલો, પક્ષકારો તેમજ કર્મચારીઓને ઈમરજન્સી સમયે તાત્કાલિક પ્રાથમિક સારવાર પૂરી પાડશે. ઘણીવાર કોર્ટ કાર્યવાહી દરમિયાન તબિયત લથડવાના બનાવો બનતા હોય છે, ત્યારે આ કેન્દ્ર ખૂબ ઉપયોગી નીવડશે તેવી અપેક્ષા છે. દિયોદર ન્યાય મંદિરમાં આરોગ્ય સુવિધા ઉપલબ્ધ થતા કોર્ટ સંકુલમાં ખુશીનો માહોલ જોવા મળ્યો હતો. આ સેવા શરૂ કરવા બદલ વકીલ મંડળ અને પક્ષકારોએ જિલ્લા ન્યાયતંત્ર અને આરોગ્ય વિભાગનો આભાર વ્યક્ત કર્યો હતો. ન્યાયની સાથે સ્વાસ્થ્યની પણ ચિંતા કરતી આ પહેલને સૌ કોઈએ આવકારી છે.

એક ભુવાજીએ રમેલ દરમિયાન ધૂણતા-ધૂણતા ભવિષ્યવાણી કરી હતી કે ૨૪ તારીખની સાંજે વરસાદ થશે. જોકે, તેમણે કયા વર્ષે — પછી ભલે તે ૨૦૨૬ હોય કે ૨૦૨૭ — વરસાદ થશે તે સ્પષ્ટ કર્યું ન હતું.

પાટણ જિલ્લાના સમી તાલુકામાં ગુરુવારે બપોર બાદ વાતાવરણમાં અચાનક પલટો જોવા મળ્યો હતો. ઘણા દિવસોથી અસહ્ય ગરમી અને ઉકળાટ વચ્ચે વરસાદની આતુરતાપૂર્વક રાહ જોવાઈ રહી હતી, ત્યારે મેઘરાજાએ ધમાકેદાર એન્ટ્રી કરતાં સમગ્ર પંથકમાં ખુશીનો માહોલ છવાઈ ગયો હતો. સમી, બાસ્પા, દાઉદપુર સહિતના અનેક ગામોમાં વરસાદી ઝાપટાં વરસતાં રસ્તાઓ અને ખેતરોમાં પાણી ફરી વળ્યા હતા. વરસાદના આગમનથી ખેડૂતોમાં નવી આશા જાગી છે, કારણ કે છેલ્લા કેટલાક દિવસોથી વરસાદ ખેંચાતા તેઓ ચિંતિત બન્યા હતા. હવે ચોમાસાની શરૂઆતમાં વરસાદ પડતાં ખેડૂતો ખેતી અને વાવણીની કામગીરીને વધુ વેગ આપી શકશે તેવી આશા વ્યક્ત કરી રહ્યા છે. ખેડૂતોના જણાવ્યા મુજબ, આગામી દિવસોમાં પણ સારો વરસાદ ચાલુ રહે તો ખરીફ પાકની વાવણી માટે અનુકૂળ પરિસ્થિતિ સર્જાશે અને ખેતીને મોટો લાભ મળશે. આ વરસાદના કારણે વાતાવરણમાં ઠંડક પ્રસરી ગઈ હતી અને ગરમીથી ત્રસ્ત લોકોને પણ રાહતનો અનુભવ થયો હતો. વરસાદની એન્ટ્રી સાથે સમી પંથકમાં ચોમાસું હવે સક્રિય બનવાના સંકેતો દેખાઈ રહ્યા છે. ગ્રામ્ય વિસ્તારોમાં વરસાદને લઈ લોકોમાં ઉત્સાહ જોવા મળ્યો હતો અને બાળકો તથા યુવાનો પણ વરસાદની મજા માણતા નજરે પડ્યા હતા. મેઘરાજાની આ પ્રથમ ધમાકેદાર એન્ટ્રીથી સમગ્ર સમી પંથકમાં આનંદ અને આશાનું વાતાવરણ છવાઈ ગયું છે.

Post by Pankaj Parmar

બનાસકાંઠા જિલ્લાના દિયોદર નજીક કોટડા હાઈવે પર એક કાર ચાલક પર જીવલેણ હુમલો થયો હોવાનો બનાવ સામે આવ્યો છે. ત્રણથી ચાર અજાણ્યા ઈસમો મોટરસાયકલ પર આવીને ધોકા અને લાકડીઓ વડે કાર પર હુમલો કર્યો હતો. હુમલાખોરોએ કારના કાચ તોડી નાખ્યા હતા અને યુવકની સોનાની ચેન તેમજ રોકડ રકમ લૂંટીને ફરાર થયા હોવાના આક્ષેપો કરવામાં આવ્યા છે. આ હુમલામાં કાર ચાલક ભુપેન્દ્ર પુરોહિત ઘાયલ થતાં તેમને તાત્કાલિક 108 એમ્બ્યુલન્સ દ્વારા દિયોદરની રેફરલ હોસ્પિટલમાં સારવાર અર્થે ખસેડવામાં આવ્યા હતા. પીડિત યુવક ભુપેન્દ્ર પુરોહિતે જણાવ્યું હતું કે હુમલાખોરોએ અંગત અદાવત રાખીને આ હુમલો કર્યો હતો. તેમણે પારસ પુરોહિત અને અન્ય ત્રણ ઈસમો સામે કાયદેસરની કાર્યવાહી કરવાની માંગ કરી છે. ઘટનાની જાણ થતાં જ 112 પર પોલીસને પણ જાણ કરવામાં આવી હતી.