విజయనగరం జిల్లా బొబ్బిలి మండలం కోమటిపల్లి జిల్లా పరిషత్తు పాఠశాలలో గణిత ఉపాధ్యాయుడిగా పనిచేస్తున్న దాసరి వెంకటనాయుడు ఆంధ్రప్రదేశ్ టీచర్ ఫెడరేషన్ (APTF) రాష్ట్ర కార్యవర్గ సభ్యునిగా రెండోసారి ఎన్నికయ్యారు. విజయవాడలో శుక్రవారం జరిగిన రాష్ట్ర స్థాయి APTF సమావేశంలో ఆయనను ఈ కీలక పదవికి ఎన్నుకున్నారు. ఈ సందర్భంగా పలువురు ప్రముఖులు, స్వచ్ఛంద సంస్థల ప్రతినిధులు, సహచర ఉపాధ్యాయులు, గ్రామ పెద్దలు మరియు యువత దాసరి వెంకటనాయుడును ఘనంగా అభినందించారు.

విజయనగరం జిల్లాలోని బొబ్బిలి, బాడంగి, సీతానగరం, ఎస్.కోట, జామి, భోగాపురం పోలీస్ స్టేషన్ల పరిధుల్లో జరిగిన పగటి దొంగతనాల కేసులను పోలీసులు ఛేదించారు. ఈ కేసుల్లో ముగ్గురు నిందితులు మరియు ఒక రిసీవర్‌ను అరెస్టు చేయగా, వారి నుంచి సుమారు 26 తులాల బంగారు ఆభరణాలను స్వాధీనం చేసుకున్నట్లు జిల్లా ఎస్పీ ఎ.ఆర్. దామోదర్ శనివారం జిల్లా పోలీసు కార్యాలయంలో నిర్వహించిన మీడియా సమావేశంలో వెల్లడించారు. రామభద్రపురం మండలం రొంపిల్లి గ్రామానికి చెందిన 22 ఏళ్ల పువ్వల మణికంఠను బొబ్బిలి పోలీసులు అదుపులోకి తీసుకుని విచారించగా పలు చోరీల వివరాలు బయటపడ్డాయి. ఫ్లిప్‌కార్ట్ డెలివరీ బాయ్‌గా పనిచేస్తున్న మణికంఠ గ్రామాల్లో తిరుగుతూ పరిస్థితులను గమనించి, ఇళ్లలో ఎవరూ లేని సమయాల్లో 2023 నుంచి పగటి దొంగతనాలకు పాల్పడ్డాడు. బొబ్బిలి మండలంలో నాలుగు, బాడంగి మండలంలో నాలుగు, సీతానగరం మండలంలో రెండు చోరీల కేసుల్లో అతని ప్రమేయం ఉన్నట్లు గుర్తించారు. దొంగిలించిన బంగారాన్ని సాలూరుకు చెందిన వ్యాపారి కానూరు బాలేశ్వరరావుకు విక్రయించాడు. ఈ కేసుల్లో ప్రధాన నిందితుడు మణికంఠ, రిసీవర్ బాలేశ్వరరావును అరెస్టు చేసి, వారి నుంచి సుమారు 20 తులాల బంగారం స్వాధీనం చేసుకున్నారు. అలాగే, ఎస్.కోట మండలం పోతనాపల్లి గ్రామంలో జరిగిన ఇంటి చోరీ కేసులో పోలీసులు వేగంగా స్పందించి, పెందుర్తి మండలం నరవ గ్రామానికి చెందిన 28 ఏళ్ల బండి అప్పారావును అరెస్టు చేసి, అతడి నుంచి సుమారు నాలుగు తులాల బంగారు ఆభరణాలు రికవరీ చేశారు. మరోవైపు, విజయనగరం నుంచి అనకాపల్లి వెళ్తున్న ఆర్టీసీ బస్సులో ఓ మహిళ బ్యాగులో చోరీకి గురైన రెండు తులాల బంగారు ఆభరణాల కేసులో కొత్తవలస 202 కాలనీకి చెందిన 30 ఏళ్ల రావుల పార్వతిని జామి పోలీసులు అరెస్టు చేసి, చోరీ సొత్తును స్వాధీనం చేసుకున్నారు. రికవరీ చేసిన బంగారు ఆభరణాలను కోర్టు అనుమతితో త్వరలోనే బాధితులకు అప్పగిస్తామని ఎస్పీ తెలిపారు. ఈ కేసుల ఛేదనలో విశేష కృషి చేసిన పోలీసు అధికారులు, సిబ్బందిని ఎస్పీ అభినందించి, ప్రోత్సాహక నగదు బహుమతులు అందజేశారు. ఈ సమావేశంలో ఇన్‌చార్జ్ డీఎస్పీ ఎన్. రాఘవులు, బొబ్బిలి డీఎస్పీ ఆర్. గోవిందరావు, బొబ్బిలి సీఐ కే. నారాయణరావు, ఎస్.కోట సీఐ వి. నారాయణమూర్తి, ఎస్‌బీ సీఐ ఎ.వి. లీలారావు, జామి ఎస్సై వీర జనార్ధన్ తదితరులు పాల్గొన్నారు.

విజయనగరం నగరాన్ని మరింత పరిశుభ్రంగా తీర్చిదిద్దే లక్ష్యంతో చేపట్టిన ‘ఆపరేషన్ క్లీన్ స్వీప్’ కార్యక్రమం ముమ్మరంగా కొనసాగుతోంది. ఈ కార్యక్రమం రెండో వారాన్ని జిల్లా కలెక్టర్ ఎస్. రాంసుందర్ రెడ్డి శనివారం ప్రారంభించారు. ఈ సందర్భంగా కలెక్టర్ కణపాక పరిధిలోని కాలువల శుభ్రత పనులను పరిశీలించి, స్వయంగా క్లీన్ స్వీప్ కార్యక్రమంలో పాల్గొని పనులను ప్రారంభించారు. నగర పరిశుభ్రతలో ప్రజల భాగస్వామ్యం అత్యంత ముఖ్యమని కలెక్టర్ ఈ సందర్భంగా పేర్కొన్నారు. పరిశుభ్రత అనేది కేవలం అధికారుల బాధ్యత మాత్రమే కాదని, ప్రతి పౌరుడు తన బాధ్యతగా భావించి సహకరించాలని ఆయన పిలుపునిచ్చారు. నగరాన్ని స్వచ్ఛంగా, ఆరోగ్యకరంగా ఉంచేందుకు అందరూ కలిసి పనిచేయాలని కలెక్టర్ కోరారు.

బొబ్బిలి పురపాలక సంఘ పరిధిలో రూ. 123.90 కోట్లతో చేపడుతున్న సమగ్ర మంచినీటి సరఫరా అభివృద్ధి పథకంలో భాగంగా, ఎమ్మెల్యే బేబీ నాయన నూతన రిజర్వాయర్‌కు భూమి పూజ చేశారు. పబ్లిక్ హెల్త్ ఇంజనీరింగ్ డిపార్ట్‌మెంట్ ఆధ్వర్యంలో జరుగుతున్న ఈ పనులు, 26వ వార్డులోని స్వామి వారి వీధిలో, వెంకటేశ్వర స్వామి ఆలయం వెనుక ఈ నూతన రిజర్వాయర్ నిర్మితం కానుంది.

ఆంధ్రప్రదేశ్ రైతు సంఘం పార్వతీపురం మన్యం జిల్లా కమిటీ పిలుపు మేరకు, జూన్ 8వ తేదీన జిల్లా కలెక్టర్ కార్యాలయం వద్ద ధర్నా నిర్వహించనున్నారు. పాలకొండలోని సీఐటీయూ కార్యాలయంలో జరిగిన విలేకరుల సమావేశంలో, ఆంధ్రప్రదేశ్ రైతు సంఘం జిల్లా ప్రధాన కార్యదర్శి బంటు దాసు మరియు అభ్యుదయ రైతు సంఘం సీనియర్ నాయకులు ఖండాపు ప్రసాదరావు మాట్లాడుతూ, 2026-27 బడ్జెట్‌లో పార్వతీపురం మన్యం జిల్లా సాగునీటి ప్రాజెక్టులకు రాష్ట్ర ప్రభుత్వం ఒక్క రూపాయి కూడా కేటాయించలేదని తీవ్రంగా మండిపడ్డారు. జిల్లాకు జరుగుతున్న అన్యాయంపై చంద్రబాబును నిలదీయకుండా, జిల్లా ఎమ్మెల్యేలు అధికారులపై నిందలు వేస్తున్నారని నాయకులు ఆరోపించారు. ఇది రైతు ప్రజల ప్రభుత్వం కాదని, కార్పొరేట్లకు వేల కోట్లు విలువ చేసే ప్రజల భూమిని దఖలు పరచడం, రాయితీలు ఇవ్వడమే చంద్రబాబు పని అని విమర్శించారు. వంద రోజుల్లో భూ సర్వే లోపాలను సరిచేస్తామని రైతులకు ఉత్తుత్తి కబుర్లు చెప్పి మోసం చేస్తున్నారని, ఇది వారి పాలకుల తీరని పేర్కొన్నారు. గత ఐదేళ్లు మరియు ప్రస్తుతం రెండేళ్లుగా అధికారంలో ఉన్న చంద్రబాబు నాయుడు తోటపల్లి పెద్దగడ్డ నిర్వాసితుల పునరావాసానికి రూపాయి కూడా కేటాయించలేదని, మోసం చేయడమే వారి వంతని, మోసపోవడం మన వంతు కారాదని స్పష్టం చేశారు. గత సంవత్సరంలో పాలకొండ ప్రాంత రైతులు ఆర్‌డీవో కార్యాలయం వద్ద నిర్వహించిన ఆందోళనలు, సభలు కలెక్టరు జోక్యం, ఇరిగేషన్ అధికారులతో జాయింట్ సమావేశాలకు మాత్రమే పరిమితమయ్యాయని, తోటపల్లి ఎడమ కాలువ మరమ్మతులు, లస్కర్ నియమించడం వంటి హామీలు నేటికీ పరిష్కారం కాలేదని నాయకులు గుర్తు చేశారు. తమ పంటలకు మద్దతు ధరలు పెంచాలని, జిల్లాకు నిధులు కేటాయించి సాగునీటి ప్రాజెక్టుల నిర్మాణం పూర్తి చేయాలని, ముఖ్యంగా తోటపల్లి ఎడమ కాలువ ఆధునీకరణ మరియు జంపర్ కోట నిర్మాణం పూర్తి చేయాలని వారు డిమాండ్ చేశారు. ఈ డిమాండ్ల సాధనకై జూన్ 8వ తేదీన జిల్లా కలెక్టరేట్ కార్యాలయం వద్ద జరిగే ధర్నాలో రైతులంతా ఐక్య పోరాటాలకు సిద్ధం కావాలని వారు విజ్ఞప్తి చేశారు.

శనివారం రంపచోడవరంలోని ఐటీడీఏ సమావేశ మందిరంలో పోలవరం ప్రాజెక్టు నిర్వాసితుల సమస్యల పరిష్కారం కోసం నిర్వహించిన ప్రత్యేక గ్రీవెన్స్ కార్యక్రమంలో అధికారుల సమయపాలన లేకపోవడంపై రాష్ట్ర ఎస్టీ కమిషన్ ఛైర్మన్ బొజ్జిరెడ్డి తీవ్ర అసంతృప్తి వ్యక్తం చేసి, సమావేశం నుంచి వాకౌట్ చేశారు. ఉదయం 11 గంటలకు ప్రారంభం కావాల్సిన ఈ సమావేశానికి మధ్యాహ్నం 12 గంటలైనా సంబంధిత అధికారులు హాజరు కాకపోవడంతో ఆయన ఆగ్రహం వ్యక్తం చేశారు. సమయపాలన పాటించని అధికారులు ప్రజా సమస్యలను ఎలా పరిష్కరిస్తారని ప్రశ్నించిన ఛైర్మన్, అధికారుల తీరుపై తీవ్ర ఆగ్రహంతో సమావేశ మందిరం నుంచి బయటకు వెళ్లిపోయారు. ఈ ఘటన అక్కడ ఉన్న నిర్వాసితులు, ప్రజాప్రతినిధుల మధ్య చర్చనీయాంశంగా మారింది.

రాష్ట్ర ఎస్టీ కమిషన్ చైర్మన్, క్యాబినెట్ హోదా కలిగిన గౌరవ శ్రీ సోళ్ల బొజ్జిరెడ్డి పోలవరం జిల్లా అధికారులతో నిర్వహించ తలపెట్టిన ఆర్&ఆర్, రెవెన్యూ శాఖల సమీక్షా సమావేశానికి అధికారులు సమయానికి హాజరుకాకపోవడం తీవ్ర వివాదానికి దారితీసింది. రంపచోడవరం ఐ. టి డి.ఎ అధికారులు ఆలస్యంగా వచ్చారు. వారం రోజుల ముందే చైర్మన్ పర్యటన, సమీక్షా సమావేశం షెడ్యూల్ జిల్లా యంత్రాంగానికి అధికారికంగా అందినప్పటికీ, సోమవారం ఉదయం 10:30 గంటలకు చైర్మన్ సోళ్ల బొజ్జిరెడ్డి తన కమిషన్ సభ్యులతో సమావేశ మందిరానికి చేరుకున్నారు. కానీ కీలక శాఖల అధికారులు మధ్యాహ్నం 12 గంటలు దాటినా హాజరుకాలేదు. దీంతో చైర్మన్ దాదాపు రెండు గంటల పాటు వేచి ఉండాల్సి వచ్చింది. ఈ ఘటనపై గిరిజన సంఘాలు తీవ్ర ఆగ్రహం వ్యక్తం చేస్తూ, ఇది గిరిజనుల పట్ల చిన్నచూపు కాదా అని ప్రశ్నించాయి. క్యాబినెట్ హోదా ఉన్న ఎస్టీ కమిషన్ చైర్మన్‌కే అధికారులు ఇంత నిర్లక్ష్యంగా వ్యవహరిస్తే, ఒక సాధారణ గిరిజనుడు 50 కి.మీ దూరం నుంచి తన సమస్య చెప్పుకోవడానికి వస్తే వారి పరిస్థితి ఏంటని గిరిజన నాయకులు ఆందోళన వ్యక్తం చేశారు. మరోవైపు, ఆర్&ఆర్ ప్యాకేజీ అమలు, పునరావాస కాలనీల్లో మౌలిక వసతులు, భూసేకరణ నష్టపరిహారంపై జరగాల్సిన సమీక్షలో అవినీతి, నిర్లక్ష్యం బయటపడుతుందనే భయంతోనే అధికారులు ఉద్దేశపూర్వకంగా సమావేశానికి డుమ్మా కొట్టారనే ఆరోపణలు కూడా వినిపిస్తున్నాయి. సమయపాలన పాటించని అధికారుల తీరుపై చైర్మన్ సోళ్ల బొజ్జిరెడ్డి తీవ్ర అసహనం వ్యక్తం చేశారు. రాజ్యాంగబద్ధ సంస్థకు ఇవ్వాల్సిన గౌరవం ఇదేనా అని ప్రశ్నించిన ఆయన, గిరిజనుల సమస్యలపై చర్చించే సమావేశానికే అధికారులు రాకపోతే, క్షేత్రస్థాయిలో పరిస్థితి ఎలా ఉంటుందో అర్థం చేసుకోవచ్చని వ్యాఖ్యానించారు. నిర్ణీత సమయానికి హాజరుకాని అధికారులపై క్రమశిక్షణ చర్యలు తీసుకోవాలని, ఆర్&ఆర్ అంశంపై ప్రత్యేక విచారణ జరపాలని ఎస్టీ కమిషన్‌ను గిరిజన సంఘాలు కోరుతున్నాయి. ఈ ఘటనపై ప్రభుత్వ ప్రధాన కార్యదర్శికి నివేదిక పంపనున్నట్లు కమిషన్ వర్గాలు తెలిపాయి. ఒక క్యాబినెట్ హోదా కలిగిన కమిషన్ చైర్మన్‌కే అధికారులు విలువ ఇవ్వకపోతే, సామాన్య గిరిజనుడి గోడు వినేదెవరు అనే ప్రశ్న ఇప్పుడు జిల్లా వ్యాప్తంగా చర్చనీయాంశంగా మారింది.

పోలవరం జిల్లాలోని అడ్డతీగల సర్కిల్ పరిధిలో గంజాయి నిర్మూలనకు, మహిళల భద్రతకు పోలీసులు అత్యంత ప్రాధాన్యత ఇస్తున్నారని సీఐ స్పష్టం చేశారు. ఈ దిశగా కఠిన చర్యలు తీసుకునేందుకు పోలీసులు సిద్ధంగా ఉన్నారని తెలిపారు. గంజాయి వినియోగాన్ని సమూలంగా అరికట్టేందుకు ప్రభుత్వం, పోలీసు శాఖ సంయుక్తంగా 'రాపిడ్ టెస్ట్' అనే కొత్త విధానాన్ని తీసుకొచ్చాయి. ప్రెగ్నెన్సీ టెస్ట్ మాదిరిగానే మూత్రం నమూనా ద్వారా పనిచేసే ఈ కిట్‌లో, కేవలం 'C' వద్ద ఎర్రటి గుర్తు వస్తే గత ఆరు నెలల వ్యవధిలో గంజాయి సేవించినట్లుగా (పాజిటివ్) నిర్ధారించి, వారిపై సెక్షన్ 27B కింద కేసు నమోదు చేస్తారు. 'C' మరియు 'T' గుర్తు వస్తే నెగిటివ్ అని అర్థం. కొత్తగా అలవాటు పడిన వారికి కౌన్సెలింగ్ ఇచ్చి నిరంతరం పోలీస్ పర్యవేక్షణలో ఉంచుతారు. అడ్డతీగల పోలీస్ స్టేషన్‌కు 25 కిట్లు కేటాయించగా, ఇప్పటికే నిర్వహించిన మూడు పరీక్షల్లోనూ నెగిటివ్ ఫలితాలు వచ్చినట్లు సీఐ తెలిపారు. రానున్న రోజుల్లో గంజాయి విక్రయ, వినియోగ ప్రాంతాల్లో ఈ తనిఖీలను మరింత ముమ్మరం చేయనున్నారు. వీటితో పాటుగా, మహిళలను వేధించడం, లైంగిక దాడులకు పాల్పడటం వంటి మహిళా సంబంధిత కేసులలో నిందితులపై ఎట్టి పరిస్థితుల్లోనూ ఉపేక్షించకుండా కఠిన చర్యలు తీసుకుంటామని సీఐ స్పష్టం చేశారు.

తెలంగాణలోని ఒక చిన్న పట్టణంలో, మసాలా దోసెలను ఎంతగానో ఇష్టపడే ఒక ప్రత్యేకమైన ఎద్దు ఉంది. ఈ ఎద్దు ప్రతిరోజూ ఉదయం ఒక నిర్దిష్ట సమయానికి ఒక దోసె బండి దగ్గరకు తన అల్పాహారం కోసం వస్తుంది. ఆ దోసె బండి యజమాని ఎద్దుకు మంచి స్నేహితుడు. అతను ప్రేమతో ఆ ఎద్దు కోసం కారం లేకుండా, ఆలుగడ్డ మసాలాతో ప్రత్యేకంగా రెండు దోసెలు తయారు చేస్తాడు. దోసెలు సిద్ధమయ్యే వరకు ఎంతో ఓర్పుగా ఎదురుచూసే ఆ ఎద్దుకు, యజమాని వాటిని ఫ్యాన్ కింద చల్లబరచి, తన స్నేహితుడైన ఎద్దుకు స్వయంగా తినిపిస్తాడు. ఈ అరుదైన, అందమైన అనుబంధం ఎన్నో సంవత్సరాలుగా నిరంతరం కొనసాగుతోంది.