“ইন্না লিল্লাহি ওৱা ইন্না ইলাইহি ৰাজিউন।” মৃত্যু এক চিৰন্তন সত্য আৰু ইয়াক কোনেও অস্বীকাৰ কৰিব বা জয় কৰিব নোৱাৰে। তথাপিও কিছুমান মৃত্যুৰ খবৰে অন্তৰত গভীৰ আঘাত সানে। এনে এক দুখবৰ যে চাকলা গাঁৱৰ শ্ৰদ্ধাৰ কুংফু শিক্ষক দেৱান তোফাজ্জ্ল হুছেইন ছাৰে আজি শেষ নিশ্বাস ত্যাগ কৰে। তেওঁৰ মৃত্যুত গভীৰভাৱে ব্যথিত হৈছে, লগতে তেওঁৰ চিৰশান্তি কামনা কৰা হৈছে। ছাৰে বৃহত্তৰ অঞ্চলৰ বহু ল’ৰা-ছোৱালীক কুংফুৰ প্ৰশিক্ষণ প্ৰদান কৰিছিল।

কলগাছিয়াৰ অগ্ৰনী স্বেচ্ছাসেৱী সংগঠন জ্যোতি ৰাভা নজৰুল সংঘই কলগাছিয়া পাব্লিক স্কুলৰ সহযোগত বিদ্যালয় চৌহদত কলাগুৰু বিষ্ণুপ্ৰসাদ ৰাভাৰ স্মৃতিত এক দিনজোৰা কাৰ্যসূচীৰে ৰাভা দিৱস উদযাপন কৰে। এই অনুষ্ঠানত গাম্ভীৰ্যপূৰ্ণ বক্তৃতানুষ্ঠান আৰু কবিতা আবৃত্তি আদি বিভিন্ন কাৰ্যসূচী অনুষ্ঠিত হয়। এই উদযাপন সভাত বিশিষ্ট নাট্যকাৰ ছায়েদ আলী, ইমান আলী আহমেদ, ওচমান গণি, বাহাদুৰ আলী আহমেদ, আব্দুল কৰিম, শ্বহিদুল ইছলাম, আৰু মোঃ নূৰুল আমিনকে ধৰি কেইবাজনো বিশিষ্ট ব্যক্তি উপস্থিত থাকে।

আজি পৱিত্ৰ ৰাভা দিৱস উপলক্ষে সমগ্ৰ ৰাজ্যজুৰি কলা-সংস্কৃতিৰ মহীৰূহ, বৰেণ্য অসমীয়া, গণশিল্পী তথা কলাগুৰু বিষ্ণুপ্ৰসাদ ৰাভাদেৱৰ মৃত্যু বাৰ্ষিকী শ্ৰদ্ধাৰে সোঁৱৰা হৈছে। ৰাজ্যৰ বিভিন্ন প্ৰান্তত ৰাইজে গীতে-মাতে বৰেণ্য অসমীয়াগৰাকীক স্মৰণ কৰে। বিদ্যালয়, মহাবিদ্যালয়ৰ পৰা আৰম্ভ কৰি বিভিন্ন দল-সংগঠনে কলাগুৰুৰ প্ৰতিচ্ছবিত বন্তি প্ৰজ্বলন আৰু মাল্যাৰ্পণ কৰাৰ লগতে তেখেতৰ অমৰ সৃষ্টিসমূহৰ চৰ্চাৰে শিল্পীগৰাকীলৈ গভীৰ শ্ৰদ্ধাঞ্জলি জ্ঞাপন কৰে। সমগ্ৰ ৰাজ্যৰ সমান্তৰালভাৱে বৃহত্তৰ বঙাইগাঁও প্ৰেছ ক্লাবতো অনুষ্টুপীয়াভাৱে ৰাভা দিৱস উদযাপন কৰা হয়। প্ৰেছ ক্লাবৰ বিষয়ববীয়াসকল আৰু সাংবাদিকসকলে একত্ৰিত হৈ শ্ৰদ্ধাৰ শিল্পীগৰাকীক গভীৰ শ্ৰদ্ধাঞ্জলি জ্ঞাপন কৰে। সাংবাদিকসকলে কলাগুৰুৰ কালজয়ী গীতৰ সুৰেৰে অনুষ্ঠানটি জীপাল কৰি তোলে। এই অনুষ্ঠানত সকলোৱে বিষ্ণুপ্ৰসাদ ৰাভাদেৱে অসমীয়া জাতীয় জীৱন, সমাজ আৰু সংস্কৃতিলৈ আগবঢ়াই যোৱা অনবদ্য অৱদানৰ কথা শ্ৰদ্ধাৰে সুঁৱৰে।

মেডিকেলত মুছলমান সম্প্ৰদায়ৰ ল’ৰা-ছোৱালীয়ে ৪০০ খন আসন লাভ কৰাক লৈ এক বিশেষ মন্তব্য পোৱা গৈছে। এই সন্দৰ্ভত উল্লেখ কৰা হৈছে যে হিন্দু সম্প্ৰদায়ৰ লোকৰ আধা সময় আন্দোলন কৰোঁতেই ব্যয় হয়। লগতে, বদৰুদ্দিন আজমলে যদি সংখ্যালঘুসকলৰ বাবে বছৰি ১০০ জনক চিকিৎসক হিচাপে গঢ়ি তুলিব পাৰে, তেন্তে আনসকলে কিয় সেই একেই কাম কৰিব নোৱাৰে বুলি প্ৰশ্ন উত্থাপন কৰা হৈছে। এই প্ৰসংগত মুখ্যমন্ত্ৰী হিমন্ত বিশ্ব শৰ্মাই স্পষ্ট কৰিছে যে বদৰুদ্দিন আজমলৰ শিক্ষানুষ্ঠানৰ ল’ৰা-ছোৱালীয়ে কোনো ধৰণৰ কটাত আসন লাভ কৰা নাই, বৰঞ্চ তেওঁলোকে সম্পূৰ্ণ প্ৰতিযোগিতা কৰিহে চিকিৎসকৰ আসন লাভ কৰিছে।

মন্দিয়া অঞ্চলত সংঘটিত মাৰিফা তামান্না নামৰ এগৰাকীৰ হত্যাকাণ্ডক লৈ তীব্ৰ প্ৰতিবাদ সাব্যস্ত হৈছে। এই চাঞ্চল্যকৰ ঘটনাক কেন্দ্ৰ কৰি স্থানীয় ৰাইজৰ মাজত ব্যাপক ক্ষোভৰ সৃষ্টি হৈছে আৰু দোষীক শীঘ্ৰে চিনাক্ত কৰি কঠোৰতকৈ কঠোৰ শাস্তি প্ৰদান কৰিবলৈ দাবী উত্থাপন কৰা হৈছে।

আজি চিৰাং জিলাৰ মাদলীপাৰা এল,পি,স্কুলত এক সম্প্ৰীতি ভোজনৰ আয়োজন কৰা হৈছিল। এই কাৰ্যসূচী দিনটোৰ বাবে অঞ্চলটোত এক উল্লেখযোগ্য অনুষ্ঠান হিচাপে পৰিগণিত হৈছে।

বৰপেটা জিলাৰ মন্দিয়া বিধানসভা সমষ্টিৰ অন্তৰ্গত ১ নং ৰছুলপুৰ গাঁৱৰ নৈপৰীয়া ৰাইজে বিশুদ্ধ খোৱাপানীৰ অভাৱত বেকী নৈৰ ঘোলা পানী সেৱন কৰি প্ৰাণ বচাবলগীয়া হৈছে। গাঁওখনত পানী যোগানৰ এটা আঁচনি আছে যদিও ৰাইজে এটুপি পানীও পোৱা নাই। পানীৰ পাইপসমূহ সংযোগ কৰাৰ পিছতেই বেকী নদীৰ খহনীয়াই উটুৱাই লৈ যোৱাৰ ফলত গাঁওবাসী বিশুদ্ধ খোৱাপানীৰ পৰা বঞ্চিত হৈছে। ফলস্বৰূপে, তেওঁলোকে নদীৰ এই লেতেৰা পানীৰে ৰন্ধা-বঢ়া, খোৱা-লোৱা, গা ধোৱা আদি সকলো দৈনন্দিন কাম কাজ সম্পন্ন কৰিবলৈ বাধ্য হৈছে। এই লেতেৰা পানী সেৱন কৰি ১ নং ৰছুলপুৰ গাঁৱৰ নৈপৰীয়া ৰাইজ বিভিন্ন বেমাৰত আক্ৰান্ত হৈছে। ভুক্তভোগী ৰাইজে অভিযোগ কৰিছে যে চৰকাৰৰ জল জীৱন আঁচনি ফুটুকাৰ ফেনত পৰিণত হৈছে। সেয়েহে, তেওঁলোকে চৰকাৰক শীঘ্ৰে খোৱাপানীৰ সু-ব্যৱস্থা কৰিবলৈ দাবী জনাইছে আৰু এই ক্ষেত্ৰত চৰকাৰৰ সুদৃষ্টি কামনা কৰিছে।

বঙাইগাঁও জিলাৰ ১৭ নং সৃজনগ্ৰাম সমষ্টিৰ অন্তৰ্গত শৌলমাৰী গাঁৱৰ মাজেৰে পাৰ হৈ যোৱা পোকালাগী নৈৰ ওপৰত থকা এখন জৰাজীৰ্ণ বাঁহৰ দলঙৰ বাবে প্ৰতিদিনে শ শ পথচাৰীৰ লগতে কেইবাখনো বিদ্যালয়-মহাবিদ্যালয়ৰ ছাত্ৰ-ছাত্ৰীয়ে বিপদসংকুলভাৱে যাতায়ত কৰিবলৈ বাধ্য হৈছে। ইয়াৰ ফলত তেওঁলোকে যমৰ যাতনা ভূগি আহিছে। স্থানীয় ৰাইজে অভিযোগ কৰিছে যে প্ৰতি বছৰে কোনো জনপ্ৰতিনিধিৰ সহায় নোলোৱাকৈ তেওঁলোকে প্ৰায় ১ লাখৰ পৰা ১ লাখ ২০ হাজাৰ টকা খৰচ কৰি এই দলংখন নিৰ্মাণ কৰি আহিছে। নিৰ্বাচনৰ সময়ত প্ৰতিজন প্ৰতিনিধিয়ে সমস্যা সমাধানৰ প্ৰতিশ্ৰুতি দিছিল যদিও নিৰ্বাচনত জয়ী হোৱাৰ পিছত গাওঁখনৰ এই গুৰুত্বপূৰ্ণ সমস্যাটো সমাধান কৰাৰ ক্ষেত্ৰত কোনো পদক্ষেপ লোৱা নাই। বাৰিষাৰ সময়ত নৈখনৰ কোবাল সোঁতে দলংখন উটুৱাই নিয়ে, যাৰ ফলত দুয়োপাৰৰ ৰাইজৰ যাতায়ত সম্পূৰ্ণৰূপে বন্ধ হৈ পৰে আৰু ছাত্ৰ-ছাত্ৰীসকলে বিদ্যালয়-মহাবিদ্যালয়লৈ যাব নোৱাৰে। এই দলংখনে ৯০১নং শৌলমাৰী প্ৰাথমিক বিদ্যালয়, বাৰোঘড়ী শৌলমাৰী এম ই স্কুল, দক্ষিণ নাম্বাৰপাৰা হাই স্কুল, চাকলা উচ্চতৰ মাধ্যমিক বিদ্যালয়, নৱজ্যোতি মহাবিদ্যালয়, চি কে মহাবিদ্যালয়কে আদি কৰি কেইবাখনো শিক্ষানুষ্ঠানৰ ছাত্ৰ-ছাত্ৰীক পোনপটীয়াকৈ প্ৰভাৱিত কৰিছে। দলংখনৰ এটা পাৰত চৰকাৰৰ স্বীকৃতিপ্ৰাপ্ত এখন সাপ্তাহিক বজাৰ থকা স্বত্বেও, ইয়াৰ জৰাজীৰ্ণ অৱস্থাৰ বাবে পূৰ্বতে দূৰ-দূৰণিৰ পৰা অহা ব্যৱসায়ীসকলে এতিয়া আৰু আহিব নোৱাৰে বুলি স্থানীয় ৰাইজে জনাইছে। এই সমস্যাৰ স্থায়ী সমাধানৰ বাবে অঞ্চলবাসীয়ে নৱনিৰ্বাচিত ১৭ নং সৃজনগ্ৰাম সমষ্টিৰ বিধায়ক নুৰুল ইছলাম আৰু অভিলেখ সংখ্যক ভোটত সাংসদ হিচাপে নিৰ্বাচিত হোৱা ৰকিবুল হুছেইনৰ সু-দৃষ্টি কামনা কৰিছে, কিয়নো বৰ্তমান জনপ্ৰতিনিধি আৰু প্ৰশাসন দুয়ো নিমাত হৈ থকা দেখা গৈছে।