यवतमाळ जिल्ह्यातील पुसदमध्ये नाईक कुटुंबाने २० ते २५ कोटी रुपयांच्या सार्वजनिक जागेवर अतिक्रमण केल्याचा आरोप आहे. यातील ४-५ कोटींची जागा बेकायदेशीरपणे विकल्याची तक्रार काँग्रेस गटनेते डॉ. मोहम्मद नदीम यांनी पोलिसांत केली आहे. जिल्हाधिकाऱ्यांनी या प्रकरणाची चौकशी सुरू केली असून, अतिक्रमित जागा नगर परिषदेने ताब्यात घेण्याची मागणी होत आहे.

औरंगाबादच्या वाळूज पोलीस स्टेशनजवळ भीषण अपघात झाला, ज्यात एक महिला गंभीर जखमी झाली. अपघातानंतर काही काळ वाहतूक विस्कळीत झाली होती. स्थानिक नागरिक आणि पोलिसांनी तातडीने मदत केली.

जय लक्ष्मी कंपनीने सिल्लोडच्या राजनगाव येथील म्हारोळा रोडवरील महार हडूळे अवैधपणे खोदून मुरुमाची वाहतूक सुरू केली आहे. हा प्रकार दिवसाढवळ्या सुरू असल्याने स्थानिक नागरिकांमध्ये संताप व्यक्त होत आहे.

छत्रपती संभाजीनगर जिल्ह्यातील सिल्लोड तालुक्यात विहिरीची मोटर दुरुस्त करताना वडील आणि त्यांच्या दोन मुलांचा दुर्दैवी मृत्यू झाला. धानोरा येथे घडलेल्या या हृदयद्रावक घटनेने संपूर्ण महाराष्ट्रात हळहळ व्यक्त होत आहे.

जळगाव जिल्ह्यातील चोपडा तालुक्यात विष्णूपुरकडे जाणाऱ्या रस्त्याचे काम अद्यापही पूर्ण झालेले नाही. यामुळे स्थानिक नागरिकांना ये-जा करताना प्रचंड गैरसोयीचा सामना करावा लागत असून, कामाची तातडीने पूर्तता करण्याची मागणी होत आहे.

"हातात मोबाईल नाही म्हणत फक्त श्रींचे नाव जिथे शांततेत ऐकू येते फक्त गण गण गणात बोते."...... त्या पवित्र शेगाव नगरीत आता भक्तीला मिळणार अधिक शांततेचा स्पर्श… श्री गजानन महाराज संस्थानने मंदिर परिसरात मोबाईल वापरण्यावर सक्त बंदी लागू केली आहे. मंदिराचे पावित्र्य अबाधित राहावे, भाविकांना श्रींचे सहज आणि सुरक्षित दर्शन मिळावे, तसेच गर्दीचे व्यवस्थापन अधिक प्रभावी व्हावे यासाठी हा महत्त्वपूर्ण निर्णय घेण्यात आला आहे. संस्थानच्या सूचनेनुसार, मंदिरात प्रवेश करतानाच मुख्य प्रवेशद्वारावर भाविकांनी आपला मोबाईल बंद करणे आवश्यक राहणार आहे. मंदिर परिसरात मोबाईल वापरताना कोणी आढळल्यास संबंधित मोबाईल जमा करण्यात येईल, असेही स्पष्ट करण्यात आले आहे. दररोज हजारो भक्त श्रींच्या दर्शनासाठी शेगावमध्ये येतात… कोणी डोळ्यात श्रद्धा घेऊन… कोणी मनात नवस घेऊन… तर कोणी फक्त श्रींच्या चरणी दोन क्षण शांत बसण्यासाठी… अशावेळी मोबाईलच्या रिंगटोन, फोटो-व्हिडिओची गर्दी आणि गोंधळामुळे दर्शनाचा भाव खंडित होऊ नये, यासाठी संस्थान प्रशासनाने हे कठोर पण महत्त्वाचे पाऊल उचलले आहे. 🙏 “श्रींचा अनुभव कॅमेऱ्यात नाही… तो भक्तांच्या मनात जपला जातो…” भाविकांनी नियमांचे पालन करून संस्थानला सहकार्य करावे, असे आवाहन व्यवस्थापकीय विश्वस्तांकडून करण्यात आले आहे.

बुलडाणा जिल्ह्यातील धरणगावाजवळ राष्ट्रीय महामार्ग ५३ वर धावत्या ट्रकला अचानक भीषण आग लागली. या घटनेमुळे परिसरात खळबळ उडाली असली तरी, सुदैवाने कोणतीही जीवितहानी टळली.

जळगाव जिल्ह्यातील अमळनेर तालुक्यातील चौबारी गावाच्या विकासाकडे प्रशासनाने पूर्णपणे दुर्लक्ष केले आहे. पंचायत समितीच्या अनास्थेमुळे गावातील अनेक मूलभूत सोयीसुविधांची कामे रखडली असून नागरिकांना समस्यांना सामोरे जावे लागत आहे.

छत्रपती संभाजीनगर पोलिसांनी सुट्ट्यांमध्ये गावी जाणाऱ्या नागरिकांसाठी विशेष आवाहन केले आहे. घरे रिकामी सोडून जाताना चोरी आणि घरफोडीच्या घटना टाळण्यासाठी आवश्यक खबरदारी घेण्याचे निर्देश दिले आहेत. प्रवासाला निघण्यापूर्वी नागरिकांनी पोलिसांशी संपर्क साधून माहिती देण्याचे आवाहन करण्यात आले आहे.