मुंबई-आग्रा महामार्गावरील लळींग घाटात पहाटेच्या सुमारास झालेल्या भीषण अपघातात पाच जणांचा मृत्यू झाला आहे. या मृतांमध्ये एका टोल कर्मचाऱ्याचाही समावेश आहे. या घटनेनंतर संतप्त टोल कर्मचाऱ्यांनी आक्रमक भूमिका घेत तात्काळ रस्ता रोको आंदोलन सुरू केले आहे. कर्मचाऱ्यांच्या मते, त्यांना कोणतीही सुरक्षितता पुरवली जात नाही, तसेच अपघातानंतर तातडीने क्रेनची मोठ्या प्रमाणावर गरज असताना ती देखील उपलब्ध करून दिली जात नाही. जोपर्यंत राष्ट्रीय महामार्गाचे संबंधित अधिकारी घटनास्थळी येत नाहीत, तोपर्यंत आंदोलन मागे न घेण्याचा पवित्रा टोल कर्मचाऱ्यांनी घेतला आहे. दरम्यान, पोलीस अधीक्षक विशाल आनंदसिंगुरी हे देखील टोल नाक्यावर दाखल झाले असून, त्यांच्या वतीने कर्मचाऱ्यांना आंदोलन मागे घेण्याचे आवाहन करण्यात येत आहे.

धुळे शहरातील अवधान उपनगरातील निंबा नगर येथील आदिवासी वस्तीत अनैतिक संबंधांच्या वादातून किशोर डापटे नावाच्या तरुणाची धारदार शस्त्राने निर्घृण हत्या करण्यात आली आहे. आज ही धक्कादायक घटना उघडकीस आल्याने संपूर्ण परिसरात मोठी खळबळ उडाली आहे. प्राथमिक माहितीनुसार, अनैतिक संबंधांच्या वादामधून अज्ञातांनी किशोर डापटे याच्यावर धारदार शस्त्राने सपासप वार केले, ज्यात त्याचा जागीच मृत्यू झाला. रक्ताच्या थारोळ्यात पडलेला मृतदेह आढळल्यानंतर नागरिकांनी तात्काळ पोलिसांना माहिती दिली. घटनेची माहिती मिळताच मोहाडी पोलिसांनी घटनास्थळी धाव घेत पंचनामा केला आणि मृतदेह शवविच्छेदनासाठी पाठवला. या भीषण हत्येमागील नेमके धागेदोरे शोधून मारेकऱ्यांच्या मुसक्या आवळण्याचे आव्हान आता पोलिसांसमोर आहे. मोहाडी पोलीस ठाण्याच्या पोलीस निरीक्षक शिल्पा पाटील यांच्या मार्गदर्शनाखाली या संपूर्ण प्रकरणाचा पुढील सविस्तर तपास वेगाने सुरू आहे.

आज, मंगळवार, २६ मे २०२६ रोजी महाराष्ट्राचे माजी मुख्यमंत्री आणि माजी केंद्रीय मंत्री लोकनेते आदरणीय विलासरावजी देशमुख साहेब यांच्या ८१ व्या जयंतीनिमित्त बाभळगाव येथील विलासबाग येथे सार्वजनिक आदरांजली कार्यक्रमाचे आयोजन करण्यात आले होते. देशमुख कुटुंबाच्या वतीने आयोजित या कार्यक्रमात विलासरावजी देशमुख साहेब यांच्या पवित्र स्मृतींना विनम्र अभिवादन करण्यात आले आणि त्यांना उजाळा देण्यात आला. या प्रसंगी सुप्रसिद्ध शास्त्रीय संगीत गायक हेमंत पेंडसे यांच्या भाव स्वरांजली कार्यक्रमाचेही आयोजन करण्यात आले होते. लोकनेते आदरणीय विलासराव देशमुख साहेब हे महाराष्ट्राच्या राजकारणातील एक अत्यंत लोकप्रिय, सुसंस्कृत आणि प्रसन्न व्यक्तिमत्त्व म्हणून ओळखले जात होते. त्यांचा राजकीय प्रवास बाभळगावचे सरपंच, जिल्हा परिषद सदस्य ते राज्याचे दोनदा मुख्यमंत्री आणि केंद्रीय मंत्री असा संघर्षमय व यशस्वी राहिला आहे. आपल्या अमोघ वक्तृत्वाने आणि हजरजवाबीपणाने त्यांनी जनतेच्या मनावर अधिराज्य गाजवले. त्यांचे कार्य केवळ राजकारणापुरते मर्यादित नव्हते, तर उद्योग, सहकार, क्रीडा, साहित्य, संगीत आणि कला अशा विविध क्षेत्रांतही त्यांचा सहज वावर होता. ग्रामीण महाराष्ट्राच्या विकासाचे मोठे श्रेय त्यांना दिले जाते. विशेषतः लातूरच्या विकासाचा ध्यास घेतलेल्या विलासरावजी देशमुख साहेब यांनी मांजरा नदीवर बॅरेजेसची साखळी निर्माण करून शेतकऱ्यांना बारमाही पाणी मिळवून दिले. आपल्या दिलदार आणि संवेदनशील स्वभावाने विरोधकांनाही आपलेसे करणारे आदरणीय विलासरावजी देशमुख साहेब आजही खऱ्या अर्थाने सर्वसामान्यांचे नेते आणि युवकांचे प्रेरणास्थान म्हणून ओळखले जातात.

लातूर जिल्ह्यातील उदगीर शहरातील देगलूर रोडवरील सोनवणे पेट्रोल पंपावर पेट्रोल आणि डिझेल भरण्यासाठी वाहनधारकांनी मोठी गर्दी केली आहे. दुचाकी, चारचाकी तसेच मालवाहू वाहनांच्या लांबच लांब रांगा लागल्याने मुख्य रस्त्यावर वाहतूक कोंडीची परिस्थिती निर्माण झाली आहे. राज्यातील काही भागांत इंधन पुरवठ्याबाबत चर्चा आणि अफवा पसरल्यामुळे नागरिकांनी खबरदारी म्हणून वाहनांच्या टाक्या पूर्ण भरण्यावर भर दिला आहे. यामुळे अनेक शहरांप्रमाणेच उदगीरमध्येही पेट्रोल पंपांवर मोठी गर्दी पाहायला मिळत आहे. पेट्रोल पंपावर वाहनांच्या रांगा मुख्य रस्त्यापर्यंत पोहोचल्याने नागरिकांना वाहतूक समस्येलाही सामोरे जावे लागत आहे. इंधन संपण्याच्या भीतीने अनेक वाहनचालकांनी आगाऊ इंधन भरून घेतल्याचे सूत्रांनी सांगितले. दरम्यान, संबंधित पेट्रोल पंप व्यवस्थापनाने इंधनाचा पुरेसा साठा उपलब्ध असल्याचे स्पष्ट केले असून, नागरिकांनी अशा अफवांवर विश्वास ठेवू नये असे आवाहन केले आहे. राज्यातील इतर भागांतही अशाच अफवांमुळे पेट्रोल पंपांवर गर्दी वाढल्याच्या घटना समोर आल्या आहेत.

मान्सूनपूर्व शेती मशागतीची कामे वेगात सुरू असताना, डिझेल मिळत नसल्याने संतप्त झालेल्या शेतकऱ्यांनी मुखेड-लातूर महामार्गावर काही काळ रास्ता रोको आंदोलन केले. या अचानक झालेल्या आंदोलनामुळे महामार्गावरील वाहतूक काही काळ विस्कळीत झाली होती. सध्या पावसाळ्यापूर्वी शेतकरी मशागतीची कामे, पेरणीपूर्व तयारी आणि इतर शेती कामांमध्ये व्यस्त आहेत. ट्रॅक्टर, पंपसेट आणि शेती अवजारे चालवण्यासाठी मोठ्या प्रमाणात डिझेलची आवश्यकता असते. मात्र, डिझेलचा पुरवठा सुरळीत होत नसल्याने शेतकऱ्यांना पेट्रोलपंपावर तासनतास रांगा लावाव्या लागत आहेत. यामुळे शेतीच्या कामासाठी महत्त्वाचा वेळ वाया जात असून मशागतीची कामे खोळंबत असल्याची नाराजी शेतकऱ्यांनी व्यक्त केली आहे.

परभणी जिल्ह्यातील पाथरी तालुक्यात २३ मे २०२६ रोजी झालेल्या अवकाळी पावसामुळे शेतकऱ्यांचे मोठे नुकसान झाले आहे.

राज्यात खळबळ उडवून देणाऱ्या दहा वर्षीय चिमुकलीच्या हत्या प्रकरणात पोलिसांनी आरोपीला अटक केल्यानंतर एका नव्या वादाला तोंड फुटले आहे. या गंभीर आणि संवेदनशील प्रकरणात, पत्रकार परिषदेदरम्यान काही अधिकारी हसत-खिदळत बोलताना दिसल्याचा व्हिडिओ मोठ्या प्रमाणात सोशल मीडियावर व्हायरल झाला असून त्यामुळे नागरिकांमध्ये तीव्र संताप व्यक्त होत आहे. या प्रकरणामुळे आधीच जनतेत संतापाची लाट असताना, पोलिस अधिकाऱ्यांचे कथित हलकेफुलके वर्तन पाहून अनेकांनी प्रशासनावर प्रश्नचिन्ह उपस्थित केले आहे. सोशल मीडियावरून 'एका निष्पाप मुलीचा जीव गेला आणि अधिकारी मात्र हसत आहेत का?' असा सवाल विचारला जात आहे. व्हायरल व्हिडिओमध्ये अधिकारी पत्रकार परिषद सुरू असताना परस्परांशी हसत बोलताना दिसत असल्याचा दावा केला जात आहे. हा व्हिडिओ समोर आल्यानंतर फेसबुक, इंस्टाग्राम आणि एक्स (ट्विटर) वर नागरिकांनी तीव्र प्रतिक्रिया दिल्या आहेत. या घटनेची चौकशी करून संबंधितांवर कारवाई करण्याची मागणी अनेक सामाजिक संघटना व बालहक्क कार्यकर्त्यांनी केली आहे. दरम्यान, पोलिस विभागाकडून या व्हिडिओबाबत अद्याप अधिकृत स्पष्टीकरण आलेले नसले तरी, प्रकरणाची गंभीरता लक्षात घेता वरिष्ठ स्तरावरून माहिती घेतली जात असल्याची चर्चा आहे. दहा वर्षीय मुलीच्या निर्घृण हत्येने समाजमन आधीच हेलावले असताना, आता या व्हायरल व्हिडिओमुळे नागरिकांचा रोष आणखी वाढला असून संवेदनशील प्रकरणांमध्ये जबाबदारीने वागण्याची गरज पुन्हा अधोरेखित झाली आहे.

पंचायत समिती सदस्य सौ शांताबाई माने यांनी पिक विमा मिळण्याच्या मागणीसाठी लाक्षणिक उपोषण सुरू केले आहे. या उपोषणादरम्यान, शिवसेना जिल्हाप्रमुख विष्णू मुरकुटे यांनी सौ शांताबाई माने यांची भेट घेऊन त्यांची बाजू समजून घेतली. यावेळी जिल्हाप्रमुख विष्णू मुरकुटे यांनी ठाकरे सेना शेतकऱ्यांच्या सदैव पाठीशी उभी असल्याचे स्पष्ट केले.

मुंबई-आग्रा महामार्गावरील लळींग घाटात पहाटेच्या सुमारास झालेल्या भीषण अपघातात पाच जणांचा मृत्यू झाला आहे. या मृतांमध्ये एका टोल कर्मचाऱ्याचाही समावेश आहे. या घटनेनंतर संतप्त टोल कर्मचाऱ्यांनी आक्रमक भूमिका घेत तात्काळ रस्ता रोको आंदोलन सुरू केले आहे. कर्मचाऱ्यांच्या मते, त्यांना कोणतीही सुरक्षितता पुरवली जात नाही, तसेच अपघातानंतर तातडीने क्रेनची मोठ्या प्रमाणावर गरज असताना ती देखील उपलब्ध करून दिली जात नाही. जोपर्यंत राष्ट्रीय महामार्गाचे संबंधित अधिकारी घटनास्थळी येत नाहीत, तोपर्यंत आंदोलन मागे न घेण्याचा पवित्रा टोल कर्मचाऱ्यांनी घेतला आहे. दरम्यान, पोलीस अधीक्षक विशाल आनंदसिंगुरी हे देखील टोल नाक्यावर दाखल झाले असून, त्यांच्या वतीने कर्मचाऱ्यांना आंदोलन मागे घेण्याचे आवाहन करण्यात येत आहे.