జగిత్యాల జిల్లా బతికేపల్లి గణేష్ మండపంలో విషాదం... కరెంట్ షాక్ తో యువకుడు మృతి, మరో యువకునికి గాయాలు గణేష్ ఉత్సవాలు జగిత్యాల జిల్లా పెగడపల్లి మండలం బతికెపల్లి గ్రామంలో విషాదం నింపింది. గణేష్ మండపం వద్ద విద్యుత్ షాక్ తో యువకుడు మధు మృతి చెందారు. అతన్ని కాపాడేందుకు యత్నించిన యువకుడు అఖిల్ తీవ్రగాయాలయ్యాయి. గాయపడ్డ అఖిల్ జగిత్యాల ఆస్పత్రిలో చికిత్స పొందుతున్నారు. గత రాత్రి గణేష్ మండపంలో దీపారాధన సందర్భంగా భక్తులు ఎక్కువ సంఖ్యలో రావడంతో మండపంలో ఉన్న బాక్సులను బయట పెట్టేందుకు ప్రయత్నిస్తుండగా బాక్స్ కు కరెంట్ వైరు తాకి డిగ్రీ విద్యార్థి మధు షాక్ గురై పడిపోగా అతన్ని కాపాడేందుకు యత్నించిన అఖిల్ గాయపడ్డారు. ఇద్దరినీ ఆసుపత్రికి తరలిస్తుండగా మార్గమధ్యలోనే మధు ప్రాణాలు కోల్పోయాడని స్థానికులు తెలిపారు. గణేష్ వేడుకల్లో యువకుడు మధు కరెంట్ షాక్ కు గురై ప్రాణాలు కోల్పోవడం స్థానికంగా కలకలం సృష్టించింది. గణేష్ మండపాల వద్ద భక్తులు తగు జాగ్రత్తలు తీసుకోవాలని అధికారులు సూచిస్తున్నారు.

ఈనెల 30న సిరిసిల్లలో సీఎం రేవంత్ రెడ్డి పర్యటన... కేటిఆర్ ఇలాక లో ప్రజాపాలనకు దీవెన పేరుతో బహిరంగ సభ... ఏర్పాటను పరిశీలించిన ప్రభుత్వ విప్ ఆది శ్రీనివాస్ ఉమ్మడి కరీంనగర్ జిల్లాలో సీఎం రేవంత్ రెడ్డి పర్యటన ఖరారయ్యింది. ఈ నెల 30న కరీంనగర్, సిరిసిల్లలో పర్యటిస్తారని అధికారులు ఏర్పాట్లలో నిమగ్నమయ్యారు. కాంగ్రెస్ వెయ్యి రోజుల ప్రజా పాలన పూర్తైన సందర్భంగా ప్రజాధీవేన పేరుతో కేటీఆర్ ఇలాక సిరిసిల్లలో బహిరంగ సభ నిర్వహించాలని ప్రభుత్వం నిర్ణయించింది. ఈ మేరకు ప్రభుత్వ విప్ ఆది శ్రీనివాస్ సిరిసిల్ల కలెక్టర్ గరిమా అగ్రవాల్, ఎస్పీ మహేష్ బి గీతే తో కలిసి సభ స్థలాన్ని పరిశీలించారు. ఇందిరమ్మ రాజ్యం ప్రజాపాలనకు దీవెనలు ఇవ్వడానికి సుమారు లక్ష మందితో బహిరంగసభ నిర్వహిస్తున్నట్లు ఆది శ్రీనివాస్ తెలిపారు. ఓవైపు అభివృద్ధి మరోవైపు సంక్షేమం రెండు కళ్ళులా రేవంత్ రెడ్డి సర్కార్ అందించిన సేవలను సభ ద్వారా ప్రజానీకానికి తెలిపే కార్యక్రమం చేపడుతున్నట్లు ప్రకటించారు. సిరిసిల్ల నేతన్నల, వేములవాడ దేవాలయ అభివృద్ధి, రైతుల రుణమాఫీ, ఇందిరమ్మ ఇండ్లు మరియు వేయి రోజులలో అనేక అభివృద్ధి కార్యక్రమాలు చేపట్టిందని, రాజన్న సిరిసిల్లకు వెయ్యి రోజులలో 1000 కోట్ల నిధులు ఇవ్వడం జరిగిందన్నారు. గత ప్రభుత్వం 8 లక్షల కోట్లు వారసత్వంగా అప్పు ఇచ్చి వెళ్లినా అనేక పథకాలను ముఖ్యమంత్రి అందిస్తున్నారని తెలిపారు. ముఖ్యమంత్రి చేపడుతున్న అభివృద్ధికి వారి సభకు ప్రజలు ఆశీర్వాదం ఇచ్చి అండగా నిలబడాలని కోరారు. 30న సిరిసిల్లతో పాటు కరీంనగర్లో పర్యటించి కలెక్టరేట్ నూతన భవనాన్ని ప్రారంభించనున్నట్లు అధికారులు భావిస్తున్నారు.

భారీ పెట్టుబడి మోసం కేసును పోలీసులు ఛేదించిన కరీంనగర్ పోలీసులు కరీంనగర్‌లో భారీ పెట్టుబడి మోసం కేసును పోలీసులు ఛేదించారు. **Shreya Infra and Marketing Private Limited** పేరుతో పెట్టుబడి పథకాలు నిర్వహిస్తూ, తక్కువ కాలంలో పెట్టుబడులను రెండింతలు, మూడింతలు చేస్తామని నమ్మించి కోట్లాది రూపాయలు సేకరించినట్లు పోలీసులు తెలిపారు. ఈ కేసులో ప్రధాన నిందితుడు హేమంత్ కుమార్ రాయ్‌తో పాటు రాజేష్ కుమార్, బ్రిజేష్ కుమార్ మిశ్రాలను లక్నోలో అరెస్ట్ చేశారు. 2024 మే నుంచి పెట్టుబడిదారులకు చెల్లింపులు నిలిపివేసినట్లు విచారణలో వెల్లడైంది. CCS ఇన్‌స్పెక్టర్ ఆర్. ప్రకాశ్ గౌడ్ ఆధ్వర్యంలో ప్రత్యేక బృందం నిందితులను అదుపులోకి తీసుకుని, ట్రాన్సిట్ వారెంట్‌పై కరీంనగర్‌కు తరలించింది. బాధితులు సమీప పోలీస్ స్టేషన్ లేదా CCS కరీంనగర్‌ను సంప్రదించాలని పోలీసులు కోరారు.

వేములవాడలో గణేష్ నిమజ్జనోత్సవానికి భద్రతా ఏర్పాట్లు పూర్తి.* *200 మంది పోలీసు అధికారులు,సిబ్బందితో పటిష్ట భద్రత.* *ఎలాంటి అవాంఛనీయ సంఘటనలు తలెత్తినా వెంటనే పోలీస్ వారికి సమాచారం అందించాలి.* *ప్రధాన కూడళ్లలో ట్రాఫిక్ జామ్ కాకుండా పికెట్స్ ,పుష్షింగ్ పార్టీ లు ఏర్పాటు.* *నిర్ణిత సమయానికి నిమర్జనం పూర్తి చేసి గణేష్ మండపాల నిర్వాహకులు పోలీస్ వారికి సహకరించాలి.* *శోభాయాత్రలో డి.జే లకు అనుమతి లేదు,నిబంధనలకు విరుద్ధంగా డి.జే నిర్వహిస్తే చర్యలు తప్పవు.* *వేములవాడ పట్టణంలో వినాయక విగ్రహాల నిమజ్జనం కోసం ఆలయ గుడి చెరువు వద్ద ఏర్పాట్లను మంగళవారం రోజున క్షేత్రస్థాయిలో పరిశీలించిన జిల్లా ఎస్పీ.* వేములవాడ పట్టణ పరిధిలో సుమారు 320 గణేష్ మండపాల్లో గణనాథులు కొలువుదీరగా, బుధవారం నిర్వహించనున్న గణేష్ నిమజ్జనం, శోభాయాత్రను “జీరో యాక్సిడెంట్ – జీరో ఇన్సిడెంట్” లక్ష్యంతో ప్రశాంతంగా, సురక్షితంగా నిర్వహించేందుకు పటిష్ట భద్రతా ఏర్పాట్లు చేపట్టినట్లు జిల్లా ఎస్పీ మహేష్ బి. గితే తెలిపారు. నిమజ్జనం సందర్భంగా 200 మంది పోలీస్ అధికారులు, సిబ్బందితో బందోబస్తు, ట్రాఫిక్ నియంత్రణ, రూట్ డైవర్షన్లు తదితర భద్రతా చర్యలు చేపట్టినట్లు తెలిపారు. ప్రధాన కూడళ్లలో ట్రాఫిక్‌కు అంతరాయం కలగకుండా పికెట్లు, పుషింగ్ పార్టీలను ఏర్పాటు చేసి, నిరంతరం పర్యవేక్షణ చేపడుతున్నట్లు ఎస్పీ పేర్కొన్నారు. మండపాల నిర్వాహకులు నిర్దేశించిన సమయానికి శాంతియుత వాతావరణంలో నిమార్జనం పూర్తి అయ్యేలా, ట్రాఫిక్‌కు అంతరాయం కలగకుండా పోలీసుల సూచనలకు అనుగుణంగా ప్రణాళిక చేసుకోవాలని, ఏలాంటి గొడవలు,అవాంఛనీయ సంఘటనలు, ప్రమాదాలు జరగకుండా శాంతియుత వాతావరణంలో శోభయాత్ర సాగేలా సహకరించాలని కోరారు. *గణేష్ నిమజ్జనం, శోభాయాత్రలో నిబంధనలు తప్పక పాటించాలి.* 👉 నిమజ్జనం రోజున ఎట్టి పరిస్థితుల్లోనూ డీజేలకు అనుమతి లేదు.నిబంధనలకు విరుద్ధంగా డీజేలు వినియోగిస్తే చర్యలు తప్పవు. 👉 గణేష్ మండపాల నిర్వాహకులు నిర్దేశించిన సమయానికి ఆలస్యం చేయకుండా నిమజ్జన కార్యక్రమాన్ని పూర్తి చేయాలి. 👉 శోభాయాత్ర సమయంలో ఇతరుల మనోభావాలను దెబ్బతీసే విధంగా పాటలు వినిపించడం, బాణాసంచా కాల్చి ప్రజలకు ఇబ్బందులు కలిగించడం వంటి చర్యలకు పాల్పడితే కఠిన చర్యలు తప్పవు. 👉 శోభాయాత్రలో క్రమపద్ధతిలో క్యూ పాటిస్తూ, వాహనాలు మంచి కండిషన్‌లో ఉండేలా నిర్వాహకులు ముందస్తు జాగ్రత్తలు తీసుకోవాలి. 👉 మద్యం సేవించి శోభాయాత్రలో పాల్గొని ఇతరులకు ఇబ్బందులు కలిగిస్తే చట్టపరమైన చర్యలు తీసుకుంటాం. 👉 శోభాయాత్రలో ఎలాంటి ఇబ్బందులు ఏర్పడిన పోలీస్ వారికి సమాచారం అందించాలి. 👉 శోభాయాత్ర సందర్భంగా పాల్గొనే భక్తులకు, ముఖ్యంగా మహిళలు మరియు చిన్నారులకు ఎలాంటి ఇబ్బందులు కలగకుండా నిర్వాహకులు తగిన జాగ్రత్తలు తీసుకోవాలి.

సిరిసిల్లలో 8 వేల ఎకరాల కబ్జాపై శ్వేతపత్రం విడుదల చేయాలి బిఆర్ఎస్ జిల్లా అధ్యక్షుడు తోట ఆగయ్య. సిరిసిల్లలో 8 వేల ఎకరాల కబ్జా, 2,400 ఎకరాల రికవరీపై ప్రభుత్వం శ్వేతపత్రం విడుదల చేయాలని బీఆర్‌ఎస్‌ జిల్లా అధ్యక్షుడు తోట ఆగయ్య డిమాండ్ చేశారు. మంగళవారం తెలంగాణ భవన్‌లో ఆయన మాట్లాడుతూ.. గ్రామాల వారీగా పూర్తి వివరాలు, ఆధారాలను ప్రజల ముందుంచాలని కోరారు. ఆర్టీఐ ద్వారా సమాచారం సేకరిస్తున్నామని, అవసరమైతే న్యాయపోరాటం చేస్తామని తెలిపారు. సీఎం రేవంత్‌రెడ్డి సిరిసిల్లకు వచ్చి వివరాలు వెల్లడించాలని డిమాండ్ చేశారు.

వినయ్ భాస్కర్‌పై పోలీసుల దాడి? దాడికి ప్రభుత్వమే బాధ్యత వహించాలి: మాజీ మంత్రి ఎర్రబెల్లి దయాకర్‌రావు. పోలీసులపై చర్యలు తీసుకోవాలి.. ప్రతిపక్షాల గొంతు నొక్కే ప్రయత్నం: ఎర్రబెల్లి. వరంగల్, సెప్టెంబర్ 22: ఎంజీఎం ఆస్పత్రిలో పైకప్పు పెచ్చులు ఊడిపడి రోగులు గాయపడిన ఘటనపై వారిని పరామర్శించేందుకు వెళ్తున్న మాజీ ఎమ్మెల్యే, మాజీ ప్రభుత్వ చీఫ్ విప్ దాస్యం వినయ్ భాస్కర్‌పై పోలీసులు వ్యవహరించిన తీరు సరికాదని మాజీ మంత్రి, బీఆర్‌ఎస్ నేత ఎర్రబెల్లి దయాకర్‌రావు అన్నారు. వినయ్ భాస్కర్‌ను పోలీసులు అడ్డుకుని దాడి చేశారంటూ ఆయన ఆరోపించారు. ఈ ఘటనకు ప్రభుత్వమే బాధ్యత వహించాలని డిమాండ్ చేశారు. ఎంజీఎం ఆస్పత్రిలో ఇటీవల పైకప్పు పెచ్చులు ఊడిపడిన ఘటనలో ముగ్గురు గాయపడినట్లు వార్తా కథనాలు వెల్లడించాయి. ఈ ఘటన అనంతరం ఆస్పత్రిలో పరిస్థితులను అధికారులు పరిశీలించారు. ప్రతిపక్షాల గొంతు నొక్కుతున్నారని ఆరోపణ ప్రజల సమస్యలను తెలుసుకునేందుకు, ఆస్పత్రిలో గాయపడిన వారిని పరామర్శించేందుకు వెళ్తున్న ప్రతిపక్ష నాయకులను అడ్డుకోవడం సరైన విధానం కాదని ఎర్రబెల్లి దయాకర్‌రావు అన్నారు. వినయ్ భాస్కర్‌ను అడ్డుకుని పోలీసులు దాడి చేశారని ఆరోపిస్తూ, ఘటనకు బాధ్యులైన పోలీసులపై చర్యలు తీసుకోవాలని డిమాండ్ చేశారు. పోలీసుల తీరుపై తీవ్ర వ్యాఖ్యలు పోలీసులు ప్రతిపక్ష నాయకులు, కార్యకర్తల పట్ల దౌర్జన్యంగా వ్యవహరిస్తున్నారని ఎర్రబెల్లి ఆరోపించారు. ఇటీవల అసెంబ్లీ పరిసరాల్లో మహిళా ఎమ్మెల్యేల విషయంలోనూ, బీఆర్‌ఎస్ నేతలు కేటీఆర్‌, హరీశ్‌రావు తదితరుల విషయంలోనూ పోలీసుల వ్యవహారశైలిపై అభ్యంతరాలు వ్యక్తమయ్యాయని పేర్కొన్నారు. బీఆర్‌ఎస్ నేతలపై పోలీసులు చర్యలు తీసుకున్న ఘటనలపై పార్టీ ఇప్పటికే అభ్యంతరాలు వ్యక్తం చేసినట్లు వార్తా కథనాలు కూడా ఉన్నాయి. “కార్యకర్తలు అధైర్యపడొద్దు” ప్రభుత్వం ప్రజల పక్షాన నిలబడే నాయకుల పట్ల వ్యవహరిస్తున్న తీరు బాధాకరంగా ఉందని ఎర్రబెల్లి దయాకర్‌రావు అన్నారు. పార్టీ కార్యకర్తలు అధైర్యపడకుండా ప్రజా సమస్యలపై పోరాడాలని పిలుపునిచ్చారు. వినయ్ భాస్కర్ త్వరగా కోలుకోవాలని ఆకాంక్షిస్తూ సోషల్ మీడియా వేదికగా ఆయన స్పందించారు.

సిరిసిల్లలో రాష్ట్ర ముఖ్యమంత్రి టూర్ ప్రకటనతో కేటీఆర్ వెన్నులో వణుకు ప్రభుత్వ విప్ ఆది శ్రీనివాస్ సిరిసిల్లలో రాష్ట్ర ముఖ్యమంత్రి టూర్ ప్రకటనతో కేటీఆర్ వెన్నులో వణుకు పుట్టిందని, సెప్టెంబర్ 30 నుండి సిరిసిల్లలో కేటీఆర్ కు కౌంట్ డౌన్ మొదలవుతుందని రాష్ట్ర ప్రభుత్వ విప్, వేములవాడ ఎమ్మెల్యే ఆది శ్రీనివాస్ అన్నారు. సీఎం పర్యటన నేపథ్యంలో సిరిసిల్లలో రాజకీయంగా కీలక పరిణామాలు చోటుచేసుకోనున్నాయని ఆయన వ్యాఖ్యానించారు. సీఎం పర్యటన నేపథ్యంలో జిల్లా కాంగ్రెస్ అధ్యక్షుడు సంగీతం శ్రీనివాస్ ఆధ్వర్యంలో మంగళవారం సిరిసిల్లలోని ఓ ప్రైవేట్ ఫంక్షన్‌ హాల్‌లో నాయకులు, కార్యకర్తలతో సన్నాహక సమావేశం నిర్వహించారు. ఆది శ్రీనివాస్‌తో పాటు సిరిసిల్ల నియోజకవర్గ కాంగ్రెస్ ఇన్‌చార్జి కేకే మహేందర్‌రెడ్డి, సీనియర్ నాయకుడు, మాజీ ఎమ్మెల్యే మృత్యుంజయం తదితరులు సమావేశానికి హాజరయ్యారు. ఈ సందర్బంగా వారు మాట్లాడుతూ సిరిసిల్లలో సీఎం పర్యటన నేపథ్యంలో గులాబి లీడర్ల గుండెల్లో గుబులు మొదలైందన్నారు. నేతన్నల జీవితాల్లో గత ప్రభుత్వం తీసుకొచ్చిన మార్పు ఏమిటో కేటీఆర్‌ సమాధానం చెప్పాలని ప్రశ్నించారు. సిరిసిల్ల నేతన్నలకు ఇప్పటివరకు ఉత్పత్తి ఆర్డర్లు ఇచ్చి చేతినిండా పని కల్పించామని, నేతన్నలకు సంబంధించిన సుమారు రూ.350 కోట్ల బకాయిల చెల్లింపులపై ప్రస్తావించారు. నేతన్నలకు అండగా నిలవడానికి సిరిసిల్లకు సీఎం రేవంత్ రెడ్డి వస్తున్నాడని, రూ.49 కోట్ల విద్యుత్ బకాయిలు కూడా చెల్లించబోతున్నట్లు తెలిపారు. తొమ్మిదో ప్యాకేజీ, ఎగువ మానేరు, కాలువల నిర్మాణం, సూరమ్మ చెరువు ప్రాజెక్టు నిర్లక్ష్యం తదితర అంశాలపై కూడా వారు గత ప్రభుత్వ పనితీరును ప్రశ్నించారు. ప్రాజెక్టులకు నిధులు కేటాయించి, భూసేకరణ చేపట్టి పనులను వేగవంతం చేసిన ఘనత తమ ప్రభుత్వానిదేనన్నారు. కేటీఆర్‌ గతంలో రాజన్న సిరిసిల్ల జిల్లా ఏర్పాటు విషయంలో చేసిన వ్యాఖ్యలను ప్రస్తావిస్తూ విమర్శలు చేశారు. ప్రభుత్వ భూములు కొలగొట్టి కల్వకుంట్ల కుటుంబం కట్టిన ఫామ్ లపై ఫామ్ హౌస్ ఫైల్స్ అనే సినిమా తీసే అవసరం ఉందని, అలాగే ధరణి పోర్టల్, జీవో 22ఏ లను అడ్డుపెట్టుకొని కేటీఆర్ అనుచరులు సిరిసిల్లలో ఎనిమిది వేల ఎకరాల ప్రభుత్వ భూములను కబ్జా చేశారని ఆరోపించారు. గతంలో సీఎం హోదాలో రాజన్న దర్శనానికి వచ్చిన కేసీఆర్ ఏటా వంద కోట్లతో ఆలయ అభివృద్ధి చేస్తానని రాజన్నకే శఠకోపం పెట్టాడని విమర్శించారు. ప్రస్తుతం ముఖ్యమంత్రి రేవంత్ రెడ్డి నేతృత్వంలో 250 కోట్ల నిధులతో రాజన్న ఆలయ అభివృద్ధి పనులు శరవేగంగా కొనసాగుతున్నాయని తెలిపారు. సిరిసిల్లలో సీఎం పర్యటన అనంతరం సిరిసిల్ల ప్రజలకు ప్రభుత్వం చేసిన పనులు, గతంలో జరిగిన పరిణామాలపై మరింత స్పష్టత వస్తుందన్నారు. ఈ నెల 30న సిరిసిల్లలో ముఖ్యమంత్రి రేవంత్‌రెడ్డి పాల్గొనే బహిరంగ సభను లక్ష మందితో విజయవంతం చేయాలని ప్రభుత్వ విప్‌, వేములవాడ ఎమ్మెల్యే ఆది శ్రీనివాస్‌ పిలుపునిచ్చారు. కాంగ్రెస్‌ ప్రభుత్వం అధికారంలోకి వచ్చిన తర్వాత చేపట్టిన పనులను ప్రజలకు వివరించడంతో పాటు, భవిష్యత్‌లో చేపట్టబోయే కార్యక్రమాలను వెల్లడించేందుకు సభ వేదికగా నిలుస్తుందన్నారు.

జగిత్యాల జిల్లా బతికేపల్లి గణేష్ మండపంలో విషాదం... కరెంట్ షాక్ తో యువకుడు మృతి, మరో యువకునికి గాయాలు గణేష్ ఉత్సవాలు జగిత్యాల జిల్లా పెగడపల్లి మండలం బతికెపల్లి గ్రామంలో విషాదం నింపింది. గణేష్ మండపం వద్ద విద్యుత్ షాక్ తో యువకుడు మధు మృతి చెందారు. అతన్ని కాపాడేందుకు యత్నించిన యువకుడు అఖిల్ తీవ్రగాయాలయ్యాయి. గాయపడ్డ అఖిల్ జగిత్యాల ఆస్పత్రిలో చికిత్స పొందుతున్నారు. గత రాత్రి గణేష్ మండపంలో దీపారాధన సందర్భంగా భక్తులు ఎక్కువ సంఖ్యలో రావడంతో మండపంలో ఉన్న బాక్సులను బయట పెట్టేందుకు ప్రయత్నిస్తుండగా బాక్స్ కు కరెంట్ వైరు తాకి డిగ్రీ విద్యార్థి మధు షాక్ గురై పడిపోగా అతన్ని కాపాడేందుకు యత్నించిన అఖిల్ గాయపడ్డారు. ఇద్దరినీ ఆసుపత్రికి తరలిస్తుండగా మార్గమధ్యలోనే మధు ప్రాణాలు కోల్పోయాడని స్థానికులు తెలిపారు. గణేష్ వేడుకల్లో యువకుడు మధు కరెంట్ షాక్ కు గురై ప్రాణాలు కోల్పోవడం స్థానికంగా కలకలం సృష్టించింది. గణేష్ మండపాల వద్ద భక్తులు తగు జాగ్రత్తలు తీసుకోవాలని అధికారులు సూచిస్తున్నారు.

చింతకుంట కెనాల్ వద్ద ఉద్రిక్తత..! గణేశ్ నిమజ్జనానికి ఎస్సారెస్పీ నీరు విడుదల చేయాలని బీజేపీ ధర్నా..పోలీసులతో వాగ్వాదం కార్యకర్తల అరెస్టు.. లాఠీఛార్జ్‌పై బీజేపీ నేతల ఆగ్రహం.. గణేశ్ నిమజ్జనానికి చింతకుంట కెనాల్‌కు ఎస్సారెస్పీ నుంచి నీటిని విడుదల చేయాలని డిమాండ్ చేస్తూ బీజేపీ చేపట్టిన ధర్నా ఉద్రిక్తతకు దారితీసింది. చింతకుంట కెనాల్ వద్ద ధర్నాకు దిగిన బీజేపీ కార్యకర్తలు, పోలీసుల మధ్య వాగ్వాదం చోటుచేసుకుంది. పరిస్థితిని అదుపులోకి తీసుకొచ్చేందుకు పోలీసులు పలువురు కార్యకర్తలను అరెస్టు చేసి స్టేషన్‌కు తరలించారు. ధర్నా చేస్తున్న కార్యకర్తలను పోలీసులు అదుపులోకి తీసుకునే క్రమంలో తోపులాట చోటుచేసుకుంది. పోలీసులు లాఠీఛార్జ్ చేశారని బీజేపీ నాయకులు ఆరోపించారు. ఓబీసీ మోర్చా జిల్లా అధ్యక్షుడు ఆకుల రాజేందర్‌పై పోలీసులు దాడి చేశారని, పలువురు కార్యకర్తలను గల్లా పట్టుకుని లాగి పడేశారని వారు ఆరోపించారు. ఏసీపీ విజయ్‌కుమార్, కొత్తపల్లి సీఐ కోటేశ్వర్ తీరుపై కార్యకర్తలు ఆగ్రహం వ్యక్తం చేశారు. ఈ సందర్భంగా కరీంనగర్ డిప్యూటీ మేయర్ సునీల్‌రావు, బీజేపీ జిల్లా అధ్యక్షుడు సాయిని మల్లేశం, కరీంనగర్ పార్లమెంట్ కన్వీనర్ బోయినిపల్లి ప్రవీణ్‌రావును పోలీసులు అరెస్టు చేసి బలవంతంగా స్టేషన్‌కు తరలించారు. గణేశ్ నిమజ్జనానికి నీటిని విడుదల చేయాలని కోరితే లాఠీలతో కొట్టడం ఏమిటని బీజేపీ జిల్లా అధ్యక్షుడు సాయిని మల్లేశం ప్రశ్నించారు. హిందూ పండుగలంటే కాంగ్రెస్ ప్రభుత్వానికి ఎందుకు అంత చులకన భావన అని నిలదీశారు. నీటిని విడుదల చేసే వరకు ఉద్యమాన్ని కొనసాగిస్తామని స్పష్టం చేశారు. నిమజ్జనానికి నీటిని అడిగినందుకు బీజేపీ కార్యకర్తలపై లాఠీఛార్జ్ చేయడం హేయమని బీజేపీ కరీంనగర్ పార్లమెంట్ కన్వీనర్ బోయినిపల్లి ప్రవీణ్‌రావు అన్నారు. కార్యకర్తలు తలచుకుంటే కాంగ్రెస్ నేతలు రోడ్లపై తిరగలేరంటూ ఆయన వ్యాఖ్యానించారు. నీటిని విడుదల చేసే వరకు పోరాటం కొనసాగిస్తామని తెలిపారు. గణేశ్ నిమజ్జనం కోసం అర టీఎంసీ నీటిని అడిగితే ప్రభుత్వం స్పందించకపోవడం దుర్మార్గమని డిప్యూటీ మేయర్ సునీల్‌రావు అన్నారు. ఉత్తమ్‌కుమార్‌రెడ్డి కోదాడ, హుజూర్‌నగర్ ప్రాంతాలకు నీటిని తరలించుకుపోతున్నారని ఆరోపించారు. ఆయన రాష్ట్ర మంత్రిగా ఉన్నారా? లేక కోదాడ, హుజూర్‌నగర్ మంత్రిగా ఉన్నారా? అని ప్రశ్నించారు. నగర పాలక సంస్థ ఆధ్వర్యంలో నిమజ్జనానికి ఏర్పాట్లు పూర్తిచేసినప్పటికీ నీటిని విడుదల చేయకపోవడం దారుణమన్నారు. నిమజ్జనానికి తక్షణమే నీటిని విడుదల చేయాలని, లేకుంటే పోరాటాన్ని కొనసాగిస్తామని తెలిపారు. ప్రభుత్వం నీటి విడుదలకు నిర్ణయం బీజేపీ ఆందోళన నేపథ్యంలో గణేశ్ నిమజ్జనానికి చింతకుంట కెనాల్‌కు ఎస్సారెస్పీ నుంచి నీటిని విడుదల చేయాలని ప్రభుత్వం నిర్ణయించినట్లు సమాచారం. తొలుత 500 క్యూసెక్కుల నీటిని విడుదల చేసినట్లు బీజేపీ వర్గాలు తెలిపాయి. సాయంత్రం మరో 3 వేల క్యూసెక్కుల నీటిని విడుదల చేయనున్నట్లు అధికారులు వెల్లడించినట్లు పేర్కొన్నారు. విడుదలైన ఎస్సారెస్పీ జలాలు రేపు రాత్రిలోపు చింతకుంట కెనాల్‌కు చేరుకునే అవకాశం ఉందని తెలిపారు. దీంతో గణేశ్ నిమజ్జనానికి నీటి సమస్యపై బీజేపీ చేపట్టిన ఆందోళనకు ప్రభుత్వం నుంచి స్పందన లభించినట్లైంది.