સુરતના ડિંડોલી વિસ્તારમાં માત્ર ₹5 હજારની લેતીદેતીના વિવાદમાં મિત્રતા દુશ્મનીમાં ફેરવાઈ ગઈ હતી. પૈસાના આ વિવાદને કારણે મિત્રોએ જ ભેગા મળીને પોતાના જ મિત્ર રાજ દુબેની ચપ્પુના ઘા મારીને ઘાતકી હત્યા કરી નાખી હતી. આ ચકચારી હત્યાકાંડ બાદ સમગ્ર પંથકમાં સનસનાટી મચી ગઈ હતી. આ ઘટના અંગે ડિંડોલી પોલીસે ગુનાનો ભેદ ઉકેલવા ત્વરિત કાર્યવાહી હાથ ધરી હતી. પોલીસે ગણતરીના સમયમાં જ સફળતા મેળવીને આ હત્યા કેસનો ભેદ ઉકેલી કાઢ્યો છે અને ડાંગમાંથી હત્યા કરનારા ત્રણેય મિત્રોની ધરપકડ કરી લીધી છે.

સુરતના સચિન વિસ્તારમાં પૂર જેવી ગંભીર સ્થિતિ વચ્ચે સચિન પોલીસે પોતાની જાનની પરવા કર્યા વિના જીવના જોખમે એક મોટું રેસ્કયુ ઓપરેશન હાથ ધર્યું છે. આ મેગા રેસ્કયુ દરમિયાન પોલીસે પૂર જેવી કપરી પરિસ્થિતિમાં ફસાયેલા તમામ 18 લોકોનો આબાદ બચાવ કરીને તેમને સુરક્ષિત બહાર કાઢ્યા છે.

સુરતના ઉધના લક્ષીનારાયણ ઈન્ડસ્ટ્રીમાં એક ઈમારતના પાંચમા માળેથી નીચે પટકાતા કામદાર મનિયાભાઈ ધીરાભાઈ ડામોરનું મોત નીપજ્યું છે. આ ઘટનાને પગલે મૃતકના પરિવારજનોએ ગંભીર આક્ષેપ કર્યો છે કે કોઈપણ પ્રકારની સેફ્ટી રાખ્યા વિના જ ત્યાં કામદારો પાસે કામ કરાવવામાં આવી રહ્યું હતું, જેના કારણે આ દુર્ઘટના સર્જાઈ છે. નિધન પામેલા મનીયાભાઇ પોતાના પરિવારમાં કમાવનાર એકમાત્ર વ્યક્તિ હતા, જેથી તેમના જવાથી પરિવાર નિરાધાર બન્યો છે. રોષે ભરાયેલા પરિવારજનોએ બિલ્ડીંગ કોન્ટ્રાક્ટર વિરુદ્ધ કડક કાર્યવાહી કરવાની માંગ કરી છે. સેફ્ટી વિના કામ કરાવીને કામદારોનો જીવ જોખમમાં મુકવા બદલ જવાબદારો સામે સાપરાધ મનુષ્યવધનો ગુનો દાખલ કરવા માટે અપીલ કરવામાં આવી છે. પરિવારજનોએ આ મામલે યોગ્ય વળતર આપવાની પણ માંગ કરી છે. પરિવારે ચીમકી ઉચ્ચારતા સ્પષ્ટ જણાવ્યું છે કે જ્યાં સુધી કોન્ટ્રાક્ટર વિરુદ્ધ યોગ્ય કાર્યવાહી કરવામાં નહીં આવે, ત્યાં સુધી તેઓ લાશનો સ્વીકાર કરશે નહીં અને મૃતદેહનું પીએમ (પોસ્ટમોર્ટમ) પણ કરાવવા દેવામાં આવશે નહીં.

સુરતમાં ઉધના નજીક આવેલા આશીર્વાદ પાર્કમાં ફાયર બ્રિગેડની ટીમ સફાઈ કરવા માટે આવી પહોંચી છે.

સુરતમાં પિઝાનું રો મટીરીયલ કચરાની જેમ રિક્ષામાં ભરીને લઈ જવામાં આવી રહ્યું હોવાનો એક ચોંકાવનારો કિસ્સો સામે આવ્યો છે. આ રિક્ષામાં બેઠેલી એક મહિલા ચંપલ પહેરીને પિઝાના આ કાચા માલ (રો મટીરીયલ) પર જ પગ રાખીને બેઠેલી જોવા મળી રહી છે. આ પ્રકારની ગંદકી જોઈને પિઝા પ્રેમીઓ પણ વિચારમાં પડી જશે કે આખરે કેવા પ્રકારના પૌષ્ટિક પિઝા તેમની થાળીમાં પીરસવામાં આવી રહ્યા છે. સુરતની જનતા ખૂબ જ હોંશે હોંશે આવા પિઝાનું સેવન કરી રહી છે, તેથી સુરતની અંદર રહેતા પિઝા લવર્સે હવે સાવધાન થઈ જવાની જરૂર છે. આ સમગ્ર બાબત અંગે સુરતથી નરેન્દ્ર પટેલે અહેવાલ આપ્યો છે.

સુરતના બારડોલી રૂરલ પોલીસ સ્ટેશન વિસ્તારમાં હીરાચંદ નગર પ્રવેશદ્વારથી બારડોલી સ્ટેશન રોડ પર રિક્ષામાં સવાર ચાર અજાણ્યા બદમાશોએ એક વૃદ્ધાને બળજબરીથી રિક્ષામાં બેસાડી લૂંટ ચલાવી હોવાનો મામલો સામે આવ્યો છે. 8 જૂન 2026ના રોજ સવારે આશરે 10:50 વાગ્યે બનેલી આ ઘટનામાં, આરોપીઓએ ફરિયાદકર્તાની માતાના હાથમાંથી રૂપિયા 45,000ની કિંમતની સોનાની બંગડી કટર વડે કાપી લીધી હતી અને ગળામાંથી રૂપિયા 75,000ની સોનાની ચેઈન ખેંચી લીધી હતી. આ લૂંટ ચલાવ્યા બાદ તેઓ વૃદ્ધાને રસ્તા પર એકલી છોડીને રિક્ષા સાથે ફરાર થઈ ગયા હતા. આ ઘટના અંગે માહિતી મળતા જ પોલીસે તપાસ હાથ ધરી શંકાસ્પદ રિક્ષાને અટકાવી હતી. રિક્ષા ચાલકની પૂછપરછ કરતા તેણે પોતાનું નામ નઈમ રહેમાન શેખ હોવાનું જણાવ્યું હતું. કડક પૂછપરછ દરમિયાન નઈમે ગુનાની કબૂલાત કરતા જણાવ્યું કે, એક મહિના પહેલા તે અને તેના મિત્રો સલમાન શાહ તથા શરીફ રિક્ષા લઈને બારડોલી સ્ટેશન રોડ પર આવ્યા હતા. ત્યાં તેઓએ એક વૃદ્ધ મહિલાને રિક્ષામાં બેસાડી, ચપ્પુ વડે તેમની સોનાની બંગડી કાપી લીધી હતી અને ગળામાંથી સોનાની ચેઈન આંચકીને તેમને રસ્તા પર ફેંકીને ભાગી ગયા હતા. નરેન્દ્ર પટેલના અહેવાલ મુજબ, બારડોલી વિસ્તારમાં વૃદ્ધોને રિક્ષામાં બેસાડી તેમના દાગીના લૂંટતી આખી ગેંગ સક્રિય હતી. હાલમાં પોલીસે આરોપીને કસ્ટડીમાં લઈ તેની સામે આગળની કાયદેસરની કાર્યવાહી હાથ ધરી છે.