କେନ୍ଦୁଝର ସଦର ବ୍ଲକର ନୂଆଗାଁରେ ଚାଲିଥିବା ୪ ଦିନିଆ ନେତାଜୀ ୟୁଥ୍ କ୍ରିକେଟ୍ ଟୁର୍ଣ୍ଣାମେଣ୍ଟ ଶେଷ ହୋଇଛି। ଫାଇନାଲ୍ ମ୍ୟାଚ୍‌ରେ ଟାଙ୍ଗରାଣୀ ଦଳ ନୂଆଗାଁକୁ ହରାଇ ଚାମ୍ପିୟନ ହୋଇଛି। ଚାମ୍ପିୟନ ଦଳକୁ ୧୫ ହଜାର ଓ ରନର୍ସ ଅପ୍ ଦଳକୁ ୧୨ ହଜାର ଟଙ୍କା ସହ ଟ୍ରଫି ପ୍ରଦାନ କରାଯାଇଛି।

କେନ୍ଦୁଝରର ପଦ୍ମପୁର ମେଗା ନର୍ସରୀରେ ଏବେ ହାତୀଛୁଆ 'ସରସ୍ୱତୀ' ଏକ ନୂଆ ଜୀବନ ଆରମ୍ଭ କରିଛି। ମାତ୍ର ୨ ମାସର ହୋଇଥିବା ବେଳେ ତା' ମା' ତାକୁ ଛାଡ଼ି ଚାଲିଯାଇଥିଲା। ଏହା ପରେ ବନ କର୍ମଚାରୀମାନେ ତାକୁ ନିଜ ଛୁଆ ଭଳି ପାଳୁଛନ୍ତି। ବନ କର୍ମଚାରୀମାନଙ୍କ ସ୍ନେହ ଏବଂ ଯତ୍ନରେ ବଢ଼ୁଥିବା 'ସରସ୍ୱତୀ' ଫୁଟବଲ୍ ଖେଳିବା ସହ ପ୍ରତି ଦୁଇ ଘଣ୍ଟାରେ ୩ ଲିଟର ଲାକ୍ଟୋଜେନ୍ ପିଉଛି।

ମୟୂରଭଞ୍ଜ ଜିଲ୍ଲା ଉଦଳା ଥାନା ଅନ୍ତର୍ଗତ ଉର୍ମଳ ଗ୍ରାମର ହାଟ ପଡ଼ିଆ ନିକଟରୁ ଜଣେ ବୃଦ୍ଧାଙ୍କ ମୃତଦେହ ଉଦ୍ଧାର କରାଯାଇଛି। ଅତ୍ୟଧିକ ଖରା ଏବଂ ଗରମ ଯୋଗୁଁ ତାଙ୍କର ଜୀବନ ଯାଇଥିବା ଅନୁମାନ କରାଯାଉଛି, ଯାହା ଅଞ୍ଚଳରେ ଶୋକର ଛାୟା ଖେଳାଇ ଦେଇଛି। ସୂଚନା ଅନୁସାରେ, ସମ୍ପୃକ୍ତ ବୃଦ୍ଧା ନିଜ ମାମୁଁଙ୍କ ଶୁଦ୍ଧି କ୍ରିୟାରେ ଯୋଗ ଦେବାକୁ ସେଠାକୁ ଆସିଥିଲେ। ଦିନ ବେଳେ କୌଣସି କାମରେ ହାଟ ପଡ଼ିଆ ନିକଟକୁ ଯାଇଥିବା ସମୟରେ ସେ ଅସୁସ୍ଥ ହୋଇପଡ଼ିଥିଲେ। ପ୍ରଚଣ୍ଡ ଗରମ ଏବଂ ଅତ୍ୟଧିକ ଖରାକୁ ସହିନପାରି ସେଠାରେ ହିଁ ତାଙ୍କର ପ୍ରାଣବାୟୁ ଉଡ଼ିଯାଇଥିବା ଅନୁମାନ କରାଯାଉଛି। ଏଭଳି ଏକ ଦୁଃଖଦ ଘଟଣା ପରେ, ଲଗାତାର ବଢ଼ୁଥିବା ତାପମାତ୍ରାକୁ ଦୃଷ୍ଟିରେ ରଖି ସମସ୍ତଙ୍କୁ ପରାମର୍ଶ ଦିଆଯାଇଛି ଯେ, ଅତ୍ୟାବଶ୍ୟକ କାମ ନଥିଲେ ଦିନ ବେଳେ ବାହାରକୁ ନଯାଆନ୍ତୁ ଏବଂ ପର୍ଯ୍ୟାପ୍ତ ପରିମାଣରେ ପାଣି ପିଇବାକୁ ଧ୍ୟାନ ଦିଅନ୍ତୁ।

ଓଡ଼ିଶାର ବ୍ରହ୍ମପୁରରେ ଏକ ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି, ଯେଉଁଠାରେ ପୂର୍ବ ଶତ୍ରୁତାକୁ କେନ୍ଦ୍ର କରି ଜଣେ ଯୁବକଙ୍କୁ ବିଚ୍‌ ରାସ୍ତାରେ ଗୋଡ଼ାଇ ଗୋଡ଼ାଇ ହାଣି ଦିଆଯାଇଛି। ଏହି ଭୟଙ୍କର ଆକ୍ରମଣରେ ଯୁବକ ଜଣକ ଗୁରୁତର ଭାବେ ଆହତ ହୋଇଛନ୍ତି। ତାଙ୍କୁ ତୁରନ୍ତ ଚିକିତ୍ସା ନିମନ୍ତେ ବ୍ରହ୍ମପୁରର ବଡ଼ ମେଡିକାଲରେ ଭର୍ତ୍ତି କରାଯାଇଛି।

ଭଦ୍ରକ ଜିଲ୍ଲା ବନ୍ତ ଥାନା ଅଞ୍ଚଳରେ ଜଣେ ବ୍ୟକ୍ତିଙ୍କ ଉପରେ ସଂଘବଦ୍ଧ ମରଣାନ୍ତକ ଆକ୍ରମଣ ହୋଇଛି। ସମ୍ପର୍କୀୟଙ୍କ ଘରୁ ଶୁଦ୍ଧିକ୍ରିୟା କାର୍ଯ୍ୟ ସାରି ଫେରୁଥିବା ବେଳେ, କିଛି ଦୁର୍ବୃତ୍ତ ତାଙ୍କୁ ରାସ୍ତା ଉପରେ ଘେରିଯାଇ ଧାରୁଆ ଅସ୍ତ୍ରରେ ଅତି ନିର୍ମମ ଭାବେ ଆକ୍ରମଣ କରିଛନ୍ତି।

ଅନୁଗୁଳ ଜିଲ୍ଲାର ସୁଦ୍ର ଗ୍ରାମରେ ବର୍ଷା, ପବନ ସହିତ କୁଆପଥର ବର୍ଷା ହୋଇଛି। ଏହି ସମୟରେ ବିଜୁଳିର ପ୍ରକୋପ ମଧ୍ୟ ଦେଖିବାକୁ ମିଳିଛି।

ମୁଣ୍ଡାରୀ ଭାଷା, ସଂସ୍କୃତି ଏବଂ କଳାର ପ୍ରଚାର ପ୍ରସାର ଲକ୍ଷ୍ୟରେ ତୃତୀୟ ମୁଣ୍ଡାରୀ ଗ୍ରାଣ୍ଡ ଆୱାର୍ଡ ସେରିମନି-୨୦୨୬ ଆୟୋଜିତ ହୋଇଯାଇଛି। ମୁଣ୍ଡାରୀ ଯୁବକ, ପ୍ରୋଡ୍ୟୁସର ଏବଂ ଆର୍ଟିଷ୍ଟ ଆସୋସିଏସନ (MYPAA) ଦ୍ୱାରା ଆୟୋଜିତ ଏହି ମେଗା କାର୍ଯ୍ୟକ୍ରମରେ ଓଡ଼ିଶା, ଝାଡ଼ଖଣ୍ଡ ଏବଂ ପଶ୍ଚିମବଙ୍ଗ ଭଳି ବିଭିନ୍ନ ପ୍ରାନ୍ତରୁ ଶତାଧିକ ମୁଣ୍ଡାରୀ କଳାକାର ଓ ସଂସ୍କୃତି ପ୍ରେମୀ ସାମିଲ ହୋଇଥିଲେ। ଆଜିର ଆଧୁନିକ ତଥା ଡିଜିଟାଲ ଯୁଗରେ ନିଜର ମାତୃଭାଷା ଏବଂ ପାରମ୍ପରିକ ସଂସ୍କୃତିକୁ ବଞ୍ଚାଇ ରଖିବା ସହ ନୂତନ ପିଢ଼ି ପାଖରେ ପହଞ୍ଚାଇବା ଏହି କାର୍ଯ୍ୟକ୍ରମର ମୂଳ ଲକ୍ଷ୍ୟ। ବିଶେଷ କରି ମୁଣ୍ଡାରୀ ଭାଷାକୁ ସମ୍ବିଧାନର ଅଷ୍ଟମ ଅନୁସୂଚୀରେ ସାମିଲ କରିବା ଏବଂ ଡିଜିଟାଲ୍ ମାଧ୍ୟମରେ ନିଜ ପରମ୍ପରାକୁ ଆଗକୁ ନେବା ପାଇଁ ଏହି କାର୍ଯ୍ୟକ୍ରମ ଏକ ଶକ୍ତ ମାଧ୍ୟମ ପାଲଟିଛି। ସ୍ଥାନୀୟ ସହିଦ ସ୍ମୃତି ଭବନ ଠାରେ ଆୟୋଜିତ ଏହି ଭବ୍ୟ ସମାରୋହରେ ମୁଣ୍ଡାରୀ ଚଳଚ୍ଚିତ୍ର, ଆଲବମ୍, ୟୁଟ୍ୟୁବର୍ ଏବଂ ସୋସିଆଲ୍ ମିଡିଆ ଇନଫ୍ଲୁଏନ୍ସରମାନଙ୍କୁ ସେମାନଙ୍କର ବର୍ଷସାରା ଭଲ କାମ ଏବଂ ଉଲ୍ଲେଖନୀୟ ଅବଦାନ ପାଇଁ ସମ୍ମାନିତ କରାଯାଇଛି। ସ୍ମୃତି, କଳା ଏବଂ ଐତିହ୍ୟକୁ ଉଜ୍ଜୀବିତ ରଖିବାରେ ଏହିଭଳି ଆଞ୍ଚଳିକ ଏବଂ ଜନଜାତି କାର୍ଯ୍ୟକ୍ରମକୁ ଏକ ମାଇଲଖୁଣ୍ଟ ବୋଲି କୁହାଯାଇଛି। ମୁଣ୍ଡାରୀ ସମାଜର ଯୁବ ନେତା ମଙ୍ଗଲ ସିଂହ ଏବଂ ଜାମସେଦପୁର, ଝାଡ଼ଖଣ୍ଡର ସୀମା କଚ୍ଛପ ଏହି ଅବସରରେ ନିଜର ବକ୍ତବ୍ୟ ପ୍ରଦାନ କରିଥିଲେ। ଆଗାମୀ ଦିନରେ ଏହି ପ୍ରୟାସ ମୁଣ୍ଡାରୀ ଭାଷା ଓ ସଂସ୍କୃତିକୁ ସାରା ବିଶ୍ୱ ଦରବାରରେ ଏକ ସ୍ୱତନ୍ତ୍ର ପରିଚୟ ଦେବ ବୋଲି ଆଶା କରାଯାଉଛି।

ଜଙ୍ଗଲ ଭିତରେ ଚାଲିଥିବା ବେଆଇନ ମହୁଲି ମଦର କଳା ସାମ୍ରାଜ୍ୟ ଉପରେ ହଠାତ୍ ଅବକାରୀ ବିଭାଗ ମାଡ଼ି ବସିଛି, ଯାହା ଫଳରେ ମଦ ମାଫିଆଙ୍କ ଆଡ୍ଡା କିଛି ମିନିଟ୍‌ ମଧ୍ୟରେ ଚୁରମାର ହୋଇଯାଇଛି। ଗୁପ୍ତ ସୂଚନା ପାଇ ଉଦଳା, ବାରିପଦା, ବେତନଟୀ ଏବଂ ଖୁଣ୍ଟା ଅବକାରୀ ଟିମ୍‌ର ଏକ ମିଳିତ ଦଳ ଏହି ଚଢ଼ାଉ କରିଛି। ଅବକାରୀ ଟିମ୍‌ର ଗାଡ଼ି ଜଙ୍ଗଲ ଭିତରକୁ ପ୍ରବେଶ କରିବା ମାତ୍ରେ ମଦ ମାଫିଆମାନେ ଭୟଭୀତ ହୋଇ ଫେରାର ହୋଇଯାଇଥିଲେ। ଅବକାରୀ ବିଭାଗ ଆଦାପାଳ ଓ ଜୁଆଳିଆ ଜଙ୍ଗଲ ନଦୀପଠାରେ ଗଢ଼ିଉଠିଥିବା ଏହି ବେଆଇନ ମହୁଲି ମଦ କାରଖାନାକୁ ସମ୍ପୂର୍ଣ୍ଣ ରୂପେ ଧ୍ୱଂସ କରିଦେଇଛି। ଏହି ଚଢ଼ାଉରେ ୧୩,୩୦୦ କିଲୋ ମହୁଲ ପୋଚ ନଷ୍ଟ କରାଯିବା ସହ ୧୧୨୦ ଲିଟର ଦେଶୀ ମହୁଲି ମଦ ଜବତ କରାଯାଇଛି। କିଛି ଦିନ ଧରି ନିରବ ଥିବା ଉଦଳା ଅବକାରୀ ବିଭାଗ ଏବେ ପୁରା ଆକ୍ସନ ମୋଡରେ ଥିବା ଜଣାପଡ଼ିଛି। ନୂଆ OIC ଦାୟିତ୍ୱ ନେବା ପରେ ବେଆଇନ ମଦ କାରବାର ବିରୋଧରେ ଚଢ଼ାଉ ଜାରି ରହିବ ବୋଲି ସୂଚନା ମିଳିଛି।

ଯାଜପୁର ଜିଲ୍ଲା ପାଣିକୋଇଲି ଥାନା ଅଧୀନ ଅଳତି ନିକଟରେ ଏକ ଚାଞ୍ଚଲ୍ୟକର ଛୁରାମାଡ଼ ଘଟଣା ଘଟିଛି। ପ୍ରାପ୍ତ ସୂଚନା ଅନୁଯାୟୀ, ଏକ ଝିମିଟି ଖେଳରୁ ମହାଭାରତ ଭଳି ସାମାନ୍ୟ ଝଗଡ଼ା ଉଗ୍ର ରୂପ ନେବା ପରେ ଏହି ଛୁରାମାଡ଼ କରାଯାଇଛି। ଏହି ଘଟଣାରେ ଜଳଧର ବାରିକଙ୍କୁ ଛୁରାମାଡ଼ ହୋଇଥିବା ସୂଚନା ମିଳିଛି। ସୂଚନା ଅନୁସାରେ, ଏକ ଗ୍ୟାରେଜ ସ୍ପେୟାର ଦୋକାନର କର୍ମଚାରୀମାନଙ୍କ ମଧ୍ୟରେ ଉପୁଜିଥିବା ସାମାନ୍ୟ ଝଗଡ଼ା ହିଁ ଏହି ଛୁରାମାଡ଼ର କାରଣ ବୋଲି ଜଣାପଡିଛି।

ଅନୁଗୁଳ ଜିଲ୍ଲାର ସୁଦ୍ରା ଗ୍ରାମରେ ଅପରାହ୍ନ ୨ଟାରୁ ୨ଟା ୨୫ ପର୍ଯ୍ୟନ୍ତ ପ୍ରବଳ କୁଆପଥର ବର୍ଷା ହୋଇଥିଲା। ଏହି ସମୟରେ ଗ୍ରାମରେ କୁଆପଥର ବର୍ଷା ସହିତ ଘଡ଼ଘଡ଼ି ମଧ୍ୟ ଦେଖିବାକୁ ମିଳିଥିଲା।