सासऱ्याचा खून करून डोंगरात फेकला मृतदेह; जावई मित्रासह जेरबंद ढवळपुरी (ता. पारनेर) येथील खुनाची 48 तासांत उकल; कौटुंबिक वादातून घडला थरारक प्रकार अहिल्यानगर : पारनेर तालुक्यातील ढवळपुरी शिवारातील डोंगर परिसरात सापडलेल्या खुनाच्या प्रकरणाची स्थानिक गुन्हे शाखेने अवघ्या दोन दिवसांत उकल केली असून सासऱ्याचा खून करणाऱ्या जावयासह त्याच्या मित्राला पोलिसांनी अटक केली आहे. कौटुंबिक वाद आणि मुलीच्या कारणावरून हा खून केल्याची धक्कादायक कबुली आरोपीने दिली आहे. पोलिसांकडून मिळालेल्या माहितीनुसार, 22 फेब्रुवारी 2026 रोजी दुपारी ढवळपुरी शिवारातील डोंगर परिसरात रामदास निवृत्ती सोनवणे (वय 55, रा. निमगाव सावा ता. जुन्नर जि. पुणे) यांचा अज्ञात व्यक्तीने गळा आवळून खून केल्याची घटना उघडकीस आली होती. या प्रकरणी 25 फेब्रुवारी रोजी तुळशीराम निवृत्ती सोनवणे यांनी दिलेल्या फिर्यादीवरून पारनेर पोलीस ठाण्यात भारतीय न्याय संहिता 2023 कलम 103(1) अन्वये गुन्हा दाखल करण्यात आला. घटनेचे गांभीर्य लक्षात घेऊन सोमनाथ घार्गे, पोलीस अधीक्षक यांनी स्थानिक गुन्हे शाखेला तात्काळ तपासाचे आदेश दिले. पोलीस निरीक्षक किरणकुमार कबाडी यांच्या नेतृत्वाखालील पथकाने घटनास्थळाची पाहणी करून गोपनीय माहितीच्या आधारे तपास सुरू केला. तपासादरम्यान हा खून मयताचा जावई अमित नारायण डुकरे (वय 34, रा. पारगाव तर्फे आळे ता. जुन्नर) व त्याचा मित्र अमोल उत्तम डुकरे (वय 31, रा. औरंगपूर ता. जुन्नर) यांनी केल्याचे निष्पन्न झाले. पोलिसांनी दोघांना ताब्यात घेतल्यानंतर चौकशीत आरोपी अमित डुकरे याने गुन्ह्याची कबुली दिली. पत्नी सुमारे वर्षभरापासून माहेरी राहत होती आणि सासरे वारंवार वाद घालत तसेच मुलीला मारून टाकण्याची धमकी देत असल्याचा राग मनात धरून त्याने मित्राच्या मदतीने सासऱ्याला कारमध्ये नेले. त्यानंतर गळा आवळून खून करून मृतदेह ढवळपुरी शिवारातील डोंगरात टाकल्याचे आरोपीने सांगितले. दोन्ही आरोपींना पुढील तपासासाठी पारनेर पोलीस ठाण्यात हजर करण्यात आले असून पुढील तपास सुरू आहे. ही कारवाई स्थानिक गुन्हे शाखेच्या पथकाने पोलीस अधीक्षक यांच्या मार्गदर्शनाखाली केली.

राविराज शिंदे

Farmer Nagar, Ahmednagar•

14 hrs ago