కరీంనగర్‌లోని టీఎన్‌జీఓ కాలనీలో గల భవానీ శంకర దేవాలయంలో మరకత శివలింగ విగ్రహ ప్రతిష్ఠాపన కార్యక్రమం కన్నుల పండువగా జరిగింది. వేద పండితులు పురాణం మహేశ్వర శర్మ పర్యవేక్షణలో ఈ విగ్రహ ప్రతిష్ఠాపన సందర్భంగా పలు ఆధ్యాత్మిక, ధార్మిక కార్యక్రమాలను వైభవంగా నిర్వహించారు. ఈ కార్యక్రమాల్లో భక్తులు, కాలనీ వాసులు, దాతలు, ప్రముఖులు పెద్ద సంఖ్యలో పాల్గొని విజయవంతం చేశారు. వేద పండితుల మంత్రోచ్ఛారణల మధ్య జరిగిన ఈ ప్రతిష్ఠాపన మహోత్సవం అత్యంత భక్తిశ్రద్ధలతో సాగింది. ఇందులో ప్రత్యేక పూజలు, హోమాలు, అభిషేకాలు, అన్నదాన కార్యక్రమాలు నిర్వహించారు. భక్తులందరూ స్వచ్ఛందంగా పాల్గొనడంతో ఆలయ ప్రాంగణం మొత్తం ఆధ్యాత్మిక వాతావరణంతో కళకళలాడింది. మధ్యాహ్నం విగ్రహ ప్రతిష్ఠాపన పూర్తయిన అనంతరం, సాయంత్రం శివపార్వతుల కల్యాణోత్సవం జరిగింది. ఈ మరకత శివలింగ ప్రతిష్ఠాపనతో ఆలయానికి మరింత ఆధ్యాత్మిక వైభవం వచ్చిందని పురాణం మహేశ్వర శర్మ తెలిపారు. ఆయన ఈ సందర్భంగా మరకత శివలింగం యొక్క ప్రత్యేకత, ప్రాముఖ్యతలను భక్తులకు వివరించారు.

పూజ్య గురువులు సురేష్ ఆత్మారామ్ మహరాజ్ ఆధ్వర్యంలో తెలంగాణ శ్రీనివాసుల సేవా సంస్థ సభ్యులు పర్యావరణ పరిరక్షణకు తమ వంతు బాధ్యతను చాటుకుంటూ సీడ్ బాల్స్ తయారీకి శ్రీకారం చుట్టారు. వర్షాకాలంలో ప్రతి ఒక్కరూ ఒక మొక్కను నాటాలనే లక్ష్యంతో ఈ సీడ్ బాల్స్ తయారు చేస్తున్నారు. అడవులు, కొండ ప్రాంతాలు, ఖాళీ స్థలాల్లో ఈ సీడ్ బాల్స్‌ను విసరడం ద్వారా మొక్కలు మొలిచి అడవుల విస్తీర్ణం పెరుగుతుందని, ఇది ప్రకృతి సమతుల్యతను కాపాడటానికి ఎంతో అవసరమని వారు తెలిపారు. తెలంగాణ శ్రీనివాసుల సేవా సంస్థ వ్యవస్థాపక చైర్మన్ శ్రీనివాస్ రెడ్డి వూట్కూరి మాట్లాడుతూ, పెరుగుతున్న జనాభా అవసరాల కోసం అడవులను నరికివేయడం వల్ల పర్యావరణ సమతుల్యత తీవ్రంగా దెబ్బతింటోందని ఆందోళన వ్యక్తం చేశారు. అడవుల నాశనం కారణంగా అడవి జంతువులు గ్రామాలు, పట్టణాల్లోకి ప్రవేశించడం, పంటలకు నష్టం కలగడం, భూగర్భ జలాలు తగ్గిపోవడం వంటి సమస్యలు తీవ్రరూపం దాల్చుతున్నాయని ఆయన పేర్కొన్నారు. అంతేకాకుండా, చెట్ల కొరత వలన ఉష్ణోగ్రతలు 45 నుండి 48 డిగ్రీల వరకు పెరిగి మానవాళికి తీవ్రమైన ముప్పు ఏర్పడుతోందని హెచ్చరించారు. ఈ సందర్భంగా, శ్రీనివాస మిత్రులు గురువుగారు సభ్యులకు సీడ్ బాల్స్ తయారీ విధానాన్ని ప్రత్యక్షంగా ప్రదర్శించి అవగాహన కల్పించారు. ప్రస్తుతం తెలంగాణ శ్రీనివాసుల సేవా సంస్థ ఆధ్వర్యంలో ఈ సీడ్ బాల్స్ తయారీ కార్యక్రమం కొనసాగుతోంది.

బెజ్జంకి మండల కేంద్రంలోని శ్రీ లక్ష్మీనరసింహస్వామి ఆలయంలో గురువారం నిర్వహించనున్న గిరిప్రదక్షిణ కార్యక్రమానికి విస్తృత ఏర్పాట్లు పూర్తి చేశారు. ఉదయం 5:30 గంటలకు ప్రారంభమయ్యే ఈ ఆధ్యాత్మిక కార్యక్రమంలో మండలంలోని భక్తులతో పాటు కరీంనగర్, సిద్ధిపేట జిల్లాల నుంచి కూడా పెద్ద సంఖ్యలో భక్తులు పాల్గొంటారని ఆలయ ప్రధాన పూజారి శేషం మధుసూదనాచార్యులు తెలిపారు. భక్తులకు ఎలాంటి ఇబ్బందులు కలగకుండా అన్ని ఏర్పాట్లు పూర్తి చేసినట్లు బెజ్జంకి సర్పంచ్ బొల్లం శ్రీధర్ వెల్లడించారు. గిరిప్రదక్షిణలో పాల్గొని శ్రీ లక్ష్మీనరసింహస్వామివారి ఆశీస్సులు పొందాలని ఆయన భక్తులకు పిలుపునిచ్చారు. ఈ కార్యక్రమాన్ని భక్తిశ్రద్ధల మధ్య ఘనంగా నిర్వహించేందుకు ఆలయ కమిటీ ప్రత్యేక చర్యలు చేపట్టింది.

కరీంనగర్ జిల్లాలో ప్రైవేట్ విద్యాసంస్థలు విద్యను సేవా దృక్పథంతో కాకుండా కేవలం వ్యాపారంగా మార్చి, నిరుపేద విద్యార్థులను దోచుకుంటున్నాయని కరీంనగర్ జిల్లా మాజీ గ్రంథాలయ సంస్థ చైర్మన్ అనిల్ కుమార్ గౌడ్ తీవ్ర ఆగ్రహం వ్యక్తం చేశారు. విద్యాశాఖ రెండు రోజుల్లోగా ఈ విద్యాసంస్థలపై తగిన చర్యలు తీసుకోవాలని ఆయన డిమాండ్ చేశారు. పొన్నం అనిల్ కుమార్ గౌడ్ ఆధ్వర్యంలో బిఆర్ఎస్‌వి నేతలు నేడు డీఈవోను కలిశారు. గత రెండు రోజుల క్రితం ఇచ్చిన హామీ ప్రకారం, ప్రైవేటు పాఠశాలల్లో జరుగుతున్న దోపిడీకి సంబంధించిన సమగ్ర నివేదికను, అక్రమంగా పుస్తకాలను అమ్ముతున్న గోదాముల వివరాలను, పుస్తకాల నిల్వలకు సంబంధించిన సమగ్ర నివేదికను తయారు చేసి డీఈవోకు అందజేశారు. ఈ సందర్భంగా అనిల్ కుమార్ గౌడ్ మాట్లాడుతూ, జిల్లాలో ప్రైవేట్ పాఠశాలల దోపిడీని 'విద్య వ్యవస్థల్లో నెలకొన్న సమస్యలు వాటిపై మీ స్పందన' అనే కార్యక్రమం ద్వారా వివరించామని తెలిపారు. ప్రస్తుతం కాంగ్రెస్ పార్టీ ప్రభుత్వ హయాంలో పాఠశాలల్లో కనీస వసతులు లేవని, గురుకులాలు నిర్వీర్యం అయ్యాయని, దీంతో ప్రజలు ప్రైవేటు పాఠశాలలపై మొగ్గుచూపాల్సిన పరిస్థితి నెలకొందని ఆయన విమర్శించారు. దీనిని ఆసరాగా చేసుకొని ప్రైవేటు పాఠశాలలు దోపిడీకి పాల్పడుతున్నాయని, వీటిని అరికట్టాల్సిన బాధ్యత ప్రభుత్వంపై ఉందని స్పష్టం చేశారు. కొంతమంది అధికారులు పాఠశాల యజమాన్యాలతో మాట్లాడి, అక్రమంగా పుస్తకాలను అమ్ముకోవడానికి ప్రత్యక్షంగా మద్దతు ఇస్తున్నారని తమకు సమాచారం ఉందని ఆయన ఆరోపించారు. తల్లిదండ్రులు తమ పిల్లలను చదివించాలంటే ఆస్తులు అమ్ముకోవాల్సిన దుస్థితి ఈ ప్రభుత్వంలో ఉందని ఆవేదన వ్యక్తం చేశారు. రెండు రోజుల్లో డీఈవో తగిన ఆదేశాలు జారీ చేసి అధికారుల ద్వారా చర్యలు తీసుకోకుంటే, బిఆర్ఎస్‌వి ఆధ్వర్యంలో ప్రైవేటు పాఠశాలల పుస్తక గోదాములను ముట్టడిస్తామని అనిల్ కుమార్ గౌడ్ హెచ్చరించారు. ఈ ముట్టడి చర్యలు శాంతియుతంగానే ఉంటాయని, మీడియా ప్రతినిధులకు, పోలీసులకు సమాచారం ఇచ్చి మరీ ఈ గోదాములను ముట్టడిస్తామని పేర్కొన్నారు. సోషల్ మీడియాలో కూడా ఎప్పటికప్పుడు నిజాలను బయటపెడతామని ఆయన స్పష్టం చేశారు. ఈ కార్యక్రమంలో పొన్నం అనిల్ కుమార్ గౌడ్ తో పాటు జిల్లా బిఆర్ఎస్‌వి కోఆర్డినేటర్ ద్యావ మధుసూదన్ రెడ్డి, శాతవాహన యూనివర్సిటీ ఇంచార్జ్ చుక్క శ్రీనివాస్, నగర అధ్యక్షుడు బొంకూరి మోహన్, నియోజకవర్గ యూత్ అధ్యక్షుడు గంగాధర చందు, పటేల్ శ్రవణ్ రెడ్డి, సోమిరెడ్డి రాజా నరేష్ రెడ్డి, వడ్లకొండ పరుశరామ్, విక్రమ్, అన్వేష్, దినేష్ తదితరులు పాల్గొన్నారు.

భారత విద్యార్థి ఫెడరేషన్ (SFI) కరీంనగర్ జిల్లా కమిటీ బుధవారం కరీంనగర్ పట్టణంలోని ప్రభుత్వ సైన్స్ వింగ్ జూనియర్ కళాశాలను సర్వే చేసింది. ఈ సందర్భంగా నాయకులు విద్యార్థులతో మాట్లాడి వారి సమస్యలను తెలుసుకున్నారు. ఎస్ఎఫ్ఐ జిల్లా కార్యదర్శి గజ్జెల శ్రీకాంత్ మాట్లాడుతూ, ఎంతోమంది మేధావులను అందించిన సైన్స్ వింగ్ కళాశాల ప్రస్తుతం కనీస వసతులు లేక అల్లాడుతోందని ఆవేదన వ్యక్తం చేశారు. కళాశాలలో విద్యార్థులకు సరిపడా బెంచీలు, క్లాస్ రూములు, ల్యాబ్‌లు లేని పరిస్థితి ఉందని, మొత్తం 26 తరగతి గదులు అవసరం ఉండగా, కేవలం 12 రూములతోనే నెట్టుకొస్తున్నారని విమర్శించారు. పక్కనే ఉన్న పాడుబడిన తరగతి గదుల్లో సౌకర్యాలు లేకపోవడంతో విద్యార్థులు తీవ్ర ఇబ్బందులు పడుతున్నారని ఆయన తెలిపారు. అంతేకాకుండా, ఏఈటీ (AET) సబ్జెక్టుకు కనీసం ఫ్యాకల్టీని కూడా రిక్రూట్ చేయలేని పరిస్థితిలో రాష్ట్ర ప్రభుత్వం ఉందని, ఈ విద్యాసంవత్సరంలో నూతన సిలబస్ ప్రవేశపెట్టి, ఫస్ట్ ఇయర్ విద్యార్థులకు ల్యాబ్‌లు నిర్వహించాలని చెప్తున్నప్పటికీ, కళాశాలలో మాత్రం ఎలాంటి ల్యాబ్ పరికరాలు లేవని ఆయన మండిపడ్డారు. కరీంనగర్ నడిబొడ్డున ఉన్న ఈ కళాశాల సమస్యలు అధికారులకు, ప్రజాప్రతినిధులకు ఎందుకు కనిపించడం లేదని ప్రశ్నించారు. కాంగ్రెస్ ప్రభుత్వం అధికారంలోకి వస్తే విద్యకు అధిక ప్రాధాన్యత ఇస్తామని చెప్పినప్పటికీ, ఇప్పటికీ విద్యార్థులను, విద్యారంగ సమస్యలను పట్టించుకున్న దాఖలాలు రాష్ట్రవ్యాప్తంగా లేవని శ్రీకాంత్ ఆరోపించారు. రోజురోజుకూ విద్యార్థులకు సమస్యలు పుట్టగొడుగుల్లా పెరిగిపోతున్నా రాష్ట్ర ప్రభుత్వానికి చలనం లేదని ఆయన అన్నారు. ప్రతి ఏటా విద్యారంగానికి కేటాయించే బడ్జెట్‌లో కోతలు వేస్తూ పేద, మధ్యతరగతి విద్యార్థులు చదువుకునే ప్రభుత్వ పాఠశాలల్లో కనీస మౌలిక వసతులు లేని పరిస్థితి రాష్ట్రవ్యాప్తంగా కనిపిస్తోందని విమర్శించారు. కావున ప్రభుత్వం, విద్యాశాఖ అధికారులు తక్షణమే స్పందించి సైన్స్ వింగ్ కళాశాలకు ల్యాబ్ పరికరాలను సమకూర్చాలని, మౌలిక వసతులు కల్పించాలని ఎస్ఎఫ్ఐ డిమాండ్ చేసింది. అంతేకాకుండా, రాష్ట్రవ్యాప్తంగా ఉన్న విద్యారంగ సమస్యలను పరిష్కరించాలని కోరింది. లేనిపక్షంలో ఎస్ఎఫ్ఐ ఆధ్వర్యంలో పెద్ద ఎత్తున ఆందోళనలు చేపడతామని హెచ్చరించింది. ఈ కార్యక్రమంలో జిల్లా ఉపాధ్యక్షులు వినయ్, గట్టు ఆకాష్, జిల్లా కమిటీ సభ్యులు సన్నీ, నరేష్ తో పాటు పలువురు విద్యార్థులు పాల్గొన్నారు.

అఖిలభారత కాంగ్రెస్ పార్టీ అగ్రనేత రాహుల్ గాంధీ, దేశం ఎదుర్కొంటున్న విద్యార్థుల జటిలమైన సమస్యపై దృష్టి సారించారు. కోటాలో వరుస ఘటనలు జరుగుతున్న నేపథ్యంలో అక్కడి విద్యార్థులతో సమావేశమై పరిస్థితులను సమీక్షించారు. దేశవ్యాప్తంగా పెరుగుతున్న నిరుద్యోగం, విద్యార్థుల ఆత్మహత్యలు, వారి ఆత్మస్థైర్యాన్ని దెబ్బతీసే విద్యావ్యవస్థ తీరు విద్యార్థుల భవిష్యత్తుపై తీవ్ర ప్రభావం చూపుతున్నాయని ఆయన ప్రస్తావించారు. విద్యా వ్యవస్థలో మార్పులు, సంస్కరణలు చేయడం ద్వారా లోపాలను సరిదిద్దవచ్చని రాహుల్ గాంధీ సూచించారు. యువత భవిష్యత్తు రక్షణ కోసం ప్రభుత్వం తక్షణ చర్యలు చేపట్టేలా ఒత్తిడి తీసుకురావాల్సిన బాధ్యత మనందరిపై ఉందని ఆయన నొక్కి చెప్పారు. ఇటీవల జరిగిన నీట్ పరీక్ష దేశ విద్యా వ్యవస్థలోని లోపాలను స్పష్టంగా చూపించిందని కాంగ్రెస్ నాయకులు పేర్కొన్నారు. సుమారు 22 లక్షల మంది విద్యార్థులు నీట్ పరీక్ష రాయడానికి సిద్ధమైతే, ఒక విద్యార్థిపై ఒక కుటుంబం పది నుంచి పదిహేను లక్షల వరకు ఖర్చు చేస్తోందని తెలిపారు. గణాంకాల ప్రకారం, కేంద్ర ప్రభుత్వం విద్యాశాఖకు కేటాయించే బడ్జెట్ (1.4 లక్షల కోట్లు) కంటే, Gen Z కుటుంబాలు SSC, UPSC, RRB, JEE, నీట్ పరీక్షల కోసం పెట్టే ఖర్చు (3.5 లక్షల కోట్లు) మూడు రెట్లు ఎక్కువగా ఉంది. దేశవ్యాప్తంగా మూడు వేల మంది పరీక్షలు రాస్తే ఒకరు మాత్రమే ఐఏఎస్‌కు సెలెక్ట్ అయ్యే పరిస్థితి నెలకొందని, మిగతావారు అసంఘటిత రంగ వ్యవస్థలలో పనిచేసే దుస్థితి దాపురించిందని ఆందోళన వ్యక్తం చేశారు. నీట్ పరీక్షకు ముందే పేపర్ లీక్ అయి దేశవ్యాప్తంగా పరీక్ష వాయిదా వేయాల్సి వచ్చిందని, దీనిపై దేశవ్యాప్తంగా నిరసనలు వెల్లువెత్తాయని, కేంద్ర విద్యా శాఖ మంత్రి రాజీనామా చేయాలని ముక్తకంఠంతో నినదించాల్సి వచ్చిందని గుర్తుచేశారు. ఈ ఘటనపై విచారణ జరిపి దోషులను శిక్షించాలని డిమాండ్ చేశారు. పేపర్ లీకేజీల వల్ల దేశవ్యాప్తంగా 1000కి పైగా విద్యార్థులు ఆత్మహత్య చేసుకున్నారని, శ్రేయ అనే విద్యార్థిని మళ్లీ నీట్ పరీక్ష రాయడం కోసం కుటుంబానికి భారంగా మారకూడదని ఆత్మహత్య చేసుకున్న సంఘటన దేశ ప్రజలందరికీ తెలిసిందేనని నేతలు ఆవేదన వ్యక్తం చేశారు. రాహుల్ గాంధీ విద్యార్థుల తరఫున గళమెత్తి, యువతకు కావలసిన విద్య, ఉపాధి అవకాశాలను కల్పించాలని డిమాండ్ చేశారు. పోటీ పరీక్షలకు సిద్ధమవడానికి కోచింగ్ సెంటర్లు, హాస్టల్లు, ఫీజుల వసూలు వంటి అంశాలలో దోపిడీ జరుగుతోందని ఆరోపించారు. విద్యార్థులకు న్యాయం చేయడంలో కేంద్ర ప్రభుత్వం పూర్తిగా విఫలమైందని, ఈ అంశంలో విద్యార్థులకు తీరని అన్యాయం చేసిన కేంద్ర విద్యా శాఖ మంత్రిపై చర్యలు తీసుకుంటూ, జరిగిన లీకేజీలపై విచారణ జరిపించాలని డిమాండ్ చేశారు. ఈ సమస్యపై పోరాడటానికి, జూన్ 25 నుండి ఆగస్టు 9 వరకు నేషనల్ స్టూడెంట్స్ యూనియన్ ఆఫ్ ఇండియా, యూత్ కాంగ్రెస్, అన్ని విభాగాల కార్యవర్గాలు, మండల కాంగ్రెస్, బ్లాక్ కాంగ్రెస్, జిల్లా కాంగ్రెస్ కార్యవర్గాలు అన్నీ కలిసి కార్యాచరణతో సిద్ధమవుతున్నాయి. ఆగస్టు 9న చలో ఢిల్లీ కార్యక్రమంతో దేశవ్యాప్తంగా ఉన్న విద్యార్థులకు విద్యా వ్యవస్థపై జరుగుతున్న దోపిడీ, అన్యాయాల గురించి అవగాహన కార్యక్రమం నిర్వహించబడుతుంది. ఈ సందర్భంగా కేంద్ర విద్యా శాఖ మంత్రిపై చర్యలు తీసుకుంటూ, అతడిని కేంద్ర మంత్రి పదవి నుంచి బర్తరఫ్ చేయాలని డిమాండ్ చేశారు. రాజన్న సిరిసిల్ల డీసీసీ అధ్యక్షులు సంగీతం శ్రీనివాస్ ఆధ్వర్యంలో జరిగిన ఈ మీడియా సమావేశంలో డీసీసీ ఉపాధ్యక్షులు కూరగాయల కొమరయ్య, దత్తాత్రేయ గౌడ్, పిల్లి కనకయ్య, పులి రాంబాబు, జిల్లా కాంగ్రెస్ అధికార ప్రతినిధి చిలుక రమేష్, జిల్లా ప్రధాన కార్యదర్శులు వకులాభరణం శ్రీనివాస్, గొట్టే రుక్మిణి, రాగుల జగన్, మంగకిరణ్, గిరిధర్ రెడ్డి, బాల్ లక్ష్మి, సోమల రోజా, వనిత, నాగుల విష్ణు, మిరియాల కార్ శ్రీనివాస్, ఫిరోజ్ పాషా, అరుణ్ చారి, వెంకట్ రెడ్డి, జిల్లా మైనార్టీ సెల్ అధ్యక్షులు రియాజ్ తదితరులు పాల్గొన్నారు.

బుధవారం ములుగు జిల్లాలోని ఏటూరునాగారం మండలం ఎలిషెట్టిపల్లి గ్రామంలో తీవ్ర విషాదం నెలకొంది. తీవ్ర అనారోగ్యంతో బాధపడుతున్న రాకేష్‌ను స్థానికులు తెప్పపై జంపన్నవాగు దాటించి ఆసుపత్రికి తరలించే ప్రయత్నం చేశారు. అయితే, భారీ వర్షాల కారణంగా జంపన్నవాగు ఉద్ధృతంగా ప్రవహించడంతో రాకపోకలు నిలిచిపోయి, సమయానికి వైద్యం అందడంలో తీవ్ర జాప్యం జరిగింది. ఈ ఆలస్యం కారణంగా రాకేష్ మృతి చెందినట్లు గ్రామస్థులు తెలిపారు. ఈ ఘటనతో గ్రామంలో విషాద ఛాయలు అలుముకున్నాయి.

జగిత్యాల జిల్లాలోని ఎండపల్లి మండలం గుడిసెలపేట గ్రామంలో బుధవారం ఉదయం ఒక పిచ్చికుక్క స్వైర విహారం చేసింది. ఈ ఘటనలో పిచ్చికుక్క ఆరుగురిపై దాడి చేసి గాయపరచగా, వెంటనే బాధితులను జగిత్యాల ప్రభుత్వ ఆసుపత్రికి తరలించి చికిత్స అందిస్తున్నారు.

కరీంనగర్‌లోని టీఎన్‌జీఓ కాలనీలో గల భవానీ శంకర దేవాలయంలో మరకత శివలింగ విగ్రహ ప్రతిష్ఠాపన కార్యక్రమం కన్నుల పండువగా జరిగింది. వేద పండితులు పురాణం మహేశ్వర శర్మ పర్యవేక్షణలో ఈ విగ్రహ ప్రతిష్ఠాపన సందర్భంగా పలు ఆధ్యాత్మిక, ధార్మిక కార్యక్రమాలను వైభవంగా నిర్వహించారు. ఈ కార్యక్రమాల్లో భక్తులు, కాలనీ వాసులు, దాతలు, ప్రముఖులు పెద్ద సంఖ్యలో పాల్గొని విజయవంతం చేశారు. వేద పండితుల మంత్రోచ్ఛారణల మధ్య జరిగిన ఈ ప్రతిష్ఠాపన మహోత్సవం అత్యంత భక్తిశ్రద్ధలతో సాగింది. ఇందులో ప్రత్యేక పూజలు, హోమాలు, అభిషేకాలు, అన్నదాన కార్యక్రమాలు నిర్వహించారు. భక్తులందరూ స్వచ్ఛందంగా పాల్గొనడంతో ఆలయ ప్రాంగణం మొత్తం ఆధ్యాత్మిక వాతావరణంతో కళకళలాడింది. మధ్యాహ్నం విగ్రహ ప్రతిష్ఠాపన పూర్తయిన అనంతరం, సాయంత్రం శివపార్వతుల కల్యాణోత్సవం జరిగింది. ఈ మరకత శివలింగ ప్రతిష్ఠాపనతో ఆలయానికి మరింత ఆధ్యాత్మిక వైభవం వచ్చిందని పురాణం మహేశ్వర శర్మ తెలిపారు. ఆయన ఈ సందర్భంగా మరకత శివలింగం యొక్క ప్రత్యేకత, ప్రాముఖ్యతలను భక్తులకు వివరించారు.