লখিমপুৰৰ ২ নং দক্ষিণ ৰূপহীত পৈতৃক সম্পত্তিৰ লোভত কণিষ্ঠ ভাতৃয়ে জ্যেষ্ঠৰ প্ৰায় ১৫ লাখ টকাৰ সামগ্ৰী আৰু প্ৰয়োজনীয় নথিপত্ৰ জ্বলাই দিলে। আই টি বি পিৰ জোৱান হেম অধিকাৰীৰ এই বৃহৎ ক্ষতিৰ বাবে অভিযুক্ত বলিন অধিকাৰীক আৰক্ষীয়ে আটক কৰিছে।

লখিমপুৰৰ বগীনদী মডাৰ্ণ ক্লাবত ১৪ মে'ত ব'হাগী বিদায় অনুষ্ঠানৰ অন্তিম দিনা মুকলি বিহু আৰু সাংস্কৃতিক সন্ধিয়া অনুষ্ঠিত হ'ব। এই অনুষ্ঠানত কণ্ঠশিল্পী মৰ্মিতা মিত্ৰই গীত পৰিৱেশন কৰিব।

প্ৰথম কেবিনেট বৈঠকৰ পিছতে মুখ্যমন্ত্ৰীয়ে মন্ত্ৰী সভাৰ সন্দৰ্ভত গুৰুত্বপূৰ্ণ মন্তব্য কৰিছে। তেওঁ জনাই যে অতি শীঘ্ৰেই মন্ত্ৰীসকলক তেওঁলোকৰ দায়িত্ব প্ৰদান কৰা হ'ব।

মুখ্যমন্ত্ৰী হিমন্ত বিশ্ব শৰ্মাই নতুন অসম চৰকাৰৰ প্ৰথম কেবিনেট বৈঠকত বিধানসভাত সম নাগৰিক সংহিতা (UCC) বিধেয়ক উত্থাপনৰ সিদ্ধান্তৰ কথা ঘোষণা কৰিছে। নিৰ্বাচনৰ সময়ত দিয়া প্ৰতিশ্ৰুতি অনুসৰি এই সিদ্ধান্ত লোৱা হৈছে, যিয়ে ৰাজ্যত UCC প্ৰৱৰ্তনৰ পথ মুকলি কৰিব।

‘সেউজ ছচাইটী’ৰ উদ্যোগত আন্তঃৰাষ্ট্ৰীয় উদ্ভিদ স্বাস্থ্য দিৱস পালন: শিশু সৰ্প উদ্ধাৰকাৰী ৰাজ সৌৰভ বৰকটকীলৈ ‘সৰ্প কোঁৱৰ’ উপাধি প্ৰদান | আন্তঃৰাষ্ট্ৰীয় উদ্ভিদ স্বাস্থ্য দিৱসৰ সৈতে সংগতি ৰাখি পৰিৱেশ সংৰক্ষণমূলক সংগঠন ‘সেউজ ছচাইটী’ৰ ঢেকিয়াজুলি আঞ্চলিক শাখা আৰু ঢেকিয়াজুলি উচ্চতৰ মাধ্যমিক বিদ্যালয়ৰ উদ্যোগত আজি এক গাম্ভীৰ্যপূৰ্ণ অনুষ্ঠান সম্পন্ন হয়। উক্ত অনুষ্ঠানত ভাৰতবৰ্ষৰ সৰ্ব কনিষ্ঠ সৰ্প উদ্ধাৰকাৰী হিচাপে পৰিচিত তেজপুৰৰ ৫ বছৰীয়া শিশু ৰাজ সৌৰভ বৰকটকীক আনুষ্ঠানিকভাৱে "সৰ্প কোঁৱৰ" উপাধি প্ৰদান কৰা হয়। বিদ্যালয়ৰ অধ্যক্ষ জুৰি ওজা আৰু পৰিচালনা সমিতিৰ সভাপতি নাৰায়ণ বৰাৰ নেতৃত্বত অনুষ্ঠিত এই সভাত কেইবাগৰাকীও বিশিষ্ট ব্যক্তি তথা সেউজ ছচাইটীৰ বিষয়ববীয়াসকলে অংশগ্ৰহণ কৰে। উল্লেখ্য যে, সৰ্পবান্ধৱ সৌৰভ বৰকটকী আৰু কৃষ্ণা কলিতা বৰকটকীৰ পুত্ৰ ৰাজে মাত্ৰ ৪ বছৰ বয়সৰ পৰাই শোণিতপুৰ জিলাৰ বিভিন্ন প্ৰান্তত সৰ্প উদ্ধাৰৰ লগতে গছপুলি ৰোপণ আৰু বন্যপ্ৰাণী সংৰক্ষণৰ কামত নিয়োজিত হৈ ৰাইজৰ দৃষ্টি আকৰ্ষণ কৰিবলৈ সক্ষম হৈছে। তেওঁৰ এই অনন্য প্ৰতিভাক স্বীকৃতি জনাই সংগঠনটোৰ ৰাজ্যিক সভাপতি সঞ্জয় বৰুৱাই শিশু ৰাজক অভিনন্দন জ্ঞাপন কৰে।

শিৱসাগৰ জিলা কংগ্ৰেছে এক সংবাদমেল পাতি অখিল গগৈয়ে মিত্ৰজোঁটৰ পৰাজয়ৰ বাবে গৌৰৱ গগৈক জগৰীয়া কৰা মন্তব্যৰ তীব্ৰ বিৰোধিতা কৰিছে। জিলা কংগ্ৰেছে অখিল গগৈৰ অভিযোগ নস্যাৎ কৰি কয় যে এনে মন্তব্যই কংগ্ৰেছ কৰ্মীসকলৰ মনত যথেষ্ট দুখ দিছে। তেওঁলোকে অদূৰ ভৱিষ্যতে মিত্ৰজোঁটত ৰাইজৰ দল থাকিবনে নাই বুলিও প্ৰশ্ন উত্থাপন কৰিছে।

যোৰহাটৰ কমলেশ্বৰ কুটুম নামৰ এজন যুৱকে বৰলুইতৰ চাপৰিত লাখ লাখ গছপুলি ৰোপণ কৰি প্ৰকৃতি প্ৰেমৰ এক অনন্য নিদৰ্শন দাঙি ধৰিছে। ২০১৯ চনৰ পৰা ৮ বছৰত তেওঁ ১১২০০ হেক্টৰ মাটিত ১১.৫ লাখ গছপুলি ৰোপণ আৰু প্ৰতিপালন কৰিছে। এই প্ৰচেষ্টাত বালিপাৰা ফাউণ্ডেচনৰ আংশিক সহযোগিতাত প্ৰায় ডেৰশ লোকে অংশগ্ৰহণ কৰিছিল।

চৰাইদেউৰ মথুৰাপুৰ বাগিচা প্ৰাথমিক বিদ্যালয়ৰ এজন শিক্ষকে ছাত্ৰ-ছাত্ৰীক গুৰুলাগুৰুলকৈ প্ৰহাৰ কৰাৰ ঘটনাই চাঞ্চল্যৰ সৃষ্টি কৰিছে। এই বৰ্বৰ কাণ্ডৰ বিৰুদ্ধে আছা (ATSA)ই তীব্ৰ প্ৰতিক্ৰিয়া ব্যক্ত কৰি দোষী শিক্ষকৰ ওপৰত উচিত ব্যৱস্থা গ্ৰহণৰ দাবী জনাইছে।

লখিমপুৰৰ ২ নং দক্ষিণ ৰূপহীত পৈতৃক সম্পত্তিৰ লোভত কণিষ্ঠ ভাতৃয়ে জ্যেষ্ঠৰ প্ৰায় ১৫ লাখ টকাৰ সামগ্ৰী আৰু প্ৰয়োজনীয় নথিপত্ৰ জ্বলাই দিলে। আই টি বি পিৰ জোৱান হেম অধিকাৰীৰ এই বৃহৎ ক্ষতিৰ বাবে অভিযুক্ত বলিন অধিকাৰীক আৰক্ষীয়ে আটক কৰিছে।