நேற்று இரவு, சத்தியமங்கலம் புலிகள் காப்பகத்திற்கு உட்பட்ட திம்பம் மலைப்பாதையில் ஒரு தடுப்புச்சுவர் மீது சிறுத்தை ஒன்று படுத்திருந்தது. இதைக் கண்ட வாகன ஓட்டி ஒருவர் தனது செல்போனில் படமெடுத்தார். நீண்ட நேரம் அங்கேயே இருந்த சிறுத்தை, பின்னர் வனப்பகுதிக்குள் திரும்பிச் சென்றது. சத்தியமங்கலம் புலிகள் காப்பகத்தில் உள்ள பத்துக்கும் மேற்பட்ட வனச்சரகங்களில் சிறுத்தை, புலி, மான், கரடி, யானை போன்ற பல்வேறு வனவிலங்குகள் வசித்து வருகின்றன. திம்பம் மலைப்பாதையில் இரவு நேர போக்குவரத்து தடை செய்யப்பட்டுள்ள நிலையில், வனவிலங்குகள் சாலைகளில் அதிக அளவில் நடமாடுகின்றன. பகல் நேரங்களிலும் யானைகளின் நடமாட்டம் அதிகமாக இருப்பதால், வாகன ஓட்டிகள் கவனத்துடன் செல்லுமாறு வனத்துறையினர் ஏற்கனவே எச்சரிக்கை விடுத்துள்ளனர். இந்நிலையில், இரவு நேரங்களில் பயணம் செய்யும் வாகன ஓட்டிகள் கூடுதல் கவனத்துடன் செல்ல வேண்டும் என வனத்துறையினர் மீண்டும் அறிவுறுத்தியுள்ளனர்.

சேலம் மாநகரில் அமைந்துள்ள ஒரு அரசுப்பள்ளியில் மாணவிகளுக்கு காவல்துறையின் 'சிங்கப் பெண்' சிறப்பு அதிரடிப்படையின் செயல்பாடுகள் குறித்து இன்று விழிப்புணர்வு நிகழ்ச்சி நடத்தப்பட்டது. அவசர காலங்களில் காவல்துறையின் உதவி எண்கள் குறித்தும், தற்காப்புக் கலைகள் குறித்தும் மாணவர்களுக்கு விளக்கமளிக்கப்பட்டது. இந்த விழிப்புணர்வு நிகழ்ச்சியில், அவசரகால உதவிகளுக்கான 100 (காவல்துறை), 112 (அவசர உதவி) மற்றும் 1098 (குழந்தைகள் உதவி மையம்) ஆகிய தொலைபேசி எண்களின் பயன்பாடுகள் குறித்து மாணவிகளுக்கு எடுத்துரைக்கப்பட்டது. ஏராளமான மாணவிகளும், பெண் காவல்துறை அதிகாரிகளும் இந்த நிகழ்வில் கலந்துகொண்டனர்.

திண்டுக்கல் மாவட்டம் வேடசந்தூர் பேரூராட்சிக்கு உட்பட்ட வடமதுரை சாலையில், பயன்படாத நிலையில் நான்கு சக்கர வாகனங்களின் டயர்கள் குவியலாக வைக்கப்பட்டுள்ளன. இது அப்பகுதியில் சுகாதாரச் சீர்கேட்டை ஏற்படுத்தி வருகிறது. மழைக்காலங்களில் இந்த டயர்களில் மழைநீர் தேங்கி, கொசுப் புழுக்கள் உருவாகும் நிலை உள்ளது. இதனால் நோய் தொற்று பரவும் அபாயம் இருப்பதாகவும், பொதுமக்கள் வேடசந்தூர் பேரூராட்சி நிர்வாகம் அலட்சியம் காட்டாமல் உடனடியாக இந்தச் சிக்கலைச் சரிசெய்ய வேண்டும் என்றும் கோரிக்கை விடுத்துள்ளனர்.

திண்டுக்கல் மாவட்டம் நத்தத்தில், தங்களுக்கு போதிய விலை கிடைக்காததால் விவசாயிகள் தாங்கள் விளைவித்த மாங்காய்களை குப்பையில் கொட்டி அழித்துள்ளனர். இதனால், மாங்காய்கள் அனைத்தும் வீணாகி குப்பையில் குவிந்தன. இல்லாதவர்களுக்கு ஒரு ரூபாய் விலைக்குக் கூட கொடுத்து வைத்திருக்கலாமே என சமூக வலைத்தளங்களில் கருத்துக்கள் எழுந்துள்ளன.

தமிழகம் மற்றும் கேரள எல்லையில் அமைந்துள்ள முல்லைப்பெரியாறு அணையின் நீர்ப்பிடிப்புப் பகுதிகளில் மழை பெய்ய வேண்டும் என வலியுறுத்தி தேக்கடியில் கம்பம் பள்ளத்தாக்கு விவசாயிகள் மும்மதப் பிரார்த்தனை வழிபாட்டு நிகழ்ச்சியை நடத்தினர். தேனி, திண்டுக்கல், மதுரை, ராமநாதபுரம், சிவகங்கை ஆகிய ஐந்து மாவட்ட மக்களின் குடிநீர் மற்றும் விவசாயத்திற்கான முக்கிய நீராதாரமாக முல்லைப்பெரியாறு அணை விளங்குகிறது. இந்த அணை நீரை நம்பி இப்பகுதியில் விவசாயம் நடைபெற்று வருகிறது. தேனி மாவட்டத்தில் உள்ள 14,707 ஏக்கர் இருபோக சாகுபடி நிலங்கள் பெரியாறு அணை நீரையே சார்ந்துள்ளன. இந்த நிலங்களுக்கு பெரியாறு அணையிலிருந்து முதல் போக விவசாயத்திற்காக ஒவ்வொரு ஆண்டும் ஜூன் முதல் வாரத்தில் தண்ணீர் திறக்கப்படுவது வழக்கம். ஆனால், இந்த ஆண்டு ஜூன் ஒன்றாம் தேதி தமிழகப் பகுதிக்கு தண்ணீர் திறக்கப்பட வேண்டிய நிலையில், தண்ணீர் திறக்கப்படவில்லை. ஜூன் மாதத்தில் தொடங்க வேண்டிய பருவமழை ஏமாற்றி வருவதால், முதல் போகத்திற்கு போதுமான தண்ணீர் திறக்கப்படுமா என்ற கேள்வி எழுந்துள்ளது. அணையின் நீர்ப்பிடிப்புப் பகுதிகளில் மழை இல்லாததால், அணையின் நீர்மட்டம் தொடர்ந்து குறைந்து வருகிறது. தற்போது முல்லைப்பெரியாறு அணையின் நீர்மட்டம் 113.55 அடியாக உள்ளது. இதன் காரணமாக, தேனி மாவட்டம் குமுளி அருகே உள்ள தேக்கடியில் உள்ள பொதுப்பணித்துறை அலுவலகப் பகுதியில், தமிழகத்திற்கு தண்ணீர் திறந்துவிடப்படும் ஷட்டர் பகுதியில் கம்பம் பள்ளத்தாக்கு விவசாயிகள் மற்றும் மேலூர் பகுதி விவசாயிகள் ஒன்றிணைந்து மழை வேண்டி மும்மதப் பிரார்த்தனை வழிபாட்டு நிகழ்ச்சியை நடத்தினர். அங்குள்ள ஜெயதுர்க்கை கோவிலில் இந்து மதத்தினர் வருண பகவானுக்கு சிறப்பு பூஜை செய்து, பூஜை செய்யப்பட்ட கலச நீரை பெரியாறு அணையிலிருந்து தமிழகத்திற்கு தண்ணீர் வரும் தேக்கடியிலுள்ள ஷட்டர் பகுதியில் பெரியாற்று நீரில் கலந்தனர். இதேபோல், கிறிஸ்தவ மதத்தினரும் இஸ்லாமிய மதத்தினரும் ஷட்டர் அருகே தங்கள் முறைப்படி மழை வேண்டி பிரார்த்தனைகளை மேற்கொண்டனர். இந்நிகழ்ச்சியில் பொதுப்பணித்துறை அதிகாரிகள், விவசாய சங்கத்தினர் உள்ளிட்ட ஏராளமான விவசாயிகள் மற்றும் மும்மதக் குருமார்கள் கலந்து கொண்டனர்.

திருச்சி மாவட்டம் மணப்பாறையை அடுத்த வாகைக்குளம் விஸ்தரிப்பு தெருவில் வசித்து வரும் 68 வயதான ஜெயலெட்சுமி, தனது இளைய மகள் புவனேஸ்வரியுடன் வசித்து வருகிறார். மாலை நேரத்தில் மூத்த மகள் கார்த்தியாவைப் பார்ப்பதற்காக விராலிமலை சாலையில் உள்ள அவரது வீட்டிற்குச் சென்றுவிட்டு, இளைய மகளுடன் வீடு திரும்பி உள்ளார். விராலிமலை சாலையிலிருந்து வாகைக்குளம் விஸ்தரிப்பு தெருவுக்குத் திரும்பிக்கொண்டிருந்தபோது, பின்னால் வந்த இளைஞர் ஒருவர் மூதாட்டியின் கழுத்தில் இருந்த 5 சவரன் எடையுள்ள கல் முகப்பு சங்கிலியைப் பறித்துக்கொண்டு, அருகில் இருசக்கர வாகனத்தில் காத்திருந்த மற்றொருவருடன் தப்பி ஓடிவிட்டார். சம்பவம் குறித்து தகவல் அறிந்ததும், எஸ்ஐ கதிரவன் தலைமையிலான போலீசார் சம்பவ இடத்திற்கு விரைந்து சென்று அப்பகுதியில் பொருத்தப்பட்டிருந்த சிசிடிவி காட்சிகளைச் சேகரித்து, தப்பி ஓடியவர்களை அடையாளம் காணும் முயற்சியில் ஈடுபட்டுள்ளனர். மணப்பாறை போலீசார் இச்சம்பவம் குறித்து விசாரணை நடத்தி வருகின்றனர்.

திண்டுக்கல் மாவட்டம் வேடசந்தூர் கைதையங்கோட்டை ஊராட்சிக்குட்பட்ட நாகமா நாயக்கனூர் கிராமத்தில், ஒரு தனிநபர் தனது சுயநலத்திற்காக தனக்குச் சொந்தமான பட்டா நிலத்தில் இருந்த பனை மரங்களையும், சாலையோரம் இருந்த பனை மரங்களையும் பிடுங்கி அகற்றியுள்ளார். இது குறித்து அதே கிராமத்தைச் சேர்ந்த செல்லச்சாமி என்பவர் கடந்த இரண்டாம் தேதி அன்று மாவட்ட ஆட்சியரின் மக்கள் குறைதீர்க்கும் முகாமில் புகார் அளித்துள்ளார். இந்த புகார் அளிக்கப்பட்ட போதிலும், சம்பந்தப்பட்டவர்கள் மீது எந்தவித நடவடிக்கையும் எடுக்காமல் அரசு அலட்சியம் காட்டுவதாக குற்றச்சாட்டு எழுந்துள்ளது. பனை மரங்களை பிடுங்கியவர்கள் மீது நடவடிக்கை எடுக்க அரசு தாமதிப்பதாக பொதுமக்கள் அதிருப்தி தெரிவித்துள்ளனர்.

திண்டுக்கல் மாவட்டத்தில் உள்ள ஒட்டன்சத்திரம் நெல் கொள்முதல் நிலையத்தில் விவசாயியிடம் இருந்து ₹2 லட்சம் லஞ்சம் வாங்கிய அரசு அலுவலர் லஞ்ச ஒழிப்புத் துறையினரால் கைது செய்யப்பட்டார்.

திருச்சி மாவட்டம் திருப்பராய்த்துறை ஊராட்சியில் கடந்த சில நாட்களாக குடிநீர் சரியாக விநியோகிக்கப்படவில்லை என்று கூறப்படுகிறது. இது குறித்து பலமுறை புகார் அளித்தும் எந்த நடவடிக்கையும் எடுக்கவில்லை எனக் கூறி பொதுமக்கள் இன்று திருப்பராய்த்துறையில் சாலை மறியலில் ஈடுபட்டு வருகின்றனர். இந்த சாலை மறியலால் போக்குவரத்து பாதிக்கப்பட்டுள்ளது. தகவலறிந்து சம்பவ இடத்திற்கு வந்த காவல்துறையினரும், அதிகாரிகளும் பொதுமக்களுடன் பேச்சுவார்த்தை நடத்தி வருகின்றனர்.

கிருஷ்ணகிரி வட்டார போக்குவரத்து அலுவலகத்தில் லஞ்ச ஒழிப்புத்துறை அதிகாரிகள் அதிரடி சோதனை நடத்தினர். இந்த சோதனையின்போது, கணக்கில் வராத ₹1 லட்சத்திற்கும் அதிகமான பணம் பிடிபட்டதாக தகவல் வெளியாகியுள்ளது.