డిప్యూటీ సీఎం మల్లు భట్టి విక్రమార్కకు తగిన స్థాయిలో ప్రతిష్టాత్మకంగా రైతు ఆశీర్వాదం సభను నిర్వహించాలని మంత్రి తుమ్మల నాగేశ్వర రావు పిలుపునిచ్చారు. ఈ సభను విజయవంతం చేయడం ద్వారా తన గళాన్ని బలంగా వినిపించి వైరా ప్రాజెక్టుకు గోదావరి జలాలను సాధించుకుంటానని మంత్రి తుమ్మల ధీమా వ్యక్తం చేశారు. ఈ నెల 30న లక్షలాది మంది రైతులతో నిర్వహించే ఈ బహిరంగ సభను విజయవంతం చేయాలని ఆయన రైతాంగాన్ని కోరారు.

రాష్ట్రంలో రెవెన్యూ తగ్గుతుంటే, రెవెన్యూ మంత్రి పొంగులేటి రెవెన్యూ మాత్రం వందల, వేల కోట్లకు పెరుగుతోందని ఆరోపణలు వెల్లువెత్తాయి. మంత్రి తుమ్మల నాగేశ్వరరావు సీతారామ ప్రాజెక్టు నుండి ఏకంగా ₹100 కోట్ల విలువైన మట్టిని దోపిడీ చేస్తున్నారని విమర్శించారు. ఇదే క్రమంలో, బుగ్గపాడులో మార్కెట్ విలువ ఎకరానికి ₹60 లక్షలు ఉండగా, కేవలం ₹21 లక్షల చొప్పున 70 ఎకరాలను రాసిచ్చినట్టు పేర్కొన్నారు. అలాగే, ఖమ్మం వెలుగుమట్లలో మంత్రులు పొంగులేటి, తుమ్మల రియల్ ఎస్టేట్ వ్యాపారులకు అండగా నిలబడి, దాదాపు 1000 మంది పేదల ఇళ్లను కూల్చివేశారని తీవ్ర ఆరోపణలు చేశారు.

ఖమ్మం జిల్లా, కొణిజర్ల మండలం అంజనాపురంలో నిర్మాణంలో ఉన్న గోద్రెజ్ ఆయిల్ పామ్ ఫ్యాక్టరీ పనులను త్వరితగతిన పూర్తి చేయాలని కలెక్టర్ దివాకర టీఎస్ ఆదేశించారు. ఆయన అదనపు కలెక్టర్ శ్రీనివాసరెడ్డితో కలిసి ఫ్యాక్టరీ నిర్మాణ పనులను స్వయంగా పరిశీలించారు. ఈ సందర్భంగా కలెక్టర్ మాట్లాడుతూ, ఆయిల్ పామ్ సాగు వాతావరణ మార్పులను తట్టుకుని, రైతులకు తక్కువ పెట్టుబడితో స్థిరమైన, దీర్ఘకాలిక ఆదాయాన్ని అందిస్తుందని పేర్కొన్నారు. రైతుల ఆదాయ వృద్ధికి ఈ ఫ్యాక్టరీ అత్యంత కీలకంగా మారనుందని తెలిపారు.

ఎన్టీఆర్ జిల్లాలోని గొల్లపూడిలో తెలుగుదేశం పార్టీ నాయకులు మంత్రి జోగి రమేష్‌పై తీవ్ర ఆగ్రహం వ్యక్తం చేశారు. విజయవాడ రూరల్ మండలం గొల్లపూడిలోని టీడీపీ కార్యాలయంలో ఏఎంసీ చైర్మన్ నర్రా వాసు, విజయవాడ రూరల్ మండలం తెలుగుదేశం పార్టీ అధ్యక్షులు మందా మురళీమోహన్, నూతులపాటి నారద, కాటంనేని పూర్ణచంద్రరావు, క్లస్టర్ ఇన్‌చార్జి ధారావత్ శీను నాయక్‌తో సహా పలువురు నేతలు మీడియా సమావేశం నిర్వహించారు. మైలవరం ఎమ్మెల్యే వసంత వెంకట కృష్ణ ప్రసాద్‌పై "అవాకులు చవాకులు పేలిన" జోగి రమేష్‌ను వారు తీవ్రంగా విమర్శించారు. ఈ సందర్భంగా టీడీపీ నేతలు జోగి రమేష్‌పై అనేక ప్రశ్నలు సంధించారు. కొత్తూరు తాడేపల్లి, జక్కంపూడి కొండలను ఎవరు కొల్లగొట్టారని, వైసీపీ ప్రభుత్వంలోని మంత్రులు, నందిగం సురేష్ అనుచరులు మైనింగ్ మాఫియాకు పాల్పడి దోచుకున్నది నిజం కాదా అని ప్రశ్నించారు. పెడన నుంచి వచ్చిన నాగేశ్వరరావు, అతని మనుషులు జోగి రమేష్ తెచ్చినవారే కాదా అని నిలదీశారు. జోగి రమేష్ అనుచరులు చేసిన దోపిడీ, అవినీతి గురించి లెక్కలతో సహా ఎంత దోచుకున్నారో చెప్పమంటే చెబుతామని టీడీపీ నాయకులు ప్రకటించారు. రూ.20 లక్షలు లంచం తీసుకుని మట్టి తోలుకుపోతుంటే జిల్లా కలెక్టర్ అడ్డుకున్నారని, దీనివల్ల నష్టపోయినవారి డబ్బులు తిరిగి ఇచ్చారా అని ప్రశ్నించారు. పెడన నుంచి వచ్చిన అజయ్ ఎవరు అని అడిగి, జోగి రమేష్ విజయవాడ రూరల్ మండలాన్ని లూటీ చేసింది నిజం కాదా అని తీవ్రంగా ఆరోపించారు. అంతేకాకుండా, జోగి రమేష్ అగ్రిగోల్డ్ భూములను కబ్జా చేసి కోట్ల రూపాయలు దోచుకున్నారని, కల్తీ మద్యం విక్రయించి ప్రజల ప్రాణాలతో చెలగాటమాడారని ధ్వజమెత్తారు. జోగి రమేష్ రాజకీయ జీవితం సమాధి అవుతున్న సమయంలో జగన్మోహన్ రెడ్డి కాళ్ళు పట్టుకొని మైలవరం నియోజకవర్గ ఇన్‌చార్జిగా కొనసాగుతున్నారని టీడీపీ నేతలు ఎద్దేవా చేశారు. మైలవరం ఎమ్మెల్యే వసంత వెంకట కృష్ణ ప్రసాద్‌పై అబద్ధాలు, అసత్యాలు, కుట్ర రాజకీయాలతో విష ప్రచారం చేస్తున్నారని ఆరోపించారు. జోగి రమేష్ ఒక "చిల్లర వ్యక్తి," "ఒక బఫూన్" అని అభివర్ణించిన టీడీపీ నాయకులు, సాక్షి మీడియాలో "చీప్ పబ్లిసిటీ" కోసం, జగన్మోహన్ రెడ్డి దగ్గర మార్కులు కొట్టేయడం కోసం నాటకాలు ఆడుతున్నాడని విమర్శించారు. పెడనలో ఓడిపోతాడని తెలిసి, మంత్రిగా ఉన్నప్పుడే పెనమలూరుకు తీసుకెళ్లి టికెట్ ఇచ్చారని గుర్తు చేశారు. జోగి రమేష్ "చేతకాని దద్దమ్మ" అని, ప్రతి ఎన్నికలకు ఒక నియోజకవర్గానికి పారిపోతాడని అన్నారు. 2019లో పెడనలో ఆయన గెలిచారంటే దానికి ఎమ్మెల్యే వసంత కృష్ణ ప్రసాద్ సహకారమే కారణమని పేర్కొన్నారు. 2009లో అన్నం పెట్టిన కాంగ్రెస్ పార్టీకి "సున్నం పెట్టి" వైసీపీలో చేరిన "దుష్టుడు, దుర్మార్గుడు" జోగి రమేష్ అని తీవ్ర పదజాలంతో విమర్శించారు. మళ్లీ జనసేన పార్టీలో కూడా చేరడానికి ప్రయత్నాలు చేశాడని వెల్లడించారు. మైలవరం నియోజకవర్గంలో స్వర్ణాల తిరుపతిరావును తప్పించి మళ్లీ వైసీపీకి ఇన్‌చార్జిగా జోగి రమేష్ వచ్చాడని తెలిపారు. చివరిగా, విజయవాడ రూరల్ మండలం తెలుగుదేశం పార్టీ నాయకులు జోగి రమేష్‌కి "ఓపెన్ ఛాలెంజ్" విసిరారు. మైలవరం నియోజకవర్గంలో ఎప్పుడు ఎమ్మెల్యే టికెట్ తెచ్చుకున్నా, "చిత్తుచిత్తుగా ఓడించడమే" తమ ప్రధాన లక్ష్యమని, ప్రజలు కూడా ఇందుకోసం సిద్ధంగా ఉన్నారని స్పష్టం చేశారు. "ఖబడ్దార్ జోగి," పెడన నుంచి తరిమికొట్టారు, పెనమలూరు, మైలవరం నుంచి తరిమికొట్టారు, ఇబ్రహీంపట్నంలోని నీ ఇంటి నుంచి కూడా తరిమికొడతామని గట్టిగా హెచ్చరించారు.

మహబూబాబాద్ జిల్లా ఎస్పీ డాక్టర్ శబరిష్, "గంజాయి వద్దు.. గెలుపే ముద్దు" అనే సందేశంతో యువతకు విలువైన సూచనలు చేశారు. దంతాలపల్లి మండలంలోని బొడ్లాడ గ్రామంలో పోలీసు శాఖ ఆధ్వర్యంలో నిర్వహించిన గంజాయి రహిత గ్రామ నిర్మాణ అవగాహన సదస్సులో ఆయన ముఖ్య అతిథిగా పాల్గొన్నారు. ఈ సందర్భంగా ఎస్పీ మాట్లాడుతూ, గంజాయి మరియు ఇతర మాదకద్రవ్యాల వినియోగం యువత జీవితాలను అంధకారంలోకి నెట్టేస్తోందని తీవ్ర ఆందోళన వ్యక్తం చేశారు. మాదకద్రవ్యాలకు బానిసైన వారు ఆరోగ్యపరంగా, ఆర్థికపరంగా, సామాజికపరంగా తీవ్ర నష్టాలను ఎదుర్కొంటారని ఆయన స్పష్టం చేశారు. యువత తమ విలువైన జీవితాన్ని చెడు అలవాట్లకు బలిచేయకుండా విద్య, ఉపాధి, క్రీడలు, వ్యక్తిత్వ వికాసంపై దృష్టి సారించాలని సూచించారు. వ్యసనాల బారిన పడితే భవిష్యత్తు అంధకారమవుతుందని హెచ్చరించారు. గంజాయి అక్రమ రవాణా, విక్రయాలు, వినియోగంపై పోలీసు శాఖ ఎటువంటి రాజీ లేకుండా కఠిన చర్యలు తీసుకుంటోందని ఎస్పీ స్పష్టం చేశారు. గ్రామాల్లో ప్రజల సహకారంతోనే మాదకద్రవ్యాల నిర్మూలన సాధ్యమవుతుందని పేర్కొంటూ, అనుమానాస్పద కార్యకలాపాలపై వెంటనే పోలీసులకు సమాచారం అందించాలని ప్రజలకు విజ్ఞప్తి చేశారు. తల్లిదండ్రులు తమ పిల్లల ప్రవర్తనపై ప్రత్యేక శ్రద్ధ వహించి, వారి స్నేహితులు, అలవాట్లు మరియు రోజువారీ కార్యకలాపాలను గమనించాలని ఆయన సూచించారు. ఈ కార్యక్రమంలో గ్రామ సర్పంచ్ బొడ్డుపల్లి వెంకన్న, ఉప సర్పంచ్ బొడపట్ల సతీష్, సర్పంచ్ ల ఫోరమ్ మండల అధ్యక్షులు అక్కిరెడ్డి దామోదర్ రెడ్డి, వార్డు సభ్యులు ఇండ్ల శ్రీలేఖ, ఎర్రబోయిన మమత, గువ్వ రోజా, జనిగల అంజయ్య, కొత్తపల్లి మధు, పోలీసు అధికారులు, గ్రామ పెద్దలు, ప్రజాప్రతినిధులు, యువకులు, మహిళలు, ఆశా కార్యకర్తలు, విద్యార్థులు తోపాటు పలువురు పాల్గొన్నారు.

భద్రాద్రి కొత్తగూడెం జిల్లాలోని ఇల్లందు మండలంలో గంజాయి, ఇతర మత్తు పదార్థాల నిర్మూలనకు ఇల్లందు పోలీస్ శాఖ ఉక్కు పాదం మోపింది. ఇల్లందు డిఎస్పి వెంకన్న బాబు నేతృత్వంలో, ఎస్ హెచ్ ఓ సి ఐ తాటిపాముల సురేష్ బృందంతో కలిసి, పట్టణంలోని పలు అనుమానిత ప్రాంతాలలో డాగ్ స్క్వాడ్ మరియు నార్కోటిక్ బృందంతో విస్తృత తనిఖీలు నిర్వహించారు. ఇల్లందు సబ్ డివిజన్ పరిధిలో గంజాయి సేవించడం లేదా మత్తు పదార్థాలు వినియోగించడం జరిగితే కఠిన చర్యలు తీసుకుంటామని డిఎస్పి వెంకన్న బాబు హెచ్చరించారు. గంజాయి వినియోగంపై రాష్ట్రవ్యాప్తంగా విస్తృతంగా తనిఖీలు జరుగుతాయని ఆయన తెలిపారు. విద్యార్థులు, యువత మత్తు పదార్థాలకు బానిసలై తమ జీవితాలను కోల్పోవద్దని సూచించారు. ప్రజలు మరియు ప్రతి ఒక్క తల్లిదండ్రులు ఈ మత్తు వినియోగంపై పోరాటానికి సహకరించి సిద్ధంగా ఉండాలని ఆయన పిలుపునిచ్చారు.

ఖమ్మం జిల్లా వెలుగుమట్లలో ముఖ్యమంత్రి, మంత్రులు పేదల భూములను లాక్కున్నారని, కాంగ్రెస్‌ను గెలిపించిన ఖమ్మం జిల్లా వాసులకు ఏమి మిగిలిందని కేటీఆర్ తీవ్రంగా ప్రశ్నించారు. మూడు నెలల్లో అభివృద్ధి చేస్తామన్న వాగ్దానాలను 30 నెలలు గడిచినా నెరవేర్చలేదని ముఖ్యమంత్రి పనితీరుపై ఆయన విమర్శలు గుప్పించారు. నేడు కేటీఆర్ రాకతో సత్తుపల్లి గులాబీ రంగుల హంగులతో దద్దరిల్లింది, ఆయనకు ఘన స్వాగతం లభించింది.

పెదకూరపాడులోని ఆనందపేట కృష్ణమాదిగ కాలనీలో డాక్టర్ బాబు జగజ్జీవన్ రామ్ భవన నిర్మాణానికి స్థల అనుమతి, అలాగే జగజ్జీవన్ రామ్, డాక్టర్ బి.ఆర్. అంబేద్కర్ విగ్రహాల ఏర్పాటుకు అనుమతి కోరుతూ పి.డి.ఎస్. జె. ఎస్. సి, కమిటీ అధ్యక్షులు కంచర్ల రత్నబాబు మాదిగ ఆధ్వర్యంలో తహసిల్దార్ శ్రీనివాసరావుకు మంగళవారం వినతి పత్రం సమర్పించారు. కాలనీలో సమావేశాలు, విద్యా కార్యక్రమాలు, ఇతర సామాజిక కార్యక్రమాలు నిర్వహించడానికి కమ్యూనిటీ హాల్ లేదని, బాబు జగజ్జీవన్ రామ్ భవన నిర్మాణం ద్వారా ఆనందపేట అభివృద్ధికి ఎంతో మేలు జరుగుతుందని అధ్యక్షులు కంచర్ల రత్నబాబు మాదిగ ఈ సందర్భంగా పేర్కొన్నారు. ఈ విషయాన్ని కలెక్టర్ దృష్టికి తీసుకువెళ్లి మాట్లాడి తప్పకుండా తగు న్యాయం చేస్తానని తహసిల్దార్ శ్రీనివాసరావు హామీ ఇచ్చారు. ఈ కార్యక్రమంలో సెక్రటరీ కంచర్ల ప్రదీప్ కుమార్, ట్రెజరరీ కంచర్ల అంకమ్మ, వైస్ ప్రెసిడెంట్ తాళ్లూరు సూరిబాబు, జాయింట్ సెక్రటరీ మేకల నరేష్, కమిటీ గౌరవ సలహాదారులు కంచర్ల జానుబాబు మాదిగ, రావెల మాథ్యూస్, కంచర్ల అమర్ కుమార్, కంచర్ల సుబ్బారావు, కమిటీ ఎగ్జిక్యూటివ్ మెంబర్స్ పి రాజు, ఎం శ్రీనివాసరావు, పవన్ ఎం మల్లేశ్వరరావు తదితరులు పాల్గొన్నారు.

డిప్యూటీ సీఎం మల్లు భట్టి విక్రమార్కకు తగిన స్థాయిలో ప్రతిష్టాత్మకంగా రైతు ఆశీర్వాదం సభను నిర్వహించాలని మంత్రి తుమ్మల నాగేశ్వర రావు పిలుపునిచ్చారు. ఈ సభను విజయవంతం చేయడం ద్వారా తన గళాన్ని బలంగా వినిపించి వైరా ప్రాజెక్టుకు గోదావరి జలాలను సాధించుకుంటానని మంత్రి తుమ్మల ధీమా వ్యక్తం చేశారు. ఈ నెల 30న లక్షలాది మంది రైతులతో నిర్వహించే ఈ బహిరంగ సభను విజయవంతం చేయాలని ఆయన రైతాంగాన్ని కోరారు.