ଓଡ଼ିଶାର ପୁରୀ ସମୁଦ୍ରରେ ପୁଣି ଏକ ଅଘଟଣ ସାମ୍ନାକୁ ଆସିଛି। ସମୁଦ୍ରରେ ଗାଧୋଇବା ପାଇଁ ଯାଇ ୩ ଜଣ ପର୍ଯ୍ୟଟକ ବୁଡ଼ି ଯାଇଥିଲେ। ତେବେ ଲାଇଫ ଗାର୍ଡଙ୍କ ଯୋଗୁଁ ସମସ୍ତ ୩ ଜଣ ପର୍ଯ୍ୟଟକଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି।

ଗଞ୍ଜାମ ଜିଲ୍ଲା ହିଞ୍ଜଳିକାଟୁ ଶାସନ ଆମ୍ବଗାଁ ସ୍କୁଲରୁ ସ୍ମାର୍ଟ ସ୍କୁଲର ଅସଲ ଚିତ୍ର ସାମ୍ନାକୁ ଆସିଛି। ସ୍କୁଲରେ ଶିକ୍ଷକ ଅଭାବ ଯୋଗୁଁ ପିଟି ସାର୍ ନିଜର ଖେଳ ପଡ଼ିଆ ଛାଡ଼ି ଶ୍ରେଣୀଗୃହରେ ସବୁ ବିଷୟର ପାଠ ପଢ଼ାଉଛନ୍ତି। ଜାଗୃତି ଖବରର ଗ୍ରାଉଣ୍ଡ ଜିରୋ ରିପୋର୍ଟରୁ ଏହି ବାସ୍ତବ ଚିତ୍ର ସାମ୍ନାକୁ ଆସିଛି, ଯେଉଁଠି ଶିକ୍ଷକ ଅଭାବ ଯୋଗୁଁ ପିଟି ସାର୍ ହିଁ ସବୁ ବିଷୟର ପାଠ ପଢ଼ାଳି ସାଜିଛନ୍ତି।

ବିଶ୍ୱପ୍ରସିଦ୍ଧ ଶ୍ରୀଜଗନ୍ନାଥଙ୍କ ରଥଯାତ୍ରା ହେବାକୁ ଆଉ ମାତ୍ର ପାଞ୍ଚ ଦିନ ବାକି ଥିବାବେଳେ ପୁରୀକୁ ସଂଯୋଗ କରୁଥିବା ନୂଆ ଜଗନ୍ନାଥ ସଡ଼କର ଅବସ୍ଥା ଅତ୍ୟନ୍ତ ଶୋଚନୀୟ ହୋଇପଡ଼ିଛି। ପଶ୍ଚିମ ଓ ଦକ୍ଷିଣ ଓଡ଼ିଶାରୁ ପୁରୀକୁ ଯୋଡ଼ୁଥିବା ଏହି ଗୁରୁତ୍ୱପୂର୍ଣ୍ଣ ରାସ୍ତାର ଦୁର୍ଦ୍ଦଶାକୁ ନେଇ ଏକ ଚିନ୍ତାଜନକ ଚିତ୍ର ସାମ୍ନାକୁ ଆସିଛି। ରଥଯାତ୍ରା ସମୟରେ ଶ୍ରୀକ୍ଷେତ୍ରକୁ ଲକ୍ଷ ଲକ୍ଷ ଭକ୍ତଙ୍କ ସୁଅ ଛୁଟିବାକୁ ଥିବାବେଳେ ଏହି ବିପଦପୂର୍ଣ୍ଣ ରାସ୍ତା ସେମାନଙ୍କ ସୁରକ୍ଷା ପ୍ରତି ଏକ ବଡ଼ ବିପଦ ସୃଷ୍ଟି କରିପାରେ। ୧୬ ନମ୍ବର ଜାତୀୟ ରାଜପଥର ରାମେଶ୍ୱର ଛକରୁ ପୁରୀ ପର୍ଯ୍ୟନ୍ତ ଯାଇଥିବା ଏହି ଗୁରୁତ୍ୱପୂର୍ଣ୍ଣ ସଡ଼କ ଦେଇ ପ୍ରତିଦିନ ହଜାର ହଜାର ଗାଡ଼ି ଚଳାଚଳ କରୁଛି। ମାତ୍ର ବର୍ତ୍ତମାନ ଏହି ରାସ୍ତାରେ ସୃଷ୍ଟି ହୋଇଥିବା ବଡ଼ ବଡ଼ ଖାଲଖମା ଯୋଗୁଁ ପ୍ରତ୍ୟେକ ଯାତ୍ରା ଅତ୍ୟନ୍ତ ବିପଦପୂର୍ଣ୍ଣ ହୋଇପଡ଼ିଛି ଏବଂ ଏଠାରେ ପ୍ରତିଦିନ ଛୋଟବଡ଼ ଦୁର୍ଘଟଣା ଘଟିବା ଏକ ନିତିଦିନିଆ ଘଟଣା ପାଲଟିଛି। ରଥଯାତ୍ରା ଭଳି ବିଶ୍ୱସ୍ତରୀୟ ପର୍ବକୁ ଦୃଷ୍ଟିରେ ରଖି ଏହି ସଡ଼କର ମରାମତି କରାଯିବା ନେଇ ଆଶା କରାଯାଉଥିଲା, କିନ୍ତୁ ଏପର୍ଯ୍ୟନ୍ତ ପୂର୍ତ୍ତ ବିଭାଗ ପକ୍ଷରୁ କୌଣସି ତତ୍ପରତା ଦେଖିବାକୁ ମିଳିନାହିଁ। ଏହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ସ୍ଥାନୀୟ ବାସିନ୍ଦା ଦାବି କରିଛନ୍ତି ଯେ ରଥଯାତ୍ରା ପୂର୍ବରୁ ଯୁଦ୍ଧକାଳୀନ ଭିତ୍ତିରେ ଏହି ସଡ଼କର ମରାମତି କରାଯାଉ, ନଚେତ ଏହା ଭକ୍ତଙ୍କ ଯାତ୍ରା ସୁରକ୍ଷା ପ୍ରତି ବିପଦ ସୃଷ୍ଟି କରିବ। ଏହି ସମ୍ପର୍କରେ ବିଭାଗୀୟ ଅଧିକାରୀଙ୍କ ସହ ଫୋନ ଯୋଗେ ଯୋଗାଯୋଗ କରିବାକୁ ଚେଷ୍ଟା କରାଯାଇଥିଲେ ମଧ୍ୟ ତାହା ସମ୍ଭବ ହୋଇପାରି ନାହିଁ। ବର୍ତ୍ତମାନ ସମସ୍ତଙ୍କ ନଜର ରହିଛି ଯେ, ପୂର୍ତ୍ତ ବିଭାଗ କେବେ ଜାଗିବ ଏବଂ ଭକ୍ତମାନଙ୍କର ଏହି ବିପଦପୂର୍ଣ୍ଣ ଯାତ୍ରାର ଅନ୍ତ ଘଟିବ।

ଶ୍ରୀକ୍ଷେତ୍ର ପୁରୀରେ ମହାପ୍ରଭୁ ଶ୍ରୀ ଜଗନ୍ନାଥଙ୍କ ବିଶ୍ୱପ୍ରସିଦ୍ଧ ରଥଯାତ୍ରା ପାଇଁ ଭକ୍ତିର ସାଗର ଉଛୁଳୁଛି ଏବଂ ଆଉ ମାତ୍ର କିଛି ଦିନର ଅପେକ୍ଷା ରହିଛି। ରତ୍ନବେଦୀ ଛାଡ଼ି ମହାପ୍ରଭୁ ଶ୍ରୀ ଜଗନ୍ନାଥ, ଭ୍ରାତା ବଳଭଦ୍ର ଓ ଭଗିନୀ ସୁଭଦ୍ରା ନବଦିନାତ୍ମକ ଯାତ୍ରାରେ ବାହାରିବେ। ଏହି ଅବସରରେ ଦଇତାପତି ସେବକମାନେ କାହାଳି ଓ ଛତି ଧରି ଶ୍ରୀ ନଅର ଅଭିମୁଖେ ବାହାରି ଗଜପତି ମହାରାଜାଙ୍କୁ ରୂପା ଥାଳିରେ ନିମନ୍ତ୍ରଣ କରିବା ସହ ମହାପ୍ରଭୁ ସମ୍ପୂର୍ଣ୍ଣ ସୁସ୍ଥ ଥିବାର ବାର୍ତ୍ତା ପ୍ରଦାନ କରିବେ ବୋଲି ପୁରୀରୁ ଡଃ ମନୋଜ କୁମାର ବଳିଆରସିଂ ସୂଚନା ଦେଇଛନ୍ତି। ରଥଖଳାରେ ଯୁଦ୍ଧକାଳୀନ ଭିତ୍ତିରେ କାର୍ଯ୍ୟ ଚାଲିଥିବା ବେଳେ ମହାରଣା, ଭୋଇ ଓ ଚିତ୍ରକାର ସେବକମାନେ ତିନି ରଥକୁ ଶେଷ ସ୍ପର୍ଶ ଦେବାରେ ବ୍ୟସ୍ତ ଅଛନ୍ତି। ରଥରେ ୨ଟି ଲେଖାଏଁ ବ୍ରେକ୍ ପୁଲିଙ୍ଗ ସଂସ୍ଥାପନ କାର୍ଯ୍ୟ ଶେଷ ହୋଇଥିବା ବେଳେ ଘୋଡ଼ା, ସାରଥୀଙ୍କ ରଙ୍ଗ କାର୍ଯ୍ୟ ଏବଂ ଚନ୍ଦ୍ରଶାଳୀରେ ଚିକଣ ଜରିଫୁଲ, ଲେସ ଓ ଡାଳିଲତାର ସାଜସଜ୍ଜା ଜାରି ରହିଛି। ଆସନ୍ତାକାଲି ଦରଜି ସେବକମାନଙ୍କ ଦ୍ୱାରା ରଥରେ କନା ଲଗା କାର୍ଯ୍ୟ ଆରମ୍ଭ କରାଯିବ। ଅନ୍ୟପଟେ, ଗୁଣ୍ଡିଚା ମନ୍ଦିର ଏବଂ ମାଉସୀମା’ ମନ୍ଦିରରେ ମଧ୍ୟ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି। ଚୈତନ୍ୟ ମହାପ୍ରଭୁଙ୍କ ଭକ୍ତମାନଙ୍କ ଗହଳି ଭିତରେ ଗୁଣ୍ଡିଚା ମନ୍ଦିରକୁ ସୁସଜ୍ଜିତ କରାଯାଇଛି ଏବଂ ମାଉସୀମା’ ମନ୍ଦିରରେ ମହାପ୍ରଭୁଙ୍କୁ ପୋଡ଼ପିଠା ଅର୍ପଣ ପାଇଁ ସମସ୍ତ ପ୍ରସ୍ତୁତି ଚୂଡ଼ାନ୍ତ ହୋଇଛି। ଶ୍ରୀଜିଉଙ୍କ ପହଣ୍ଡି ପାଇଁ କୁସୁମୀ ଚାରିପଟିଆ, ଛଗୋଟି, ବାର ହାତିଆ ଧଳା ଗଡ଼ା ଓ ଷୋଳ ହାତିଆ କପଡ଼ା ପ୍ରସ୍ତୁତି କାର୍ଯ୍ୟ ଶେଷ ପର୍ଯ୍ୟାୟରେ ରହିଛି। ହଂସ ପଟା, ରତ୍ନ ସିଂହାସନର ପଘା କାର୍ଯ୍ୟ ଚାଲିଥିବା ବେଳେ ଓଲଟ ସୁଆ ଏବଂ କଳସ ସ୍ଥାପନ କାର୍ଯ୍ୟ ସମ୍ପୂର୍ଣ୍ଣ ହୋଇସାରିଛି। ବର୍ତ୍ତମାନ ସିଂହଦ୍ୱାର ଓ ନାକଚଣା ଦ୍ୱାର ମହାପ୍ରଭୁଙ୍କ ଆଗମନକୁ ଚାହିଁ ରହିଛନ୍ତି।

ପୁରୀ ଜିଲ୍ଲା ଚନ୍ଦନପୁର ଅଞ୍ଚଳରେ କାଳିଆ ରଜାଙ୍କ ଆଗମନକୁ ନେଇ ଶ୍ରଦ୍ଧାଳୁଙ୍କ ମଧ୍ୟରେ ପ୍ରବଳ ଉତ୍ସାହ ଓ ଆନନ୍ଦର ମାହୋଲ ଦେଖିବାକୁ ମିଳିଛି। କାଳିଆ ରଜାଙ୍କ ଆଗମନ ସମୟ ଅତି ନିକଟତର ହେଉଥିବାରୁ ଚାରିଆଡ଼େ ଘଣ୍ଟ, ଶଙ୍ଖ ଏବଂ ମୃଦଙ୍ଗ ବଜାଇ ଭକ୍ତିପୂତ ପରିବେଶରେ ତାଙ୍କୁ ସ୍ୱାଗତ କରିବା ପାଇଁ ସର୍ବସାଧାରଣଙ୍କୁ ଆହ୍ୱାନ ଦିଆଯାଇଛି। ସାରା ଅଞ୍ଚଳ ଏବେ ଏହି ଆଧ୍ୟାତ୍ମିକ ତଥା ମଙ୍ଗଳମୟ ଧ୍ୱନିରେ କମ୍ପିଉଠିବା ପାଇଁ ଅପେକ୍ଷା କରି ରହିଛି।

ଖୋର୍ଦ୍ଧା ଜିଲ୍ଲା ଜଟଣୀ ଅଞ୍ଚଳରେ ପବିତ୍ର ରଥଯାତ୍ରା ଉପଲକ୍ଷେ ରାଜ୍ୟ ବିଜେଡି ଉପସଭାପତି ଅନନ୍ତ ଶତପଥୀ ଶୁଭେଚ୍ଛା ବାର୍ତ୍ତା ଜଣାଇଛନ୍ତି। ଏହି ପବିତ୍ର ଅବସରରେ ସେ ସମସ୍ତଙ୍କୁ ନିଜର ଆନ୍ତରିକ ଶୁଭକାମନା ଜ୍ଞାପନ କରିଛନ୍ତି।

ଗଜପତି ଜିଲ୍ଲା ଆର. ଉଦୟଗିରି ବ୍ଲକ୍ ଅନ୍ତର୍ଗତ ତବାରସିଂ ସରକାରୀ ଉଚ୍ଚ ବିଦ୍ୟାଳୟରେ ବନମହୋତ୍ସବ ସପ୍ତାହ ଅତ୍ୟନ୍ତ ଉତ୍ସାହର ସହ ପାଳନ କରାଯାଇଛି। ଜିଲ୍ଲା ଜୁନିଅର ରେଡକ୍ରସ ଏବଂ ରାମଗିରି ବନାଞ୍ଚଳ ବନ ବିଭାଗର ସହଯୋଗରେ ବିଦ୍ୟାଳୟ ପରିସରରେ ବିଭିନ୍ନ ପ୍ରଜାତିର ଚାରାରୋପଣ କରାଯାଇଥିଲା। ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଏମ୍.କାମେଶ୍ୱର ରାଓ ଯୋଗଦେଇ ବୃକ୍ଷରୋପଣର ଗୁରୁତ୍ୱ ଉପରେ ଆଲୋକପାତ କରିବା ସହ ପରିବେଶ ସୁରକ୍ଷା ଏବଂ ସବୁଜିମା ବୃଦ୍ଧି ପାଇଁ ପ୍ରତ୍ୟେକ ଛାତ୍ରଛାତ୍ରୀଙ୍କୁ ଅତି କମ୍‌ରେ ଗୋଟିଏ ଗଛ ଲଗାଇ ତାହାର ଯତ୍ନ ନେବାକୁ ଆହ୍ୱାନ କରିଥିଲେ। ବିଦ୍ୟାଳୟର ପ୍ରଧାନଶିକ୍ଷକ ପୁରୁଷୋତ୍ତମ ନାୟକଙ୍କ ନେତୃତ୍ୱରେ ଏହି କାର୍ଯ୍ୟକ୍ରମ ସୁଚାରୁରୂପେ ପରିଚାଳିତ ହୋଇଥିଲା। ଏଥିରେ ଜୁନିଅର ରେଡକ୍ରସ (JRC) ପରାମର୍ଶଦାତା ମୁକ୍ତିକାନ୍ତ ମଲ୍ଲିକ୍ ବୃକ୍ଷରୋପଣ ସହ ପରିବେଶ ସଚେତନତାର ବାର୍ତ୍ତା ପ୍ରଦାନ କରି ଚାରାଗୁଡ଼ିକର ନିୟମିତ ଯତ୍ନ ନେବା ଓ ପରିବେଶ ସୁରକ୍ଷାରେ ସକ୍ରିୟ ଭାବେ ସାମିଲ ହେବାକୁ ଛାତ୍ରଛାତ୍ରୀମାନଙ୍କୁ ପ୍ରେରିତ କରିଥିଲେ। ବିଦ୍ୟାଳୟର ଶିକ୍ଷକ, ବନ ବିଭାଗର କର୍ମଚାରୀ ଏବଂ ଛାତ୍ରଛାତ୍ରୀମାନେ ଏହି ବୃକ୍ଷରୋପଣ କାର୍ଯ୍ୟକ୍ରମରେ ସକ୍ରିୟ ଭାବେ ଅଂଶଗ୍ରହଣ କରିଥିଲେ। ଶେଷରେ ପରିବେଶ ସୁରକ୍ଷାର ବାର୍ତ୍ତା ପ୍ରଚାର ସହ ରୋପଣ କରାଯାଇଥିବା ଚାରାଗୁଡ଼ିକର ନିୟମିତ ଯତ୍ନ ନେବା ପାଇଁ ସମସ୍ତେ ସଂକଳ୍ପ ଗ୍ରହଣ କରିଥିଲେ।

ପୁରୀ ଜିଲ୍ଲାରେ ଅଙ୍ଗନବାଡ଼ି କର୍ମୀମାନେ ଜିଲ୍ଲା ସମାଜ କଲ୍ୟାଣ ଅଧିକାରିଣୀ ଶ୍ରୀମତୀ ତନୁପ୍ରଭା ବେଉରାଙ୍କ ବିରୋଧରେ ଗୁରୁତର ଦୁର୍ନୀତି ଓ ଶୋଷଣର ଅଭିଯୋଗ ଆଣି ଆକ୍ରୋଶ ପ୍ରକାଶ କରିଛନ୍ତି। ଏହି ପରିପ୍ରେକ୍ଷୀରେ ଅଲ୍ ଓଡ଼ିଶା ଅଙ୍ଗନବାଡ଼ି ଲେଡିଜ୍ ୱାର୍କର୍ସ ଆସୋସିଏସନ୍ ପକ୍ଷରୁ ଏକ ସାମ୍ବାଦିକ ସମ୍ମିଳନୀ ଆୟୋଜନ କରାଯାଇ ଅଧିକାରିଣୀଙ୍କ ମନମୁଖୀ କାର୍ଯ୍ୟକଳାପକୁ ତୀବ୍ର ବିରୋଧ କରାଯାଇଛି। ସଂଘର ଅଭିଯୋଗ ଅନୁଯାୟୀ, ବିଭିନ୍ନ ସରକାରୀ ଯୋଜନା ଯଥା ପୁଷ୍ଟିଫଳକ, ପୋଷଣ ପକ୍ଷ ବ୍ୟାନର ଏବଂ ଖେଳନା କିଟ୍ କ୍ରୟ ବାବଦ ଅର୍ଥରେ ଅଧିକାରିଣୀ ଜଣକ ବ୍ୟାପକ ବେପାର ଚଳାଇଛନ୍ତି। ସରକାରୀ ଗାଇଡଲାଇନକୁ ସମ୍ପୂର୍ଣ୍ଣ ଅଣଦେଖା କରି ନିଜ ପସନ୍ଦର ଡିଲରଙ୍କ ଜରିଆରେ ସାମଗ୍ରୀ କିଣିବାକୁ ଅଙ୍ଗନବାଡ଼ି କର୍ମୀମାନଙ୍କୁ ବାଧ୍ୟ କରାଯାଉଛି। ଏହାବ୍ୟତୀତ ଅନେକ ପ୍ରୋଜେକ୍ଟରେ କର୍ମୀଙ୍କ ପାଉଣା ଓ ପ୍ରସୂତୀକାଳୀନ ଭତ୍ତା ଦୀର୍ଘ ଦିନ ଧରି ବନ୍ଦ ରହିଛି। ଯଦି କେହି ଏହାର ବିରୋଧ କରୁଛନ୍ତି, ତେବେ ତାଙ୍କୁ କଦର୍ଯ୍ୟ ଭାଷାରେ ଗାଳିଗୁଲଜ କରାଯିବା ସହ ସୁପରଭାଇଜରଙ୍କ ଜରିଆରେ ହଇରାଣ ହରକତ କରାଯାଉଛି। କେବଳ ସେତିକି ନୁହେଁ, ଅଯଥା ଅଭିଯୋଗ ଆଧାରରେ ଅଙ୍ଗନବାଡ଼ି କର୍ମୀମାନଙ୍କୁ ଚାକିରିରୁ ନିଲମ୍ବିତ କିମ୍ବା ସ୍ଥାନାନ୍ତର ମଧ୍ୟ କରାଯାଉଛି। ଏହି ସମସ୍ୟା ସମ୍ପର୍କରେ ଜିଲ୍ଲା ପ୍ରଶାସନ ଓ ସରକାରଙ୍କୁ ବାରମ୍ବାର ଅବଗତ କରାଯାଇଥିଲେ ମଧ୍ୟ ଏପର୍ଯ୍ୟନ୍ତ କୌଣସି ସୁଫଳ ମିଳିନାହିଁ। ତେଣୁ ଆଗାମୀ ଦିନରେ ଯଦି ଅଧିକାରିଣୀଙ୍କ ବଦଳି କରାନଯାଏ ଏବଂ ଏହି ସମସ୍ୟାର ସ୍ଥାୟୀ ସମାଧାନ ନହୁଏ, ତେବେ ସଂଘ ପକ୍ଷରୁ 'କଲମ ଛାଡ଼ ଆନ୍ଦୋଳନ' କରାଯିବ ବୋଲି ଚେତାବନୀ ଦିଆଯାଇଛି। ଏହି ଆନ୍ଦୋଳନ ପାଇଁ ସରକାର ଓ ଜିଲ୍ଲା ପ୍ରଶାସନ ସମ୍ପୂର୍ଣ୍ଣ ଦାୟୀ ରହିବେ ବୋଲି ସଂଘ ସ୍ପଷ୍ଟ ଭାବେ ଚେତାଇ ଦେଇଛି।

ଗଜପତି ଜିଲ୍ଲା ମୋହନା ଅନ୍ତର୍ଗତ ଚାନ୍ଦିପୁଟରୁ ୨୧ କିଲୋ ଗଞ୍ଜେଇ ସହ ଅଭିଯୁକ୍ତ କମଳ ନାୟକକୁ ଅବକାରୀ ବିଭାଗର ମୋବାଇଲ ଟିମ୍ ଗିରଫ କରିଛି। ଏହି ଗଞ୍ଜେଇକୁ ବ୍ରହ୍ମପୁର ଚାଲାଣ କରିବା ଉଦ୍ଦେଶ୍ୟରେ ଅଭିଯୁକ୍ତ ଜଣକ ବସକୁ ଜଗି ରହିଥିବା ସମୟରେ ଧରାପଡ଼ିଛି।